1. a) Jeftepash Anapash ¿imapita igual carca? (Callari dibujota ricupangui). b) ¿Ima tapuicunatata cai temapica yachajupashun?

JEFTÉ shuti runaguca ali ñaupaman pushajmi carca. Macanajunatapash na manllanllu carca. Ana shuti huarmiguca humildemi carca. Paipa cusatapash huasitapash aligutami cuidan carca. Jeftepash Anapash Jehová Diosta adorajcunami carca. Ishcandillatami Jehová Diosman imagutapash cunata ofrecirca. Paicuna imata ofrecishcataca alimi pactachirca. Cunan punllacunapi Jehová Diosman imagutapash ofrecishpaca paicunapa ali ejemplotami cati ushanchi. Shinapash ¿imamandata Jehová Diosman imagutapash ofrecinaca na shuj pugllailla cana can? ¿Imatata Jeftemandapash Anamandapash yachajuita ushapanchi? Chai tapuicunataca cai temapimi yachajupashun.

2, 3. Jehová Diosman imagutapash ofrecinamanda parlashpaca ¿imatata Bibliaca nin?

² Bibliapi nishca shinaca, imagutapash ofrecijcunaca, imatapash ruranata, caranata, ashtahuan sirvinata, o huaquin cosascunata na ruranatami ofrecinajun. Imagutapash ofrecishpaca ñucanchi munaimi ofrecinchi. Na pipash obligajpichu ofrecinchi. Shinapash, imagutapash ofrecishpaca, Jehová Diospa ñaupajpi na yanga pugllailla cashcata intindishpami imata ofrecishcataca respetana, pactachina canchi. Jehová Diospa ñaupajpica imatapash ofrecishpaca shuj juramentota  rurajuj cuendami can. Juramentota rurashpami gentecunaca imatapash rurangapaj o na rurangapaj ofrecinajun (Génesis 14:22, 23; Hebreos 6:16, 17). Bibliapi nishca shinaca, Jehová Diosman imatapash ofrecishpaca ¿yangata saquinallachu canchi?

³ Moisesman Cushca Leypica nijurcami, Jehová Diosman pipash imatapash ofrecishpaca pactachinapachami can nishpa. Chaimandami Números 30:2pica nin: ‘Paipa shimihuan tucui imata nishcashnallatami pactachina’ can nishpa. Jipamanga rey Salomonbash nircami: “Taita Diosman imagutapash rurashapachami nishpaca, ama unayashpa ucha pactachingui. Paica, juizu illaj runacunahuanga na cushijunllu. Imagutapash rurashami nishcataca, pactachinapachami cangui” nishpa (Eclesiastés 5:4). Jesuspash yachachircami, Taita Diosman imatapash ofrecishpaca pactachinapachami can nishpa. Chaimandami nirca: “Na llullashpa juramentunachu cangui. Ashtahuangarin can juramentushcataca, Jatun Diospaj ñaupajpi pactachinami cangui” nishpa (Mateo 5:33).

4. a) ¿Imamandata Jehová Diosman imagutapash ofrecinaca na shuj pugllailla can? b) ¿Imatata Jeftemandapash Anamandapash yachajupashun?

⁴ Imashinami ricupashcanchi, Jehová Diosman imagutapash ofrecinaca na shuj pugllaillachu cashca. Imata ofrecishcata pactachishpaca Jehová Diospa ñaupajpica alimi ricurishun. Cutin imata ofrecishcata na pactachishpaca na ali ricurishunllu. Chaita ali intindichunmi rey Davidca cashna nishpa tapurca: “¿Pita Mandaj Diospaj urcuman vitsianga? Jucha illaj paipaj pushtupica, ¿pita shayari ushanga?” nishpa. Shina tapushpami rey Davidllata nirca, Jehová Diosca ‘umachishpa juramentunatapash na yachajtami’ chasquin nishpa (Salmo 24:3, 4). Shinaca ¿imatata Jeftepash Anapash Jehová Diosman ofrecirca? ¿Paicuna imata ofrecishcata pactachinaca facilchu carca? Chaita yachajupashun.

5. a) ¿Imatata Jefteca Jehová Diosman ofrecirca? b) Chaimanda ¿imatata Jehová Diosca rurarca?

⁵ Shuj punllaca, israelitacunapa contra ammonitacunahuanmi Jefteca macanajungapaj rigrijurca (Jueces 10:7-9). Chaimandami Jefteca, paicunata mishangapaj ayudahuai nishpa Jehová Diosmanga cashna nishpa ofrecirca: “Amonitacunataca, ñuca maquipimi churangui. Shina churajpi, macanajuita mishashpa tigrajujpi, ñucata tuparingapaj ñuca huasi pungumanda maijambash punda llujshimushpaca, Mandaj Diospajmi canga” nishpa. Shina nishpa mañajpica ¿imatata Jehová Diosca rurarca? Jehová Diosca Jeftepa mañashcata uyashpami contracunata mishachun ayudarca. Jefté paipa huasiman tigrajujpica paipa juyashca ushimi paita chasquingapaj llujshirca. Chaimandami Jeftepa ushica Jehová Diospa cana carca (Jueces 11:30-34). Shinaca ¿imata Jeftepa ushihuanga pasana carca?

6. a) Jehová Diosman imata ofrecishcata pactachinaca ¿imamandata Jeftepapash paipa ushipapash na fácil carca? b) ¿Imatata Deuteronomio 23:21, 23pi, Salmo 15:4pipash yachajupanchi?

⁶ Jeftepa ushica paipa taitapa nishcata pactachingapami, tabernáculo nishca carpa huasiguman rishpa Jehová Diosta sirvishpa causana carca. Shinapash Jefteca ¿na pensarishpa, yangatachu Jehová Diosmanga nirca, maijan punda llujshimujtami canman cusha nishpa? Na. Jefteca  paipa ushi pundapi llujshimushpa chasquinataca tal vez yachashcangami. Shinapash Jehová Diosman ofrecishcata pactachinaca Jeftepapash, paipa ushipapash shinllimi cashcanga. Jefteca paipa ushi llujshimujta ricushpami shungupi imahuanbash tujsijpishna nanachirca. Jeftepa ushipash nircami: ‘Jarihuan nara tacarishcami cani, ñucapaj cumba cuitsacunahuan huacangapaj ishcai quillata shuyapai’ nishpa. ¿Imamandata Jeftepa ushica shina nirca? Paipa taitapa nishcata pactachishpaca, Jeftepa ushica nunca na cazarashpami huahuacunatapash na charita ushana carca. Jeftepash shuj huahuacunataca na charircachu. Chaimandami Jeftepa shutica chingarina carca. Shinapash Jeftepash paipa ushipash ima ashtahuan importante cashcataca alimi yacharca. Chaimandami Jefteca nirca: “Mandaj Diosmanmi cushapachami nircani. Chaitaca, na saqui ushanichu” nishpa. Jeftepa ushipash nircami. ‘Ñuca taitalla, imashna can nishcashnallata rurailla’ nishpa (Jueces 11:35-39). Jeftepash paipa ushipash tucuipimi Jehová Diosta cazurca. Chaimandami Jehová Diosman imata ofrecishcataca shinlli cajpipash pactachirca (Deuteronomio 23:21, 23; Salmo 15:4, liingui).

7. a) ¿Imatata Anaca Jehová Diosman ofrecirca? ¿Imamandata shina ofrecirca? b) ¿Imashinata Jehová Diosca Anapa mañashcata contestarca? c) ¿Imashinata Samuelca paipa mamapa ofrecishcataca pactachirca? (Notata ricupangui).

⁷ Anapash, huahuacunata na chari ushashpami llaquillapacha carca. Shujcunapash nalicachishpa, burlarishpami ricun carca (1 Samuel 1:4-7, 10, 16). Chashna llaquipi causajushpami Anaca pai imashina sintirishcata Jehová Diosman villashpa cashna nishpa ofrecirca: ‘Tucuita Mandaj Dioslla, canda sirvij ñuca, cashna llaquihuan cajtaca llaquishpa ricushpa, ñuca mañashcata yaripayari. Canda sirvij ñucataca ama cungashpa, ashtahuangarin canda sirvij ñucaman shuj jari huahuaguta carahuayari. Shina carajpica chai huahuagutaca, tucui paipa causaipi can Mandaj Diostalla sirvishpa causachunmi cupasha. Shinallata paipa ajchatapash, na rutuchingachu’ nishpa * (notata ricupangui) (1 Samuel 1:11). Anapa mañashcata Jehová Dios uyajpimi, shuj huata jipaca shuj huahuaguta Anaca charirca. Chai huahuagutaca Samuel nishpami shutichirca. Anaca cushijushcapachami carca. Shinapash Jehová Diosman imata ofrecishcataca na cungarcachu. Paipa churita ungushpaca Anaca nircami: “Mandaj Diosta ñuca mañajpimi, cai huahuagutaca carahuarca” nishpa (1 Samuel 1:20).

8. a) Jehová Diosman imata ofrecishcata pactachinaca ¿imamandata Anapaca na fácil carca? b) ¿Imashinata Salmo 61ca Anapa ali ejemplota yarichun ayudan?

⁸ Samuel quimsa huatacunata charijpica, Jehová Diosman ofrecishca shinami Anaca, Siló llactapi tabernáculo nishca carpa huasiguman Samueltaca aparca. Samueltaca Elí shuti sumo sacerdoteman ricuchishpami Anaca nirca: “Cai huahuagumandami mañajurcani. Mandaj Diosca, ñuca mañashcataca carahuarcami. Chaimandami cai huahuagutaca, ñucapash Mandaj Diosman cupani. Paica, tucui  causaipimi Mandaj Diospaj canga” nishpa (1 Samuel 1:24-28). Chai punllamandami Samuelca tabernáculo nishca carpa huasigupi causarca. Bibliapica ninmi: “Samuel huambraguca, Mandaj Diospaj ñaupajpimi viñajurca” nishpa (1 Samuel 2:21). Anapaca Jehová Diosman ofrecishcata pactachinaca na facilchu cashcanga. ¿Imamandashi na fácil cashcanga? Paipa juyashca churiguta cada punlla na ricuna, paihuan na canaca shinllimi cashcanga. Shinapash Anapaca, Jehová Diosman imata ofrecishcata pactachinaca importantemi carca. Chaimandami, paipa munaicunatapash huashaman saquishpa Jehová Diosman imata ofrecishcata pactachirca (1 Samuel 2:1, 2; Salmo 61:1, 5, 8, liingui).

9. ¿Ima tapuicunatata yachajushpa catipashun?

⁹ Imashinami ricupashcanchi, Jehová Diosman imatapash ofrecishpaca pactachinapachami cashcanchi. Shinapash ¿imacunatallata cunanbica rurashami nishpa ofrecita ushapanchi? ¿Imamandata ñucanchi imata ofrecishcata pactachingapaj esforzarina capanchi? Cunanga chai tapuicunata yachajupashun.

10. a) Jesusta catijcunapaca ¿imata ofrecinata ashtahuan importante can? b) Jehová Diosman mingarishpaca ¿imatata ninajupanchi?

¹⁰ Ñucanchi causaita Jehová Diosman mingangapaj  ofrecinami, Jesusta catijcunapaca ashtahuan importante can. Jehová Diosman mingarishpaca, shuj oracionda rurashpami, ima pasajpipash candallami para siempre sirvishpa causasha nishpa Jehová Diosman ofrecinchi. Jesús nishca shinaca, ñucanchi causaitaca na llaquishpami Jehová Diosta pundapi churanchi (Mateo 16:24, NM). Ñucanchicunaca Jehová Diosman mingarishca punllamandapachami Jehová Diospa munaita rurangapaj causanchi (1 Pedro 4:2). Chaimandami Jehová Diosman imatapash ofrecinaca na shuj pugllai cuenda can. Salmo librota escribij runagu cuendami ñucanchipash ninchi: “Mandaj Dios ñucaman tucui alicunata rurashcamandaca, ¿imatata paiman cupashayari? Cunanga, Mandaj Diosman carashapachami nishcataca, tucui pai agllashcacunapaj ñaupajpimi cusha” nishpa (Salmo 116:12, 14).

11. Bautizarigrinajushpa ari nishpaca ¿imatata ricuchiparcanchi?

¹¹ ¿Jehová Diosman mingarishpa, paiman mingarishcata shujcunapash yachachun bautizarishcanchichu? Shina rurashca cashpaca alitami rurashcanchi. ¿Bautismo discursota yaripanchichu? Chai discursota cujuj huauquica tapurcami, Jehová Diosman mingarishpa, bautizarishpaca testigo de Jehová tucujushcataca ¿alichu intindipanguichi? nishpa. Chai tapuita ari nishpa contestajpimi tucuicuna yachaj chayarca, ñucanchicunaca Jehová Diosman mingarishcata, bautizaringapaj listo cashcata, Jehová Diospa sirvijcuna cai ushashcatapash. Bautizarijpica ashtacatami Jehová Diosca cushijushcanga.

12. a) ¿Imacunatata tucuicunallata tapurina capanchi? b) ¿Imatata apóstol Pedroca animarca?

¹² Bautizarishpaca, tucui causaipimi candalla sirvishpa causagrini, candalla cazushpa causangapami esforzarigrini nishpami Jehová Diosmanga ofrecircanchi. Shinapash bautizarishpaca chairami Jehová Diosta sirvi callarinajunchi. Tucuicunallatami tapurina capanchi: “Bautizarishca punllamandaca ¿ashtahuanllu Jehová Diosman quimirishcani? ¿Tucui shunguhuanllu sirvishpa catijuni?” (Colosenses 3:23). “¿Cutin cutinllu Jehová Diosta mañani? ¿Cada punllachu Bibliata liini? ¿Tucui tandanajuicunamanllu rini? ¿Siemprechu villachinaman llujshingapaj esforzarini? Na cashpaca ¿villachina cashcamandalla, tandanajuicunaman rina cashcamandallachu rurajuni?” nishpa. Apóstol Pedroca animarcami, ama chiriyangapaca, shinlli feta charingapaj, ashtahuan yachajungapaj, aguantangapaj, Taita Diosta ashtahuan juyangapami esforzarina canguichi nishpa (2 Pedro 1:5-8, liingui).

13. Jehovaman mingarishpa, bautizarishca huauqui o panica ¿imatata na nita ushan?

¹³ Sirvishpami causasha nishpa Jehová Diosman ofrecishpaca na huashaman tigraita ushanchichu. Jehovata sirvinata o Jesús mandashcata pactachishpa causanata shaijushpaca na nita ushanchichu, “ñucaca nunca na ciertopacha Jehová Diosman mingarishcanichu, ñuca bautismoca na valishcachu” nishpa * (notata ricupangui). Jehovaman mingarishca jahua shuj jatun juchata rurashpaca, nalita rurashcataca Jehová Diosman ricuchinami can. Congregacionbipash imatapash na rurashcashna ali quedaitaca na ushanllu (Romanos 14:12). Jesusca Jehová Diosta callaripishna ñana juyanajun huauquipanicunamandami parlarca. Ñucanchicunaca na chai huauquipanicunashna cangapaj munanchichu. Ashtahuangarin, Jesús cai shimicunata ñucanchiman nichunmi munanchi: ‘Ñucata juyashpami ñucata crishpa, ali sirvishpa, alitalla rurashpa, ali shunguhuanbacha causajungui. Cri callarijushpa rurajushcataca, ashtahuan yalimi cunanbica rurajungui. Chaitaca ricujunimi’ nishpa (Apocalipsis 2:4, 19). Jehová  Diosman mingarishpa, imata ofrecishcata ali pactachishpami Jehová Diosta cushichingapaj munanchi.

14. a) ¿Imata pactachinapashta minishtirishca can? b) ¿Imamandata minishtirishca can?

¹⁴ Cazarajui punllapi imata ofrecishcata pactachinapash minishtirishcapachami can. ¿Imamandata minishtirishca can? Jehová Diosca cazarashca causaita respetachunmi munan. Noviocuna cazaranajushpaca Jehová Diospa ñaupajpipash, cumbaj gentecunapa ñaupajpipashmi cazarashca jipa imata ruranata ofrecinajun. Ashtaca llactacunapi noviocuna cazaranajushpaca, cai Alpapi causajungacamanmi Taita Dios mandashcashna candalla juyasha, cuidasha, respetasha nishpa ofrecinajun. Huaquin noviocunaca na chai shimicunatallata nishpapash, Taita Diospa ñaupajpimi, cazarashca jipa imata ruranata ofrecinajun. Shinami noviocunaca cusahuarmi tucun. Cazarashpaca huañungacamanmi igual cana can (Génesis 2:24; 1 Corintios 7:39, NM). Jesusca nircami: ‘Taita Dios tandachishcataca, maijan runapash na shicanyachi ushanllu’ nishpa. Cazaragrinajujcunaca, nali causashpaca divorciarishallami yuyaihuanga na cazaranachu can (Marcos 10:9).

15. ¿Imamandata Jesusta catijcunaca cazarashca causaimandaca na ashtaca gentecunashna yuyana can?

¹⁵ Juchayucuna caimandaca tucui cusahuarmicunallatami problemacunata charin. Chaimandami Bibliapica nin: “Cazarajcunaca, cai causaipi llaquicunatami apanajunga” nishpa (1 Corintios 7:28). Cunan punllacunapi ashtaca gentecunaca yanmi, imapash problema ricurijpica divorciarinallami can nishpa. Shinapash Jesusta catijcunaca na shina pensanchichu. Jesusta catij cusahuarmicunaca, cazarajuj punllapi Jehová Diospa ñaupajpi imata ofrecishcataca yaipimi charin. Paicuna imata nishcata na pactachishpaca Jehová Diosta llullajuj cuendami canman. Jehová Diosca llullajcunataca na ricunayachinllu (Levítico 19:12; Proverbios 6:16-19). Jesusta catij cusahuarmicunaca siempremi apóstol Pablopa shimicunata yarina can. Paica nircami: ‘¿Cazarashcachu cangui? Shina cashpaca, jichunataca na yarinachu cangui’ nishpa (1 Corintios 7:27). ¿Imamandata apóstol Pabloca shina nirca? Shujhuan cangapaj munaimanda divorciarijcunataca Jehová Diosca millanayachinmi. Chaita ali yachashpami apóstol Pabloca shina nirca (Malaquías 2:13-16, NM).

16. a) Divorciarinamandaca ¿imatata Bibliaca nin? b) Partirinamanda, jichushpa rinamandaca ¿imatata Bibliaca nin?

¹⁶ Bibliapi nishca shinaca ¿imamandata cazarashcacunaca divorciarita ushanman? Jesusca yachachircami, cusa o huarmi shujhuan puñushpa falta urmajpi, falta urmashcapa huarmi o cusa na perdonangapaj munajpillami divorciarita ushanman nishpa (Mateo 19:9, NM; Hebreos 13:4). Cutin cusahuarmicuna partirinamanda, jichushpa rinamandaca ¿imatata Bibliaca nin? 1 Corintios 7:10, 11pimi Bibliaca aliguta intindichin (chai textota liipangui). Bibliapica partirinalla cashcata, jichushpa rinalla cashcataca na nijunllu. Shinapash huaquin cusahuarmicunaca paicunapa cusa o huarmi yapata maltratashpa paicunapa causai peligropipacha cajpimi partirinata yashca. Shinallata, paipa cusa o huarmi Jehová Diosmanda caruyashca gentecunapa panda yuyaicunata alicachishpa, paita Jehová Diosmanda caruyachingapaj munajujpimi partirinata yuyashca * (notata ricupangui).

17. Ali causangapaca ¿imatata cusahuarmicuna rurai ushan?

¹⁷ Cusahuarmicuna ali causangapaj munashpa shuj consejota mañajpica ¿imatata ancianocunaca  rurana can? Ancianocunaca Ciertopacha juyaica ¿imashinata can? nishca videota ñachu ricuparcanguichi nishpami tapuita ushan. Shinallata ¿Quiquinba familiaca cushilla causaita ushanllu? nishca folletotapash ñachu yachajupashcanguichi nishpami tapuita ushan. Chai publicaciongunapi ashtaca textocunami cusahuarmicunataca ali causachun ayudaita ushan. Shuj cusahuarmica nircami: “Chai folletota yachajui callarishcamandami ashtahuan cushilla cashcanchi” nishpa. Shuj paniguca ña 22 huatacunata cazarashca cashpami igual causaitaca ñana ushagrinchichu yarca. Shinapash Ciertopacha juyaica ¿imashinata can? nishca videota ricushca jipaca nircami: “Ñuca cusahuanga ishcandillatami Testigocuna carcanchi. Shinapash ñana shujllashna sintirishpami, igual causana cashcamandalla igual causanajurcanchi. Minishtijuj punllacunapipachami cai videoca llujshirca. Cunanga ñami ashtahuan alillata causanajunchi” nishpa. Imashinami ricupanchi, cusahuarmicunaman Jehová Dios Bibliapi cushca yuyaicunata pactachishpaca, cusahuarmicunaca ashtahuan cushillami causanga.

18, 19. a) ¿Imatata ashtaca taitamamacunaca rurashca? b) Tiempo completo especialpi sirvinajuj huauquipanicunaca ¿imashinata paicuna imata ofrecishcataca pactachin?

¹⁸ Ñaupa parrafocunapica Jeftepash Anapash Jehová Diosman imata ofrecishcatami yachajuparcanchi. Paicuna imata ofrecishcata pactachijpimi Jeftepa ushipash, Anapa churipash paicunapa tucui causaipi Jehová Diosta ashtahuan sirvi usharca. Cunan punllacunapi ashtaca taitamamacunapash tiempo completopi sirvishpa causachunmi paicunapa huahuacunataca animan. Tucuicunallatami jovengunataca Jehová Diosta ashtahuan sirvishpa catichun animaita ushapanchi (Jueces 11:40, NM; Salmo 110:3).

¹⁹ Cunan punllacunapica, 67 mil huauquipanicunami Orden Mundial de Siervos Especiales de Tiempo Completo nishcapi sirvinajun. Huaquingunaca Betelpi, construccionbimi sirvinajun. Cutin shujcunaca superintendente de circuitocuna, precursor especialcuna, misionerocuna, Jatun Tandanajui Huasicunapi ñaupaman pushajcuna, Jehová Diospa organización churashca escuelacunapi yachachijcuna, o chai escuelacunapi ruraicuna ali ñaupaman catichun ricushpami sirvinajun. Chai huauquicuna, panicunaca cazushunmi, Jehová Diospa organización cushcatalla chasquishpami causashun nishpami ofrecishca. Shinami, ima asignaciondapash alimi pactachisha, minishtirishca cosascunahuanllami causasha, permisota cujpillami canllaman trabajasha nishpa ofrecishca. Tiempo Completo Especialpi sirvinajuj huauquipanicunaca na imapash especial huauquipanicunachu can. Shinapash paicunapa rurashcacunami alipacha can. Chai huauquipanicunaca humildecunami can. Tiempo completo especialpi sirvingapaj imata ofrecishcataca tucui shunguhuanmi pactachingapaj munan.

20. Jehová Diosman imata ofrecishcamandaca ¿imata yuyana capanchi? ¿Imamandata shina yuyana capanchi?

²⁰ Imashinami cai temapi ricupashcanchi, quimsa cosascunatami Jehová Diosman ofrecita ushapashcanchi. Tal vez, ñachari Jehová Diosman mingarircanchi, cazararcanchi, o tiempo completo especialpi sirvinajunchi. Chai punlla imata ofrecishcataca nunca na cunganachu capanchi. Imata ofrecishcata pactachingapaca esforzarinami capanchi (Proverbios 20:25). Jehová Diosman imata ofrecishcata na pactachishpaca tal vez jatun llaquicunatami charishun (Eclesiastés 5:6). Chaimandami Salmo librota escribij runagushna cashna nina canchi: ‘Ñuca tucui causaipimi canba shutiguta candajusha. Ñuca imata rurashapachami nishcataca, punllandimi pactachijusha’ nishpa (Salmo 61:8).