NOVIEMBRE de 1932 huatapica, millón yali gentecunami ciudad de México llactapica tiarca. Michahuan semaforocunata churajpimi, gentecunaca chai semaforocunamanda parlanajurca. Shinapash, shuj jatun tandanajui tiagrijujpimi, gentecunaca chaimanda ashtahuan parlanajurca. Chai llactapi ashtaca periodistacunaca, Sociedad Watch Tower nishcapa presidente, Joseph F. Rutherford huauquitami tren paradapica, fotocunata llujchingapaj listo shuyanajurca. Testigo de Jehovacunapashmi chaipi shuyanajurca. México llactapi quimsa punlla jatun tandanajuimanmi, Rutherford huauquica shamujurca.

Cunanbi ¡Despertad! revistatami, chai punllacunapica The Golden Age nin carca. Chai revistapica nijurcami: “Chai jatun tandanajuitaca nunca na cungaringachu. Chai tandanajuimandami México llactapi ashtaca gentecunaca Jehová Diosta rijsirca” nishpa. Shinapash 150 gentecunalla rijpipash ¿imamandata chai jatun tandanajuica alipacha carca?

Chai jatun tandanajui nara tiajpica, asha gentecunallami ali villaicunataca uyarca. 1919 huatamanda, huaquin jatun tandanajuicuna tiashca cajpipash, cati huatacunapica huaquin congregaciongunaca tucurircami. 1929 huatapica, México llactapimi shuj Betel huasi tiai callarirca. Alishnallami carca. Shinapash huaquin problemacunami ricurirca. Ishcai ejemplocunata ricupashun. Villachinajushpaca, ñana negociocunata rurangapaj aprovechanachu canguichi nishpami, Jehová Diospa organizacionga instrucciongunata curca. Chaimandami, shuj colportor huauquica organizacionmanda caruyashpa, Bibliamanda yachajungapaj shuj grupota callarichirca. Chai punllacunapica, precursorcunatami colportorcuna nin carca. Chai punllacunapillatami, Betel huasita ñaupaman pushajuj huauquitapash nalita rurashcamanda cambiana tucurca. Chaimandami, Mexicopi huauquipanicunaca animachun minishtinajurca.

México llactata huauqui Rutherford visitashpaca, ashtacatami huauquipanicunataca animarca. Ishcai alipacha discursocunatami jatun tandanajuipi curca. Cutin, radiopica picha discursocunatami curca. Primera vezmi tucuilla Mexicopi gentecunaca, ali villaicunata radiopi uyanajurca. Jatun tandanajui tiashca jipaca, Betelta ñaupaman pushajuj mushuj huauquimi, Mexicopi imashina villachinata aliguta organizarca. Chaimanda ñaupamanga, ashtaca huauquipanicunami Jehová Dios bendiciajujta cuenta japishpa, cushijushpa, shinlli tucushpa Jehová Diosta sirvishpa catirca.

Cati huatapica, ishcai jatun tandanajuicunami tiarca. Shujca Veracruz llactapi, cutin chaishujca ciudad de México nishca llactapimi tiarca. Huauquipanicuna ashtacata esforzarishpa villachishcamandaca, ashtaca bendiciongunatami chasquirca. 1931 huatapica, 82 publicadorcunallami tiarca. Cutin 10 huatacuna jipaca, 800 yali huauquipanicunami tiarca. 1941​picarin, casi huaranga  gentecunami ciudad de Mexicopi shuj jatun tandanajuiman rirca.

1943 huatapica ashtaca Testigocunami, “Nación Libre” nishca jatun tandanajuitami Mexicopica 12 llactacunapi charigrinchi nishpa, shuj carteltaca ñaupaman huarcuchishpa, cutin chaishuj carteltaca huashaman huarcuchishpa villachinajurca. * Testigocunaca 1936 huatamandami, cartelcunahuan villachin carca.

La Nación nishca revistaca nircami, Mexicopi cartelcunahuan villachishpaca, alitapachami Testigocunaca rurashca nishpa. Ashtahuangarin nircami: “Callari punllaca, shuj gentecunatapash apamunguichi nishpami animarca. Cati punllaca, ashtaca gentecuna rijpimi ñana pactajurca” nishpa. Cartelcunahuan villachina alipacha cashcata ricushpami, Católico Iglesiata ñaupaman pushajcunaca ashtacata culirashpa, Testigocunapa contra parlai callarirca. Shina cajpipash, ñucanchi huauquipanicunaca na manllashpami callecunapi villachishpa catirca. La Nación nishca revistaca nircapashmi, testigo de Jehovacuna cartelcunahuan villachinajujtaca, México llacta enteromi ricurca nishpa. Fotocunatapashmi periodicopica ricuchijurca. Foto ura ladopica nijurcami: “Callecunapica jundami villachinajun” nishpa.

Chai punllacunapica, ashtacata esforzarishpami, México llactapi jatun tandanajuicunamanga rin carca. Ashtacacunaca caru caru uchilla pueblocunapimi causarca. Chaicunamanga trengunapash na chayanllu carca, ñangunapash na tianllu carca. Shuj congregacionmanda huauquicunaca, caicamanga trengunapash na chayamunllu nishpami escribirca. Jatun tandanajuiman ringapaca, tauca punllacunata mulapi tiarishpa o chaquilla rishpami tren paradaman chayan carca. Chai jipami trenbi rishpa jatun tandanajui tiana pushtuman chayan carca.

Ashtaca huauquipanicunaca, chayangapallami culquita charin carca. Chaimandami ashtacacunaca huauquicunapa huasipi quedan carca. Huauquicunapash cushijushpami chasquin carca. Cutin shujcunaca, Tandanajui Huasicunapimi puñun carca. Shuj viajeca, casi 90 huauquicunami chai llactapa Betel huasipi puñurca. Paicunaca, 20 cartongunata mandashca jahuapimi puñurca. Anuario 1944 libropi nishca shinaca, chai huauquicunaca cartón jahuapi puñushcamandami cushijushpa nirca: “Cemento alpatapash yali amujlla, cunujllami cashca” nishpa.

Jatun tandanajuicunaman rinata ninanda alicachimandami, chai huauquipanicunaca imashinapash rin carca. Cunanbica, casi shuj millón Testigocunami México llactapica tian. * Ashtaca publicadorcunaca ñaupa huatacunapi huauquicunashnami jatun tandanajuicunataca ashtacata alicachin. 1949 huatapica, México llactapi Betelca nircami: “Ashtaca llaquicunata charishpapash, huauquipanicunaca Jehová Dios churashca organizacionba arreglocunata respetashpa catinmi. Cada jatun tandanajui tiashca jipami huauquipanicunaca, jatun tandanajuimanda parlanajun. Siempremi tapunajun, ‘¿ima horashi cutin shuj jatun tandanajuita charishun?’” nishpa. Cunangamanmi shina nishpa catin. (Yalishca Huatacunata Yaripashun, Centroamérica sucursal).