1, 2. Trabajomanda parlashpaca ¿imatata ashtaca gentecunaca yuyan?

ASHTACA gentecunaca ali trabajotami charini yashpami importante sintirin, cutin yangalla trabajotami charini yashpaca na importante sintirinllu. Huaquin llactacunapicarin, pitapash rijsishcandimi tapun, quiquinga ¿imapita trabajapangui? nishpa.

² Huaquinbica Bibliapipashmi huaquin gentecuna imapi trabajashcata parlan. Huaquin ejemplocunata ricupashun. Mateoca ‘impuestocunata japijmi’ carca. Simonga animal ‘carata jacushpa chaquichijmi’ carca. Lucasca ‘juyashca jambij doctormi’ carca (Mateo 10:3; Hechos 10:6; Colosenses 4:14). Cutin huaquinbica, Jehová Diosta sirvingapaj huaquin gentecuna imata rurashcatami Bibliapica parlan. Huaquin ejemplocunatapash ricupashun. Davidca reymi carca. Eliasca profetami carca. Cutin Pabloca apostolmi carca. Paicunaca Jehová Dios mingashca responsabilidadcunataca tucui shunguhuanmi alicachirca. Ñucanchicunapash Jehová mingashca responsabilidadcunataca tucui shunguhuanmi alicachina canchi.

3. ¿Imamandata mayorlla huauquicunaca jovenlla huauquicunata yachachina can? (Callari dibujota ricupangui).

³ Ñucanchicunaca Jehová Diosta sirvinatapash, pai mingashca responsabilidadcunatapash tucui shunguhuanmi alicachinchi. Chaimandami ashtacacunaca Jehová mingashca responsabilidadcunata pacta chishpa catingapaj munanchi. Shinapash mayorlla tucushpaca, joven cashpa rurashca cosascunataca ñana rurai ushanchichu (Eclesiastés 1:4). Chaimandami huaquin llaquicunata charinchi. Cunan punllacunapica ali villaicunata villachinaca ashtahuanmi mirajun. Jehovapa organizacionbash shuj shuj gentecuna ali villaicunata uyachunmi mushuj aparatocuna tiashcata aprovechan. Shinapash mayorlla huauquicunapaca mushuj cosascunata yachajunaca shinllimi can (Lucas 5:39). Shinallata tucuicunallatami mayorlla tucushpaca pundashna shinlli caitaca na ushanchi, shaijunchillami (Proverbios 20:29). Chaimandami mayorlla huauquicunaca jovenlla huauquicuna ashtahuan responsabilidadcunata pactachichun yachachina can (“¿Imatata nisha nin?” nishca recuadrota ricupangui) (Salmo 71:18, liingui).

4. ¿Imamandata huaquingunapaca shujcunaman responsabilidadcunata minganaca shinlli can? (“ Shujcunaman responsabilidadcunata cuna shinlli cajpica ¿imatata rurashun?” nishca recuadrota ricupangui).

⁴ Huaquinbica responsabilidadta charij huauquicunapaca jovenlla huauquicunaman shuj responsabilidadcunata minganaca shinllimi can (“¿Imatata nisha nin?” nishca recuadrota ricupangui). Huaquin huauquicunaca paicuna alicachishca responsabilidadcunata saquinami cani yashpa, o shujcunami ñuca alicachishca responsabilidadcunataca ruranga yashpami ashtacata llaquirin. Huaquinbicarin, paicuna pactachijushca responsabilidadcunataca shujcunaca na ali pactachi ushangachu yashpami preocuparin. Cutin huaquinbica shujcunata yachachingapaca na tiempota charinichu yanmi. Jovenllacunapash paicunaman shuj responsabilidadcunata na cujpica, na yapata preocuparijunachu can.

5. ¿Ima tapuicunatata cai temapica yachajupashun?

⁵ ¿Imamanda, imashinata mayorllacunaca jovenllacuna ashtahuan responsabilidadcunata charichun ayudana can? (2 Timoteo 2:2). ¿Imamandata jovenllacunapash mayorllacuna yachachijujpica yachajuna munaihuan, ali yuyaihuan yachajuna can? Chaipaca, rey Davidpa churi shuj jatun responsabilidadta chasquijpi rey David imashina ayudashcata ricupashun.

6. a) Rey Davidca ¿imatata rurangapaj munarca? b) Shinapash ¿imatata Jehová Diosca nirca?

⁶ Davidca contracuna catiriashpa llaquichijpimi ashtaca huatacunata shuj shuj ladocunapi pacajushpa causarca. Jipamanga rey tucushpami Davidca shuj jatun juyailla huasipi causajurca. Chaimandami rey Davidca profeta Natandaca nirca: ‘Ricui ñucaca cedro caspicunahuan rurashca huasipimi causajuni. Ashtahuangarin Mandaj Dioshuan ari nishpa escribishcata alichishca arcaca cortina ucupillami tiajun’ nishpa. Davidca tucui shunguhuanmi Jehová Diospa huasita rurangapaj munarca. Chaimandami profeta Natanga nirca: “Tucui imata rurangapaj cambaj shungupi yarijushcataca rurailla. Taita Diosca canhuanmi” can nishpa. Natán shina nijpipash Jehová Diosca, paipa huasita rey David rurachunga na munarcachu. Chaimandami profeta Natandaca Davidman cashna nichun cacharca: “Ñuca causana huasitaca, canga na shayachinguichu” nishpa. Jehová Diosca bendiciashpami catisha nishpapash Davidtaca nircami, canba churimi ñuca huasitaca ruranga nishpa. Jehová Dios shina nijpica ¿imatata rey Davidca rurarca? (1 Crónicas 17:1-4, 8, 11, 12; 29:1).

7. Jehová Dios na nijpica ¿imashinata rey Davidca Jehovapa decisionda respetashcata ricuchirca?

⁷ Davidca tucui shunguhuanmi Jehová Diospa huasita rurangapaj munarca. Chaimandami ñuca huasitaca na ruranguichu nijpica Davidca ashtacata llaquirishcanga. Shinapash, paipa churi Salomón Jehová Diospa huasita rurachunga ashtacatami ayudarca. Davidmi trabajadorcunata aliguta organizarca, jirruta, cobreta, orota, jatun racu ali caspicunata tandachishpapash ayudarca. Shinapash ¿gentecuna paita alicachichunllu rey Davidca Jehovapa huasita rurashpa Salo mondaca ayudarca? Na. Jipamanga rey David rurashpa ayudashca huasitaca, Salomón rurashca Diospa huasi nishpami gentecunaca rijsin carca. Ashtahuangarin, rey Davidca Salomondaca nircami: ‘Ñuca huahualla, Mandaj Diosca canhuan cachun. Imata ruranapipash tucuimi ali llujshinga. Shinallata canda Mandaj Taita Diospa huasigutaca Dios imashina mandashcashnallata shayachingui’ nishpa (1 Crónicas 22:11, 14-16).

8. a) ¿Imamandashi Davidca pensashcanga, Salomonga Jehovapa huasita ruraitaca na ushangachu nishpa? b) ¿Imatata rey Davidca rurarca?

⁸ (1 Crónicas 22:5, liingui). Rey Davidca Jehovapa huasi ‘aligupacha juyaillagu’ cachunmi munarca. Rey Davidpa churi Salomonbash ‘chairalla huambragumi’ carca. Chaicunamandami rey Davidca pensashcanga, Salomonga Jehovapa huasita ruraitaca na ushangachu nishpa. Shinapash Jehová Diospa huasita rurachun, Jehovallata Salomonda ayudanataca Davidca seguromi carca. Chaimandami rey Davidca imapi ayudai ushashcapi paipa churitaca ayudarca.

9. Paicuna charishca responsabilidadcunata shujcuna pactachijujta ricushpa cushijungapaca ¿ima ejemplopita mayorllacunaca pensarina can?

⁹ Mayorlla huauquicunaca paicuna ruranajushca huaquin responsabilidadcunata ashtahuan jovenllacunaman mingana cashpaca na desanimarinachu can. Cunan punllacunapica Jehová Diospa mingashcata pactachinaca minishtirishcapachami can. Chaimandami mayorlla huauquicunaca jovenlla huauquicunaman yachachina can. Shuj ejemplopi pensaripashun. Taitacuna carrota charijpica, uchilla huahuacunaca taitacuna imashina manejajtaca ricuitallami ricun. Shinapash, chai uchilla huahua viñajpica imashina manejanatami taitaca yachachi callarin. Shinami tiempohuanga licenciatapash llujchishpa churillata carrotaca manejai callarin. Manejai callarijpipash taitaca paipa churi ashtahuan ali manejachunmi huaquin yuyaicunata cun. Jipamangarin, shuj ratotaca taita chaishuj ratotaca churimi carrotaca manejan. Taita ña mayorlla tucujpicarin  churillatami carrotaca yalillata manejan. Shinaca pensaripai ¿shina pasajpica taitaca culirangachu? Na. Churillata manejashpa shuj shuj pushtucunaman apajpica taitacunaca cushijunmi. Congregacionbipash shinallatami can. Mayorllacuna yachachijpi jovenlla huauquicuna Jehovapa organizacionbi ashtahuan responsabilidadcunata chasquijpica, mayorlla huauquicunaca ashtacatami cushijun.

10. Jatun tucunamanda, ashtahuan autoridadta charinamandaca ¿imatata Moisesca yuyan carca?

¹⁰ Shujcuna responsabilidadcunata chasquijpica na envidiajunachu canchi. Chaipa randica Moisespa ejemplotami catina canchi. Shinaca, huaquin israelitacunapash profetacuna cangapaj munajpi Moisés imata nishcata ricupashun (Números 11:24-29, liingui). Huaquin israelitacuna profeta cangapaj munajpimi Josueca jarcangapaj munarca. Shinapash Moisesca nircami: ‘¿Canga ñucata juchachishpachu chashna nijungui? Mandaj Dios paipa espirituta paicunapi churajpi, tucuicuna [profetacuna] tucushpapash alimi canman’ nishpa. Moisesca Jehová Dios tucuita ñaupaman pushajujtaca alimi yacharca. Chaimandami Moisesca pailla jatun tucunapa randi, pailla ashtahuan autoridadta charinapa randica Jehovata tucuilla sirvijcuna profetacuna cachun munarca. Ñucanchicunapash shujcuna responsabilidadcunata chasquijpica ¿cushijunchichu?

11. Pai charishca responsabilidadcunata shuj huauqui pactachi callarijpica ¿imatata shuj mayorlla huauquica nirca?

¹¹ Ashtaca mayorlla huauquicunami shinllita esforzarishpa ashtaca huatacunata Jehovata sirvinajushca. Shinallata, jovenlla huauquicunatapashmi ashtahuan responsabilidadcunata pactachichun ayudanajushca. Shuj ejemplota ricupashun. Peter shuti huauquica 74 huatacunatami tiempo completopi sirvijushca. Paica 35 huatacunatami Europa jatun llactapa shuj Betelpi sirvijushca. Ashtahuangarin, tauca huatacunatami Departamento de Servicio nishcapi superintendente carca. Shinapash jipamanga, paillata yachachishca Paul shuti jovenlla huauquimi Departamento de Serviciopi superintendente tucurca. Chaita ricushpaca ¿Peterca llaquirijurcachu? Na. Paica ninmi: “Ali yachajushca huauquicuna ashtahuan responsabilidadta chasquishpa ali pactachinajujta ricushpaca ashtacatami cushijuni” nishpa.

12. ¿Imatata Rehoboamba ejemplomandaca yachajupanchi?

¹² Rey Salomón huañujpica paipa churi Rehoboam shutimi rey tucurca. Rehoboamga llactata imashina mandanata yachangapami mayorllacunapa consejota mascarca. Shinapash mayorllacunapa consejotaca na cazurcachu. Chaipa randica paihuan igual viñashca jovengunapa consejota catishpami jatun llaquicunapi urmarca (2 Crónicas 10:6-11, 19). Shinaca ¿imatata yachajun chi? Ñucanchita yali experienciata charijcunapa o mayorllacunapa consejota mascashpa respetohuan uyanaca alimi can. Shinapash, jovenlla huauquicuna responsabilidadcunata pactachi callarinajushpaca, mayorllacuna imashina rurajushcatapacha catinataca na minishtinllu. Shina cashpapash na ñapash pensanachu can, mayorllacunapa yuyaicunata catinaca nalichu canga nishpa.

13. Mayorlla huauquicunahuan Jehovata sirvinajushpaca ¿imatata jovenlla huauquicunaca rurana can?

¹³ Huaquinbica mayorlla huauquicunapa o experienciata charij huauquicunapa trabajota ricuna responsabilidadtami jovenlla huauquicunaca chasquin. Shina cajpica, mayorlla huauquicunamanda yachajunaca alimi can. Peter shuti huauquipa ejemplota cutin yaripashun. Paillata yachachishca Paul shuti huauquimi Peterpa randica, Departamento de Serviciopi superintendente tucurca. Paulca nircami: “Ñucaca Peter imata nijta yachangapami siempre imatapash tapun carcani. Departamento de Serviciopi trabajanajuj shuj huauquicunatapash paipa consejota mascachunmi animan carcani” nishpa.

14. Apóstol Pablopash Timoteopash Jehovata igual sirvinajushcamandaca ¿imatata yachajupanchi?

¹⁴ Apóstol Pabloca ashtaca huatacunahuanmi Timoteopaca mayor carca. Shinapash ashtaca huatacunatami paicunaca Jehová Diosta igual sirvinajurca (Filipenses 2:20-22, liingui). Apóstol Pabloca Corinto llactamanda huauquicunataca nircami: ‘Timoteotami cangunapaman cachamurcani. Paica Jesuspi alipacha crishpami ñuca juyashca huahuashnalla. Shinallata Cristota catishpa ñuca imashina causajujtapash, paimi cangunaman yarichijunga. Chaitallatami maipi cashpapash, tucuicunaman yachachijuni’ nishpa (1 Corintios 4:17). Imashinami ricupanchi, apóstol Pablopash Timoteopash igualmi Jehová Diostaca ali sirvinajurca, randimandami ayudarinajurca. Pabloca ‘Cristota catishpa imashina causanata’ Timoteoman yachachingapami tiempota llujchirca. Timoteopash Pablo yachachijpica ali yachajungapami esforzarirca. Ashtahuangarin, Pabloca Timoteotaca ashtacatami juyarca. Corinto llactapi huauquipanicunata Timoteo juyashpa tratanataca Pabloca seguromi carca. Cunanbi ancianocunapash, apóstol Pablopa ejemplota catishpami shuj huauquicunapash congregacionbi ñaupaman pushachun yachachina can.

15. Imapash cambiocunata rurana tucujpica ¿imashinata Romanos 12:3-5 shimicunaca ayudan?

¹⁵ Cunan punllacunapica alipacha punllacunapimi causanajunchi. Cai Alpapi Jehovapa organizacionga ashtacatami mirajun. Chaimandami ashtaca cambiocuna tiashpa catinga. Huaquin cambiocuna tiashcamandami ñucanchi causaipipash cambiocunata rurashpa catina tucushun. Shinapash huaquinbica na facilchu canga. Chai cambiocuna ama yapa shinlli ricurichunga, humildemi cana canchi. Ñucanchipa munaicunata pundapi churanapa randica, Jehovapa munaitami pundapi churana canchi. Shina rurashpami tucuilla huauquipanicunahuan shujllashna tandanajushca caita ushashun. Roma llactamanda huauquipanicunataca apóstol Pabloca nircami: ‘Na cangunapaj munailla alicachishpa jariyanachu canguichi’ nishpa. Chaita nishca jipaca, apóstol Pabloca gentecunapa cuerpopi partecunahuan chimbapurashpami nirca, imashinami cuerpopi partecunaca imatapash ruran, shinallatami congregacionbica tucuicunallata imatapash rurangapaj minishtirishcacuna canchi nishpa (Romanos 12:3-5).

16. Jehovapa organizacionbi tucuicuna tranquilo, shujllashna tandanajushca cachunga ¿imatata cada uno ruraita ushapanchi?

 ¹⁶ Jehovata sirvijcunaca tucuicunami Diospa Reinota apoyashpa, ñucanchi imata rurana cashcata rurashpa catingapaj munanchi. Mayorllacunaca jovenlla huauquicunata yachachishpami catina can. Jovenllacunapash humilde cashcata ricuchishpa, respetota ricuchishpami ashtahuan responsabilidadcunata chasquita ushan. Cazado huauquicunaca, cambiocuna tiajpipash paicunapa huarmicuna apoyashpa catishcamandami ashtaca agradicin. Chai huauquicunapa huarmicunaca Priscila shuti huarmigupa ejemplotami catinajun. Bibliapi nishca shinaca, Priscilaca siempremi paipa cusa Aquilataca ayudarca (Hechos 18:2).

17. ¿Imata rurachunda Jesusca paipa catijcunataca yachachirca?

¹⁷ Jesusca siempremi shujcunata yachachingapaj munarca. Chaimandami shujcunaman yachachingapaca Jesuspa ali ejemplotami catina canchi. Jesusca pai imata rurai callarishcata shujcuna rurashpa catina cashcataca alimi yacharca. Shinallata paipa catijcuna juchayucuna cashcatapash alimi yacharca. Shinapash paipa catijcuna ali villaicunata ashtahuan villachi ushanataca tucui shunguhuanmi Jesusca confiarca (Juan 14:12). Chaimandami paipa catijcunataca aliguta yachachirca. Shinami paipa catijcunaca shuj shuj llactacunaman rishpa aliguta villachirca (Colosenses 1:23).

18. a) Shamuj punllacunapica ¿ima bendiciondata Jehová Diosca cunga? b) Cunan punllacunapica ¿ima bendiciondata charipanchi?

¹⁸ Jesús huañujpica Jesusta causachishpami Jehová Diosca shuj responsabilidadcunatapash curca. Ashtahuanbash, ‘ushaita charijcunata, jatun mandajcunata, cati mandajcunatapash, tucuita mandachunmi’ Jesusmanga ushaita curca (Efesios 1:19-21). Armagedón punlla nara chayamujpillata Jehovata ali sirvishpa ñucanchicuna huañujpica, Jehová Diosca ñucanchicunata causachishpami paraíso Alpagupica shuj responsabilidadcunatapash cunga. Chai responsabilidadcunahuanga cushillami cashun. Shinapash cunan punllacunapica ali villaicunata villachina, yachachina bendiciondami charinchi. Shinaca jovenllacuna cashpa, mayorllacuna cashpapash cada unomi ñucanchiman ‘imata rurachun mingashcataca ashtahuan rurashpa catina canchi’ (1 Corintios 15:58).