Indi tiaimandami cai alpapi causaica tian. Indimandami plantagucunapash, sisagucunapash, muyugucunapash tian. Shinallata indimandami plantagucunaca sapimanda, fangagucunacaman yacutaca apan. Chaipimi jipamanga yacuca fuyuman tigran.

Taita Diosmi tamiataca caramushca. Chaimandami cai alpapica granogucunapash fucun. Chaita cosechashpami micunagutapash charipanchi. Shinami cushilla causaita ushapanchi.

Familia ucupica micunagupash, ima churajuna ropagupash ama faltachunmi taitacunaca ricurian. Bibliapica “alasyu animalcunata ricushpami, yarina canguichi. Paicunaca, na tarpunajunllu, granotapash na tandachishpa alichinajunllu. Paicuna micuchunga, jahua pachapi tiajuj cangunapaj Taitami caramujun. ¿Nachu cangunaca, chaicunatapash ashtahuan yali valishca canguichi?” ninmi (Mateo 6:25, 26).

“Lirio sisacuna pambapi viñashcata ricushpami, yarina canguichi [...;] Salomonga, ninan charij cashpapash, na chai sisacunashna churajuita usharcachu. Taita Diosmi, jihuagutapash juyailla viñachishpa sisachin. [...] ¿nachu cangunamangarin churajunaguta caramunga?” (Mateo 6:28-30).

Taita Dios ñucanchiman micunaguta, churajungapaj ropagutapash carashpaca ¿nachu ñucanchimanga ima minishtirishcaguta caramunga? Taita Diospa nishcacunata pactachingapaj esforzarijpica Taita Diosllatami micunaguta charichun o trabajoguta tarishpa ñucanchi minishtishcaguta charichun ayudanga (Mateo 6:32, 33).

Indita, tamiata, urpigucunata, sisagucunata ricushpaca ¿nachu ashtahuan Taita Diostaca juyapanchi? Cati yuyaipica Taita Dios gentecunahuan imashina parlashcata yachajupashun.