Arco de Tito nishca monumentopica, imashina mishashcatami ishcai jatun rumicunapi dibujashca tiajun. Ashtaca gentecunaca, chai monumento Bibliapa profeciacuna imashina pactarishcata ricuchijujtaca na yachanllu. Chai monumentoca na parlashpapash, Bibliapa profeciacuna pactarishcatami ricuchijun.

Huata 30​pica Britania, Galia (Francia) llactamanda Egipto llactacamanmi Roma llactaca mandajurca. Roma mandajushca llactacunaca, tranquilo, alipachami causanajurca. Shinapash carupi tiaj Judea nishca llactaca, Roma llactata na cazungapaj munashpami culirachin carca.

Punda Roma llactamanda parlajuj shuj libroca ninmi: “Roma llacta mandajuj llactacunamandaca, Judea llactami ashtahuanbachaca na cazungapaj munan carca. Mandajcunapash paicunataca na ricunayachinllu carca. Judiocunaca paicunata mandajcuna na paicunapura cajpi, paicunapa costumbrecunatapash na respetajpimi paicunataca culiran carca. Romanocunapash judiocuna na cazujpimi paicunataca ninanda maltratan carca” nishpa. Ashtaca judiocunaca, Taita Dios agllashca gobernante mandashpa romanocunamanda salvachun, pundashna ali causaita cuchunmi shuyanajurca. Shinapash huata 33​pica Jesusca nircami, Jerusalén llactaca tucuchi tucungami nishpa.

Jesusca nircami: ‘Cangunata llaquichina punllacuna chayamujpimi cangunata fiñajcunaca, chaupipi churashpa patata ruranga. Cangunataca caimanda, chaimandami japij shamunga. Huasicunatapash urmachishpa ñutushpami, rumicunatapash tucuillata alpapi shitanga. Cangunatapash, huañuchishpami tucuchinga’ nishpa (Lucas 19:43, 44).

Chai shimicunata imamanda nishcataca, Jesuspa catijcunaca yachangapaj munashcangami. Ishcai punllacuna jipallami Jerusalenbi Taita Diospa templo huasita ricushpa shujca nirca: “Yachachij, ricui. Cai huasicunaca, rumicunahuanlla rurashcamari” nishpa. Huaquin rumicunaca, 11 metro largo, 5 metro ancho, 3 metro altomi carca. Shinapash Jesusca nircami: ‘Canguna ricunajuj chaicunata tucuchina punllacunaca chayamungami. Caipica, shuj rumillapash chai jahuan, chai jahuanga na quedangachu. Tucuillami urmachi tucunga’ nishpa (Marcos 13:1; Lucas 21:6).

Chai jipaca Jesusca nircapashmi: ‘Jerusalenda ashtaca soldadocuna chaupipi churajta ricushpaca, tucuchigrinbachami yanguichilla. Judeapi causajcunaca urcucunapi pacajungapaj richun. Jerusalenmandapash, tucuilla richun. Pambacunapi purinajujcunapash, pueblomanga ama tigrachun ninimi’ nishpa (Lucas 21:20, 21). ¿Jesuspa chai shimicunaca pactarircachu?

33 huatacunatami romanocunaca judiocunata llaquichirca. Shinapash huata 66​pimi Judea llactapa procurador Gesio Floroca templo huasimanda culquita shuhuarca. Chaimi na cazungapaj munaj judiocunaca ñana aguantashpa Jerusalenman rishpa  romano soldadocunataca yahuarsapa macashpa Roma llacta quedarca.

Quimsa quillacuna jipaca, Cestio Galomi 30 mil yali soldadocunahuan Jerusalenman rishpa na cazuj judiocunataca atacangapaj rirca. Romanocunaca ñapashmi Jerusalén llactaman yaicurca, templo huasipa pircacunatapash urmachi callarirca. Shinapash, na yashcapimi romano soldadocunaca Jerusalenmanda rirca. Chaimandami, na cazuj judiocunaca mishashunmi yashpa, paicunataca catiria rirca. Chaicamanmi Jesusta catijcunaca, Jesuspa shimicunata yarishpa, Jordán yacucunapa chaishuj ladopi tiajuj urcucunaman pacajungapaj rirca (Mateo 24:15, 16).

Cati huataca cutinmi Romaca Judea llactata atacai callarirca. Chaipami Vespasiano nishca generalta, paipa churi Titotapash soldadocunata mandachun churarca. Shinapash huata 68​pi Nerón nishca jatun mandaj huañujpimi, Vespasianoca Romaman tigrashpa pai mandai callarirca. Chaimi Judea llactata atacangapaca Tito quedarca. Titoca 60 mil soldadocunatami mandajurca.

Huata 70​pa junio quillapimi, Judea llactapi tiaj quirucunata cuchushpa, chaicunahuan estacacunata rurachun Titoca paipa soldadocunata mandarca. Chai estacacunata shayachishpami Jerusalendaca muyuchirca. Quimsa quillacunapillami romanocunaca Jerusalendapash, templo huasitapash rupachishpa, chaipi tiashca cosascunatapash japirca. Jesús nishca shinaca, shuj rumillapash jahuan jahuanga na quedarcachu (Lucas 19:43, 44). Cuentata rurajpica, casi 500 mil gentecunami Jerusalenbipash, chaishuj llactacunapipash huañushcarca.

Huata 71​pica, ninanda jariyashpami Titoca Italiaman tigrarca. Roma llactapi gentecunaca ninanda alicachishpami chasquirca.

Titoca jatun barcocunatapash, Jerusalenba templo huasimanda valishca cosascunatapash apashpami yaicurca. Shinallata, jatun carretacuna jahuapimi imashina mishashcata ricuchijurca. Chaimi gentecunaca manllarishpa ricunajurca.

Huata 79​pi, paipa taita Vespasiano huañujpimi, Titoca Roma llactata mandai callarirca. Shinapash ishcai huatacuna jipallami cungashcapi Titoca huañurca. Chaimandami Titopa huauqui Domiciano Romata mandai callarirca. Paica asha tiempo jipallami Tito mishashcata ricuchingapaj shuj jatun monumentota rurarca.

Ashtaca gentecunami cada huata Roma llactaman rin. Paicunaca Arco de Tito nishca monumentotami ninanda alicachishpa ricun. Huaquingunaca ninmi, chai monumentoca alipacha rurashcami can nishpa. Shujcunaca, punda Roma llacta ashtaca poderta charishcatami ricuchijun nin. Cutin shujcunaca, Jerusalén llactapash, Jerusalenba templo huasipash tucuchi tucushcatami ricuchijun nin.

Shinapash Bibliamanda yachajuj gentecunapaca, Bibliapi profeciacuna tucuipi pactarijujta, chai shimicunata Taita Dios escribichishcatami Arco de Tito nishca monumentoca ricuchijun (2 Pedro 1:19-21).