1. ¿Imashinata Abrahanga Jehová Dios ali ricushpa juzganataca seguro carca? (Callari dibujota ricupangui).

SHUJ punllaca cashna nishpami Abrahanga Jehová Diostaca tapurca: “Tucui cai pachapi causajcunapaj Juezca, ¿nachu [alita] ruranman?” nishpa (Génesis 18:25). Abrahanga ¿Jehová Diospi na confiaimandachu shina nishpa tapurca? Na. Abrahanga Sodoma y Gomorra nishca llactacunata Jehová Dios ali ricushpa juzganata seguro cashpami shina tapurca. Abrahanga alimi yacharca, Jehová Diosca ‘alita ruraj runatapash, Taita Diosta na manllaj runatapash’ na igual tucuchinata. Bibliapica ninmi, Taita Diosca ‘Jatun Rumishna Diosmari. Paipa rurashcacunaca, ima pandapash illajmi. Tucui imatapash aligutallami ruran. Na llullaj Taita Diosmi. Paipica, ima nalipash na tianllu. Paica aligutalla ruraj Diosmi’ can nishpa (Deuteronomio 31:19; 32:4).

2. ¿Imamandata Jehová Diosca ima ali cajta ricushpalla juzgan?

² ¿Imamandata Abrahanga Jehová Dios siempre tucuita ali ricushpa juzganataca seguro carca? Jehová Dios shuj ali ejemplota  churashcamandami Abrahanga seguro carca. Jehová Diospa leycunaca siempremi ali can. Chaimandami, imata juzgashpapash, ima ali cajta ricushpalla siempre juzgan. Bibliapica ninmi: ‘Mandaj Diosca [alita] ruranata, aliguta ricushpa’ juzganatami juyan nishpa (Salmo 33:5).

3. ¿Imashinata huaquin gentecunaca yangamanda juchachi tucushca? Shuj ejemplomanda parlapai.

³ Jehová Dios siempre ali ricushpa juzganata yachashpaca cushillami sintirinchi. Shinapash cunan punllacunapi ashtaca gentecunaca yangamanda juchachishpami shujcunata llaquichin. Shuj ejemplota ricupashun. Huaquin gentecunaca napash culpata charishpatami yangamanda juchachi tucushpa carcelman yaicushca. Shinapash jipamanga, mushuj investigaciongunata rurashpami, na culpata charishcata ricushca. Ashtaca huatacunata carcelpi cashca jipami huaquingunaca libre llujshita ushashca. Yangamanda juchachijpimi ashtaca gentecunaca llaquilla, culira sintirin. Cunan punllacunapica ashtaca huauquipanicunapashmi yangamanda llaquichi tucushpa ashtacata llaquirishca. ¿Imashinata llaquichi tucushca?

4. Huaquinbica ¿imata Jehovata sirvijcunapaca shinlli ricurin?

⁴ Jehová Diosta sirvijcunaca congregacionmanda canllaman gentecuna yangamanda ñucanchita llaquichinataca alimi yachanchi. Shinapash congregación ucupillata pipash ñucanchita o shuj huauquita yangamandami llaquichijun yashpami ñaupaman catinaca shinlli ricurin. Shinaca, yangamandami llaquichijun yashpaca ¿imatata rurashun? ¿Nitijarishpachu Jehová Diosta sirvinata saquipanchiman?

5. Congregacionmanda pipash ñucanchita o shujcunata yangamanda llaquichijpica ¿imamandata na manllarina capanchi?

⁵ Tucuicunallatami juchayucuna canchi, pandarinchipash. Chaimandami huaquinbica, congregacionmanda shuj huauqui ñucanchitaca tal vez yangamanda llaquichinga, o ñucanchillatapash shuj huauquita yangamanda llaquichishun (1 Juan 1:8). Chashna llaqui tiajpica, Jesusta ali catijcunaca na manllarishpa nitijarinchichu. Shuj huauqui yangamanda llaquichijpipash, Jehová Diosca Bibliapi textocunahuan aliguta yuyachishpami paita ali sirvishpa catichun ayudan (Salmo 55:12-14).

6, 7. a) Shuj huauquica ¿ima llaquitata congregacionbica aguantana carca? b) Chai huauqui ñaupaman catichunga ¿imacunata ayudarca?

⁶ Willi Diehl shuti huauquipa ejemplota ricupashun. Paica huata 1931pimi Suiza-Berna llacta Betelpi Jehová Diosta ali sirvi callarirca. 1946 huatapica Estados Unidos-Nueva York llactapi Galaad Escuelamanmi rirca. Chaimanda huaquin tiempo jipaca, Suiza llactapimi superintendente de circuito carca. Chai huauquica nircami: “Mayo de 1949 huatapimi, ñucaca cazaragrijunimi nishpa Suiza Betelman villarcani. Shina nijpimi chaipi huauquicunaca nihuarca, cunanga can charishca tucuilla responsabilidadcunataca ñana charigringuichu, precursorllami caita ushangui nishpa. Discursocunata cuchunbash ñana saquihuanllu carca, ashtaca huauquipanicunaca expulsadocuna cajpishnami ñucatapash ñuca huarmigutapash ñana saludan carca”.

⁷ Shina pasajpica ¿imatata huauqui Diehlca rurarca? Bibliapi nishca shinaca, cazarana na jucha cashcataca paipash paipa huarmipash alimi yacharca. Chaimandami paicunaca Jehová Diosta mañashpa paipi confiarca.  Chai punllacunapi huaquin huauquicunaca cazaranamanda Jehová Dios imata yuyajtaca na ali intindinllu carca. Shinapash jipamanga alimi intindirca. Shinami huauqui Diehlca cutin responsabilidadcunata chasquirca. Chai huauqui tucuipi cazushpa catishcamandami Jehová Diosca ashtacata bendiciarca * (notata ricupangui). Ñucanchita chashna llaquichijpica ¿imatata rurapanchiman? Jehová Dios chaicunata ricushpa, paillata arreglachun ¿shuyapanchimanllu? Na cashpaca ¿ñucanchipilla confiashpachu ñucanchillata imatapash rurangapaj munapanchiman? (Proverbios 11:2; Miqueas 7:7, liingui).

8. Huaquinbica ¿imamandata ñucanchita o shujcunataca yangamandami llaquichijun nishpa pandarinchiman?

⁸ Congregación ucupillata pipash yangamandami llaquichijun yashpaca, tal vez pandarinajushunmi. ¿Imamandata shina nipanchi? Juchayucuna cashcamandaca tal vezmi imatapash panda intindishca cashun. Shinallata, tucuita cabal yachaitapash na usharinllu. Ima cashca cajpipash Jehová Diostami mañana canchi. Shinallata paipi confiashpami paita cazushpa catina canchi. Shinami ñucanchi shungupillapash Jehová Dioshuanga ‘na fiñarishun’ (Proverbios 19:3, liingui).

9. ¿Imatata cai temapipash cati temapipash yachajupashun?

⁹ Ñaupa punllacunapi Jehová Diosta sirvijcuna imashina yangamanda llaquichi tucushcata ricupashun. Cai temapica, Abrahanba bisnieto Josemandami yachajupashun. Huauquicunapa culpamanda José ima llaquicunata charishcatami yachajupashun. Cati temapica, rey Acabhuan Jehová Dios imata rurashcatami yachajupashun. Shinallata, Antioquía de Siria llactapi cashpa apóstol Pedro imata rurashcatami yachajupashun. Chai quimsa ejemplocunata yachajunajushpaca pensaripashunchi ¿imashinata Jehová Dios imata yuyashcata cati ushapani? ¿Imashinata paiman ashtahuan quimirita ushapani? nishpa. Ashtahuangarin, paicunapa ejemplocunata yachajunami, shujcunaca yangamandami llaquichihuan nishpa pensajushpapash ñaupaman catichun ayudanga.

10, 11. a) ¿Imatallata Joseca aguantana tucurca? b) Prezo cashpaca ¿imata rurangapata Joseca aprovecharca?

¹⁰ Joseca Jehová Diosta ali sirvishpami causarca. Shujcuna tauca viaje yangamanda llaquichijpipash aguantashpami catirca. Shinapash paipa huauquicunallata yangamanda llaquichijpimi ashtacata llaquirirca. José 17 huatacunata charijpica paipa huauquicunami pacalla apashpa paitaca esclavotashna jatushpa saquirca. Jatujpica Josetaca Egipto llactamanmi apashpa rirca (Génesis 37:23-28; 42:21). Egiptopi cajpica, Joseca  violangapami munahuarca nishpami shuj huarmica yangamanda juchachirca. Shina nijpimi, chai huarmipa cusaca nali yachashpata Josetaca carcelman cacharca (Génesis 39:17-20). Joseca 13 huatacunatami prezo carca, esclavoshnami causarca. Shinaca congregacionmanda huauquicuna ñucanchita yangamanda llaquichijpica ¿imashinata Josepa ejemploca ayudaita ushan?

¹¹ José prezo cajpica faraonman vinota yalichij runatapashmi prezo churarca. Shuj tutaca shuj muscuita charishpami, vinota yalichij runaca imata muscushcata Joseman parlarca. Chaimi Joseca, Jehová Dios ayudajpi chai muscui ima cajta villashpa chai runamanga nirca, canga libre llujshigringuimi, cutinmi faraonba ñaupajpi vinota yalichishpa trabajagrijungui nishpa. Shina parlajushcata aprovechashpami Joseca paipa llaquimandapash parlarca. Shinapash ¿imatallata Joseca parlarca? ¿Imatata na parlarca? ¿Imatata yachajui ushapanchi? (Génesis 40:5-13).

12, 13. a) Llaquipi cashpapash ¿imatata Joseca rurarca? b) Vinota yalichij runamanga ¿imacunatata Joseca na parlarca?

¹² (Génesis 40:14, 15, liingui). Joseca yangamandami llaquichi tucushcarca. Paica “shuhuamui tucushcami” cani nishpami vinota yalichij runamanga parlarca. Shinallata  yangamandami juchachi tucurcani nishpami parlarca. Shina nishca jipami, vinota yalichij runamanga nirca, faraonba ñaupajpi cashpaca, ñucatapash libre llujchichun ñucamanda parlapangui nishpa.

¹³ Shinaca, llaquipi cashpaca ¿Joseca llaquilla, na imatapash rurashpachu quedarca? Na. Joseca paita yangamanda llaquichishcataca alimi yacharca. Chaimandami vinota yalichij runaca ayudahuangami yashpa, paipa llaquitaca paiman parlarca. Huauquicunami ñucataca pacalla japishpa jatuhuarca nishpa shujman shujman José parlajushcataimanga Bibliapica na imatapash ninllu. Faraonmanllapash Joseca na villarcachu. Ashtahuangarin, Josepa huauquicuna Egiptoman rishpa, Josehuan ali tucujpica faraonga cushijushpami chasquirca. Ashtahuangarin, Egiptopipash quedaichilla, cai ‘llactapi imalla tiashcacunatapash’ japichilla nircami (Génesis 45:16-20).

14. Congregacionbi pipash yangamanda llaquichijpica ¿imata ayudanga shujcunamanda nalicunata ama parlachun?

¹⁴ Congregacionbi pipash yangamandami llaquichihuashca yashpaca, ama shujcunaman parlashpa puringapami cuidadota charina capanchi. Shinapash, shuj huauqui shuj jatun juchata rurajpica, ancianocunahuan parlashpami paicunapa ayudata mascana canchi (Levítico 5:1). Shuj uchilla problemalla cajpica, na shujcunaman parlajunachu canchi. Chaipa randica ñucanchi huauquihuan parlashpami chai problemataca arreglana canchi. Huaquinbica ancianocunaman parlanapash na minishtirinllu (Mateo 5:23, 24; 18:15, liingui). Uchilla problemacunata charishpaca, Jehová Diosta tucuipi cazushcata ricuchishpami, Bibliapi textocuna imata nijta aliguta pensarishpa, chai textocunapi yuyaicunata pactachina canchi. Shinallata tal vez cuenta japishunllari, pandata intindishcata, na imapash problema tiajta. Pensaripai, pandata intindishcata cuenta japishpaca ¿nachu chai huauquimanda shujcunaman imapash nalita na nishcamandaca ali sintirinchiman? Razonda charishpa o na razonda charishpapash, espadahuan chugrichinshna imatapash ninaca, imapash arreglarichunga nunca na ayudanllu. Jehová Diosmandapash, ñucanchi huauquipanicunamandapash na caruyangapaj munaimandami espadahuan chugrichinshna parlanamandaca jarcarina canchi. Salmo librota escribij runaguca nircami: “Ima nalitapash na ruraj” runaca, na shujcunamanda llullacunata parlashpa purinllu, shujcunataca na llaquinllu nishpa (Salmo 15:2, 3; Santiago 3:5).

15. Jehová Diospa ali amigo caimandaca ¿imatallata Joseca rurarca?

¹⁵ Josepa ali ejemplomandaca shuj yuyaitapash yachajupashun. Paica 13 huatacunatami  shujcuna yangamanda llaquichijpi causarca. Chai tucui huatacunapica Jehová Diospa yuyaita charishcatami ricuchirca (Génesis 45:5-8). Jehová Diospa culpamandami llaquicunata charini nishpapash nunca na Jehová Diostaca culparcachu. Joseca yangamanda llaquichi tucujushcata ali yachashpapash chai llaquicunapilla pensarishpa nanarishpaca na causarcachu. Ashtahuangarin, shujcunapa pandarishcacunata o rurashcacunata ricuimanda Jehová Diosmanda caruyanatapash na yarcachu. Jehová Diosmanda nunca na caruyaimandami shujcuna paita yangamanda llaquichijpi Jehová Dios imashina paita ayudajta ricurca. Shinallata paitapash paipa familiatapash Jehová Dios imashina bendiciajtapashmi ricurca.

16. Congregacionbi pipash yangamanda llaquichijpica ¿imamandata Jehová Diosman ashtahuan quimirina capanchi?

¹⁶ Ñucanchicunapash Josepa ali ejemplota catishpami Jehová Dioshuan ali amigo canataca alicachina capanchi. Paipa amigo cashpa catingapapash esforzarinami capanchi. Jehová Diostaca tucui shunguhuanmi juyanchi, adoranchi. Chaimandami shuj huauquicunapa pandarishcacunata ricushpaca nunca na Jehová Diosmanda caruyana capanchi (Romanos 8:38, 39). Chaipa randica, congregacionbi pipash yangamanda llaquichijpipash, Josepa ejemplota catishpa Jehová Diosman ashtahuan quimiripashunchi. Shinallata Jehová Diospa yuyaita charingapaj esforzaripashunchi. Imapash problema tiajpica, Bibliapa textocunapi aliguta pensarishpa arreglangapaj esforzaripashunchi. Chai jipaca, ima problema cajpipash Jehová Diospa maquipi saquipashunchi. Jehová Dios pai agllashca tiempopi, pai munashcashna ñucanchi problemacunata arreglanataca tucui shunguhuanmi confiana capanchi.

17. ¿Imashinata ‘tucui cai pachapi causajcunapa Juezpi’ confiashcata ricuchi ushapanchi?

¹⁷ Cai nali mundopi causajuimandaca yangamanda llaquichi tucushunmi. Huaquinbica congregacionbipashmi ñucanchita o shujcunata tal vez yangamanda llaquichishcashnalla ricuringa. Shina pasajpica na nitijarinachu canchi (Salmo 119:165). Chaipa randica Jehová Diosta cazushpa catipashunchi. Paita mañashpa paipi confiapashunchi. Juchayucuna caimandami huaquinbica imatapash panda intindinchi. Tucuita cabal yachaitapash na ushanchichu. Shinallata Josepa ejemplota catishpami imatapash o pitapash nalicachishpaca na parlajuna capanchi. Nalicachishpa parlajushpaca ashtahuanmi problemacunataca jatunyachishun. Ashtahuangarin, pipash ñucanchita yangamandami llaquichishca yajushpaca, ñucanchillata chai problemata arreglanapa randica, Jehová Diosta cazushpa, Jehová Dios arreglachun shuyapashunchi. Shina rurajpica imashinami Joseta alicachishpa bendiciarca, shinallatami Jehová Diosca ñucanchitapash alicachishpa bendicianga. ‘Tucui cai pachapi causajcunapa Juez’, Jehová Diosca ‘tucui imatapash aligutalla ruraj’ Dios cashcamandami paica ima ali cajta ruranga (Génesis 18:25; Deuteronomio 32:4).

18. ¿Imatata cati temapica yachajupashun?

¹⁸ Cati temapica, Jehová Diosta sirvijcunata imashina yangamanda llaquichishcatami ishcai ejemplocunapi yachajupashun. Chai ejemplocunapimi, Jehová Diospa yuyaita charingapaca, humilde canapash, perdonanapash minishtirishca cashcata yachajupashun.