Imamanda shina tucushcata parlapasha. Ñucaca 29 de julio de 1929 huatapimi nacirircani. Filipinas llactapi shuj uchilla pueblopimi viñarcani. Chai tiempopica llacta enteromi culqui faltalla causanajurcanchi. Huaquin huatacuna jipa ña joven cai horasca guerrami tiai callarirca. Japón llactamanda soldadocunami Filipinas llactata llaquichingapaj yaicurca. Ashata carulla causajuimandami na yapata llaqui aparcanchi. Ñucanchicunaca radiota, teleta, periodicotapash na charircanchichu. Chaimandami ima pasajujtaca shujcuna parlajpilla yachaj chayan carcanchi.

Ochopura huahuacunami carcanchi. Ñuca 8 huatacunata charijpimi ñuca abuelocunaca paicunahuan causachun apahuarca. Catolicocuna cashpapash, ñuca abueloca paipa amigocuna cushca religionmanda librocunatami charin carca. Shuj viajeca Bibliatapash, Protección, Seguridad y Descubierta nishca folletocunatapashmi tagalo shimipi ricuchihuarca. * Bibliata liinataca ninandami gushtan carcani. Ashtahuanbachaca Mateo, Marcos, Lucas, Juan librocunatami liin carcani. Chaimi Jesuspa ejemplota catina munaita charichun ayudahuarca (Juan 10:27).

1945 huatapimi Japón llactamanda soldadocunaca Filipinas llactamanda rirca. Chai tiempopimi ñuca taitamamacunaca huasiman cutin tigramui nihuarca. Chaimi ñuca abueloca canba taitamamacunahuan causangapaj rilla nishpa consejahuarca.

Asha tiempo jipaca diciembre de 1945 huatapimi, Angat llactamanda testigo de Jehovacuna ñucanchi causajuj pueblopi villachingapaj shamurca. Shuj mayorlla jarimi ñucanchi huasiman shamushpa ‘tucurimui punllacunamanda’ Biblia ima nijta yachachirca (2 Tim. 3:1-5). Ñucanchi causajuj ladolla pueblopimi huaquingunaca Bibliamanda yachajungapaj tandanajun carca. Paicunahuan Bibliamanda yachajuchunmi ñucanchitapash invitarca. Ñuca taitamamacuna na ringapaj munajpipash ñucaca rircanimi. Chaipica 20pura gentecunami tandanajushca  cashcarca. Huaquingunaca Bibliamanda shuj shuj tapuicunatami ruranajurca.

Chaipi imata yachachijujta na ali intindi ushashpami rigrijurcani. Shinapash ña llujshigrijujpimi candai callarirca. Chaita uyashpami quedarcani. Candai tucuchishca jipaca, shuj mañaitami rurarca. Shinallata Angat llactapi domingo punlla shuj tandanajuiman richunbashmi invitarca.

Familia Cruzpa huasiman chayangapaca casi 8 kilometrocunatami rina carcanchi. Chai huasipimi tandanajuitaca ruragrinajurca. Chaipica casi 50 gentecunami tandanajurcanchi. Huahuacunapash Bibliapa shinlli yuyaicunamanda comentariocunata cujta ricushpami manllarircani. Huaquin tandanajuicunaman rishca jipaca, Damián Santos shuj mayorlla precursor huauquimi paipa huasipi mingachihuarca. Casi tuta enteromi Bibliamanda parlarcanchi.

Chai tiempopica ashtacacunami Bibliapi nishcacunata yachajushpa espiritualmente ñaupaman catin carcanchi. Asha tiempotalla tandanajuicunaman rinajujpimi bautizaringapaj munanguichichu nishpa tapurca. Ñucaca Jesusta catingapaj munaimandami bautizaringapaj munanimi nircani (Col. 3:24). Chaimi 15 de febrero de 1946 huatapi ishcaipura bautizarircanchi.

Ña bautizarishca caimandaca Jesuspa ejemplota catishpa villachina cashcatami intindircanchi. Ñuca taitaca villachinaman richunga nimamanda na munarcachu. Chaimi cashna nihuarca: “Bautizarishca cani nishpallaca na villachishpa purijunallachu cangui, shina purijungapaca yapa jovenmi cangui” nishpa. Shina nijpimi ñuca taitamanga nircani, Taita Diosca paipa Reinomanda villachichunmi munan nishpa (Mat. 24:14). Caitapashmi nircani: “Taita Diosman imata rurasha nishcataca pactachinami cani” nishpa. Shina nijpimi callaripi nishca shimicunata ñuca taitaca nihuarca. Ñuca taita villachichun na munajpipash ñucaca espiritual metacunata pactachingapami tucuita saquircani.

Angat llactapi paicunahuan causagrichunmi familia Cruzca pushahuarca. Paicunaca ñucatapash, paicunapa Nora shuti último ushitapashmi precursorcuna shina sirvichun animarca. Chaimi 1 de noviembre de 1947 huatapi precursor shina sirvi callarircanchi. Nora shuti paniguca shuj pueblopimi sirvingapaj rirca. Cutin ñucaca Angat llactapi villachinata apoyangapami quedarcani.

Ña quimsa huatacunata precursor regular shina sirvijujpimi Betelmanda Earl Stewart shuti huauquica 500 yali gentecunaman Angat plazapi shuj discursota curca. Chai huauquica inglespimi chai discursota curca. Chaimi chai huauqui tucuchishca jipaca tagalo shimipi chai discursopa huaquin yuyaicunamanda parlarcani. Escuelapi siete huatacunatalla estudiashca cashpapash profesorcuna casi siempre inglés shimipilla parlajpimi chai shimitaca yachajurcani. Shinallata  inglés shimipi publicaciongunata yachajunami ashtahuan chai shimita ali intindichun ayudahuarca. Shinami inglés shimimanda huaquin discursocunata tagalo shimiman tigrachi usharcani. Chai tiempopica huaquin publicaciongunallami tagalo shimipica tiarca.

Earl Stewart huauquipa discursota tagalo shimiman tigrachishca punllallatami chai huauquica nirca, Betelpi sirvichunmi shuj o ishcai precursorcunata mascanajunchi nishpa. Betelpi sirvinajuj misionerocunami “Aumento de la Teocracia” nishca Asamblea Internacionalman rishcarca. Chai tandanajuica 1950 huatapi Nueva York (Estados Unidos) llactapimi tiarca. Chaipimi Betelman richun invitahuarca. Angat llactapi yacharishca cashpapash Betelpi sirvingapami tucuita saquishpa rircani.

19 de junio de 1950 huatapimi Betelpi sirvi callarircani. Betel huasica shuj hectárea alpapimi carca. Chai muyundipica jatun quirucunami tiarca. Chaipica casi 12 jovengunami trabajan carca. Ñucaca cocinapi ayudashca jipaca ña las 9 tucujujpimi ropata planchangapaj rin carcani. Chaupi punlla jipapash chaitallatami rurashpa catin carcani. Asamblea Internacionalmanda misionerocuna tigramushca jipapash Betelpimi ayudashpa catircani. Ñucaca publicaciongunata shuj ladocunaman cachangapaj segurashpa, mashna publicaciongunata minishtijujta anotashpami Betelpi ayudan carcani. Tucui ima nishcatami ruran carcani.

1952 huatapica ñucapash, 6 huauquicunapashmi shuj ali villaita chasquircanchi. Galaad Escuelapi número 20 clasemanmi ñucanchitaca invitarca. Estados Unidos llactapica tucuimi ista ista carca. Uchilla pueblogupi viñashcamandaca chai llactapica tucuimi shujpacha carca.

Estados Unidos llactapica na rijsishca aparatocunatami utilizana tucurcanchi. Chai llactapi climapash diferentemi carca. Shuj punllaca calleman llujshishpami tucui yura yura cajta ricurcani. Chaipimi primera vez rasuta rijsircani. Chaica chiripachami cashcarca.

Chai llactapi tucui diferente cajpipash Galaad Escuelapi cana shuj jatun privilegio cajpimi ninanda cushijurcani. Chai escuelapi yachachij huauquicunaca alimi intindichin carca. Aliguta investigashpa Bibliata ali yachajuchunmi ayudarca. Galaad Escuelaca espiritualmente ñaupaman catichunmi ayudahuarca.

Chai escuelamanda graduarishca jipaca Nueva York llactapimi asha tiempota precursor especial shina sirvircani. Chaimi chai llactapillata julio de 1953 huatapica “Sociedad del Nuevo Mundo” nishca Jatun Tandanajuiman ri usharcani. Chai Jatun Tandanajui tucurishca jipaca cutinmi Filipinas llactaman tigrarcani.

Betelpi huauquicunaca congregaciongunata visitachunmi Filipinas llactaman cachahuarca. Chaimi  Jesuspa ejemplota ashtahuan catichun ayudahuarca. Jesusca caru llactacunaman, pueblocunaman rishpami Jehovata sirvijcunata ricuriarca (1 Ped. 2:21). Luzón shuti islamanda Bulacan, Nueva Écija, Tarlac, Zambales llactacunapi tiaj congregaciongunatami visitana carcani. Carulla pueblocunaman ringapaca Sierra Madre nishca peligroso urcucunatami yalina tucurcani. Chaimanga buspash na chayanllu carca. Chaimi huaquinbica troncocunata apaj jatun camiongunapi rin carcani. Chai camiongunapi rina peligroso cajpipashmi shina rin carcani.

Chai llactacunapica chairalla callarishca uchilla congregaciongunami tiarca. Chaipi huauquipanicunaca villachinapi, tandanajuipi ayudashcamandaca ninandami agradicin carca.

Chai jipaca Bicol llactapi congregaciongunata visitachunmi cachahuarca. Chaipica congregacionguna tiashpapash mayoriami grupocunalla carca. Shinallata nima hora na villachishca pushtucunapimi precursor especialcunaca villachigrin carca. Ñuca mingarishca huasipica bañopash ishcai tablacunata churashca shuj utujullami carca. Shuj viajeca tablacuna faquirijpi chai utujupi urmashpami mapa mapa quedarcani. Chaimi desayunomanbash na ri pactarcani.

Tiempohuanga Nora panigupimi pensari callarircani. Paica Bulacan llactapimi precursora shina sirvijurca. Shinapash jipamanga Dumaguete llactapimi precursora especial shina sirvijushcarca. Chaimi paita visitangapaj rircani. Chai jipami escribiri callarircanchi. 1956 huatapimi cazararcanchi. Cazarashca semanahuanllami Rapu Rapu shuti islapi congregaciongunata visitachun cacharca. Urcucunata yalina cajpipash caru pushtucunamanda huauquipanicunata ñuca huarmiguhuan ayudashpaca cushillami sintirircanchi.

Casi chuscu huatacunata congregaciongunata visitanajushca jipami Betelpi sirvichun invitarca. Betelmanga enero de 1960 huatapimi chayarcanchi. Cunangamanmi Betelpillata sirvinchi. Jatun responsabilidadta charij huauquicunahuan trabajaimandami ashtacata paicunamanda yachajushcani. Ñuca huarmiguca Betelpi shuj shuj cosascunata rurashpami ayudan.

Betelpi sirvijuimandami Filipinas llactapi Diosta sirvijcunaca ashtahuan mirashpa catijta ricui ushashcani. Ñucaca soltero cashpami primera vez Filipinas llactaman shamurcani. Chai tiempopica 10 mil publicadorcunallami llacta enteropi tiarca. Cunanga 200 mil yali publicadorcunami tian. Ashtahuanbash paicunapuramanda 435puracunami Betelpi sirvin.

Diosta sirvijcuna ashtacata mirajpimi Betel huasitaca ashtahuan jatunda rurana minishtirirca. Chaimi Cuerpo Gobernantemanda huauquicunaca shuj alpata randingapaj mascaichi nirca. Shina nijpimi superintendente de imprenta huauquindi vecinocunata tapungapaj rircanchi. Shina tapushpa purinajupimi shuj jarica cashna nirca: “Chinocunaca na jatunchichu, randitami randinchi” nishpa. Nipi na jatungapaj munarcachu.

Shinapash shuj vecinoca Estados Unidos llactapi causangapaj rijuimandami paipa alpata randichun villaj shamurca. Chai vecino jatujpimi, shujcunapash paicunapa alpacunata jaturca. Chai chino jaripashmi paipa alpata jaturca. Shinami Betel huasita shayachingapaj jatun alpata charircanchi. Chaita ricushpaca Jehovallatami chashna munashcanga yarcani.

1950 huatapica Betelpica ñucami tucuicunamanda ashtahuan joven carcani. Cunanga ñucanchimi ashtahuan rucucuna canchi. Tucuita saquishpa shuj shuj ladocunaman rishca cashpapash Jesusta catishcataca na arripintirinichu. Ñuca taitamamacuna huasimanda llujchishpa cachajpipash, Jehová Diosca ashtaca huauquipanicunata charina privilegiotami carahuashca. Ima privilegiota charijpipash Jehová Dios tucui ñucanchi minishtishcacunata cushpa cuidanataca seguromi cani. Ñucanchicunaca Jehová Dios ashtaca bendiciongunata cushcamandaca ninandami agradicinchi. Chaimi shuj huauquipanicunapash Jehová ayudashpa bendicianataca paicunallata ‘ricuchun’ animanchi (Mal. 3:10).

Shuj viajeca impuestota japishpa causaj Mateo Leví jaritami Jesusca paita catichun invitarca. Mateoca ¿imatata rurarca? Bibliapica ninmi: ‘Ima tiashcatapash saquishpami, Jesustaca catishpa rirca’ nishpa (Luc. 5:27, 28). Ñucapashmi tucuita saquishpa Jesusta catina privilegiota charishcani. Chaimandami shujcunapash shinallata rurashpa catichun, ashtaca bendiciongunata charichunbash animani.