1, 2. Romanos 5:12​ca ¿imashinata ñucanchita ayudan?

ROMANOS 5:12​pica ninmi: “Juchata ruranaca, shujlla runamandami cai pachapica callarirca. Chai juchamandami, huañuipash callarirca. Shinallatami tucuicuna juchata rurashcamandaca, huañuipash tucuicunapajman yalijun” nishpa. Cai textotaca tucuicunami alipacha rijsinchi. Gentecunaman Bibliata yachachijushpapash cai textotaca cutin cutinmi yachachishcanchi.

² Romanos 5:12​ca ¿Imatata Bibliaca Yachachin? libropipash cutin cutinmi ricurin. Cai libropa capítulo 3, 5, 6ta gentecunamanbash ñucanchi huahuacunamanbash yachachijushpaca tal vezchari Romanos 5:12​ta liinchi. Shinapash, cai textohuanga ¿imacunatalla intindichunda ayudai ushanchi? Romanos 5:12​huanga, cai Alpa imamanda na shuj paraíso cashcata, ñucanchita salvachun Jesusta minishtishcata, gentecuna imamanda huañujta intindichunmi ayudai ushanchi. Cai textoca ñucanchitapashmi ayudan. ¿Imashinata ayudan? Jehová Diospaman quimirichun saquishcamanda Jehovata tucui shunguhuan agradicichunmi ñucanchitaca ayudan. Tucui shunguhuan agradicimandami ñucanchicunaca paita cushichi ushashun, pai  carasha nishcacunata ricujunshna causaitapash ushashun.

3. Ñucanchicunaca ¿imashinata canchi?

³ Tucuicunallatami juchayucuna nacirishcanchi. Chaimandami cada punlla imapipash pandarinchi. Shinapash Jehová Diosca llaquij Diosmi can. Chaimandami ñucanchicuna juchayu nacirishcata intindishpa ñucanchi juchacunata perdonangapaj listo can (Salmo 103:​13, 14). Je­susca nircami, Taita Diostaca juchacunata perdonahuangui nishpami mañana canguichi nishpa (Lucas 11:​2-4). Ñucanchi punda juchacunata Jehová Dios ña perdonashca cajpica, na chai juchacunapi cutin cutin pensajunachu canchi. Shinapash ¿imamandata Jehová Diosca ñucanchi juchacunata perdonangapaj munan?

4, 5. a) Romanos 5:​12​ca ¿imata intindichunda ayudan? b) ‘Llaquishpa jahuan jahuan carana’ nishpaca ¿imatata nisha nin?

⁴ Tucuilla Romanos libro, ashtahuanbacha Romanos capítulo 6mi ñucanchitaca juchacunata imamanda Jehová Dios perdonai ushashcata intindichun ayudan. Romanos capítulo 3pi nishca shinaca, ‘tucuicunami juchayucuna’ canchi. Apóstol Pabloca nircami: ‘Dios ninanda juyashpa [o “llaquishpa jahuan jahuan carashpa”, NM] Cristo Jesusmanda quishpichishpami [alita] rurashcatashna chasquirca’ nishpa (Romanos 3:​23, 24). Griego shimipi “llaquishpa jahuan jahuan carana” nishpaca, na mericijpipash, favorta na tigrachi ushana cajpipash imatapash rurashpa ayudanatami shina nin.

⁵ Shuj ali estudiashca runaca ninmi, Griego shimipi “llaquishpa jahuan jahuan carana” nishpaca gentecunata juchamanda, huañuimanda salvangapaj Taita Diospash Jesuspash imata rurashcatami ashtahuanga shina nin nishpa. Chaimandami inglés shimipi Traducción del Nuevo Mundo Bibliaca griego shimimanda traducishpa “llaquishpa jahuan jahuan carana” nishpa churashca. Shinaca ñucanchicunamanda Jehová Dios imata rurashcata, pai ñucanchita “llaquishpa jahuan jahuan” carashcamanda ima bendiciongunata cunan punllacunapipash, shamuj punllacunapipash chari ushanata ricupashun.

6. ¿Picuna, imashinata Jehová Dios llaquishpa jahuan jahuan carangapaj munashcataca chasqui ushan?

⁶ Adán juchata rurashcamandami tucuicuna juchayu nacirinchi, huañunchipash. Chaimandami Bibliapica nin: “Shujlla runa na cazuimandami, huañuica mandajurca” nishpa. Shina cajpipash gentecunata llaquishpa jahuan jahuan carangapaj munashcamandami, Jehová Diosca paipa Churi Jesuspa causaita cushpa tucuilla gentecunamanga salvarina oportunidadta curca (Romanos 5:​12, 15, 17). Bibliapica ninbashmi: ‘Shujlla runa cazushcamandami, ashtacacunaca [alita] rurajcunashna’ tucushpa ‘Apunchi Jesucristomandaca causaita causana’ esperanzata chari ushan nishpa (Romanos 5:​19, 21).

7. ¿Imashinata Jehová Diosca paipa Churipa causaita cushpa gentecunata llaquishcatapash, jahuan jahuan carangapaj munashcatapash ricuchirca?

⁷ Pensaripashun, Jehová Diosca ñucanchicunata salvangapaca ¿paipa Churi Jesuspa causaita cuna obligacionda charircachu? Na. Jehová Diosca gentecunata llaquishpa jahuan jahuan carangapaj munashcamandallami paipa Churipa causaita cushpa gentecunataca juchamandapash huañuimandapash salvarca. Gentecunamandaca ¿pita nita ushanchiman, Jehová Diospash Jesuspash ñucataca salvanami carca nishpa? Pipash  chaitaca na nita ushanchimanllu. Chaimandami, ñucanchita perdonashpa para siempre causana oportunidadta carashcamanda Jehová Diostapash Jesustapash ashtacata agradicinchi. Ñucanchi causaipi alita rurashpami Jehová Diosta agradicishcata ricuchi ushanchi.

8. ¿Ima yuyaimandata cuidarina capanchi?

⁸ Jehová Diosca ñucanchi juchacuna jatun cajpipash perdonangapami munan. Shinapash nunca na pensanachu canchi, Jehová Diosca llaquishpa jahuan jahuan caraj Diosmi can, juchata rurajpipash paica perdonahuangallami nishpa. Huaquin apostolcuna causanajuj tiempopipashmi Jesusta huaquin catijcunaca, Jehová Diosca perdonangallami nishpa juchata ruranajurca ( Judas 4, liingui). Cunan punllacunapi gentecunapash shinallata pensashpami causan. Chai yuyai ñucanchita ama asha asha pandachichunmi cuidarina canchi.

9, 10. ¿Imashinata apóstol Pablopash shuj huauquipanicunapash juchamanda, huañuimandapash salvari usharca?

⁹ Apóstol Pabloca Jesusta catijcunataca nirca­mi, juchata rurashpa catijpipash Jehová Diosca perdonajungallami nishpa pensanaca na alichu can nishpa. Chashna pensanataca saqui­nami canguichi. Cangunaca ‘juchata ama ashtahuan rurangapami huañushcashna canguichi’ nishpa (Romanos 6:​1, 2, liingui). ¿Imamandata apóstol Pabloca shina nirca?

¹⁰ Apostolcunapa punllacunapica, Jesús paipa causaita cushcamandami Jehová Diosca apóstol Pablopa juchacunatapash chaishuj huauquipanicunapa juchacunatapash perdonarca. Jehová Diosca espíritu santota cushpami paicunataca paipa huahuacuna cachun agllarca. Paicuna tucuipi cazushpaca jahua cieloman rishpami Jesushuan mandai ushana carca. Shinapash, paicuna cai Alpapi causanajushpaca ¿imashinata ‘juchata ama ashtahuan rurangapaj huañushcashna carca’? Paicunapa causai tucuipi cambiashcata intindichingapami Jesusmanda parlashpa apóstol Pabloca nirca, Jesús huañushca jipaca, shuj espíritu cuendami causarirca. Ñana huañunachu carca nishpa. Ñana huañuna cashcamandami ‘juchaca na ashtahuan mandashpa chari ushana’ carca. Ungidocunapash paicunapa nali munaicuna paicunata ‘ashtahuan mandashpa charichunga’ na saquinllu. Shina rurashpami paicunapa causaica tucuipi cambiashca. Ashtahuanbash paicunaca Jehová Dios munashcashna causangapami esforzarishpa catin. Paicunaca ‘juchata ama rurangapaj huañushcashna cashpami, Cristo Jesusmanda Taita Diospalla causanajun’ (Romanos 6:​9, 11).

11. Jesusta catijcunaca ¿imashinata ‘juchata ama ashtahuan rurangapaj huañushcashna capanchi’?

¹¹ Cutin ñucanchicunaca ¿imashinata ‘juchata ama ashtahuan rurangapaj huañushcashna canchi’? Jehovata nara rijsishpaca Jehová Diospa ñaupajpi pandata rurajushcata na cuenta japishpami causarcanchi. Ñucanchica ‘mapatalla rurashpami juchapa gañan [o esclavo] carcanchi’ (Romanos 6:​19, 20). Shinapash Bibliata yachajushpami Jehová Dios imashina causachun munashcata intindishpa ñucanchi causaipi cambiocunata rurarcanchi. Chai jipaca Jehovaman oracionda rurashpami mingarishcanchi, bautizarishcanchipash. Ñucanchica Jehovata tucui shunguhuan cazungapaj munashpami pai munashcashna causashpa paita cushichingapaj munanchi (Romanos 6:​17, 18).

12. ¿Imatata cada uno ricuna capanchi?

¹² Tucuicuna aliguta pensarishpa causachunmi Pabloca nirca: ‘Cangunapa huañunalla cuerpopi jucha mandachunga napacha saquinachu canguichi. Nali munaicuna yarichijujtapash, napacha cazunachu canguichi’ nishpa (Romanos 6:​12). Shinaca ñucanchillatami cada uno ricuna canchi nali munaicuna, nali yuyaicuna ñucanchita mandachun saquinata o na saquinatapash. Chaimandami tapurina capanchi: “¿Nali mu naicuna ashtahuan ashtahuan mirashpa catichun saquishpachu nalita rurani? ¿O nali munaicuna, nali yuyaicuna umaman shamushcandichu ñapash jarcarini?” nishpa. Jehová Dios ñucanchita llaquishpa jahuan jahuan carashcata agradicishpaca Jehová Dios imata munashcatami rurashun.

13. ¿Imamandata nita ushanchiman, juchamandaca caruyai ushanchimi nishpa?

¹³ Apostolcunapa punllacunapi Corinto llactamanda gentecunaca shuhuacuna, jaripura o huarmipura juchapi urmashpa puñujcuna, cazarashc­a jahua shuj huarmita o shuj jarita charijcuna, yanga diosta adorajcuna, machajcunami carca. Shinapash Jehovata rijsishpa, Jehovata juyai callarishpaca nalita ruranajushcata pinganayachishpami cambiarca (Romanos 6:​21; 1 Corintios 6:​9-​11). Roma llactamanda Jesusta catijcunapash chashnallata cambiocunatami rurana carca. Chaimandami apóstol Pabloca paicunataca nirca: ‘Cangunapa cuerpopi tucui tiajtapash na juchaman saquinachu canguichi. Ashtahuangarin huañushcacunapa chaupimanda causarishcashna cashpami, Taita Diospa cachun cuna canguichi. Cangunapa cuerpopi ima tiajtaca, [alita] rurachunmi Taita Diosman saquina canguichi’ nishpa (Romanos 6:​13). Apóstol Pabloca, Roma llacta huauquipanicuna alita ruranata, Jehová Dios paicunata llaquishpa jahuan jahuan caranataca seguromi carca.

14, 15. ¿Imatata tapurina capanchi?

¹⁴ Cunan punllacunapi huaquin huauquipanicunapash Corinto llactamanda huauquipanicunashnami jatun juchacunata rurashca. Shinapash Jehovata rijsishpa cambiaimandami paicunaca armashcashna limpio caita ushan. Tucuicunallatami Jehovata cushichingapaj munaimandaca ñucanchi causaipi cambiocunata rurashcanchi. Cunangamanmi ñucanchicunaca Jehová Dios ñucanchita llaquishpa jahuan jahuan carashcamanda agradicishcata ricuchingapaj munanchi. Chaimandami ñucanchi nali munaita ladoman saquishpa Jehovata sirvishpa causangapaj munanchi.

¹⁵ Ñucanchicunaca Corinto llactamanda huauquipanicunashna jatun juchacunataca na ruranachu canchi. Shinallata Jehová Diosca llaquishpa jahuan jahuan caraj Dios cashcamandaca jatun juchata rurajpipash perdonahuangallami nishpaca na pensanachu canchi. Shinapash tapuripashunchi, shujcunapa ñavipi na jucha cajpipash ñucanchi ñavipi na ali cajpica ¿imatata rurani? ¿Tucuipichu Jehová Diosta cazungapaj munani? nishpa (Romanos 6:​14, 17).

16. 1 Corintios 6:​9-​11​pi nishca juchacunata na rurashpapash ¿imashinata yachanchi nali ruraicunata ama rurangapaj esforzarina cashcata?

¹⁶ Apóstol Pablota yaripashun. Paica nircami: ‘Tucurinalla aichayu cashpami, juchata rurangapaj ñucallata jatui tucushcani. Ñuca imaguta alita rurangapaj munashcataca, na rurai ushanichu. Ashtahuangarin ñuca na ricunayachishcatarami rurani’ nishpa (Romanos 7:​14, 15). Pabloca 1 Corintios 6:​9-​11​pi nishca juchacunataca na rurajurcachu. Shinapash paica juchayu cashcataca alimi intindirca. Chaimandami paica Jehovata cushichingapaj munashpa nali ruraicunata ama rurangapaj shinllita esforzarirca (Romanos 7:​21-​23, liingui). Ñucanchicunapash paipa ali ejemplota catishpami Jehovata tucuipi cazungapaj esforzarina canchi.

17. ¿Imamandata honrado cangapaj munana capanchi?

¹⁷ Shuj ejemplota ricupashun. Jehovata sirvij cunaca honrado cana cashcataca alimi yachanchi (Proverbios 14:5; Efesios 4:​25, liingui). Diabloshna llulla cangapaca na munanchichu. Diabloca “llullapacha cashpami llullapaj taita” can. Ananías paipa huarmi Zafirata yaripashun. Paicunaca llullaimandami huañuita tarirca. Shinaca na llullanachu canchi (Juan 8:​44; Hechos 5:​1-​11). Shinapash honrado cangapaca ¿llullaitallachu na llullana canchi? Jehová Dios ñucanchita llaquishpa jahuan jahuan carashcamanda agradicishpaca tucuipimi honrado cana canchi.

18, 19. Honrado cashpaca ¿imatata na rurana capanchi?

¹⁸ ¿Imashinata na llullata nishpapash na honrado cashcata ricuchinchiman? Shuj ejemplota ricupashun. Jehová Diosca israelitacunataca nircami: ‘Na shuhuanachu canguichi, na umachirinachu canguichi, caishuj chaishujpash na llullarinachu canguichi’ nishpa. Shinapash ¿imamandata chaita ruranaca minishtirishca carca? Jehová Diosca nircapashmi: ‘Ñucami cangunata Mandaj, jucha illaj Taita Dios cani. Shina cashcamandami cangunapash ñucashnallata jucha illaj causana canguichi’ nishpa (Levítico 19:​2, 11). Na llullajushpapash huaquinbica shujcunata crichingapami imatapash ninchi. Chaita rurashpaca honrado cashcataca na ricuchinajunchimanllu.

¹⁹ Shuj ejemplotapash ricupashun. Shuj trabajadorca paita trabajachijman o paihuan igual trabajajcunataca ninmi, doctor atindichunmi shuj turnota charini, chaiman uchalla ringapami  permisota minishtini nishpa. Paica farmaciapi jambita randingapalla o doctorman pagagringapallami tiempota minishtin. Shinapash chai trabajadorca trabajomanda uchalla llujshishpa paseo rinamandallami shina nij tucujun. Shinaca ¿paica honrado cashcata ricuchijunllu o shujcunata crichingapallachu umachijun? Trabajadorca napash cierto cajpitami paita trabajachijtaca umachingapaj munajun. Huaquin gentecunaca shujcunamanda aprovecharingapalla o ali quedangapallami imatapash nishpa shujcunata umachin. Shinapash Jehovata sirvijcunaca Jehovata cazunami canchi. Paica nircami: ‘Na umachinachu canguichi’ nishpa. Ñucanchica Jehová Diospa ñaupajpi ali ricurishcatallami nina canchi, rurana canchipash (Romanos 6:​19).

20, 21. Jehová Dios ñucanchita llaquishpa jahuan jahuan carashcata agradicingapaj munashpaca ¿imatallata na rurana capanchi?

²⁰ Ñucanchicunaca cazarashca jahua na shuj huarmita, na shuj jarita charinata, na machanata, o shuj jatun juchacunata na rurana cashcataca alimi yachanchi. Ali yachashpami chaicunataca na ruranchi. Chaicunata na rurashpapash Jehová Dios nalicachishca shuj ruraicunatapash na rurangapaj munanchichu. Huaquin ejemplocunata ricupashun. Shuj huarmihuan o shuj jarihuan na juchapi urmashpapash, jarihuan huarmihuan pinganai cosascunata ruranajuj peliculacunatapash na ricunchichu. Shinallata na machashpapash uma japingacamanga na ufianchichu. Chai tentaciongunapi ama urmangapaca ashtacatami esforzarina capanchi. Esforzarishpaca chai tentanciongunata mishai ushashunmi.

²¹ Ñucanchica apóstol Pablopa consejota pactachingapami munana canchi. Paica nircami: ‘Cangunapa huañunalla cuerpopi jucha mandachunga napacha saquinachu canguichi. Nali munaicuna yarichijujtapash napacha cazunachu canguichi’ nishpa (Romanos 6:​12; 7:​18-​20). Imapash juchapi na urmashpa causaitaca pipash na ushanchichu. Shinapash, juchapi ama urmangapaj esforzarishpaca, Jehová Diospash Jesuspash ñucanchita llaquishpa jahuan jahuan carashcata agradicishcatami ricuchinajushun.

22. Jehová Dios ñucanchita llaquishpa jahuan jahuan carashcamanda agradicishcata ricuchishpaca ¿ima bendiciondata charipashun?

²² Jehová Diosca ñucanchi juchacunataca ñami perdonashca, perdonashpa catingapapash munanmi. Ñucanchita llaquishpa jahuan jahuan carashcamandaca ashtacatami agradicinchi. Shinaca Jehovapa ñaupajpi nali ricurishca cosascunata ama rurangapaj esforzaripashunchi. Shujcunap­a ñavipi na jucha cajpipash ñucanchi ñavipi na ali cajpica chaicunamandapash jarcaripashunchi. Shina rurashpaca ¿ima bendiciondata charipashun? Apóstol Pabloca nircami: ‘Juchata rurashpa causajushcamanda, Dios cangunata cacharishcamandami cunanga Taita Diostalla sirvijcuna tucurcanguichi. Shina tucushpami, grano fucunshna Diospajlla causanata japircanguichi. Chaita japijushcamandaca causaita causagrinatami charinguichi’ nishpa (Romanos 6:​22).