SHUJ gentecunaman villachinaca minishtirishcapachami can. Shinapash huaquingunaca na shina pensanllu. Huaquin gentecunaca ninmi, Biblia ima nijta yachana ali cashpapash Bibliata Testigocunahuan yachajunaca na minishtirinllu nishpa.

Gavin shuti runagupa ejemplota ricupashun. Paica Testigocunapa tandanajuicunaman rishpapash Bibliata yachajungapaca na munanllu carca. Paica yanmi carca, Bibliamandaca ashagutallami yachani, ñuca na yachajta shujcuna cuenta japichunga na munanichu. Maijanbash religionbi participangapaj o ñucata umachichunga na munanichu nishpa. Quiquinga ¿imatata Gavin runagumandaca pensapangui? ¿Imashinata paitaca ayudanguiman carca? Bibliaca ashtacatami gentecunataca ayudai ushan. Chaimandami Jehová Diosca israelitacunataca nirca, ñuca yachachishca shimicunaca ‘jamzi paramushna’, jihua jahuapi ‘tamia urmashcashnami’ can nishpa (Deuteronomio 31:19, 30; 32:2). Shinaca, ‘jamzi paramumanda’ chuscu yuyaicunata ricupashun. Chai yuyaicunami ‘tucui’ gentecunaman villachingapaj ayudanga (1 Timoteo 2:3, 4).

Jamzi paramuca amujllagumi can. Madrugado tucujujpica, cai alpa chiriyajpimi airepi tiaj vaporca jamzi paramu yacugushna planta hojacunapica urman. ¿Imamandata Bibliaca nin, Jehovapa yachachishca shimicunaca ‘jamzi paramushnami’ can nishpa? Jehová Dios paipa sirvijcunahuan parlashpaca ali shimicunata agllashpami amujllaguta parlan. Shinaca ¿imashinata villachijushpaca Jehovapa ejemplota catita ushanchi? Villachijushpaca gentecunapa crishcacunata respetashpa, paicunata yuyachishpa, paicunallata decisiongunata japichun animashpami Jehovapa ejemplota catinajunchi. Tucui shunguhuan paicunamanda preocuparijta sintishpami gentecunaca ñucanchita uyangapaj munanga. Shina rurashpami ashtahuan ali villachi ushashun.

Jamzi paramuca plantacuna frescollagu cachunmi ayudan. Villachijushpa gentecuna frescollagu o ali sintirichun ayudashpami jamzi paramushna cashun. Shinaca, gentecunata ali sintirichun ayudangapaca ¿imatata rurana canchi? Chaipaca pensarinami canchi, gentecuna Bibliata yachajuchunga ¿imashinata ayudai ushani nishpa? Gavin shuti runagupa ejemplota cutin yaripashun. Chris shuti huauqui callaripi Bibliata yachachisha nishca cashpapash na cutin cutin chaita nijurcachu. Chaipa randica, Bibliamanda ashaguta parlashpami ali sintichingapaj esforzarirca. Chris huauquica Biblia imamanda ashtahuan parlajujtami intindichirca. Chaita intindinami tandanajuicunata ashtahuan ali intindichun ayudanga nircami. Ashtahuangarin nircami, Bibliapi nishcacuna imashina pactarijushcata ricushpami, Bibliapi ashtahuan confiangui nishpa. Paicunaca Bibliapi nishcacuna pactarinatami cutin cutin parlarca. Shinami Gavin runaguca alillata sintirishpa Bibliata yachajui callarirca.

Jamzi paramugu urmajpimi plantacunaca na anguyan. Israel llactapica, chaquishca quillacunapi na tamiashpami ushashcata indin. Jamzi paramugu na urmajpica plantacunaca anguyashpami chaquinman. Bibliapica nircami, tucuri punllacunapica Jehová Dios ‘villashca shimita uyanayachij’ gentecunami tianga nishpa (Amós 8:11). Gentecunaca yacunayachinshnami Taita Diosmanda yachajungapaj munana carca. Chaimandami Bibliapica nin, Taita Diosmanda ali villaita villaj ungidocunaca, ‘Mandaj Dios cachamushca paramushnami can’ nishpa (Miqueas 5:7). Bibliapi nishca shinaca, ‘shuj llamagucuna’ nishcacunapashmi ungidocunataca villachishpa ayudanajun (Juan 10:16). Ali villaicunata yachajuimandapashmi Jehová Diosmanda yachajungapaj munajcunaca causaita charinga. Shinaca ¿ali villaicunataca tucui shunguhuanllu alicachinchi?

Jamzi paramuguca Jehová Diospa bendicionmi can. (Deuteronomio 33:13). Ali villaicunata chasquij gentecunamanga villachishpami shuj alipacha regalota caranajunchi. Gavin runagupaca Bibliamanda yachajunami shuj jatun bendición carca. Bibliapimi paica, yachangapaj munashca cosascunata yachajurca. Shinami jipamanga bautizarirca. Cunanbica Joyce shuti paipa huarmigundimi ali villaicunata cushijushpa villachinajun.

Ali villaicunata shuj jamzi paramutashna ricushpaca shuj gentecunaman villachingapami tucui shunguhuan esforzarishun. ¿Imamandata shina ninchi? Shujlla jamzi paramugulla urmashpaca na imatapash ruranllu. Shinapash, ashtaca ashtaca jamzi paramu urmashpaca alpataca humedoyachinmi. Huaquinbica ñucanchicunapashchari pensanchi, ñucallaca na imatapash rurajunichu nishpa. Shinapash, ashtaca millón testigo de Jehovacuna villachijpimi ali villaicunataca ‘tucui llactacunapi causaj’ gentecuna uyanga (Mateo 24:14). Imashinami ricupanchi, villachinaca shuj jamzi paramushnami amujllagu cachun, frescollagu cachun, ama anguyachun ayudan. Villachinaca shuj jatun bendicionmi can.