1, 2. Congregacionbi responsabilidadcunata pactachichunga ¿imamandata shujcunata yachachina capanchi?

JESUSCA Diospa Reinomanda villachingapami ashtacata esforzarirca. Shinapash, shujcunaman imashina yachachinata, Jehovata sirvijcunata imashina cuidanatami paipa catijcunaman yachachingapaca ashtacata esforzarirca. Shinami paipa catijcunaca llamagucunata michijcunashna canata yachajurca (Mateo 10:5-7). Felipepash villachingapaj ashtacata esforzarishpapash paipa ushicunamanbashmi imashina villachinata yachachirca (Hechos 21:8, 9). Cunanbica ñucanchicunapashmi shujcunaman yachachina canchi. Shinapash ¿imamandata shujcunaman yachachinaca minishtirishca can?

² Mundo entero congregaciongunapica ashtacacunami Bibliata chaira yachajujun, bautizaritapash nara bautizarinllu. Chaimandami paicunata yachachinaca minishtirishcapacha can. Ñucanchicunaca imamanda paicunallata Bibliata liina, estudiana minishtirishca cashcata intindichunmi ayudana canchi. Shinallata, ali villaicunata shujcunaman villachinata, yachachinatapashmi paicunamanga yachachina canchi. Chairalla bautizarishca huauquicunatapash siervo ministerialcuna, ancianocuna tucuchunmi yachachina  canchi. Congregacionbica tucuicunallatami mushujcunataca ashtacata ayudaita ushanchi (Proverbios 4:2).

3, 4. a) Apóstol Pablo nishca shinaca ¿imashinata Bibliata estudianaca villachinapipash ayudan? b) Shujcunapash Bibliata estudiana minishtirishca cashcata intindichunga ¿imatata rurana capanchi?

³ Jehová Dios imata munashcata yachangapaca tucuicunallatami Bibliata liina, estudiana canchi. Apóstol Pabloca Colosas congregacionmanda huauquipanicunataca nircami: “Ñucanchicunapash uyashca punllamandapachami cungaitapash na cungashpa, cangunamandaca Taita Diosta mañanajunchi. Taita Dios munashcata aligutapacha yachajuchunmi mañanajunchi” nishpa. Shinaca ¿imamandata Colosasmanda huauquipanicunapaca Bibliata liina, estudianaca minishtirishca carca? Apóstol Pablo nishca shinaca, Bibliata liishpa, estudiashpami paicunaca ali yachaita charishpa, ‘Jehová Dios imata munashcata rurashpa Taita Diosta cushichita’ ushana carca (Colosenses 1:9, 10, NM). Shinaca, pimanbash yachachinajushpaca Bibliata siempre liina, estudianami Jehová Diosta ashtahuan sirvichun ayudanga nishpa intindichipashunchi.

⁴ Ñucanchihuan yachajujcunapash paicunallata Bibliata estudiana minishtirishca cashcata intindichunga pundapica ñucanchicunami Bibliata estudiangapaj esforzarina canchi. Bibliata liingapaj, imata liishcapi pensaringapaj esforzarishpaca ashtahuan alimi causashun, villachitapash ashtahuan aligutami villachishun. Shuj ejemplota ricupashun. Villachingapaj llujshijpi pipash shuj shinlli tapuita rurajpica ashtahuan jahuallami Bibliahuan contestai ushashun. Shinallata Jesuspash apóstol Pablopash o shujcunapash imashina villachingapaj esforzarishcata Bibliapi liishpami ñucanchicunapash llaquicuna ricurijpica villachishpa catingapaj animarishun. Ashtahuangarin, shujcunahuan parlajushpapash, Bibliata estudiana ñucanchita imashina ayudashcata parlashpami paicunapash ashtahuan aliguta Bibliata estudiashpa paicunapash beneficiarichun ayudaita ushanchi.

5. Ñucanchihuan yachajujcunapash paicunallata Bibliata estudiashpa catichunga ¿imashinata ayudai ushapanchi?

⁵ Pensarinami canchi: “Ñucahuan yachajujcunapash Bibliata siempre estudiashpa catichunga ¿imashinata ayudaita ushani?” nishpa. Huaquin yuyaicunata ricupashun. Ñucanchicunaca paicunahuan yachajujushca publicacionda imashina prepararinatami yachachita ushanchi. Chaipaca parrafocunapi tiashca textocunata mascachunmi animana canchi. Cutin ¿Imatata Bibliaca yachachin? librohuan yachajujushpaca tucuri paginacunapi informacionda liichunmi animana canchi. Chai jipaca, tandanajuicunapi comentangapaj imashina prepararinatami  yachachita ushanchi. Shinallata Villajun revistapi, ¡Despertad! revistapi tucui temacunata liichunbashmi animaita ushanchi. Ashtahuangarin, Watchtower Library nishcapi o INTERNETPI BIBLIOTECA Watchtower nishcapi Bibliapa tapuicunapa respuestacunata imashina mascanatami yachachi ushanchi. Shina ayudajpimi yachajujcunaca Bibliata yachajunata alicachishpa ashtahuan yachajungapaj munanga.

6. a) Yachajujcunapash paicunallata Bibliata estudiangapaj munachunga ¿imatata intindichina capanchi? b) Bibliapi yachachishcacunata alicachishpaca ¿imatata Bibliata yachajujllata ruranga?

⁶ Bibliata estudianami Jehová Diosta ashtahuan ali rijsichun ayudan. Chaimandami yachajujcunamanbash chaita ali intindichina canchi. Bibliata canllata estudianami cangui nishpa atichijunapa randica Bibliata estudiana imamanda ali cajtami ricuchina cangui. Bibliata ashtahuan ashtahuan estudiashpami yachajujcunapash salmistashna sintirishpa cashna ninga: ‘Ñucamanda rimashpaca, Taita Diospaman quimirinaca aligupachami. Mandaj Jatun Diostami shuyashpa causajuni’ nishpa (Salmo 73:28). Paiman quimiringapaj munajcunataca Jehová Diospa espíritu santollatami ayudanga.

7. Paipa apostolcunapash ali villaicunata villachichunga ¿imashinata Jesusca yachachirca? (Callari dibujota ricupangui.)

⁷ Paipa apostolcunaman Jesús imashina yachachishcata ricushpami ñucanchicunapash ashtaca cosascunata yachajuita ushanchi. Apostolcunaca Jesús villachingapaj rishpa paicunata pushashpa rijpimi Jesús imashina yachachijta ricui usharca. Shinallata, paipa apostolcunata villachichun cachajushpaca imata villachinata ali yachachishpami cacharca (Mateo capítulo 10) ^[1] (cai tema tucuripi notata ricupangui). Shinami apostolcunaca ñapash Jesuspa ejemplota catishpa shuj gentecunamanbash ali villaicunata yachachi usharca (Mateo 11:1). Cunanga, villachingapaj rishpa mushujcunata imashina ayudana cashcata ishcai yuyaicunapi ricupashun.

8, 9. a) ¿Imashinata Jesusca cada unohuan parlanata alicachishcata ricuchirca? b) Mushuj publicadorcunapash Jesuspa ejemplota catishpa parlachunga ¿imashinata ayudai ushapanchi?

⁸ Gentecunahuan parlanata yachachishunchi. Jesusca huaquinbillami tandanajushca ashtaca gentecunahuanga parlan carca. Paica cada unohuan parlanatami alicachin carca. Paica cushilla quimirishpami parlan carca. Huaquin ejemplocunata ricupashun. Shuj punllaca, Sicar llacta ladopi tiaj pozopi yacuta llujchingapaj rij huarmiguhuan parlangapami Jesusca quimirirca (Juan 4:5-30). Cutin shuj punllaca impuestocunata cobrajuj Mateo shuti runaguhuanbash parlangapaj quimirishpami Jesusca ¿nachu ñucata catingapaj munahuangui? nirca. Shina nijpimi Mateoca ari munanimi nishpa jipamanga Jesustapash shujcunatapash paipa huasipi micungapaj richun invitarca. Chaipimi Jesusca tandanajushca ashtaca gentecunahuan parlarca (Mateo 9:9; Lucas 5:27-39).

⁹ Natanael shuti runagu Jesushuan parlajushpaca, Nazaret llactamanda gentecunataca nalicachishpami parlarca. Nazaret llactaca Jesuspa llactami carca. Shina parlajpipash Jesusca ali shimicunahuanmi parlashpa catirca. Chaimandami Natanael runaguca Nazaret llactamanda Jesús cajpipash paitaca alicachishpa ricui callarirca. Ashtahuangarin Jesusmanda ashtahuan  yachajungapami munarca (Juan 1:46-51). Shinaca ¿imatata Jesuspa ejemplomandaca yachajunchi? Aliguman cushilla parlajpica gentecunaca tal vez ñucanchita uyangapaj munangami ^[2] [cai tema tucuripi notata ricupangui]. Gentecunahuan imashina parlanata yachachijpimi mushujcunapash villachingapaj rinataca ashtahuan ashtahuan alicachinga.

10-12. a) Ali villaicunata alicachichunga ¿imatata Jesusca rurarca? b) Mushuj publicadorcunapash Bibliata ashtahuan aliguta yachachichunga ¿imashinata ayudai ushapanchi?

¹⁰ Uyangapaj munajcunata yachachishunchi. Jesusca quimsa huata chaupitalla yachachina caimandami ocupado carca. Shinapash gentecuna yachajungapaj munajpica tiempota llujchishpami paicunamanga ashtaca cosascunata yachachin carca. Shuj punllaca Jesusmanda ashtahuan yachajungapaj munashpami ashtaca gentecunaca yacu manñapi tandanajushca carca. Chaita ricushpami Jesusca Pedrondi canoaman vitsiashpa ashtaca gentecunaman yachachi callarirca. Chai jipaca Pedromanbash yachachingapami munarca. Chaimandami shuj jatun milagrota rurashpa Pedrotaca ashtaca pescadocunata japichun ayudarca. Chai jipami Jesusca Pedrotaca nirca: “Cunanmandapachami pijita japinshna, gentecunata tandachishpa causangui” nishpa. Bibliapica ninmi, Jesús shina nishcandimi Pedropash, Pedrohuan cajcunapash ‘canoacunata manñaman llujchimushpa, tucuita saquishpa Jesusta catishpa rinajurca’ nishpa (Lucas 5:1-11).

¹¹ Nicodemopash Jesusmanda ashtahuan yachajungapami munarca. Shinapash paica judiocunata jatun mandajcunapuramandami carca. Chaimandami paica Jesushuan parlajujta shujcuna ricuchunga manllajurca. Manllaimandami Nicodemoca tuta rishpa Jesushuan parlangapaj munarca. Jesusca Nicodemota cushilla chasquishpami tiempota llujchishpa minishtirishca cosascunata yachachirca (Juan 3:1, 2). Jesusca siempremi gentecunaman Diospa Shimimanda yachachingapaj, gentecunapa feta shinlliyachingapaj munarca. Ñucanchicunapash Jesuspa ejemplota catishpami, gentecunapa ima horas ali canata ricushpa visitana canchi. Shinallata, Bibliata aliguta intindichingapami tiempota llujchina canchi.

¹² Mushujcunahuan villachingapaj llujshishpaca, yachangapaj munanshnalla gentecunata cutin visitanatami yachachina canchi. Shinallata, revisitacunata rurangapaj rijushpa, o shuj gentecunaman Bibliata yachachingapaj rijushpaca mushuj publicadorcunataca cumbahuai nishpami invitanalla canchi. Shina invitajpimi paicunaca shujcunaman imashina yachachinata ricushpa, Jehovamanda shujcunaman yachachina ali cashcatapash ricunga. Shinami mushujcunapash cushijushpa shuj gentecunata cutin visitanata, paicunaman Bibliamanda yachachinatapash alicachinga. Ashtahuangarin, pacienciata charinata yachajushpami gentecunata huasipi na tarishpapash na ñapash desanimarinata yachajunga (Gálatas 5:22; “ Na ñapash desanimarircachu” nishca recuadrotapash ricupangui).

13, 14. a) Shujcunata ayudangapaj ashtacata esforzarishcata Bibliapi ricushpaca ¿imatata yachajupanchi? b) Shuj huauquipanicunata juyanata yachajuchunga ¿imashinata jovengunata, mushuj publicadorcunataca ayudai ushapanchi?

¹³ Jehová Diosca paita sirvijcuna caishujhuan chaishujhuan juyarichun, ayudarichunmi munan (Lucas 22:24-27; 1 Pedro 1:22, liingui). Bibliapica ninmi, Jesusca gentecunata ayudangapami ninanda esforzarirca. Chaimandami paipa causaitapash curca nishpa (Mateo 20:28). Dorcas shuti huarmigupash “imagupash illajcunata llaquishpami, aliguta rurashpa causajurca” (Hechos 9:36, 39). Mariapash Roma llactamanda  huauquipanicunataca ‘aligutapachami ayudan’ carca (Romanos 16:6). Shinaca mushujcunapash shuj huauquipanicunata ayudana importante cashcata intindichunga ¿imashinata ayudaita ushanchi?

¹⁴ Paicunataca tapui ushanchimi, ungushca o mayorlla huauquipaniguta visitangapami rijuni ¿nachu cumbangapaj munahuangui? nishpa. Taitamamacunapash ungushca o mayorlla huauquipaniguta visitangapaj rijushpaca huahuacunatapash usharijpica apashpa rinallami can. Ancianocunapash jovengunata o mushuj publicadorcunataca tapunallami can, mayorlla huauquipanigucunapa huasita imagutapash arreglashpa o paicunaman micunaguta apashpa ¿nachu ayudangapaj munapanguiman? nishpa. Huauquipanicuna imashina ayudarijta ricushpami jovengunapash, mushuj publicadorcunapash chaitallata yachajunga. Shuj ejemplota ricupashun. Carulla territorioman villachingapaj rishpaca shuj ancianoca siempremi chaipi huauquipanicuna imashina cajta ricungapaj rin carca. Chaita ricushpami chai ancianota cumbashpa purij joven huauquigupash shuj huauquipanicunata imashina ayudanapi pensari callarirca (Romanos 12:10).

15. ¿Imamandata ancianocunaca congregacionbi jaricuna ashtahuan mejorachun ayudana can?

¹⁵ Jehová Diosca jaricunamanmi congregaciongunapi Diospa Shimita yachachina responsabilidadta cushca. Chaimandami huauquicuna discursocunata cunajushpaca aliguta yachachinata yachajuna can. Chaipaca ancianocunami discursocunata ali cuchun yachachina can. Shuj ejemplota ricupashun. Shuj siervo ministerial shuj discursota cungapaj repasajujpica ancianoca aligutami uyana can. (Nehemías 8:8). ^[3] (cai tema tucuripi notata ricupangui).

16, 17. a) Timoteota aliguta yachachingapaca ¿imatata apóstol Pabloca rurarca? b) Shuj huauquicunapash congregacionda aliguta ñaupaman pushanata yachajuchunga ¿imashinata ancianocunaca apóstol Pablopa ejemplota cati ushan?

¹⁶ Congregacionda imashina ñaupaman pushanata shujcunaman yachachinaca minishtirishcapachami can (“¿Imatata nisha nin?” recuadrotapash ricupangui). Apóstol Pabloca aligutami Timoteomanga yachachirca. Yachachishca jipapash shujcunatapashmi yachachina cangui nishpami Timoteotaca cashna consejarca: ‘Canga Cristo Jesusmanda caramushca juyaihuan shinlli tucungui. Ñuca yachachishcataca, ashtacacunapa ñaupajpimi uyarcangui. Chaitaca shujcunaman yachachi ushanacunamanbash yachachipangui’ nishpa (2 Timoteo 2:1, 2). Pabloca anciano, apostolmi carca. Pai yachachijpimi Timoteoca villachijushpa imapi mejoranata, congregacionbi huauquipanicunata imashina ayudanatapash yachajurca (2 Timoteo 3:10-12).

¹⁷ Pabloca Timoteota aliguta yachachingapaj munashpami Timoteohuanga ashtaca tiempota yalirca (Hechos 16:1-5). Ancianocunapash ¿imashinata apóstol Pablopa ejemplota cati  ushan? Congregaciongunapi huauquipanicunata animangapaca huaquin siervo ministerialcunaca ñami ancianocunata cumbai ushan. Chaimandami huauquipanicunata animangapaj ancianocuna visitagrijushpaca chai siervo ministerialcunataca cumbahuai ninalla can. Shinami siervo ministerialcunapash ancianocuna imashina shujcunaman yachachijta ricushpa paicunapash pacienciata charinata, juyanata, congregacionbi huauquipanicunata ñaupaman pushangapaj Jehovapi confianata yachajunga (1 Pedro 5:2).

18. ¿Imamandata shujcunapash Jehovata ali sirvichun yachachina capanchi?

¹⁸ Cai tucurimui punllacunapica, ashtaca mushujcunami imashina villachinataca aliguta yachajuna can. Ashtahuanbash congregaciongunata ñaupaman pushachunmi huauquicuna minishtirin. Jehová Diosca paita tucuilla sirvijcuna ali yachajuchun munashpami ñucanchimanga mushujcunaman yachachina privilegiota cushca. Chaimandami Jesuspa, apóstol Pablopa ejemplota catishpa shujcunata yachachingapaj ashtacata esforzarina canchi. Tucuri punlla ñalla chayamuna cajpipash villachinapica ashtaca cosascunata ruranara caimandami mushujcunataca yachachishpa catina canchi.

19. ¿Imamandata mushujcunata yachachina ali cashcataca seguro capangui?

¹⁹ Mushujcunata yachachingapaca ashtaca tiempomi minishtirin, esforzaritapash ashtacatami esforzarina canchi. Shinapash paicunata aliguta yachachingapaj esforzarijpi Jehová Diospash Jesuspash ayudanataca seguromi cana canchi. Mushujcunaman yachachijpi paicunapash ‘Taita Diosta yariashpa, imatapash ninanda ruranajujta’ ricushpami ashtacata cushijushun (1 Timoteo 4:10). Shujcunata ayudashpapash ñucanchicunapashmi espiritualmente ñaupaman catingapaj, ali cualidadcunata charingapaj, Jehová Diosman quimiringapaj esforzarishpa catina canchi.