Jesús nishca shinaca, Diospa Reinomanda ali villaicunataca tucui muyundi Alpapimi villachinajun (Mateo 24:14). Daniel libropica ninmi, chai Reinoca Taita Dios churashca gobiernomi can nishpa. Daniel capítulo 2​pica, punda Babilonia llactapa cati, cunan punllacunacaman maijan gobiernocuna cati cati mandanatami villajun. Daniel 2:44​pica, chai jipa ima pasanata villashpami cashna nin:

‘Jahua pachapi causajuj Taita Diosca, ima horapash na tucuchi tucuna mandana llactatami churanga. Chai mandana llactataca, na shuj llacta runacunaman cungachu. Tucuilla mandana llactacunatami ñutushpa tucuchinga. Causaita causaicamanmi mandajungalla’.

Chai profeciapash, shuj profeciacunapashmi villan, gente gobiernocunapa randica Diospa Reino mandajpimi cai Alpapica tranquilo, ali causai tianga nishpa. Diospa Reino mandajpica ¿imashinashi causashun? Huaquin profeciacuna imashina ñalla pactarinata ricupashun.

• GUERRACUNACA NA TIANGACHU

  Salmo 46:9​pica ninmi, Taita Diosmi ‘cai pacha tucui manñacunacaman jatun macanajuicuna tiajtapash saquichinlla. Arcota, lanzata faquishpa fitishpami, carretacunatapash ninapi rupachin’ nishpa.

  Gentecunapa yachashcacunahuan, charishcacunahuan armacunata ruranapa randi shujcunata ayudanajujpica ¿imashinashi causanchiman? Taita Diospa Reino mandajpica, Bibliapi nishca shinami guerracunaca ñana tianga.

• UNGÜICUNACA ÑANA TIANGACHU

  Isaías 33:24​pica ninmi, ‘pipash na: “ñucaca huañujunimi” ningachu’ nishpa.

  Pensaripai, shungu nanai ungüicuna, cáncer, diabetes ungüicuna, shuj ungüicunapash ñana tiajpica ¿imashinashi causashun? Chai punllacunapica hospitalcunapash, jambicunapash ñana minishtiringachu. Tucuicunami sano cashun.

• PIPASH NA YARJACHINGACHU

  Salmo 72:16​pica ninmi, ‘pambapipash, jahua urcu umacunapipashmi, granocunaca tianga’ nishpa.

  Ashtacata fucujpimi, micunaca tucuicunapa pactanga. Pipash ñana yarjachingachu. Tucuicunami ali micunga.

• LLAQUIPASH, NANAIPASH, HUAÑUIPASH ÑANA TIANGACHU

  Apocalipsis (Revelación) 21:4​pica ninmi, ‘Taita Diosmi, tucuilla viquita fichanga. Huañuipash, huacaipash, llaquipash, nanaipash, na ashtahuan tiangachu. Punda ima tiashcapash illangami’ nishpa.

   Gentecunaca ñana juchayucuna cangachu. Paraíso Alpagupimi para siempre causanga. Chashna ali causaigutami ñucanchita Ruraj Jehová Diosca carasha nishca.

¿Chashna ali causai tianata cripanguichu? Ashtaca gentecunaca, para siempre causanata Bibliapi uyashpaca cushijunmi. Shinapash shujcunaca, para siempre causaitaca na usharingachu ninmi. Pipash na para siempre causajta ricushpami, shina yuyan.

Gentecunaca siempremi juchayuj cashcanchi, huañui tiajtapash ricushcanchi. Chaimandami llaquicunahuan sufrishpa causanaca normalmi can yan. Shinapash gentecuna chashna causachunga, Taita Diosca na munarcachu.

Paipa nishcacunapi crichunmi Taita Diosca cashna nirca: ‘Ñuca shimimanda Ilujshishca shimicunapash, na chushaj tigramungachu. Ñuca munashcataca rurangapachami. Ñuca imapa cachajpipash, tucuimi ali Ilujshinga’ (Isaías 55:11).

Bibliapica ninmi, Taita Diosca “na llullaj Taita Diosmi” can nishpa (Tito 1:2). Para siempre ali causaiguta Taita Dios carasha nishcamandami, cai tapuicunapi pensarina capanchi: “¿Ciertopachachu shuj paraíso Alpagupi para siempre causaita ushanchi? Taita Dios carasha nishcata charingapaca ¿imatata rurana capanchi?” Chai tapuicunataca cati temacunapimi yachajupashun.