1, 2. Pablopash, Silaspash ¿ima llaquitata Filipos llactapica charirca? (Callari dibujota ricupangui).

APÓSTOL Pablopash, Silaspash casi chaupi tuta tucujujtami, Filipos llacta carcelpi prezo tianajurca. Chaquicunapash tabla caspicunapi canichishca, macai tucushcamanda huashacunapash nana nanami carca (Hech. 16:23, 24). Shinapash ¿imamandata chashna llaquipi carca? Chai punllaca, ali purinajujtami ashtaca gentecunaca, cungashcapi japishpa plazapi tianajuj jatun mandajcunapaman aparca. Paicunapa churajushca ropacunatapash liquishpa, ushashcatami astishcarca (Hech. 16:16-22). Shinapash paicunataca na shina tratanachu carca. Pabloca romanomi carca. *

² Yana yana ucupi Pablo prezo tiajushpaca, chai punlla imalla pasashcatami pensarijushcanga. Shinallata Filipos llactapi causanajuj gentecunapipashmi pensarijushcanga. ¿Imamandashi chai gentecunapi pensarijushcanga? Pablo visitashca shuj llactacunapica, judiocuna Jehová Diosta adorana huasica tianmi  carca. Shinapash Filipos llactapica na tiarcachu. Chaimandami chai llactapi judiocunaca, chai llacta canllaman tiashca yacu manñaman rishpa, Jehová Diosta adorangapaj tandanajun carca (Hech. 16:13, 14). ¿Imamandata chai llactapica, Jehová Diosta adorana huasica na tiarca? Jehová Diosta adorana huasi tiachunga, 10 judío jaricunami minishtirirca. Shinaca, chai llactapi 10 judío jaricunallapash na tiajpimi, Jehovata adorana huasica tal vez na tiashcanga. Filipos llactapi causanajuj gentecunaca, romanocuna cana papelcunatapash chari ushashcamandami jariyashcacuna carca (Hech. 16:21). Chaimandami paicunaca apóstol Pablopash, Silaspash romanocuna cashcataca na crishcanga. Chai gentecuna imata pensashca cajpipash, Pablota, Silasta prezo churashpaca, nalitami ruranajurca.

3. a) Prezo churajpica ¿imatashi Pabloca pensashcanga? b) Shinapash ¿imatata Pabloca rurarca?

³ Pabloca Filipos llactaman imashina chayashcatapash pensarijushcangami. Shinapash ¿imashinata chai llactamanga chayarca? Huaquin quillacuna ñaupamanga, Asi Menor nishca llactapa Egeo nishca yacu chimba ladomanmi carca. Chaipi cajpimi, Taita Diospa espíritu santoca, shuj ladocunaman ama richun jarcarca (Hech. 16:6, 7). Shinaca ¿maiman richunda jarcajurca? Pablo, Troas llactapi cajpimi shuj muscuipishna ricurishpa shuj runaguca nirca: “Macedonia llactapi ñucanchiman yachachingapaj shamupai” nishpa. Chaimi Pabloca, Taita Dios imata rurachun munashcata cuenta japishpa, ucha Macedonia llactaman rirca (Hechos 16:8-10, liingui). Shinapash, chayashca jipallami Pablotaca prezo churarca. ¿Imamandata Jehová Diosca Pablota prezo churachun saquirca? ¿Mashna punllacunatata Pabloca prezo carca? Imamanda shina pasajujta na ali intindi ushashpapash, apóstol Pabloca shinlli fetami charishpa catirca. Cushijushca canatapash na saquircachu. Bibliapi nishca shinaca, Pablopash, Silaspash prezo cashpaca Jehová Diosta mañarca, Jehová Diosmanbash candanajurcami (Hech. 16:25). Imashinami ricupanchi, paicunaca ‘Taita Dios carashca casilla ali causaitami’ chasquirca.

4. ¿Imamandata huaquinbica apóstol Pabloshna ñucanchicunapash sintiripanchi?

⁴ Huaquinbica ¿nachu apóstol Pabloshna sintirishcanchi? Jehová Diosta mañashpachari shuj decisionda agllanchi. Chai jipaca, Jehová Diospa espíritu santo ayudajunmi yashpachari ñaupaman catinchi. Shinapash ñucanchi munaica na pactarinllu. Shuj llaquicunara ricurin, o ñucanchi causaipimi jatun cambiocunata rurana tucun (Ecl. 9:12). Tal vez pensachinpashchari, ¿imamandata Jehová Diosca chashna pasachun saquirca? nishpa. Shina cajpica ¿imashinata Jehová Diospi confiashpa llaquicunataca aguantashpa catita ushapanchi? Chai tapuita yachangapaca cutin apóstol Pablota, Silasta yaripashun.

5. ¿Imashinata apóstol Pablopa causaica ñapash cambiarca?

⁵ Pablo, Silas candanajujpillatami ñapash shuj shuj cosascuna pasai callarirca. Pundapica shuj jatun terremotomi tiarca. Chai jipaca, cárcel pungucuna pascarijpimi, prezocunaca llujshi callarirca. Chaita ricushpami prezocunata cuidajuj runaguca huañuchiringapaj munarca. Shinapash Pablo jarcajpimi, chai runaguca na huañuchirirca. Chaimi prezocunata cuidajuj runagupash, paipa familiapash bautizarirca. Pacarishcandimi, chai llactapi mandajcunaca Pablotapash, Silastapash carcelmanda llujchichun, richi nichun soldadocunata cacharca. Pablopash, Silaspash romanocuna cajta yachaj chayashpacarin, nalita rurashcata cuenta japishpami Filipos llactapi mandajcunaca, chai llactamanda richun paicunallata  ñanbi churangapaj rirca. Shinapash nara rishpallatami, Pablopash Silaspash chairalla bautizarishca Lidia shuti panigumanda dispidiringapami munanchi nirca. Shinami, Filipos llactapi shuj huauquipanicunatapash animarca (Hech. 16:26-40). Ñapashmi ashtaca cosascuna cambiarca.

6. ¿Imacunatata cai temapica yachajupashun?

⁶ Shinaca ¿imatata yachajupanchi? Jehová Diosca, ñucanchicuna na yuyashca cosascunatapash ruranllami. Chaimandami, llaquicunapi cashpaca, na yapata preocuparijuna capanchi. Apóstol Pablopash, Jehová Dios imata rurashcataca nunca na cungarcachu. ¿Imamandata shina nipanchi? Filipos llactapi llaqui apashca jipaca, casilla ali causaitaca Jehová Diosmi caran nishpami, Filipos llactamanda huauquipanicunamanga escribirca. Cai temapica, Filipenses 4:6, 7​pi * Pablo imata escribishcatami pundapica yachajupashun (chai textocunata liingui). Chai jipaca, ñaupa punllacunapi sirvijcunata ayudangapaj Jehová Dios imata rurashcatami yachajupashun. Tucuripica, Jehová Diospi confiashpa aguantachun, ‘Taita Dios carashca casilla ali causai’ ñucanchicunata imashina ayudajtami yachajupashun.

7. a) ¿Imatata apóstol Pabloca Filipos llactamanda huauquipanicunamanga yachachingapaj munarca? b) ¿Imatata ñucanchicunapash yachajupanchi?

⁷ Pablopa cartata liishpaca ¿imatashi Filipos llactamanda huauquipanicunaca pensashcanga? Paicunaca Pablopash, Silaspash ima pasashcatami yarishcanga. Shinallata, paicuna na yuyashca cosascunata rurashpa Jehová Dios ayudashcatapashmi yarishcanga. Shinaca ¿imatata Pabloca chai huauquipanicunamanga yachachingapaj munarca? Na yapata preocuparinata, shinallata Jehová Diosta mañajpica, paipa casilla ali causaita caranatami, Pabloca yachachingapaj munarca. Filipenses 4:7​pica nijunmi, Taita Dios carashca casilla ali causaica “pipash na yachai ushanallami” can nishpa. ¿Imamandata Pabloca shina nirca? Pabloca, Taita Dios carashca casilla ali causaica alipachami can, chaitaca yuyaitallapash na yuyai ushanchichu nishpami shina nirca. Shinaca ¿imatata yachajupanchi? Llaquicunapi cashpa imata ruranata na atinanajujpipash, Jehová Diosca imata ruranataca alimi yachan. Paica ñucanchicuna na yuyashca cosascunatapash ruranllami (2 Pedro 2:9, liingui) *.

8, 9. a) Filipos llactapi, Pablo yangamanda llaquichi tucujpipash ¿imata pasarca? b) ¿Imamandata Filipos llactamanda huauquipanicunaca Pablopa cartataca alicachishpa liirca?

⁸ Filipos llactamanda huauquipanicunaca, último 10 huatacunapi imalla pasashcata yarishpami ninanda animarishcanga. Pablo escribishca shimicunaca tucuimi cierto carca. Jehová Diosca apóstol Pablo yangamanda llaquichi tucuchunmi saquirca. Shinapash chai llaquicuna tiashcamandami jatun mandajcunaca  ali villaicunata ñana jarcai usharca (Filip. 1:7, NM). Shinami, Filipos llactamanda juezcunaca chai llactapi mushuj huauquipanicunataca na ñapash llaquichi usharca. Ñucapash romanomi cani nishpa Pablo villajpimi, paita cumbajuj Lucasca Filipos llactapi quedai ushashcanga. Shinami Pablopash, Silaspash rijpica, Filipos llactapi mushuj huauquipanicunata Lucasca ayudai usharca.

⁹ Pabloca ashtaca llaquicunata charishpa, paipa huasipillata prezo cashpapash ‘Taita Dios carashca casilla ali causaita’ charishcatami ricuchirca. Chaita ali yachashpami, Filipos llactamanda huauquipanicunaca, Pablo prezo cashpa escribishca cartataca, alicachishpa liirca (Filip. 1:12-14; 4:7, 11, 22).

10. Yapata preocuparinajushpaca ¿imatata rurana capanchi?

¹⁰ Ama preocuparingapaj, shinallata ‘Taita Dios carashca casilla ali causaita’ charingapaca ¿imatata rurana capanchi? Apóstol Pablo nishca shinaca, Jehová Diostami mañana capanchi. Shinaca, imamandapash yapata preocuparijushpaca Jehová Diosta mañapashunchi (1 Pedro 5:6, 7, liingui). Mañajushpaca, Jehová Dios ñucanchimanda preocuparijujta tucui shunguhuan confiashpami mañana capanchi. Bendiciashcamandapash agradicinami capanchi. Jehová Diosca ‘ñucanchi imata mañajujtapash yalita rurangapami ushaita charin’. Chaitaca yariami cana capanchi. Shinami, Jehová Diospi ashtahuan confiashun (Efes. 3:20).

11. ¿Imatata Jehová Diosmandaca siempre yarina capanchi?

¹¹ Huaquinbica, ñucanchicuna na yuyashca cosasta rurashpami, Jehová Diosca apóstol Pablotashna, Silastashna ayudanga. Jatun cosascunata na rurashpapash, ñucanchi imata minishtishcapimi Jehová Diosca siempre ayudan (1 Cor. 10:13). Shinapash, Jehová Diosmi ayudanga nishpaca na maqui cruzashca saquirinachu canchi. Chaipa randica, imatami Jehová Diosta mañarcanchi, chaita pactachingapami ñucanchicunapash esforzarina capanchi (Rom. 12:11). Chaimi Jehová Diosca, ciertopacha mañajushcata ricushpa, ñucanchicunataca bendicianga. Shinapash, siempremi yarina capanchi, Jehová Diosca ñucanchicuna na yuyashca cosascunatapash rurashpami ayudanlla. Cunanga, paita sirvijcunata Jehová Dios imashina ayudashcata ricushpa, Jehová Diospi confianata yachajupashun.

12. a) Rey Senaquerib atacangapaj munajujpica ¿imatata rey Ezequiasca rurarca? b) Jehová Dios imashina ayudashcamandaca ¿imatata yachajupanchi?

¹² Gentecuna na yuyashca cosascunata rurashpa, Jehová Dios ayudashcatami Bibliapica cutin cutin parlan. Rey Ezequiaspa punllacunapi ima pasashcata ricupashun. Chai punllacunapica, Asiria llactamanda rey Senaqueribmi, Judá llactata atacashpa tauca llactacunata tucuchirca. Shinapash Jerusalén llactataca nara tucuchircachu (2 Rey. 18:1-3, 13). Chaimandami rey Senaqueribca Jerusalén llactatapash atacangapaj munajurca. Shina pasajpica ¿imatata rey Ezequiasca rurarca? Paica Jehová Diostami mañarca. Profeta Isaiastapash imatata rurana capani nishpami consejota mañarca (2 Rey. 19:5, 15-20). Shinallata, rey Senaqueribhuan na contra cangapaj munashcata ricuchishpami, pai imata mañajushcatapash curca (2 Rey. 18:14, 15). Ashtahuangarin, asiriocuna atacajpi Jerusalén llacta ama yapata llaquichi tucuchunmi huaquin cosascunata rurarca (2 Crón. 32:2-4). Shinapash ¿imata pasarca?  Jehová Diosca shujlla angelta cachashpami, shuj tutapilla 185 mil asirio soldadocunata huañuchirca. Chaita Jehová Dios ruranataca, rey Ezequiasca yuyaitallapash na yuyashcarcachu (Is. 37:36).

13. a) ¿Imatata Josemandaca yachajupanchi? b) ¿Imashinata Jehová Diosca Sarata ayudarca?

¹³ Cunanga Jacobpa churi José joven cajpi ima pasashcata yachajupashun. Egipto llactapi prezo cashpaca, Joseca na yuyashcangachu, tiempohuanga Egipto llactapi cati mandajmi casha nishpa. Shinallata, paipa familia yarjaihuan ama huañuchun, Jehová Dios paita agllanataca, Joseca na yuyashcangachu (Gén. 40:15; 41:39-43; 50:20). Imashinami ricupanchi, José na yuyashca cosascunatami Jehová Diosca rurarca. Cunanga Josepa abuelopa mamapi pensaripashun. Paica Sara shutimi carca. Ña mayorllagumi carca. ¿Ña mayorllagu cajpipash, paipa propio churiguta charichun Jehová Dios paita ayudanataca shuyajurcachu? Isaac shuti churiguta charichun bendiciashpami, Jehová Diosca Sara na yuyashca cosascunatapash rurashpa ayudarca (Gén. 21:1-3, 6, 7).

14. ¿Imatata seguro caita ushapanchi?

¹⁴ Paraíso nara chayamujpillata, shuj milagrota rurashpa, ñucanchi tucui llaquicunata Jehová Dios tucuchinataca, na shuyanachu capanchi. Shinallata, ñucanchi causaipi imapash  jatun cosascuna pasachunga, na shuyajunachu capanchi. Shinapash, ñaupa punllacunapi paita ali sirvijcunata Jehová Dios ayudashcataca yariami cana capanchi. Jehová Diosca cunan punllacunapipash na cambiashcachu (Isaías 43:10-13, liingui). Jehová Dios na cambiashcata yachashpami tucui shunguhuan paipi confianchi. Paipa munaita pactachingapaj, ñucanchicuna na yuyashca cosascunata ruranataca seguromi capanchi (2 Cor. 4:7-9). Shinaca ¿imatata rey Ezequiasmanda, Josemanda, Saramandapash yachajupanchi? Ñucanchicuna paita ali sirvinajujpica, jatun llaquicuna japijpipash, Jehová Dios ayudanatami yachajupanchi.

15. a) Jatun llaquicunapi cashpa, ‘Taita Dios carashca casilla ali causaita’ charingapaca ¿imatata rurana capanchi? b) ¿Imamandata Jehová Diospa amigo caita ushapanchi?

¹⁵ Jatun llaquicunapi cashpa, ‘Taita Dios carashca casilla ali causaita’ charingapaca ¿imatata rurana capanchi? Chaipaca Jehová Diospa ali amigo cashpa catingapami esforzarina capanchi. Jesús paipa causaita cushcamandallami Jehová Diospa amigo caita ushanchi. Jehová Dios paipa Churipa causaita cushpa ñucanchita salvanataca, yuyaitallapash na yuyashcashunllu. Jesús paipa causaita cushcamandami, Jehová Diosca ñucanchi juchacunata perdonan. Ñucanchicunapash shuj ali concienciata chari ushanchi, Jehová Diospa amigo caitapash ushanchi (Juan 14:6; Sant. 4:8; 1 Ped. 3:21).

16. ‘Taita Dios carashca casilla ali causaita’ charishpaca ¿imashinata sintiripashun?

¹⁶ ‘Pipash na yachai ushanalla, Taita Dios carashca casilla ali causaita’ charishpaca ¿imashinata sintirishun? Bibliapica ninmi: “Taita Dios carashca casilla ali causaimi, cangunapa shungutapash, yuyaicunatapash Cristo Jesusmanda huacaichinga” nishpa (Filip. 4:7, NM). Bibliata escribishca shimipica, soldadocuna llactata cuidanajujta intindichingapami “huacaichina” nin carca. Soldadocuna cuidanajujta yachashpami, Filipos llactapi gentecunaca tranquilo puñun carca. Ñucanchicunapash, ‘Taita Dios carashca casilla ali causaita’ charishpami, ñucanchi yuyaicunapipash, shungupipash tranquilo sintirinchi. Jehová Dios cuidajujta, ñucanchicuna ali causachun munashcataca seguromi capanchi (1 Ped. 5:10). Chaita yachanami, ama yapata preocuparichun, ama desanimarichun ayudan.

17. Shamuj punllacunapi ima pasanata ama manllangapaca ¿imatata yarina capanchi?

¹⁷ Ñallami ima punllapash na tiashca, jipamanbash na tiana ‘ninan manllanayai llaqui tianga’ (Mat. 24:21, 22). Chai punllacunapi, cada uno ima pasanataca na yachapanchichu. Shinapash, na yapata preocuparinachu capanchi. Jehová Dios imatalla ruranata na yachashpapash, Jehová Dios imashina cajtaca alimi yachapanchi. Ñaupa punllacunapi paita sirvijcunata Jehová Dios ayudashcata yarishpami, Jehová Diosca ima pasajpipash, siempre paipa munaita pactachijta yachajupashcanchi. Huaquinbicarin, gentecuna na yuyashca cosascunata rurashpami, Jehová Diosca paipa munaita pactachin. Jehová Dios imatapash rurashpa ñucanchita ayudajpimi, ‘pipash na yachai ushanalla Taita Dios carashca casilla ali causaita’ charishcata cuenta japi ushapanchi.