1, 2. a) ¿Imamandata juyaitapash, fetapash charina minishtirin? b) ¿Ima tapuicunatata yachajupashun?

ÑUCANCHI Taita Jehová Diosca paita ali sirvijcunata juyashpami bendiciongunata carashami nishca. Jehová ‘Diosra ñucanchita juyajujpimi ñucanchipash paita juyanchi’ (1 Juan 4:​19). Ñucanchicunaca Jehová Diosta ashtahuan ashtahuan juyaimandami ñucanchi feta ashtahuan shinlliyachishpa, paita juyajcunata Jehová Dios bendicianataca ashtahuan seguro cashun (Hebreos 11:​6, liingui).

² Jehová Diosca bendiciongunata caraj Taita Diosmi can. Paita mascashpa causajcunaman bendiciongunata Jehová Dios caranata crishpallami shinlli feta chari ushanchi. ¿Imamandata shina ninchi? Bibliapica ninmi: “Imata japigrinata crishcatapash, chaitaca japigrishapacha yashpami shuyanajunchi” nishpa (Hebreos 11:1). Crijcuna o feta charijcunaca Jehová Dios paita ali sirvijcunata bendiciajtaca tucui shunguhuanmi confian. Jehová ñucanchita bendicianata crinaca ¿imashinata ñucanchita ayudan? Jehová Diosca ¿imashinata ñaupa punllacunapipash cunan punllacunapipash paita sirvijcunata bendiciashca?

3. Malaquías 3:​10​pica ¿imatata Jehová Diosca nin?

³ Jehová Diosca paita ali sirvijcunamanga bendiciongunata carasha nishcami. Paita ali sirvingapaj esforzarijpi pai bendicianata tucui shunguhuan confiachunmi Jehová Diosca munan. Chaimandami Jehová Diosca cashna nishpa invitan: ‘Cunanda ricuilla. Shina rurajpica ñucapashmi jahua pacha ventanacunata pascashpa ashtacatapacha bendiciamusha’ nishpa (Malaquías 3:​10). Jehová Diospa munaita rurashpa pai imashina bendiciajta ñucanchillata ricushpami paipa invitacionda agradicishcata ricuchinchi.

4. ¿Imamandata Mateo 6:33​pi Jesuspa shimicuna cierto cashcata crina capanchi?

⁴ Jesusca paipa catijcunataca nircami, Diospa Reinotara pundapi mascajpica Jehová Diosca cangunata ayudangami nishpa (Mateo 6:​33, liingui). Jesusca Jehová Dios tucui imata nishcata pactachijta ali yachashpami shina nirca (Isaías 55:11). Ñucanchicunapash Jehová Diospi shinlli feta charishpaca cai shimicuna pactarinataca tucui shunguhuanmi crishun: “Candaca na jichushachu, na saquishachu” (Hebreos 13:5). Chai shimicunami Mateo 6:33​pi Jesuspa shimicuna cierto cashcata intindichun ayudanga.

5. ¿Imamandata apóstol Pedroman nishca shimicunaca ñucanchicunatapash animan?

⁵ Shuj punllaca apóstol Pedroca Jesusta nircami: “Ñucanchica imaguta charishcatapash tucuit­a saquishpami, candaca catinajunchi. Shina catishcamandaca, ¿imagutashi charishun?” nishpa (Mateo 19:27). Pedro shina nijpica Jesusca na culirarcachu. Chaipa randica, Jehovata sirvingapaj esforzarishcamanda Jehová Dios  bendicianatami Jesusca paipa catijcunaman intindichirca. Shamuj punllacunapimi apostolcunapash, Jehovata shuj sirvijcunapash Jesushuan cai Alpataca jahua pachamanda mandanga. Shinapash cunan punllacunapillata Jehová bendicianata parlashpami Jesusca nirca: ‘Maijan cashpapash ñuca shutipi villangapaj paipa huasita, huauquicunata, panicunata, taitata, mamata, huarmita, huahuacunata, paipa alpacunata saquishcamandaca patsaj viajetapash yalitami chasquinga. Shinallata causaita causagrinatapashmi japinga’ nishpa (Mateo 19:29). Ñucanchi congregacionbi huauquipanicunaca ñucanchi taita, mama, huauqui, pani o huahuacunashnami can. Jehová Diospa Reinota pundapi churaimanda ñucanchi munaicunata huashaman saquina shinlli cajpipash, Jehová Diospa bendiciongunaca ashtahuan jatunmi can.

6. Jehová Dios bendicianata yachanaca ¿imashinata ñucanchitaca ayudan?

⁶ Ñucanchicunaca cunan punllacunapillatami ashtaca bendiciongunata chasquishcanchi. Shamuj punllacunapicarin ashtahuan jatun bendiciongunata chasquinatami cushijushpa shuyanajunchi (1 Timoteo 4:8). Jehová Diosca paipa ali sirvijcunamanga bendiciongunata carasha nishcami. Chaita yachanami ima llaquicuna ricurijpipash llaquicunata aguantachun ayudan. Jehová Dios ‘paita mascashpa causajcunaman aliguta caranata crishpami’ paita tucui shunguhuan sirvishpa catinchi (Hebreos 11:6).

7. ¿Imamandata ninchi, esperanzata charinaca barcota jirru charijunshnami can nishpa?

⁷ Paipa catijcunaman yachachijushpaca Jesusca nircami: “Ninandapacha cushijunguichilla. Canguna juyailla japinaca, jahua pachapimi. Dios ima nishcata villajcunatapash, chashnallatami catiriashpa llaquichinajurca” nishpa (Mateo 5:​12). Jehová Diosta huaquin sirvijcunaca jahua pachapi causana bendiciondami chasquinga. Cutin shujcunaca paraíso Alpagupi para siempre causana bendiciondami chasquinga. Caita yachashpami ‘ninandapacha cushijunchi’ (Mateo 5:5; Lucas 18:30). Ñucanchitaca ‘cashna shuyana’ o chashna esperanzata charinami “barcota jirru charijunshna ñucanchi almataca, shinllitapacha charijun” (Hebreos 6:​17-​20). Imashinami shinlli huaira shamujpica barco ama huashajuchun jirruca shinllitapacha charijun, shinallatami esperanzata charinaca llaquicunata aguantashpa Jehovata sirvishpa catichun ayudan.

8. ¿Imashinata Jehová Dios bendicianapi esperanzata charinaca ama yapata llaquirishpa musparijuchun ayudan?

⁸ Jehová Dios bendicianapi esperanzata charinami ama ninanda llaquirishpa musparijuchun ayudan. Imashinami bálsamo nishca aceiteca ñucanchi cuerpopi ali sintirichun ayudan, shinallatami Diospa nishcacuna pactarinapi esperanzata charinaca ñucanchi shungupi tranquilo, ali sintirichun ayudan. Ñucanchi llaquicunata Jehovapa maquipi saquijpi pai ayudanata yachanaca ali sintirichunmi ñucanchitaca ayudan (Salmo 55:22). ‘Ñucanchi imata mañajujtapash ashtahuan yalita rurangapaj’ Jehová Dios ‘ushaita charishcataca’ tucui shunguhuanmi confiaita ushanchi (Efesios 3:​20). Jehová Diosca ushaita charishpapash ñucanchita ayudangapaca ‘ashtahuan yalita rurangapami’ tucui ushaita charin.

9. ¿Imamandata Jehová bendicianataca tucui shunguhuan crina capanchi?

 ⁹ Jehová Dios bendiciashpa carachunga Jehová Diospimi tucui shunguhuan crina canchi, paipa mandashcacunatapash cazunami canchi. Moisesca israelitacunataca nircami: ‘Taita Diosllata carashpami canguna japishpa causana llactapi ninanda bendicianga. Canda Mandaj Taita Dios mandashcata uyashpa, aliguta cazushpami ñuca cunan canman tucui mandashcacunataca pactachina cangui. Canda Mandaj Taita Dios bendiciangami’ yashpami shina ruran cangui nirca (Deuteronomio 15:​4-6). Shinaca ¿paita sirvishpa catijpi Jehová Dios bendicianataca tucui shunguhuanllu cripangui? Jehová Dios bendicianataca tucui shunguhuanmi crina capangui.

10, 11. ¿Imashinata Jehová Diosca Joseta bendiciarca?

¹⁰ Bibliaca ñucanchicuna ali causachun escribishcami can. Bibliapica Jehová Dios ñaupa punllacunapi paipa sirvijcunata imashina bendiciashcatami ricui ushanchi (Romanos 15:4). Josepa ali ejemplota ricupashun. Josetaca esclavo shina causachunmi paipa huauquicunallata jaturca. Jipamanga, paipa amopa huarmi yangata juchachijpimi Josetaca Egipto llactapi prezo cachun churarca. Prezo cajpica ¿Jehová Diosca Joseta cungarcachu? Na. Bibliapica ninmi: “Mandaj Diosca, Josehuan cashpami, paitaca ashtahuan llaquijurca” nishpa. Ashtahuanbash ninmi: “Mandaj Diosmi, Josehuan carca. Chaimandami imata pai rurajpipash, Mandaj Diosca tucuipi’ ayudarca nishpa (Génesis 39:​21-​23). Joseca llaquicunahuan cashpapash Jehová Dios paita ayudanataca tucui shunguhuan confiashpami shuyajurca.

¹¹ Huaquin huatacuna jipaca, faraonllata carcelmanda llujchijpimi Joseca yanga esclavolla cashca cashpapash Egipto llactapa cati mandaj tucurca (Génesis 41:​1, 37-​43). Joseca ishcai churicunatami charirca. Paipa punda churitaca Manasés shutitami churarca. Joseca nircami: ‘Taita Diosmi ñucataca tucui llaquita cungachihuashca. Shinallata ñuca taitapa huasi ucupurutapashmi tucuillata cungachihuashca’ nishpa. “Shina nishpami, paipaj punda churitaca, Manases shutita shutichirca”. Cutin paipa cati churitaca Efraín shutitami churarca. Joseca nircami: “Taita Diosmi, llaquilla causajuj llactapi ñuca churicunata mirachinata rurahuashca” nishpa. “Shina nishpami, paipaj cati churitaca Efraín shutita shutichirca” (Génesis 41:​51, 52). Jehová Diosca José paipa tucui causaipi sirvishcamandami bendiciarca. Shinallata, paipa familiatapash, Egipto llactamanda gentecunatapashmi Joseca chai llactapi jatun yarjai tiajpica salvarca. Joseca Jehová Dios bendiciashcataca tucui shunguhuanmi crirca (Génesis 45:​5-9).

12. ¿Imashinata Jesusca ashtaca llaquicuna ricurijpipash Jehová Diosta tucuipi cazurca?

¹² Jesuspash paipa causaipi ashtaca llaquicuna ricurijpipash tucuipimi Jehová Diosta cazurca. Chaimandami Jehová Diosca Jesusta bendiciarca. ¿Imamandata Jesusca tucui causaipi Jehová Diosta cazurca? Bibliapica ninmi: Jesusca “cushijushpa causagrinata yachashpami” jatun racu caspipi llaquinayaita huarcui tucuna cashpapash, “nalicachishpa rimai’ tucuna cashpapash na pinganayachishpa aguantarca nishpa (Hebreos 12:2). Jesusca Jehová Diospa shuti limpio cachun ninanda esforzarishpami ninanda cushijurca. Chaimandami Jesusca Jehová  Diospa ñaupajpi ali ricurirca, ashtaca bendiciongunatapash chasquirca. Bibliapica ninmi, Jesusca “Taita Dios mandashpa tiajuj ali ladomanmi tiajun” nishpa. Shinallata Bibliapica Jesusmanda parlashpaca ninmi, Jehová Diosca ‘tucuita yali ashtahuan alicachishpami paitaca jatunbi churarca. Shinallata tucuicunapa shuticunata yali ashtahuan ali shutigutami cararca’ nishpa (Filipenses 2:9).

13, 14. Paita sirvingapaj ñucanchicuna esforzarinajujta ricushpaca ¿imashinata Jehová Diosca sintirin?

¹³ Jehová Diosca paita sirvingapaj ñucanchicuna esforzarijujta ricushpaca ninandami alicachin. Ñucanchicuna imatapash na rurai ushanichu yashpa llaquirijpi o nali sintirijpica Jehová Diosca ñucanchicunataca alimi intindin. Shinallata, trabajota na charimanda o ñucanchi familiata na mantini ushaimanda ninanda llaquirishpa musparijujta ricushpaca Jehová Diosca ashtacatami ñucanchimanda preocuparin. Ashtahuangarin, Jehová Diosca alimi intindin ñucanchicuna ungushca caimanda o yapa llaquilla caimanda ñaupa huatacunapi cuenda ñana paita sirvi ushashcata. Problemacunata charishpapash ñucanchicuna paita sirvingapaj ninanda esforzarijushcata ricushpaca, Jehová Diosca ninanda cushijujtaca seguromi cana capanchi (Hebreos 6:​10, 11, liingui).

¹⁴ Shinallata, ñucanchi oraciongunata Jehová Dios uyajtaca seguromi canchi (Salmo 65:2). “Paillami, ñucanchita ninanda llaquij, tucuipi cushichij Taita Dios” can. Paimanda ama caruyachunmi Jehová Diosca ñucanchi imata minishtijujta ricushpa caranga. Huaquinbica ñucanchi huauquipanicunahuanmi ayudan (2 Corintios 1:3). Jehová Diosca ñucanchicunapash shujcunata llaquishpa tratajta ricushpami cushijun. Bibliapica ninmi: “Imagutapash na charij runaguman imagutapash caraj runaca, Mandaj Diosman mañachishcashnami charin. Chashna alita rurashcamandaca, paimambash tigrachingami” nishpa (Proverbios 19:17; Mateo 6:​3, 4). Ñucanchicuna shuj huauquipanicunata juyaihuan ayudajpica, Jehová Diosca paiman imatapash mañachishcatashnami ricun. Chaimandami Jehová Diosca, ashtacatami bendiciasha nin.

15. ¿Ima bendicionda charinatata cushijushpa shuyajupangui? (Callari dibujota ricupangui).

¹⁵ Ungido huauquipanicunaca ‘[alita ruraj] coronata’ chasquina bendiciondami shuyanajun. Chai coronataca Jesusmi paicunamanga cunga (2 Timoteo 4:​7, 8). Cutin, ‘shuj llamagucuna’ nishca ashtaca ashtaca gentecunaca, paraíso Alpagupi para siempre causana esperanzatami shuyanajun. Chaipimi paicunaca ‘casilla ali causaihuan ninanda cushijunajunga’ (Juan 10:16; Salmo 37:11).

16. 1 Juan 3:​19, 20​pi shimicunaca ¿imashinata ñucanchitaca ayudan?

¹⁶ Huaquinbica Jehová Diosta ñana pundashna sirvi ushajunichu, ñuca ruraicunataca Jehová Diosca na cushijushpa ricujungachu yashpami pensarinchi. Huaquinbicarin pensanchimi, Jehová Diospa bendiciondaca na chasquinachu cani nishpa. Shina pensajushpaca ‘Taita Dios ñucanchi shunguta yali yachashcata, imatapash tucuita yachashcataca’ nunca na cunganachu canchi (1 Juan 3:​19, 20, liingui). Ashagutallami rurajuni yashpapash Jehová Diospi tucui shunguhuan crimanda, paita juyaimanda sirvishpaca Jehová Dios bendicianataca seguromi cana canchi (Marcos 12:​41-​44).

17. ¿Imashinata Jehová Diosca cunanbillata paita ali sirvijcunata bendiciajun?

¹⁷ Cai tucuri nali punllacunapi Diablo mandajujpipash Jehová Diosca paita sirvijcunata ca ashtacatami bendiciajun. ¿Imashinata bendiciajun? Jehová Diosca ashtacata yachachishpa, shinallata mundo enteropi ashtaca huauquipanicunahuanmi bendiciajun (Isaías 54:13). Jesús nishca shinaca, mundo enteropi ashtaca huauquicunata, panicunata charina bendiciondami cunanbillata Jehová Diosca cushca (Marcos 10:​29, 30). Ashtahuangarin Taita Diosta mascashpa causajcunaca cushijuitapash, shungu ucupi tranquilo sintirina bendiciondapashmi charin (Filipenses 4:​4-7).

18, 19. Jehová Diospa bendiciongunata yarishpaca ¿imashinata Jehovata sirvijcunaca sintirin?

¹⁸ Mundo enteropi Jehovata sirvijcunaca Jehová Dios paicunata bendiciashcatami cuenta japishca. Ishcai ejemplocunata ricupashun. Alemania llactamanda Bianca shuti paniguca ninmi: “Problemacunapi cajpi Jehová Dios ayudashcamanda, cada punlla ñucahuan cashcamandaca ashtacatapachami Jehovataca agradicini. Canllaman gentecunaca imata ruranatapash na atinashpa, amsa amsa ucupi cuendami causan. Shinapash ñucaca, Jehová Diosman quimirimandami paipa maquipi cashpaca seguro sintirini. Ñuca munaicunata huashaman saquishpa paita sirvingapaj esforzarijpica, Jehová Diosca ashtaca bendiciongunatami carahuashca” nin.

¹⁹ Canadá llactamanda Paula shuti panigupash 70 yali huatacunatami charin. Paipa huasha columnapi shuj bola viñashcamandami paica cuyuritapash na ushan. Shinapash paica ninmi: “Na cuyurita ushashpapash, na villachi ushanichu nishpaca na quedashcanichu. Telefonopi villachingapaj o informalmente villachingapami aprovechashcani. Huaquinbi huaquinbi ricushpa ñucallata animaringapami Bibliamanda textocunata, publicaciongunapi liishca yuyaicunataca shuj cuadernopi anotashpa charini. Chai cuadernotaca ‘causaita cuj cuaderno’ nishpami charini. Jehová Dios carasha nishca bendiciongunapi pensarimandami desanimarishpapash asha ratogutalla llaquilla sintirini” nin. Ashtahuangarin Paula paniguca ninmi: “Ñucanchi imapi minishtijujta ricushpami Jehová Diosca siempre ayudan” nishpa. Bianca o Paula panigucunashnalla llaquicunata na charishpapash pensarinami capangui, quiquindapash shuj huauquipanicunatapash Jehová Dios imashina bendiciashcata. Cunanbipash shamuj punllacunapipash Jehová Dios bendicianata yarinaca alipachami can.

20. Jehovata sirvingapaj esforzarishpaca ¿imatata seguro caita ushapashun?

²⁰ Na cunganachu capanchi, tucui shunguhuan mañashpaca ‘ninan alita japinata’ o bendiciondaca charishunmi. ‘Taita Dios munashcatalla rurashpaca pai carashami nishcataca japishunmi’ (Hebreos 10:​35, 36). Shinaca ñucanchi fetapash shinlliyachishpa, Jehovata sirvinamanda imaguta rurangapapash esforzarishpa catipashun. Shina rurashpaca Jehová Dios bendicianataca seguromi caita ushashun (Colosenses 3:​23, 24).