Mateopash, Lucaspash Jesuspa callari huatacunamandami parlan. Shinapash ¿imamandata shuj shuj can? Ricupashun.

Mateoca Josemandami parlan. María vijsayu cajta yachajpi, shuj ángel muscuipi ricurishpa Josehuan parlajta, imata ruranata Joseman villashcatami Mateoca parlan (Mat. 1:19-25). Shinallata, shuj muscuipi shuj ángel ricurishpa, Egipto llactamanda canba familiata apashpa ri nishcata, José cazushcatami Mateoca parlan. Ashtahuangarin, cutinbash shuj muscuipi shuj ángel ricurishpa, Israel llactaman tigrai nijpi tigrashpa, Nazaret llactapi José causai callarishcatami Mateoca parlan (Mat. 2:13, 14, 19-23).

Cutin Lucasca, Mariamandami ashtahuan parlan. Ángel Gabriel Mariaman ricurishcata, Elizabetta María visitangapaj rishcata, Jehová Diosta Elizabet alabashcatami parlan (Luc. 1:26-56). Shinallata, Jesús llaqui apanata, Simeón shuti runagu Mariaman villashcatami Lucasca parlan. Jesús 12 huatacunata charishpa, Taita Diospa huasiman rijpi, María ima nishcatapashmi parlan. Ashtahuangarin, chai tucuilla cosascuna Mariapa shunguman chayashcatami parlan (Luc. 2:19, 34, 35, 48, 51). Shinaca, Mateoca José imata pensashcata, imata rurashcatami parlan. Cutin Lucasca, María imata pensashcata, imata rurashcatami parlan.

Josepa, Mariapa punda familiacunamanda parlashpaca, Mateoca José maijan familiamanda cashcatami parlan. Shinami Mateoca ricuchirca, Jesusca Josepa viñachi huahua cashcamanda, rey David mandashpa tiajuna pushtuta chasquingapaj derechota charishcata. Shinapash ¿imamandata Jesusca chai derechota charirca? Joseca rey Davidpa churi Salomonba familiamandami carca (Mat. 1:6, 16). Cutin Lucasca, María maijan familiamanda shamushcatami parlan. Shinami Lucasca ricuchirca, Jesusca rey Davidpa aicha familiapacha cashcata (Rom. 1:3). Shinapash ¿imamandata Davidpa aicha familiapacha carca? Rey Davidca Natán shuti churitapashmi charirca. Mariaca Natanba familiamandami carca. Chaimandami Jesusca, Davidpa aicha familiapacha carca (Luc. 3:31). Mariaca Helí shuti runagupa ushimi carca. Shinaca ¿imamandata Lucasca nirca, Josemi Helí shuti runagupa churi carca nishpa? Chai punllacunapica, cusacunapa shutitallami escribin carca. Joseca Helí runagupa mashami carca. Chaimandami Lucasca nirca, Josemi Helí runagupa churi can nishpa (Luc. 3:23).

Mateopa, Lucaspa escribishcacunaca, shamuna nishca Mesías, Jesús cashcatami ricuchijun. Rey Davidpa familiamanda Jesús cajtaca, casi tucui gentecunami yacharca. Chaimandami, fariseocunapash, saduceocunapash chaitaca na negai usharca. Cunan punllacunacamanmi, Mateopa, Lucaspa escribishcacunaca, shinlli feta charichun, Jehová Diospa nishcacuna pactarinata crichun ayuda.