1. Bautizarinaca ¿imamandata minishtirishcapacha can? (Callari fotota ricupangui).

CADA huatami ashtaca ashtaca Bibliamanda yachajujcuna bautizarin. Bautizarishcapuramandaca ashtacacunami jovenguna, uchilla huahuacunapash can. Paicunaca Testigo taitamamacunahuanmi viñashcanga. Cutin canga ¿ñachu bautizarishca cangui? Bautizarishca cajpica ninandami cushijunchi. Jesusta ali catijcuna salvaringapaca bautizarinaca minishtirishcapachami can (Mat. 28:19, 20; 1 Ped. 3:21).

2. ¿Imamandata Jehovaman mingarinataca na manllana capanchi?

² Bautizarishca jipa ashtaca bendiciongunata charina cashpapash, shuj jatun responsabilidadmi can. ¿Imamandata shina nipanchi? Can bautizarigrijushpaca cai tapuitami ari nishpa tigrachircangui: “¿Jesús huañushcapi feta charishpa, ñachu quiquingunapa juchacunamanda arripintirishpa, Jehová Diosman mingarishpa, Jehová Diospa munaitallami rurasha nipashcanguichi?”. Mingarishpaca Jehovatallami juyasha, canba munaitarami ñuca causaipica pundapi churasha nishcanguimi. Bautizarishpaca  chai shimicunata pactachina cashcatami ricuchijungui. Shinaca ¿Bautizarinataca manllanachu cangui? Na, na manllanachu cangui. Jehová Diosta sirvina decisionda agllashpaca nunca na arripintiringuichu. Jehovata na sirvishpaca Diablo mandachunmi saquijunguiman. Diabloca can salvarichunga na munanllu. Paica paipa lado tucushpa, Jehovalla mandana derechotapash na respetashpa para siempre causaita japichunbash na munanllu.

3. Jehovaman mingarishcamandaca ¿ima bendiciongunatallata charishcangui?

³ Jehová Diosman mingarishpa bautizarishcamanda ima bendiciongunatalla charishcapi pensaripai. Mingarishpa bautizarishca caimandami Jehovaman cashna ni ushapangui: “Mandaj Diosca ñucahuan cajpimi, maijan runa ñucata llaquichinatapash na manllasha” nishpa (Sal. 118:6). Jehová Diospa ñaupajpi ali ricurinaca tucuimanda yali valishcami can.

4, 5. a) ¿Imamandata Jehovaman mingarinataca cada uno agllana capanchi? b) Mashna huatacunata charishpapash ¿imatata tucuicunallata chimbapurana capanchi?

⁴ Ña bautizarishca cashpapash Jehovahuan amigo canaca shuj alpa herenciata japina shinaca na canllu. Taitamamacunapa huasipi causashpapash Jehovahuan ali amigo tucushpa salvari ushangapaca canllatami esforzarina cangui. ¿Imamandata chaita yarina cangui? Jipa punllacunapi ima jarcaicuna tianataca na yachanguichu. Tal vez huahua cashpallatachari bautizarircangui. Cunanga ña joven cashpaca shuj shuj yuyaicunata, shuj shuj jarcaicunata charinguipashchari. Shuj joven huarmiguca cashnami nirca: “Escuelapi pitapash cumpleañota rurajpi chai pastelta na micui ushashpapash testigo de Jehová cashcamandaca na llaquiringuichu. Shinapash ña joven cajpica shuj jarihuan cana munaicunaca ashtahuanmi miran. Chaimandami Jehovapa mandashcacunata cazuna ashtahuan ali cashcata tucui shunguhuan crina cangui” nishpa.

⁵ Jarcaicunataca jovengunallaca na charinllu. Ña mayor cashpa bautizarishcacunapashmi na yashcapi shuj shuj jarcaicunata charin. Huaquinbica, imapash ungüimanda, trabajomanda o cusahuarmi causaipimi imapash jarcaicunata charin. Mashna huatacunata charishpapash tucuicunallatami huaquinbica shuj shuj “jarcaicunata” o llaquicunata chimbapurashpa tucui shunguhuan Jehovata sirvishcata ricuchina capanchi (Sant. 1:12-14, NM).

6. a) Jehová Diosmanga ¿imatata nishcangui? b) Filipenses 4:11, 12; Isaías 12:2​pi shimicunaca ¿imatata yachachin?

⁶ Ima pasajpipash Jehovata tucui shunguhuan sirvishpa catichunga Jehovaman mingarishpa imata nishcata yarinami ayudanga. Tucuita Ruraj Diosmanmi nishcangui amigocuna, taita o mama Jehovata saquijpipash tucui shunguhuanmi candaca sirvishpa catisha nishpa (Sal. 27:10). Canba causaipi ima pasajpipash chai shimicunata pactachi ushangapaca Jehovapa ayudatami mañana cangui (Filipenses 4:11, 12; Isaías 12:2, liingui).

7. “Quishpirinamandaca, manllaihuan chujchuihuan rurashpami causana canguichi” nishca shimicunaca ¿imatata nisha nin?

⁷ Jehová Diosca paipa amigo cachunmi munan. Shinapash Jehovahuan ali amigo cangapaj, salvaringapapash cada unomi ninanda esforzarina capanchi. Filipenses 2:12​pica cashnami nin: “Quishpirinamandaca, manllaihuan  chujchuihuan rurashpami causana canguichi” nishpa. Cai shimicunaca ¿imatata nisha nin? Jehovahuan ali amigo cashpa catingapaca imaguta rurashpapash ali yuyashpa rurana cashcata. Shinallata problemacunata charishpapash Jehovata tucui shunguhuan sirvishpa catina cashcata. Canbillataca ama confianguichu. Caita yaringui, ashtaca huatacunata Jehovata sirvijcunapash Jehovamanda caruyashcata. Shinaca can salvaringapaca ¿imatata rurana cangui?

8. a) Estudio personalta runaca ¿imata can? b) Estudio personalta charinaca ¿imamandata minishtirishcapacha can?

⁸ Jehová Dioshuan ali amigo cangapaca paipa nishcacunata uyanami capanchi. Paita mañanapashmi capanchi. Jehovapa nishcacunata uyangapaca estudio personalta charinaca minishtirishcapachami can. Chaipaca Bibliata, publicaciongunatapash liishpa, imata liishcapipash yuyanami capanchi. Bibliata liinaca escuelapi o colegiopi examenda cungapaj imatapash de memoria yachajuna cuendaca na canllu. Bibliata liijushpaca umapi charinamandallaca na liinachu cangui. Ashtahuanbash yachajuna munaihuanmi liina cangui. Shina liishpami Jehová Dios imashina cajta ashtahuan rijsi ushangui. Shina rurashpaca canllatami Jehovaman ashtahuan quimiringui. Jehovapashmi canbaman quimiringa (Sant. 4:8).

9. Estudio personalta rurachunga ¿imata candaca ayudashca?

⁹ Bibliata ali yachajuita ushachunmi Jehovapa organizacionga ashtaca ayudacunata  cushca. Huaquin ejemplocunata ricupashunchi. Internetpi jw.org paginapi “Jóvenes” nishca partepica “Actividades para estudiar la Biblia” nishca temami tian. Chaipimi Bibliapi parlashca gentecunamanda ashtahuan yachajui ushangui. Guías de estudio “¿Qué enseña realmente la Biblia?” nishcapashmi tian. Chaita yachajunaca canba fe shinlli cachun, canba crishcacunata shujcunaman parlai ushachunmi ayudanga. Shinallata 2009 huatapi abril quillapi llujshishca ¡Despertad! revistapi “Los jóvenes preguntan. ¿Cómo disfrutar la lectura de la Biblia?” nishca temami estudio personalta ali rurachun ayudanga. Bibliata yachajuna, yachajushcapi yuyanami salvarichun candaca ayudanga (Salmo 119:105, liingui).

10. Ña Bautizarishcacunapaca ¿imamandata Diosta mañanaca minishtirishcapacha can?

¹⁰ Jehovata uyangapaca Bibliata yachajuna cashcatami ricupashcanchi. Jehovahuan parlangapaj munashpaca paitami mañana capanchi. Jesusta ali catijcunaca Diosta mañashpaca imapipash ali richun munaimandalla o mañana cashcamandallaca na mañanachu capanchi. Tucuita Ruraj Dioshuan parlai ushachunmi mañaica ayudan. Jehová Diosca paita mañachunmi munan (Filipenses 4:6, liingui). Imamandapash llaquilla cashpaca Bibliapi cai shimicunata yaringui. Bibliapica ninmi: “Llasha quipishna cambaj llaquitaca, Mandaj Diosman saquilla” nishpa (Sal. 55:22). Ashtaca millón huauquipanicunami Jehovata mañajpi Jehová ayudashcata ricushca. Jehovata mañanaca candapashmi ayudanga.

11. ¿Imamandata Jehová Diostaca siempre agradicina cangui?

¹¹ Ñucanchita ayudachun munaimandallaca na Jehovataca mañanachu capanchi. Jehová Diostaca siempremi mañajunalla capanchi. Bibliapica ninmi: “Paitaca, pashi ninajuna canguichi” nishpa (Col. 3:15). Huaquinbica ñucanchi charishca problemacunapilla pensarishpami Jehová Dios imashina ayudashcataca cunganchilla. Cada punlla Jehovata agradicingapaca ¿imatata rurai ushangui? Chaipaca Diosta nara mañashpallata quimsa cosascunapi pensaripai. 12 huatacunata charishpa bautizarishca Abigail jovenga cashnami nin: “Tucuicunamanda yalica Jehovatami siempre agradicina canchi. Pai imatalla carashcamandami siempre pagui nijunalla canchi. Shuj punlla uyashcataca na cunganichu: ‘Caina punlla Jehovata agradicishca cosascunatalla charina cashca cajpica ¿imacunatallashi charinchiman?’” nishpa.

12, 13. a) Jehová Dios ali cashcataca ¿imashinata ricui ushangui? b) Jehová Dios canda ayudashcata pensarinaca ¿imamandata ali can?

¹² Shinlli jarcaicunata chimbapurachunmi Jehová Diosca rey Davidtaca ayudarca. Chaimandami Davidca cashna nirca: ‘Mandaj Dios ali cajta, ricushpa yachaichiyari. Paitalla yariashpa causaj runaca ninandami cushijun’ nishpa (Sal. 34:8). Jehová Dios ali cashcata canllata cuenda japina cashcatami chai shimicunaca ricuchin. Bibliata, publicaciongunata liishpa o tandanajuicunaman rishpaca,  shuj huauquipanicunata Jehová tucui shunguhuan sirvichun imashina ayudashcatami ricungui. Shinapash Jehovata ashtahuan sirvishpa catingapaca canba causaipillatami Jehová imashina ayudajta cuenda japina cangui. Jehová Dios ali cashcataca ¿imashinata canba causaipillata ricushcangui?

¹³ Jesusta ali catijcunaca tucuicunallatami Jehová Dios ali cashcata ricushcanchi. Por ejemplo Jehová Diosca paiman, paipa churi Jesusman quimirichunmi munan. Jesusca nircami: ‘Ñucata cachamuj Taita ñucapaman pushamujpillami pipash shamui ushan’ nishpa (Juan 6:44). ¿Jehová Dios candapash paipa llactaman pushamushcatachu cringui? Shuj jovenga pensanbashchari: “Ñuca taitamamacunatami Jehová Diosca paipa llactaman pushamushca. Chaimi ñuca taitamamacuna imata nishcatalla catishcani” nishpa. Shinapash Jehovaman mingarishpa bautizarishpaca, Jehovahuan ali amigo cashcatami ricuchircangui. Chaimi Jehová Diosca candaca alipacha rijsin. Bibliapica cashnami nin: ‘Taita Diosta maijambash ninanda juyashpaca, paitaca Dios rijsishcami’ can nishpa (1 Cor. 8:3). Jehovapa organizacionbi cashcata ninanda valichingapami esforzarina cangui.

14, 15. Villachinaca ¿imashinata canba fe shinlli cachun ayudan?

¹⁴ Canba crishcacunata escuelapi cumbacunaman o shuj gentecunamanbash villachichun ayudajpimi Jehová Dios ali cashcataca ricui ushangui. Huaquingunaca escuelapi o colegiopi cumbacuna na uyangapaj munangachu nishpami villachinataca manllan. ¿Nachu canbash shinallata sintirishcangui? Ashtaca gentecunapa ñaupajpi villachina cajpicarin ashtahuan shinllimi ricurin. Na manllashpa villachichunga ¿imata ayudanga?

¹⁵ Pundapica, canllatami cashna tapurina cangui: ¿Imamandata ñuca crishcacuna cierto cashcataca tucui shunguhuan crini? nishpa. Internetpi jw.org paginapi guías de estudio nishca parteca ashtaca idiomacunapimi tian. Chaipica imata crishcapi pensarichun, chai crishcacuna imamanda cierto cashcata crichun, shujcunaman intindichi ushachunmi ayudan. Chaicunata yachajungapaj tiempota llujchingui. Canba crishcacuna cierto cashcata tucui shunguhuan crishpa, aliguta prepararishpaca Jehovapa shutimanda parlangapami munangui (Jer. 20:8, 9).

16. Canba crishcacunata na manllashpa parlachunga ¿imata ayudanga?

¹⁶ Ali prepararishca cashpapash canba crishcacunata shujcunaman parlaitaca manllanguipashchari. 18 huatacunata charij shuj joven huarmigumanda parlapashunchi. Paica 13 huatacunata charishpallatami bautizarirca. Paica cashnami nin: “Ñuca crishcacuna cierto cashcata tucui shunguhuan crishpapash, huaquinbica shujcunaman parlanataca manllanimi” nishpa. Shinaca na manllashpa parlangapaca ¿imatata ruran? Paica Diospa Shimimanda na manllashpa tranquilo parlangapami esforzarin. Paica caitapashmi nin: ‘Ñuca cumbacunaca paicunapa ruraicunamandaca na manllashpami parlanlla. Ñucapash shinallata parlashalla yashpami, imagutapash parlashpaca ‘shuj punlla Bibliamanda yachachijurcani’ nishpami callarini. Chai jipaca imata  parlajushcata cutin parlashpa catini. Shina nijpica ashtacacunami tapuhuan, ¿imatata Bibliamandaca yachachingui? nishpa. Chaimi ashtahuan jahualla Bibliamanda parlai ushashcani. Diospa Shimimanda parlashpaca cushillami sintirini’ nishpa

17. Ñucanchi crishcacunataca ¿imamandata na manllashpa parlana capanchi?

¹⁷ Shujcunata respetashcata, paicunamanda preocuparishcata ricuchijpica paicunapashmi shinallata candapash tratanga. Chairalla viñaj cashpallata bautizarishca 17 huatacunata charij Oliviaca ninmi: “Bibliamandalla parlajpica shuj gentecunaca nalicachishpami ricuhuanga yashpami ninanda manllan carcani”. Shina pensashpapash paipa yuyaita cambiangapami esforzarirca. Chaimi paica cashna pensarirca: “Ashtaca jovengunami testigo de Jehovacunataca na rijsin. Chaimandami ñucanchi ruraicunaca paicunata ayudaita o llaquichita ushan. Manllaimanda ñucanchi crishcacunata na parlajpi o manllaj manllajlla imatapash parlajpica, testigo de Jehová canataca na gushtanllu yashpami gentecunaca pensaringa. Shina parlajpica uyangapajpash na munangachu. Cutin ñucanchi crishcacunapi tucui shunguhuan crishpa seguro sintirijta ricushpaca gentecunaca respetangapashchari” nishpa.

18. Salvaringapaca ¿imatata rurana cangui?

¹⁸ Salvari ushangapaca cada uno ninanda esforzarina cashcatami ricupashcanchi. Chaipaca Bibliata liina, liishcapi yuyana, Diosta mañana, Dios cushca bendiciongunapi pensarinami cangui. Chai tucui cosascunata rurashpaca Jehová canba ali amigo cashcatami tucui shunguhuan cringui. Shinami canba crishcacunatapash na manllashpa shujcunaman parlai ushangui (Salmo 73:28, liingui).

19. ¿Imamandata salvaringapaj esforzarina capanchi?

¹⁹ Jesusca nircami: “Maijan cashpapash ñucata catingapaj munashpaca, paipaj causaita na llaquishpa, paipaj [racu caspita, NM] aparinshna ñucata catihuachun” nishpa (Mat. 16:24). Jesusta catingapaca ñucanchi causaita Jehovaman cushpami bautizarinapash canchi. Shina rurashpaca ashtaca bendiciongunatami charishun. Shamuj punllacunapicarin cai alpa shuj paraíso tucujpimi para siempre chaipi causashun. Shinaca chai bendiciongunata chasquingapaj esforzaripashunchi.