Jesustapash, paipa catijcunatapash maquita na maillashcamanda, shuj cosascunatapash na rurashcamandami Jesuspa contracunaca riman carca. Moisesman Cushca Leypica ninmi carca, quilla nanaita charijcuna, yuraj yacu shamushcacuna, lepra ungüita charijcuna, huañushca genteta o animalta tacarijcunaca mapacunami can nishpa. Shinaca chai gentecuna cutin mapa illaj tucungapaca ¿imatata rurana carca? Leypi mandashca shinaca, sacrificiocunata rurana, maillarina o yacutami tsirapachina carca (Levítico capítulo 11-15; Números capítulo 19).

Judiocunata yachachijcunaca paicunapa yuyaicunatami Moisesman Cushca Leypica mirachirca. Chaimandami shuj libropica nin, imacunamandalla mapa tucunata, imacunatalla rurashpa cutin limpio tucunatami nin carca nishpa. Ashtahuangarin, maijan vasocuna, jarracuna o cosascuna mapa tucunata o na mapa tucunatami nin carca. Maijan cosascunatalla rurashpa cutin limpio tucuna costumbrecunatapashmi churarca.

Jesuspa contracunaca cashna nishpami Jesustaca tapurca: ‘¿Imashpata canba yachajujcunaca ñaupa taitacuna yachachishpa saquishcata na cazunajun? Mapayashca maquihuanrami micunajun’ nishpa (Marcos 7:5). Chai judiocunaca ¿maquita maillanamandallachu parlanajurca? Na. Paicunaca micugrijujpa maquipi yacuta talina costumbremandami parlanajurca. Ñaupa parrafopi libroca ninmi, judiocunata yachachijcunaca imacunapi maquita maillanata, maijan yacuhuan maillarinata, pi yacuta talichinata, maicaman maquicunata yacupi churana yanga costumbrecunatami churashcarca nin.

Shinapash chai costumbrecunamandaca ¿imatata Jesusca pensarca? Jesusca judiocunata yachachijcunataca mishqui shimi jayaj shungucuna, Jehová Diosca Isaiastaca cashna ningui nishpami mandarca: ‘“Cai llactapi causajcunaca, shimihuanllami ninanda alicachihuan. Paicunapa shunguca ñucamanda carupimi. Ñucataca yangatami alicachinajun. Gentecuna mandashcatallami ñuca yachachishcatashna yachachinajun” nijurcami. Cangunaca, Taita Dios mandashcata saquishpami, runacuna yachachishcatara napacha saquishpa catinajunguichi’ nishpa (Marcos 7:6-8).