Gentecuna tiai punllamandapachami Taita Diosca gentecunahuan parlangapaj angelcunata, Taita Diosmanda villaj gentecunata utilizashca. Shinallata Taita Diosca jipa punllacunapi imata ruragrijushcataca escribichishpami saquishca. Taita Diosca jipa punllacunapi cushi causaita carasha ninmi. Shinapash “chaicunataca ¿maipita nijun?” nishpami tapuringuipashchari.

Taita Diospa nishcacunaca Bibliapimi escribishca can (2 Timoteo 3:16). Shinapash ¿imashinata Taita Diosca paimanda villaj jaricuna Bibliata escribichun ayudarca? Chaipaca Taita Diosmi paipa yuyaicunata chai jaricunapa yuyaipi churarca. Shinami chai jaricunaca Taita Diospa yuyaicunata escribirca (2 Pedro 1:21). Por ejemplo, shuj jefe pimanbash shuj mensajeta cachangapaj munashpa, paipa secretariota caiguta escribipai nishcanman. Chaimi secretarioca jefepa nishcata escribin. Shinaca chai escribishca yuyaica na secretariopa canllu. Shinallatami Taita Diosca shuj jaricunata utilizashpa paipa yuyaicunata Bibliapi escribichirca.

Taita Diospa shimica ninan importantemi can. Chaimi Taita Diosca paipa shimimanda yachajuchun munan. Cunanbica ‘tucui llactacunapi causajcuna, aillucuna, shuj rimaita parlajcunaca’ Taita Diosmanda ali villaigucunamanda yachajuita ushan (Apocalipsis 14:6). Taita Diospa ayudahuanmi Bibliataca Biblia entero cashpa o Bibliapa huaquin librocunatalla cashpapash tres mil yali idiomacunapi llujchishca. Bibliaca shuj librocunamandapash yalimi llujshishca.