Felisaca ninmi: Ñucaca España llactapimi viñarcani. Ñuca familiaca catolicocunapachami carca. Ñucanchi familiamandaca 13purami curacuna carca o Iglesiapi trabajan carca. Ñuca mamapa primoca católico escuelapimi gentecunaman yachachin carca. Pai huañujpica papa Juan Pablo II shamushpami nirca, paica santomi can, paita adoranallami can nishpa. Ñuca familiaca pobre pobremi carca. Ñuca taitaca jirruta rurashpami trabajan carca. Cutin ñuca mamaca alpata tarpushpami trabajan carca. 8pura huahuacunamandaca ñucami mayor carcani.

Ñuca 12 huatacunata charijpimi Españapica guerra callarirca. Guerra tucurijpica politicocunata apoyajuimandami ñuca taitataca prezo aparca. Ñuca mamaca tucuilla huahuacunata na mantinita ushashpami ñucapa quimsa jipa ñañacunataca Bilbao llacta conventoman cacharca. Chaipimi Ramoni, Lauri, Aracelica micunaguta charirca.

Aracelica ninmi: Conventoman cachashca horasca 14 huatacunatami charircani. Laurica 12 huatacunata, cutin Ramonica 10 huatacunatami charirca. Conventopi monjacunaca limpiachunmi ñucanchitaca churarca. Ishcai huatacuna jipaca Zaragoza llactapi jatun conventomanmi cacharca. Chaipica rucugucunata cuidachun, cocinatapash limpiachun churajpimi shaijushca tucuchin carcanchi. Siempremi familiataca yarin carcanchi.

Felisaca ninmi: Ñuca ñañacuna Zaragozapi cajpimi ñuca mamapash, ñuca tiopash paicunapaman cachahuarca. Ñuca tioca curami carca. Paicunaca shuj huambra ñucata molestajujpimi chai huambramanda separangapaj munashpa conventoman cachahuarca.  Taita Diosta juyaimandami huaquin quillacunata conventopi canata yachashpaca cushijushca carcani. Tucui punllacunami misaman rin carcani. África llactapi ñuca primoshna misionera cangapajpashmi munarcani.

Conventopi cashpaca ñuca munashcashna Taita Diosta catita na ushaimandami nali sintirircani. Ñuca munashcashna shuj llactaman rishpa Taita Diosta sirvichunga monjacunaca na animanllu carca. Shinami shuj huata jipaca ñuca tiota cuidangapaj cutin huasiman tigrarcani. Huasi ruraicunapimi ayudan carcani. Ñuca tío cura cajpimi tucui chishicuna rosariota japishpa rezan carcanchi. Iglesiapi churangapaj sisacunata arreglanata, virgen mamacunaman, santocunaman ropata churachinatami alicachin carcani.

Aracelica ninmi: Monja tucungapaca huaquin juramentocunatami rurana carcani. Punda juramentocunataca Zaragoza conventopimi rurarcani. Shinapash jipamanga quimsandi ñañapuracunata separashpami monjacunaca ñuca ñaña Lauritaca Valencia llactapi conventoman, ñucataca Madrid llactapi conventoman cacharca. Cutin ñuca ñaña Ramonitaca Zaragoza conventopimi quedachirca. Madrid conventopimi, monja tucungapaj cati juramentocunata rurarcani. Chai conventopi ashtaca yachajujcunata, mayorllagucunata mingachijpimi chai conventopica ashtaca ruranacuna tiarca. Ñucaca convento hospitalpimi trabajan carcani.

Nara monja tucushpaca yanmi carcani, conventopica Bibliata liishpa, Bibliamanda yachajushpami causasha nishpa. Shinapash chaipi cashpaca conventopi causaitaca ñana alicachircanichu. Bibliataca na liinllu carcanchi. Taita Diosmanda, Jesusmandaca na yachajunllu carcanchi. Chaipa randica católico santocunamanda yachajushpami Mariata adoran carcanchi. Latín shimitapash ashaguta yachajurcanimi. Shinapash trabajaitami ashtahuanbachaca trabajan carcanchi.

Chaipi cashpaca ashtacata pensarishpami preocupari callarircani. Pensarinmi carcani, shujcunalla chariyachun cai conventopi trabajanapa randica, ñuca familiata ayudangapami trabajana cani nishpa. Shina pensarishpami, caimanda rinayanmi nishpa madre superiorahuan parlarcani. Rinayanmi nijta uyashpaca, yuyaita cambiachunmi madre superioraca shuj ucupi vichahuarca.

Monjacunaca chai ucumanda llujshichun saquihuarcami. Shinapash conventomanda llujshingapaj munashcata yachashpaca ña cutinmi ucupi vichahuarca. Quimsa viajecamanmi vichahuarca. Shinapash conventomanda llujshishpa ringapaca munarcanirami. Chaimandami paicunaca nihuarca, caimanda ringapaj munashpaca shuj papelpimi escribina cangui: “Taita Diosta sirvinapa randica Diablota sirvingapaj munashpami conventomanda llujshijuni” nishpa. Monjacuna shina ninataca na yarcanichu. Ñucaca ringapaj munashpapash shina nishpa escribingapaca na munarcanichu. Chaimandami confesaringapaj munanimi nishpa confesionda uyajuj curamanga tucuita parlarcani. Chai curami obispohuan parlashpa ñucataca Zaragoza conventoman cutin tigrachihuarca. Chai conventopi huaquin  quillacunata cashpami conventomanda llujshircani. Jipamanga ñuca ñaña Lauripash, Ramonipashmi conventomanda llujshirca.

Felisaca ninmi: Jipamanga cazarashpami España-Cantabria llactapi causangapaj rircani. Chaipi cashpaca tucui semanacunami misaman rin carcani. Shuj domingoca, La verdad que lleva a vida eterna librota ricuchishpami curaca culirashpa nirca, maijanbash cai librota charishpaca ñucaman cuhuanguichi o basuraman shitashpa saquinguichi nishpa.

Ñucaca na chai librota charircanichu. Shinapash chai librota charingapami munarcani. Chaimandami huaquin punllacuna jipalla ishcai testigo de Jehovacuna shamushpa chai librota ricuchijpica chasquircani. Chai tutallatami liircani. Testigocuna ñuca huasiman tigramushpa Bibliata yachachishunllami nijpica ari nircani.

Siempremi Taita Diosta yarishpa purin carcani. Chaimandami Jehová Diosmanda cabalta yachajushpaca tucui shunguhuan juyai callarircani. Tucui gentecunamanmi Jehovamanda parlangapaj munarcani. Shinami 1973 huatapi bautizarircani. Tucuilla familiacunaman Jehovamanda villachingapami esforzarircani. Shinapash tucuicuna, ashtahuanbachaca ñuca ñaña Aracelimi ñucataca pandarijunguimi nin carca.

Aracelica ninmi: Conventopi nali tratashcata yarishpami ñuca religiondaca nalicachishpa culiran carcani. Shinapash domingocunata misaman rishpa, tucui punllacuna rosariota japishpa rezashpa catinrami carcani. Bibliata intindingapaj munashpa catimandami, Taita Diostaca ayudahuai nishpa mañan carcani. Shuj punllaca ñuca ñaña Felisaca Bibliata yachajujunimi nishpami parlahuarca. Nalicachishpami uyajurcani. Cushijushcapacha parlajujta uyashpami nalicachishpa yarcani, paipa yachajushcacunatalla yariami purin nishpa.

Jipamanga trabajomandami Madridman tigrarcani. Chaipimi cazararcani. Ashtaca huatacunatami ricurcani, gentecuna misaman rishpapash Jesús yachachishcashna na causanajujta. Chaimandami misaman rinatapash, confesarinatapash saquircani. Santocunapi crinata, infiernopi shuj shuj castigocuna tiajta crinatapash saquircanimi. Ashtahuangarin alita, nalita rurajushcata na intindishpapash tucuilla charishca santocunatami basuraman shitarcani. Ñuca religionda ninanda nalicachishpami shina rurarcani. Taita Diostaca ninmi carcani: “Quiquinda rijsinayanmi, ayudahuai” nishpa. Testigocunaca cutin cutinmi ñuca huasiman shamushpa  punguta huactachin carca. Shinapash nunca na pungutaca pascanllu carcani. Ni maijan religionbi na confianllu carcani.

Laurica Francia llactapimi causarca. Cutin Ramonica Españapimi causarca. Ña 1980 huata tucujujtami paicunaca testigo de Jehovacunahuan Bibliata yachajui callarirca. Ñucaca yarcani, paicunapash Felisa cuendami pandachi tucunajun nishpa. Jipamanga Angelines shuti vecinahuanmi amiga tucurcani. Paica paipa cusandimi Testigo carca. Paicunaca tauca viajemi ¿nachu Bibliata yachajungapaj munangui? nishpa tapun carca. Shinapash ñucaca siempremi nin carcani, religiongunamandaca nimata na yachanayanllu nishpa. Paicunaca Bibliata ñuca intindingapaj munajtami cuenta japirca. Shinami shuj punllaca nircani, ñuca charijuj Bibliapi yachachijpillami cangunahuanga yachajusha nishpa. Ñucaca Nácar-Colunga nishca Bibliatami charircani.

Felisaca ninmi: 1973 huatapi bautizarijpica casi 70 Testigocunallami Cantabria-Santander llactapica tiarca. Chai llactapica ashtaca uchilla pueblocunami tiarca. Chai pueblocunapi gentecunaman villachingapaca busta japishpami unaita rin carcanchi. Jipamanga uchilla carrocunapimi rin carcanchi.

Cunan huatacunacamanga ashtaca gentecunamanmi Bibliata yachachishcani. Taucacunami catolicocuna carca. 11mi bautizarirca. Ashtaca pacienciatami paicunahuanga minishtircani. Paicunapa crishcacuna panda cashcata intindingapaca ñucashnallatami ashtaca tiempota minishtirca. Ñucaca alimi yacharcani, Bibliapa ayudahuanlla, Taita Diospa espíritu santopa ayudahuanlla gentecunaca cambiashpa Biblia ima nijta intindinata (Hebreos 4:12). Ñuca cusaca policiami carca. Paica 1979 huatapimi bautizarirca. Ñuca mamapash nara huañushpallatami Bibliata yachajui callarirca.

Aracelica ninmi: Testigocunahuan Bibliata yachajui callarishpaca na paicunapi confianllu carcani. Shinapash, imata villachinajujta paicunapash pactachishpa causanajujta ricushpami paicunapi confiai callarircani. Jehová Diospi, Bibliapipash ashtahuan confiashpa catimandami cushilla sintirircani. Huaquin vecinocunaca ñuca cambiajta ricushpami nin carca: “Araceli, ali ñandami tarishcangui, chaipi catilla” nishpa.

Jehová Diostaca ninmi carcani: “Na uyanayachijpipash cutin cutinmi quiquin Jehová Diosca ñucata na saquishpa Bibliamanda cabalta yachajuchun ayudahuashcangui. Pagui Jehová Dioslla” nishpa. Ñuca ñaña Felisatapashmi nalicunata nishcamanda perdonahuai nircani. Chai punllamanda ñana imacunatapash nishpa culirarishcanchichu. Ashtahuangarin Bibliamanda parlanatami alicachinchi. 1989 huatapi 61 huatacunata charishpami bautizarircani.

Felisaca ninmi: Cunanga 91 huatacunatami charini, viudami cani. Imatapash ñana pundashna rurai ushashpapash Bibliataca cada punllami liishpa catini. Ushashcagucamanga tandanajuicunaman ringapaj, villachinaman llujshingapami esforzarishpa catini.

Aracelica ninmi: Monja cashcamandachari monjacunahuan, curacunahuan Jehovamanda parlanata gushtani. Huaquin curacunahuan, monjacunahuanga aligutami parlai ushashcani. Huaquingunaca librocunata, revistacunata chasquishcami. Shuj punllaca shuj curahuanmi parlarcani. Jipamanga cutin cutinmi paihuan parlarcani. Paica nircami, canga cabaltami yachachijungui. Shinapash ñami mayorlla cani, ñuca edadpica ¿imatata rurai ushasha? Misaman shamuj gentecunapash ñuca familiapash ¿imatashi ninga? nishpa. Shina nijpimi nircani: “Cutin Taita Diosca ¿imatashi ninga?” nishpa. Ciertota nijujta cuenta japishpami paica llaquirirca. Shinapash manllaimandami na cambiashcanga yanimi.

Ñuca cusa tandanajuiman rinayanmi nishca punllataca nunca na cungashachu. 80 yali huatacunata charishpami tandanajuiman primera vez rirca. Chai punllamandaca nunca na tandanajuicunamanga faltanllu carca. Chai jipaca Bibliata yachajui callarirca, villachingapajpash llujshircami. Paihuan villachishpa purishca punllacunataca cushijushpami yarini. Bautizaringapaj ishcai semanacunalla faltajpimi huañuparca.

Felisaca ninmi: Jehovata ñuca sirvi callarijpica ñuca quimsa jipa ñañacunaca jarcangapami munarca. Shinapash jipamanga paicunapashmi Testigocuna tucurca. Ñuca ñañacunandi Testigo canaca shuj jatun bendicionmi cashca. Cunanga ñuca ñañacunandi tandanajushpami ñucanchi juyashca Taita Jehová Diosmandapash, Bibliamandapash parlai ushanchi. Cunangarinbash ñañapura tandanajushpami Jehovata adorai ushanchi. *