1, 2. a) Nabotpash paipa churicunapash ¿imashinata yangamanda juchachi tucurca? b) Jehová Dios cuenda alita rurangapaca ¿ima ishcai cosascuna minishtirishca cashcatata yachajupashun?

ISHCAI nali runacunami, shuj runagutaca yangamanda ninanda juchachirca. Chaimandami chai runaguca culpai tucushpa huañuna carca. Pensaripashun. Alita ruranata alicachij gentecunaca chai runagutapash paicunapa churicunatapash yangamanda juchachishpa, rumicunahuan pigashpa huañuchijta ricushpaca ¿imashinashi sintirishcanga? Juchachi tucushca runaguca ¿pita carca? Chai runaguca Jehová Diosta ali sirvijuj Nabot shuti runagumi carca. Paica, Israel llactata rey Acab mandajuj punllacunapimi causarca (1 Reyes 21:11-13; 2 Reyes 9:26).

² Cai temapica Nabot runagu ima pasashcatami yachajupashun. Shinallata, punda tiempo shuj congregacionbi shuj anciano imashina ninanda pandarishcatami yachajupashun. Chai ishcai ejemplocunapimi, Jehová Dios cuenda alita rurangapaca humilde  cana, perdonana minishtirishca cashcata yachajupashun.

3, 4. a) Nabotca ¿imashina runaguta carca? b) ¿Imamandata Nabotca paipa uvas pambacunata rey Acabmanga na jatungapaj munarca?

³ Nabotpa punllacunapi ashtaca israelitacunaca, rey Acabpa paipa huarmi Jezabelpa nali ejemplotami catinajurca. Paicunaca Baal nishca yanga diostami adoran carca. Jehová Diostapash paipa leycunatapash na respetanllu carca. Shinapash Nabotca ashtaca israelitacunapa ejemplotaca na catijurcachu. Paica huañunatapash na manllarcachu. Paipaca Jehová Diospa ali amigo canami ashtahuan importante carca.

⁴ (1 Reyes 21:1-3, liingui). Rey Acabca Nabotpa uvas pambacunata munashpami purijurca. Chaimandami rey Acabca, chai pambacunata jatuhuai, na cashpaca shuj ashtahuan ali pambacunahuan cambiashun nirca. Shinapash Nabotca na jatushachu nishpami rey Acabtaca respetohuan cashna nirca: “Ñuca taitacuna carashca alpata canman cunataca, Mandaj Diosllata jarcahuachun” nishpa. ¿Imamandata Nabotca rey Acabman na jatungapaj munarca? Israelitacunaman Jehová Dios cushca leycunapica mandajurcami, punda tiempo familiacuna herenciashca alpataca na tucui causaipa jatunachu canguichi nishpa (Levítico 25:23; Números 36:7). Imashinami ricupanchi, Nabotca Jehová Dios imata mandashcatami cazujurca.

5. Nabotpa uvas pambacunata japingapaca ¿imatata Jezabelca rurarca?

⁵ Paipa uvas pambacunata Nabot na jatungapaj munajpica ¿imatata rey Acabpash paipa huarmipash rurarca? Nali reina Jezabelca ishcai nali runacunatami nirca, Nabotca, jatun juchatami rurashca nishpa juchachichi nishpa. Chai runacuna yangamanda juchachijpimi, Nabotpash paipa churicunapash huañuchi tucurca. Nabot runagu yangamanda juchachi tucushpa huañujta ricushpaca ¿imatata Jehová Diosca rurarca?

6, 7. a) ¿Imashinata Jehová Diosca alita ruranata alicachij Dios cashcata ricuchirca? b) ¿Imamandata Nabotpa familiacunapash, rijsicunapash alillata sintirishcanga?

⁶ Nabot huañuchi tucushcandimi Jehová Diosca profeta Eliasta rey Acabhuan ñavi ñavi parlachun cacharca. Eliasca rey Acabtaca nircami, canga shuhuami cangui, huañuchitapash huañuchishcanguimi. Chaimandami Jehová Diosca nirca, imashinami Nabottapash paipa churicunatapash huañuchircangui, shinallatami canbash canba huarmipash, canba huahuacunapash huañuchi tucunga nishpa (1 Reyes 21:17-25).

⁷ Nabotpa familiacunapash, rijsicunapash nali rey Acabpa culpamandami ashtacata sufrirca. Shinapash, Nabotta yangamanda juchachijta Jehová Dios ricushpa, rey Acabta llaquichinata yachashpaca alillatami sintirishcanga. Shinapash jipaman ima pasashcata ricushpami, Nabotpa familiacunapapash rijsicunapapash humilde cana, Jehová Diospi confianaca shinlli ricurishcanga.

8. Jehová Dios llaquichinata yachashpaca ¿imatata rey Acabca rurarca? Chaimanda ¿imatata Jehová Diosca rurarca?

 ⁸ Jehová Dios paita llaquichinata yachashpaca ¿imatata rey Acabca rurarca? Rey Acabca ‘pai churajushcata liquishpami, cañamuta churajurca. Shinallata ninanda llaquirishpa purijushpami, micuitapash na micushpa, chai churajushcahuanllata puñurca’. Shinami Acabca humilde cashcata ricuchirca. Shina rurajpica ¿imatata Jehová Diosca rurarca? Jehová Diosca profeta Eliastami rey Acabtaca cashna ningui nirca: “Ñuca ñaupajpi chashna llaquirishcamandami, pai causajui punllacunapillataca, na llaquita cachamusha. Paipaj churi mandajui punllacunapimi, paipaj huasi ucupurataca llaquichisha” nishpa (1 Reyes 21:27-29; 2 Reyes 10:10, 11, 17). Jehová Diosca “runacunapaj shungutaca” alimi ricujun. Shina ricushpami rey Acabta llaquichishami nishpapash na llaquichirca (Proverbios 17:3).

9. Humilde canaca ¿imashinata Nabotpa familiatapash, rijsicunatapash ayudaita ushanman carca?

⁹ Rey Acab causangacaman Acabpa familia na llaquichi tucunata yachashpaca ¿imashinashi Nabotpa familiapash, rijsicunapash sintirishcanga? Ciertopacha feta charishcata ricuchinami tucushcanga. Feta charishcata ricuchina shinlli cashca cajpica humilde canami paicunataca ayudaita ushanman carca. ¿Imamandata shina ninchi? Humilde caimandami paicunaca, Jehová Dios alita rurajujta  confiashpa paita sirvishpa catita ushana carca (Deuteronomio 32:3, 4, liingui). Shamuj punllacunapi huañushcacunata Jehová Dios causachijpimi, Nabotpash, paipa churicunapash, familiacunapash cuenta japinga, Jehová Diosca alita ruranata alicachij Taita Dios cashcata (Job 14:14, 15; Juan 5:28, 29). Humilde gentecunaca, ‘ñucanchi tucui imatalla ruranajushcata’ Taita Dios ricuchinataca alimi yachan. ‘Imata pacalla rurashcata ali cajpi, nali cajpi ricuchinatapash’ alimi yachan (Eclesiastés 12:14). Jehová Diosca tucuitami ali yachan. Cutin ñucanchicunaca na tucuita ali yachanchichu. Chaimandami, humilde canaca Jehová Diosmanda na caruyashpa paipi confiashpa catichun ayudanga.

10. Huaquinbica ¿imacunamandata Jehová Diospi confianaca shinlli ricurin?

¹⁰ Shinaca, ñucanchicuna na intindishca o na alicachishca decisiongunata ancianocuna agllajpica ¿imatata rurashun? Pensaripashun. Congregacionbi responsabilidadcunata ñana charishpa o ñucanchi ali amigocuna imapash responsabilidadcunata ñana charijpica ¿imatata rurashun? Ñucanchi huarmi, cusa, huahua o shuj ali amigo congregacionmanda expulsai tucujpi, ancianocunapa chai decisionda na alicachishpaca ¿imatata rurashun? Juchata rurajtaca imamandata ancianocunaca na expulsashca yashpaca ¿imatata rurashun? Shina cosascuna pasajpica, Jehová Diospi confianapash, cunan punllacunapi congregaciongunata Jehová Dios ricujujta crinapash shinllimi ricuringa. Ñucanchipallata ama yapa shinlli ricurichunga humilde canami ayudanga. ¿Imashinata ayudanga? Ishcai yuyaicunata ricupashun.

11. ¿Imamandata humilde canaca minishtirishcapacha can?

¹¹ Pundapica humilde cashpami na tucuita yachashcataca ali intindi ushashun. Ima pasashcata alimi yachani yashpapash, na cunganachu capanchi, Jehová Diosllami gentecunapa shungutaca ali ricui ushan (1 Samuel 16:7). Chaita yaipi charishpami, humilde caita ushanchi. Humilde cashpami na tucuita ali yachai ushashcata, ñucanchi panda yuyaicunata cambiana cashcataca intindishun. Shinallata, humilde cashpami ñucanchita o pitapash yangamanda llaquichijpica Jehová Diosta cazushpa, Jehová Dios ricushpa chai llaquita arreglanata shuyashun. Bibliapica ninmi: ‘Taita Diosta manllashpa causajcunapaca, tucui alimi llujshinga’ nishpa. Shinallata ninmi: ‘Diosta na manllaj runapaca, imapash na ali llujshingachu, paipa causai punllacunapash na unaicaman cangachu’ nishpa (Eclesiastés 8:12, 13). Imashinami ricupanchi, yangamandami llaquichijuj yuyajcunapaca humilde canaca minishtirishcapachami cashca (1 Pedro 5:5, liingui).

12. a) Cunanga ¿picunapa ejemplomandata yachajupashun? b) ¿Imamandata paicunapa ejemplota yachajupashun?

¹² Apostolcunapa punllacunapi, Antioquía de Siria llactamanda Jesusta catijcunaca, humilde cashcata, perdonangapaj munashcatapashmi ricuchina tucurca. Paicunapa ejemplota yachajunami ñucanchitaca ciertopachachu perdonanata alicachini nishpa pensarichun ayudanga. Ashtahuangarin, juchayu runacunata ñaupaman pushachun churashpapash, Jehová Dios alita rurashpa catijtami yachajupashun.

13, 14. a) Apóstol Pedroca ¿ima jatun responsabilidadcunatata chasquirca? b) Apóstol Pedroca ¿imashinata na manllashcata ricuchirca?

 ¹³ Apóstol Pedroca chai punllacunapi ali rijsishca ancianomi carca. Paica Jesuspa ali amigopashmi cashcarca. Jatun responsabilidadcunatapashmi chasquishcarca (Mateo 16:19). Huata 36pi ima pasashcata ricupashun. Chai huatapica Cornelioman paipa huasipi causajcunamanbash villachina jatun responsabilidadtami apóstol Pedroca chasquirca. ¿Imamandata chaica shuj jatun responsabilidad carca? Cornelioca na judiochu carca. Circuncisión nishcatapash na rurashcachu carca. Corneliopash paipa huasipi causajcunapash espíritu santota chasquishcata cuenta japishpami Pedroca nirca: ‘Diospa jucha illaj espiritutaca, paicunapashmi ñucanchishnallata chasquirca. Paicuna yacupi bautizarinataca, pipash na jarcai ushanllu’ nishpa (Hechos 10:47).

¹⁴ Huata 49pica, Jesusta cati callarishca na judiocunaca circuncisión nishcata ruranata o na ruranata yachangapami Jerusalén llactamanda ancianocunapash, apostolcunapash tandanajurca. Chai tandanajuipica apóstol Pedropashmi carca. Paica shinlli shayarishpami villarca, na judiocunaca circuncisionda na rurashca cashpapash espíritu santota chasquishpami Jesusta cati callarirca nishpa. Apóstol Pedro shina nishpa villajpimi chai punllacunapi cuerpo gobernanteca shuj decisionda agllai usharca (Hechos 15:6-11, 13, 14, 28, 29). Shinaca, Jesusta catij judiocunapash, na judiocunapash apóstol Pedro shinlli shayarishpa imata ricushcata shujcunaman villashcamandaca cushijushcangami. Chai punllacunapi Jesusta catijcunapaca, experienciata charij, Jehová Diosta ali sirvij apóstol Pedropi confianaca facilmi cashcanga (Hebreos 13:7).

15. Antioquía de Siria llactapi cashpaca ¿imashinata apóstol Pedroca ninanda pandarirca? (Callari dibujota ricupangui).

¹⁵ Jerusalén llactapi ancianocunahuan, apostolcunahuan tandanajushca jipaca Antioquía de Siria llactamanmi apóstol Pedroca rirca. Chaipi cashpaca na judío huauquicunahuanmi tandanajun carca. Chai huauquicunaca apóstol Pedropa yachachishcacunamanda, experienciamandaca ashtacatami yachajushcanga. Shinapash, cungashcapimi apóstol Pedroca chai huauquicunahuan tandanajushpa micungapaca na munarca. Na judío huauquicunaca tapurishcangami, imata pasarca nishpa. Llaquiritapash llaquirishcangami. Na judío huauquicunamanda apóstol Pedro caruyajta ricushpami, shuj judío huauquicunapash Bernabepash na judío huauquicunahuanga na tandanajungapaj munarca. Shinapash ¿imamandata apóstol Pedroca ashtaca experienciata charij anciano cashpapash, ninanda pandarishpa tucuilla huauquipanicuna shujllashna tandanajuchunga jarcajuj cuenda carca? Ashtahuangarin imashinata apóstol Pedropa ejemploca shuj anciano imatapash nishpa o rurashpa ñucanchita llaquichijpi ñaupaman catichun ayudaita ushan?

16. a) ¿Imamandata apóstol Pedroca rimai tucurca? b) ¿Ima tapuicunapita pensari ushapanchi?

¹⁶ (Gálatas 2:11-14, liingui). Apóstol Pedroca, shuj huauquicunaca imatashi pensanga nishpami na judío huauquicunahuanga ñana tandanajurca (Proverbios 29:25). Na judiocunatapash Jehová Dios chasquijtaca  alimi apóstol Pedroca yacharca. Shinapash chai punllacunapica Jerusalén llactamanda circuncisionda rurashca judío huauquicunami Antioquía de Siria llactata visitanajurca. Chai huauquicunaca imatashi pensanga nishpami apóstol Pedroca na judío huauquicunamandaca caruyarca. Chaimandami apóstol Pabloca, canga mishqui shimi jayaj shungushnami cashcangui nishpa apóstol Pedrotaca rimarca. Shinapash ¿imamandata shina nirca? Apóstol Pabloca, huata 49pi apóstol Pedro shinlli shayarishpa na judío huauquicunapa favor cashcataca ricurcami (Hechos 15:12; Gálatas 2:13). Apóstol Pedro llaquichishca huauquicunaca ¿imatashi rurarca? ¿Nitijarircachu? Ninanda pandarishcamandaca ¿apóstol Pedroca paipa responsabilidadcunata chingachircachu?

17. Jehová Dios perdonashcamandaca ¿imatallata apóstol Pedroca rurai usharca?

¹⁷ Apóstol Pedroca humildemi carca. Apóstol Pablo imata nishcatapash intindircami. Bibliapica apóstol Pedro paipa responsabilidadcunata chingachishcataca na imatapash ninllu. Ashtahuangarin, Bibliapi tiajuj ishcai cartacunata escribichunmi Jehová Diosca apóstol Pedrotaca agllarca. Segunda de Pedro cartapica “ñucanchi juyashca huauqui” nishpami apóstol Pablomandaca parlan (2 Pedro 3:15). Apóstol Pedro ninanda pandarijpica, na judío huauquicunaca llaquirishcangami. Shinapash congregaciongunata ñaupaman pushajuj Jesusca apóstol Pedrotaca ocupashpa catircami (Efesios 1:22). Apóstol Pedrota perdonashpami na judío huauquicunaca Jesuspa, Jehová Diospa ejemplota catijushcata ricuchi usharca. Apóstol Pedro ninanda pandarishcamanda shuj huauquillapash na nitijarishca cashpaca alimi canman.

18. ¿Imacunapita Jehová Diospa ejemplota catishpa alita ruranata alicachishcata ricuchi ushapanchi?

¹⁸ Imashinami apostolcunapa punllacunapi ancianocunaca juchayucuna carca, shinallatami cunan punllacunapi ancianocunapash juchayucuna can. Bibliapi nishca shinaca, tucuicunallatami tauca viajeta pandarinchi (Santiago 3:2). Chaitaca tucuicunallatami yachanchi. Shinapash, shuj huauqui pandarishpa ñucanchita llaquichijpica ¿imatata ruranchi? ¿Jehová Diospa ejemplota catishpachu alita rurajcuna cashcata ricuchishun? Pensaripashun. Shuj anciano ñucanchita imamandapash ashaguta nalicachishpa imatapash nijpica ¿imatata rurashun? ¿Shuj anciano napash ali pensarishpa imatapash nishcamandachu nanarishpa nitijarishun? ¿Chai huauquica na anciano canachu can nishpachu ñapash pensarinchi? Na cashpaca ¿congregaciongunata Jesús ñaupaman pushajushcata yarishpachu Jesús arreglanata confiashun? ¿Anciano imapi pandarishcata yaria canapa randica, tauca huatacunata Jehová Diosta ali sirvishcatachu yarishun? Ñucanchita llaquichishca huauqui, anciano cashpa catijpi o ashtahuan responsabilidadcunata chasquijpica ¿cushijushunllu? Perdonashpami ñucanchipash Jehová Diospa ejemplota catishpa, alita ruranata alicachishcata ricuchishun (Mateo 6:14, 15, liingui).

19. Cunan punllacunapi yangamanda juchachi tucushpaca ¿imatata rurangapaj munapanchi?

¹⁹ Cunan punllacunapica Diablopa, paipa nali mundopa culpamandami ashtacacunaca yangamanda llaquichi tucushca. Shinapash ñucanchicunaca alita ruranata alicachimandami, tucui chaicunata Jehová Dios tucuchina punlla chayamuchun shuyanajupanchi (Isaías 65:17). Chai punlla chayamungacamanga, humilde cashcata ricuchishpami na tucuita cabal yachai ushashcata intindishpa, ñucanchita llaquichijcunataca perdonashpa catina capanchi. Shina rurashpami Jehová Diospa ejemplota catishpa alita ruranata alicachishcata ricuchipashun.