1-3. a) Jesusta ali catijcunapaca ¿ima yachachishcata minishtirishcapacha can? b) ¿Imamandata chaita yachanaca minishtirishcapacha can? (Callari dibujota ricupangui).

PIPASH ñucanchi crishcacunamanda tapujpica ¿imatata nipanchiman? Jehová Dios tucuita ruraj cashcata, ñucanchicunaman causaita cushcatami nipanchiman. Shinallata ñucanchi juchacunamanda Jesús huañushcata, shamuj punllacunapi cai alpa shuj paraíso tucujpi para siempre chaipi causanatapashmi crinchi nipanchimanmi. ¿Huañushcacuna causarinamandaca parlapanguimanlla?

² Ninan Manllanai Llaqui Punllacunapi salvarishpa cai alpapi para siempre causanataca tucui shunguhuanmi cripanchi. Shinallata huañushcacuna causarinataca seguropachami capanchi. Chai yachachishcami Jesusta ali catijcunapaca minishtirishcapacha can. Apóstol Pabloca huañushcacuna causarinapi crina imamanda importante cashcatami ricuchirca. Chaimi cashna nirca: ‘Huañushcacuna na causarina cajpica, Cristopash na causarishcachu canman’ carca nishpa. Jesús na causarishca cashpaca, cunanbipash rey shinaca na mandajunmanllu carca. Shinallata Diospa Reinomanda yachachinaca yanga shinami ricurinman  carca (1 Corintios 15:12-19, liingui). Religiongunata ñaupaman pushaj saduceo nishcacuna cuendaca na canchichu. Paicunaca huañushcacuna causarinataca nimamanda na crinllu carca. Cutin ñucanchicunaca Jesús causarishcataca tucui shunguhuanmi crinchi. Gentecuna burlarishpa na crijpipash huañushcacuna causarinataca seguromi capanchi (Mar. 12:18; Hech. 4:2, 3; 17:32; 23:6-8).

³ Apóstol Pabloca caitapashmi nirca: ‘huañushcacuna causarinataca’, ‘Cristomanda punda yachachijpimi yachajurcanchi’ nishpa (Heb. 6:1, 2, MTQI). Shinami Pabloca huañushcacuna causarinapi crishcata ricuchirca (Hech. 24:10, 15, 24, 25). ‘Taita Diospa Shimita’ yachajui callarijushpami huañushcacuna causarinataca yachajushcanchi. Shinapash chai yachachishcaca valishcapachami can (Heb. 5:12). ¿Imamandata valishcapacha can?

4. Huañushcacuna causarinamandaca ¿imacunatashi tapurin?

⁴ Bibliata yachajui callarishpaca, Lázaro causarishcatami yachajupashcanchi. Shinallata Diospi shinlli feta charij Abrahán, Job, Danielpash shamuj punllacunapi huañushcacuna causarinapi tucui shunguhuan crishcatapashmi yachajupashcanchi. Shinapash huaquingunaca tapurinbashchari: ¿Ashtaca huatacuna huashaman nishca cajpipashchu huañushcacunaca causaringa? ¿Huañushcacuna ima horapacha causarinataca Bibliapica ricuchinllu? nishpa. Cai tapuicunamanda ashtahuan yachajunami huañushcacuna causarinapi confiachun ayudanga. Shinaca Diospa Shimi imata yachachijta ricupashunchi.

5. ¿Imatata yachajugripanchi?

⁵ Pipash chairalla huañushca cashpa causarijpica huañushcacuna causarinapi crinaca ashtahuan facilmi canman (Juan 11:11; Hech. 20:9, 10). Shinapash huañushpa causarinata ashtaca huatacuna huashamanllata ña nishca cajpica ¿crinchimanllu? ¿Ña unai unaita huañushca cashpapashchu causari ushanga? Ashtahuangarin causarinataca ñami nishcarca. Chai shimicunaca ashtaca huatacuna jipa pactarishca cajpipashmi cierto cashcata crinchi. Shinaca ¿imashinata pactarirca? Caita yachajunami shamuj punllacunapi huañushcacuna causarinata crichun ayudanga.

6. Salmo 118​pi shimicunaca ¿imashinata Jesuspi pactarirca?

⁶ Causarinamandaca Salmo 118​pimi ashtahuan parlan. Cai shimicunataca Davidmi escribishcanga. Chaipica ninmi: “Mandaj Dioslla, cunanda quishpichihuayari nishpami ninanda mañapani. [...] Mandaj Diospaj shutipi shamujca, bendiciai tucushca cachun” nishpa. Cai shimicunataca 9 de Nisán punllapi Jerusalenman Jesús yaicujujpimi gentecunaca nishcanga. Jesús huañungapaca ashallami faltarianga (Sal. 118:25, 26; Mat. 21:7-9). Shinaca ¿imamandata nipanchi cai shimicunaca ashtaca huatacuna jipami pactarirca? nishpa. Salmo libropica caitapashmi nin: “Huasichijcuna nalicachishpa shitashca rumillatami, huasichi callaringapaj huasi pirca tigranapi churana jatun rumi tucushca” nishpa (Sal. 118:22).

7. Judiocunaca ¿imatata Jesustaca rurarca?

⁷ “Huasichijcuna” nishpaca judiocunata mandajcunamandami parlajun. Paicunami Jesustaca nalicachishpa na ricunayachirca. Judiocunaca Dios cachamushca Jesús cashcata na crishpami Jesustaca huañuchitapash huañuchirca (Luc. 23:18-23). Paicunami Jesusta huañuchishcamandaca culpata charin.

8. ¿Imashinata Jesusca ‘huasi pirca tigranapi rumishna tucuna’ carca?

 ⁸ Jesustaca na ricunayachishpami huañuchirca. Shinaca ¿imashinata Jesusca ‘huasi pirca tigranapi rumishna tucuna’ carca? Chai shimicuna pactarichunga Jesusca causachi tucunami carca. Jesusca chai shimicuna paipi pactarinata ricuchingapami shuj alpayu runamanda parlarca. Alpa dueñoca paipa alpapi trabajadorcunahuan parlachunmi paita sirvijcunata cacharca. Shinapash alpa dueñopa sirvijcunataca llaquichitarami llaquichirca. Chaimi alpa dueñoca paipa juyashca churita chai trabajadorcunahuan parlachun cacharca. Shinapash chai trabajadorcunaca alpa dueñopa churitaca huañuchishpami saquirca. Shina cuendami israelitacunaca Jehová Dios cachashca profetacunata uyanapa randica llaquichitara llaquichirca. Chaimi Jehová Diosca paipa juyashca churi Jesusta cai alpaman cachamurca. Shinapash paicunaca Jesustapashmi huañuchirca. Chai alpa dueñomanda parlashca jipaca Jesusca Salmo 118:22​pi shimicunatami nirca (Luc. 20:9-17). Apóstol Pedropashmi Jerusalenbi tandanajushca mandajcunahuan, ancianocunahuan, escriba nishcacunahuan parlajushpaca chai shimicunatallata nirca. Apóstol Pedroca ‘Jesusmandami’ parlarca. ‘Chai gentecuna Jesusta [racu caspipi huarcushpa, NM] huañuchijpipash, Taita Diosmi huañushcacunapa chaupimanda causachirca’. Chai jipaca Pedroca cashnami nirca: ‘Jesustaca cangunami imapapash na valij rumitashna shitashcanguichi. Paica huasi tigranapi churana rumishnami tucushca’ nishpa (Hech. 3:15; 4:5-11; 1 Ped. 2:5-7).

9. Salmo 118:22​pica ¿ima tucunatata ña escribishca carca?

⁹ Imashinami ricupashcanchi, Salmo 118:22​pi shimicunaca ashtaca huatacuna huashamanllatami ña escribishca carca. Jesustaca na ricunayachishpami huañuchirca. Shinapash pai causarishpami “huasi pirca tigranapi rumishna tucuna” carca. Jesusmandami Jehová Diosca ñucanchita salvai usharca. ‘Ñucanchi quishpirichun, cai pachapi runacunaman cushca ashtahuan shuj shutica na tianllu’ (Hech. 4:12; Efes. 1:20).

10. a) Salmo 16:10​pica ¿ima pasanatata nirca? b) Salmo 16:10​pi shimicuna Davidpi na pactarishcataca ¿imashinata yachapanchi?

¹⁰ Causarinamanda parlaj shuj textotapash ricupashunchi. Cai shimicunataca nara imapash pactarijpillatami mil huatacuna huashaman ña escribishca carca. Chaita yachajunaca masqui ashtaca huatacuna yalijpipash causarina cashcata confiachunmi ayudanga. Salmo 16:10​pica Davidmandaca cashnami  nin: “Ñuca almataca, na Seolpi saquihuanguichu. Cambajlla cashcamandaca, ñuca cuerpo ismuchumbash na saquihuanguichu” nishpa. Cai shimicunaca David na huañunata, na Seolman rinataca na nijurcachu. Bibliapica ninmi, David rucuyashpa huañujpica ‘paipa ñaupa taitacunahuan paipa pueblopillata pambarca’ nishpa (1 Rey. 2:1, 10). Shinaca Salmo 16:10​pica ¿pimandashi parlajun?

11. Salmo 16:10​pi shimicunataca ¿ima horata apóstol Pedroca intindichirca?

¹¹ Chai shimicunata David escribishcamanda mil huatacuna jipami, apóstol Pedroca chai textopi pimanda parlajushcata ricuchirca. Jesús huañushpa causarishcamandaca huaquin semanacunami ña yalishcarca. Chaipimi apóstol Pedroca ashtaca ashtaca judiocunaman, na judiocunamanbash Salmo 16:10​pi shimicunata intindichirca (Hechos 2:29-32, liingui). Apóstol Pedroca nircami, Davidca huañushpami pambai tucurca nishpa. Chaipi caj gentecunaca chaita alimi yacharca. Chai jipaca Pedroca cashnami nirca, ‘Cristo causarinataca ñaupamandapachami Davidca’, ña nishcarca nishpa. Tucuicunami apóstol Pedro nishcataca ali chasquinajurca.

12. a) Salmo 16:10​pi shimicunaca ¿imashinata pactarirca? b) Causarinamandaca ¿imatata ricuchin?

¹² Pedroca pai nishca shimicuna cierto cashcata ricuchingapami Salmo 110:1​pi David escribishca shimicunata nirca (Hechos 2:33-35, liingui). Diospa Shimipi imata nijujta ricuchishpa apóstol Pedro yachachijpimi chai tucui gentecunaca Jesús Mandaj cashcata, Quishpichij Cristo cashcatapash crinajurca. Chaipi cajcunaca tucuicunami Salmo 16:10​pi shimicuna Jesús causarijpi, Jesuspi pactarishcata crinajurca. Tiempo jipaca Antioquía de Pisidia llactamanda judiocunaman yachachijushpami, apóstol Pabloca cai yuyaitallata utilizarca. Chaimi chaipi cajcunaca ashtahuan yachachichun munarca (Hechos 13:32-37, 42, liingui). Chai yuyaicunata yachajunami ashtaca huatacuna huashaman nishca cajpipash, causarinamanda parlashca profeciacuna pactarinata crichun ayudanga.

13. ¿Imatata huaquingunaca tapurin?

¹³ Causarinata ashtaca huatacuna huashaman nishca cajpipash pactarinata yachashpami cushijunchi. Shinapash huaquingunaca tapurinbashchari: Shinaca “¿ñuca juyashca familiacuna causarichunga ashtaca tiempotachu shuyana cani? ¿Ima horapachashi causaringa?” nishpa. Caita yaripashunchi, Jesusca paita catijcunamanga nircami, ashtaca cosascunatami cunanbica na yachai ushanguichi, “ima hora chashna tucunataca, ñuca Taitallatami ninan ushaihuan churarca” nishpa (Hech. 1:6, 7; Juan 16:12). Shina cajpipash huañushcacuna ima hora causarinataca yachapanchimi.

14. Jesusca ¿imashinata causarirca? Cutin caishujcunaca ¿imashinata causarirca?

¹⁴ Huañushcacuna causarinamanda Bibliapi parlashca profeciacunami cai yuyaicunata ali intindichun ayudanga. Jesús causarishcami ashtahuan importante can. Jesús na causarishca cajpica, ñucanchi juyashca familiacunata cutinga na ricui ushanchimanllu. Profeta Elías, profeta Eliseopa tiempocunapi causarishca gentecunaca na para siempre causarcachu. Paicunaca huañushpa, pambai tucushpami cutin alpamanllata tigrarca. Cutin, Jesusca “huañushcacunapaj chaupimandami causarirca”. ‘Cutinga na huañungachu’. ‘Huañuica, cutinga na paitaca mandashpa charijungachu’. Cunanga Jesusca jahua cielopimi, ‘causaita causaicaman causajun’ (Rom. 6:9; Apoc. 1:5, 18; Col. 1:18; 1 Ped. 3:18).

15. ¿Imamandata Jesustaca ‘punda causarishca’ nin?

 ¹⁵ Jesusmi pundapica cielopi causangapaj na ismuna cuerpohuan causarirca. Shujcunapashmi shinallata causarigrinajurca (Hech. 26:23). Jesusllatami paipa apostolcunataca ñucahuanmi jahua cielopi mandangapaj rigringuichi nirca (Luc. 22:28-30). Chaita chasquingapaca pundapica huañunami carca. Chai jipaca Jesushnami paicunapash na ismuna cuerpohuan causarina carca. Apóstol Pablopash chai yuyaitallata intindichingapami cashna escribirca: ‘Cristoca, huañushcacunapa chaupimandami pai punda causarishca’ nishpa. Chai jipaca shujcunapash cielopi causangapaj causarinamanda parlashpami apóstol Pabloca nirca: ‘Paicuna causarinapillatami causaringa. Tucuipa pundaca Cristomi causarirca. Chai jipami Cristo tigramujpica paipajlla tucushcacuna causaringa’ nishpa (1 Cor. 15:20, 23).

16. Cielopi causarinamandaca ¿imatata Bibliapica nin?

¹⁶ Chai shimicunaca jahua cielopi causarina ima hora pactarinatami ricuchin. Chaica Jesús mandajuj punllacunapimi pactaringa. Ashtaca huatacunatami testigo de Jehovacunaca 1914 huatapi Jesús mandai callarishcata, cai nali mundo ñalla tucuchi tucunatapashmi Bibliahuan yachachinajushcanchi.

17, 18. Jesús mandajuj punllacunapi ungidocunahuanga ¿imata pasanga?

¹⁷ Jahua cielopi causarinamandaca Bibliapica ashtahuan yuyaicunatami yachachin. Bibliapica ninmi: ‘Huañushcacuna ima tucunatapash yachachunmi munanchi. Jesús huañushpa causarishcatapashmi crinchi. Chashnallatami Taita Diosca paita crishpa huañushcacunatapash causachinga’ nishpa. Caitapashmi nin: ‘Jesús tigramuna [o mandai callarina] punllacaman ñucanchi causanajushpaca, huañushcacunataca na ñaupashpa, jahua pachaman rinachu canchi. Jesusca caparishpa mandashcahuanmi jahua pachamanda urai shamunga’ nishpa. Caitapashmi nirca: ‘Shina shamujpimi, Cristota crishpa huañushcacunaca punda causaringa. Chai jipaca, ñucanchi causajcunata caipi quedashcacunatami paicunahuan tandachishpa, Jesushuan jahua huairapi tuparingapaj fuyupi apanga. Shina apajpimi, Jesushuan causaita causagrishun’ nishpa (1 Tes. 4:13-17).

¹⁸ Pundapica Jesús mandai callarishcamanda asha tiempo jipami huaquin ungidocunaca jahua cielopi causangapaj causachi tucurca. Cutin Ninan Manllanai Llaqui Punllacunapi cai alpapi causanajuj ungidocunaca ‘fuyupi apai’ tucunga. Bibliapica ninmi, ‘fuyupi apai’ tucushcacunaca ‘na huañungachu’ nishpa. Caica ¿imatata ningapaj munan? Paicuna huañushpa causachi tucungapaj na unaita shuyanatami nisha nin. Chaimi ‘tucuri trompetata huacachijpi ñavita ñapash vichashpa ñapash pascaipishna, mushujman tigrachi tucunga’ (1 Cor. 15:51, 52; Mat. 24:31).

19. Paraíso alpagupi causachi tucushcacunaca ¿imamandata ashtahuan ali causaita japinga?

¹⁹ Cunanbi Jehovata ali sirvijcunamandaca ashtacacunaca Jesushuan jahua cielopi mandangapaj agllashca ungidocunaca na canllu. Paicunaca Jehovapa punlla chayamujpi cai nali mundota tucuchinatami shuyanajun. Jehovapa punlla ima hora chayamunataca nipi na yachanllu. Shinapash chai punlla ñalla chayamunatami Bibliapica ricuchin (1 Tes. 5:1-3). Chai jipaca, ashtaca millón gentecunami paraíso alpagupi causangapaj causaringa. Chaimi ‘ashtahuan ali causaita japinga’ (Heb. 11:35). ¿Imamandata shina nipanchi? Punda tiempopi causachi tucushcacunaca cutinmi huañurca.  Cutin paraíso alpagupi causachi tucushcacunaca ñana huañungachu. Ashtahuangarin jucha illaj tucushpami para siempre causanajunga.

20. Shamuj punllacunapi huañushcacunaca causarinapillata causarinataca ¿imamandata seguro capanchi?

²⁰ Bibliapica jahua cielopi causarinamandaca ninmi, ‘paicuna causarinapillatami causaringa’ nishpa (1 Cor. 15:23). Shinaca cai alpapi causarijcunapash causarinapillata causarina cashcatami confiana capanchi. Shinapash tapurinchipashchari: “Cunan punllacunapi huañushcacunaca ¿ima horashi causaringa? ¿Paicunapa amigocuna, familiacuna chasquichunllu Jesús cai alpapi mil huatacunata mandai callarijujpi causaringa? Punda tiempopi Diospa llactata ñaupaman pushaj jaricunahuanga ¿imashi pasanga? ¿Diosta sirvijcunata ayudachunllu paicunatara pundapi causachinga? Diosta na sirvij gentecunahuanga ¿imata pasanga? ¿Paicunaca ima hora, maipishi causaringa? Imashinapacha tucunata na yachashpapash, na yapata chaicunapi preocuparijunachu capanchi. Chaipa randica chai punllapi ima pasanata ricungapami shuyana capanchi. Chai punllacunapi Jehová Dios imata rurajta ricushpaca ninandami cushijushun.

21. ¿Ima esperanzatata ñucanchipash charipanchi?

²¹ Chai punlla chayamungacamanga Jehovapi shinlli feta charingapami ashtahuan esforzarina capanchi. Jehová Diosca paipa yuyaipi cajcunataca Jesusmandami causachisha nishca (Juan 5:28, 29; 11:23). Jesusca nircami, Abrahán, Isaac, Jacobpash Diospaca causanajuj shinami can nishpa. Shina nishpaca huañushcacunata Jehová Dios causachi ushashcatami ricuchijurca (Luc. 20:37, 38). Chaimandami ñucanchipash apóstol Pabloshna ni ushapanchi: “Taita Dios causachinatami cushijushpa shuyajuni” nishpa (Hech. 24:15).