1, 2. ¿Imamandata Jehová Diosca Saúl rey cashpa catichunga ñana munarca? (Callari dibujota ricupangui).

SAULTA rey cachun Jehová Dios agllashca punllacunapica Saulca Israel llactataca na mandai ushashachu nircami (1 Samuel 9:1, 2, 21; 10:20-24). Shinapash rey tucushpaca jariyashcami tucurca. Shuj punllacarin, ashtaca huaranga filisteocunami israelitacunahuan macanajungapaj shamunajurca. Chaimi profeta Samuelca Saultaca nirca, Jehová Diosman shuj sacrificiota rurangapaj shamugrinimi nishpa. Shinapash Samuel nara chayajpimi ashtaca israelitacunaca ninanda manllarishpa Saultaca saquishpa rirca. Saulpash Samuelta shuyashpa catinapa randica paillatami Jehová Diosman sacrificiocunata rurarca. Saulca sacrificiocunata rurana derechotaca na charircachu. Chaimandami Jehová Diosca Saultaca nalicachirca (1 Samuel 13:5-9).

² Samuel chayashpaca, imamandata Jehová Diosta na cazurcangui nishpami Saultaca rimarca. Shinapash Saulca nalita rurashcataca na cuenta japingapaj munarcachu. Ashtahuangarin, pretextocunata churashpami shujcunapa culpamandami shina rurarcani nirca (1 Samuel 13:10-14). Chai punllamandami Saulca jatun tucushpa ashtaca nali cosascunata rurai callarirca. Chaimandami Jehová Diosca Saúl rey cashpa catichunga ñana munarca (1 Samuel 15:22, 23). Imashinami  ricunchi, Saulca callaripi ali cashca cashpapash, jipamanga nalicunatami rurarca (1 Samuel 31:1-6).

3. a) Cunanbi ashtaca gentecunaca ¿imatata yuyan? b) ¿Ima tapuicunatata cai temapica yachajupashun?

³ Cunanbi ashtaca gentecunaca jariyashpami yuyan, tucuipi ali ricuringapaj munashpaca imatapash na ushanichu nishpaca nunca na ninachu canchi, tucuitami ari nina canchi nishpa. Chai gentecunacarin jariyashpami nin, ñucanchimi shujcunamanda ashtahuan yali canchi nishpa. Shuj ejemplota ricupashun. Shuj rijsishca actor, politicoca jariyashpami nirca: “Ñucaca siempremi tucuita ari nini, imatapash na ushanichu ninataca na gushtanichu. Ima horapash na ushanichu ningapaca nunca na munanichu” nishpa. Shinapash ¿imamandata Jesusta catijcunaca na jariyashpa humilde cana canchi? Humildecunaca ¿imashinata can? Chai tapuicunataca cai temapimi yachajushun. Cutin cati temapica, shinlli cajpipash humilde cashpa catinatami yachajushun.

4. Jariyashcacunaca ¿imatata ruranlla?

⁴ Bibliapica ninmi, humildecunaca na jariyanllu nishpa (Proverbios 11:2, liingui). Jariyashcacunaca autoridadta o derechota na charishpapash, ñapash fiñarimanda o pacienciata na charimandami imatapash ruranlla. Huaquinbica tucuicunallatami juchayucuna caimandaca jariyashpa imatapash rurashcanchi. Shinapash imashinami rey Saulpa ejemplopi yachajurcanchi, jariyana costumbreta charijcunataca nalicachishpami Jehová Diosca ricun. Salmo 119:21pica ninmi: ‘Jariyajcunataca ninanda nalicachishpami’ ricun nishpa. Shinapash ¿imamanda nalicachishpa ricun?

5. Jariyashcacunaca ¿ima quimsa llaquicunapita urman?

⁵ Jariyashca cashpaca jatun llaquicunapimi urmashun. ¿Ima llaquicunapita urmashun? Quimsa yuyaicunata ricupashun. Pundapica, autoridadta na charishpapash imatapash rurashpaca, shujcunahuanrami problemacunata charishun (Proverbios 13:10). Shinallata, jariyashpa imatapash rurashcata shujcuna cuenta japijpica ñucanchillatami pingai tucushun (Lucas 14:8, 9). Ashtahuangarin, ñucanchita Mandaj Jehová Diosta na respetashcatami ricuchinajushun. Imashinami ricunchi, ñucanchillata ama llaqui apachunmi Jehová Diosca humildemi cana canguichi nin.

6, 7. Humildecunaca ¿imashina can?

⁶ Humildecunaca na jariyashpa jatun tucunllu, shujcuna paicunamanda ashtahuan ali cashcatami yuyan (Filipenses 2:3). Humildecunaca na tucuita rurai ushashcata intindishpami na tucuita ari nin, pandarishpapash pandarishcanimi nin. Ashtahuangarin, shujcunapa yuyaicunatapash ali uyashpami, paicuna imata nijtapash yachajungapaj munan. Humildecunataca alicachishpami Jehová Diosca ricun.

⁷ Bibliapica yachachinmi, humildecunaca imata na rurai ushashcata paicunallata cuenta japishpami, imatapash rurangapaj na autoridadta charishcata intindin nishpa. Shinami humildecunaca shujcunatapash respetashpa ali tratai ushan.

8. Humilde cashpa catingapaca ¿imacunatata na rurana capanchi?

⁸ Na cuidadota charishpaca ñucanchipashmi jariyashpa imacunatapash rurai callarinchiman o yuyai callarinchiman. Chaimanda pensaripai. ¿Ñucanchicunallata congregacionbi res ponsabilidadcunata charimanda, o ñucanchi rijsishcacuna congregacionbi responsabilidadta charijpichu importante sintiri callarishcanchi? (Romanos 12:16). Cutin huaquinbica ¿shujcuna ñucanchita alicachishpa ricuchunllu imatapash rurai callarishcanchi? (1 Timoteo 2:9, 10). Huaquinbicarin ¿shujcunata mandanshnachu ni callarishcanchi, cashnami rurana cangui, chashnaca na ruranachu cangui nishpa? (1 Corintios 4:6).

9. ¿Imamandata huaquingunaca jariyashcacuna tucushca? Bibliapi shuj ejemplomanda parlapai.

⁹ Ñucanchi nali munaicunata na jarcashpaca jariyashpami imatapash rurashun. Ashtacacunaca shujcuna paicunata alicachichun munaimanda, envidiamanda, culiramandami jariyashcacuna tucun. Bibliapi nishca shinaca, Absalón, Uzías, Nabucodonosormi chashna llaquicunapi urmarca. Chaimandami Jehová Diosca humilde canata paicunamanga yachachirca (2 Samuel 15:1-6; 18:9-17; 2 Crónicas 26:16-21; Daniel 5:18-21).

10. ¿Imamandata shujcunataca na yangata imatapash ninalla capanchi? Bibliapi shuj ejemplomanda parlapai.

¹⁰ Huaquingunaca shuj shuj cosascunamandami autoridadta na charishpapash imatapash ruran. Abimelecpa, Pedropa ejemplota yaripashun (Génesis 20:2-7; Mateo 26:31-35). Paicunaca ¿jariyashcacunachu carca? ¿Na tucuita yachaimandachu imatapash nirca o rurarca? ¿Na aliguta pensarimandachu imatapash rurarca? Ñucanchicunaca gentecuna paicunapa shungupi imata pensajujtaca na yachai ushanchichu. Chaimandami shuj gentecunataca na yangata imatapash ninalla canchi (Santiago 4:12, liingui).

11. Humildecunaca ¿imatata ali intindin?

¹¹ Jehová Diosca tucuilla ali cachun munashpami, paipa organizacionbica imagutapash rurachun cada unota churashca. Chaimandami congregacionbica tucuicuna minishtirishcacuna canchi. Humildecunaca congregacionbi Jehová Dios imapa churashcataca alimi intindin. Tucuicunallatami shuj shuj cosascunata ali rurai ushana bendicionda Jehová Diosmanda chasquishcanchi. Chaimandami Jehová Dios carashca bendiciondaca Jehová Dios munashcashna utilizana canchi (Romanos 12:4-8). Humilde cashpaca imaguta ali rurai ushashpapash Jehovata alabana munaihuan, shujcunata ayudana munaihuanmi rurashun (1 Pedro 4:10, liingui).

12, 13. ¿Imamandata huaquinbica ñucanchi responsabilidadcuna cambian?

¹² Tiempohuanga Jehovata sirvijcunapa responsabilidadcunaca cambiaita ushanmi. Jesuspa ejemplota ricupashun. Pundapica jahua pachapimi Jesusca paipa Taitahuanlla causarca (Proverbios 8:22). Paimi Jehová Diostaca jahua pachatapash, angelcunatapash, cai pachatapash, gentecunatapash rurashpa ayudarca (Colosenses 1:16). Jipamanga, cai Alpamanmi Jehová Diosca Jesusta cachamurca. Shinami Jesusca cai Alpapi nacirirca viñarcapash (Filipenses 2:7). Huañushca jipaca causarishpami Jesusca jahua cieloman cutin tigrarca. 1914 huatapica Diospa Reinopimi Rey tucurca (Hebreos 2:9). Shamuj punllacunapicarin, Diospa Reinopimi huaranga huatacunata mandanga. Chai jipami tucuita mandana autoridadtaca Jehová Diosman tigrachinga. Shinami Jehová Diosca tucuita mandanga (1 Corintios 15:28).

¹³ Ñucanchi causaipipash cambiocuna tiaita ushanmi. Huaquinbica ñucanchillata imapash decisiongunata agllashcamandami responsabilidadcunata cambiana tucunchi. Huaquin ejemplocunata ricupashun. Solterocuna cashpaca huaquinbica cazaranatami decidinchi, o cazadocuna cajpica huahuacunami shamun. Huaquinbicarin Jehovata tiempo completopi ashtahuan sirvingapami huaquin cambiocunata ruranchi. Cutin huaquinbicarin, ñucanchi causaipi  cambiocuna ricurijpimi shuj responsabilidadcunata chari callarinchi. Chaimandami huaquinbica yapalla o ashatalla Jehová Diosta sirvi ushanchi. Shinapash, joven cashpa o mayorlla cashpa, ungushca cashpa o sano cashpapash ñucanchicuna imashina paita ali sirvi ushanata, imata rurai ushanataca alimi Jehová Diosca yachan. Chaimandami ñucanchicuna esforzarijujta ricushpaca ashtacata Jehová Diosca cushijun (Hebreos 6:10).

14. ¿Imashinata humildecunaca ima responsabilidadcunata chasquishpapash cushilla caita ushan?

¹⁴ Jehová Dios ima responsabilidadcunata cujpipash Jesusca cushijushpami pactachirca. Ñucanchipashmi Jehová Dios cushca responsabilidadcunataca cushijushpa pactachi ushanchi (Proverbios 8:30, 31). Humildecuna cashpaca congregacionbi ima responsabilidadta cujpipash, o imata rurachun mingajpipash cushijushpami chasquishun. Shujcuna ima responsabilidadcunata chasquijtapash na ricuriajushunllu. Chaipa randica ima responsabilidadta chasquishpapash, Jehová Diosmandami shamun yashpami chai responsabilidadtaca cushijushpa chasquishun. Shinallata humilde cashpaca, shujcunamanbash responsabilidadcunata Jehová Dios cushcatami yarishun (Romanos 12:10). Ashtahuangarin paicunata respetashpa apoyangapami esforzarishun.

15. ¿Imatata Gedeonmandaca yachajuita ushapanchi?

¹⁵ Gedeonba ali ejemplotapash ricupashun. Paica na tucuita ari nishpa humildemi carca. Shuj punllaca Jehová Diosca Gedeondaca mandarcami, Madián llactamanda gentecuna israelitacunata ama llaquichichunmi ayudana cangui nishpa. Shina nijpimi Gedeonga nirca: “Ricui, ñuca familiacunaca, Manasespaj aillu purapica, imagutapash na charijcunamari. Ñuca taitapaj huasi ucu purapica, ñucami tucuicunapaj jipa ca pani” nishpa (Jueces 6:15). Shina nishpapash Gedeonga Jehová Diospi confiashpami Jehová Dios imata mingashcataca chasquirca. Ashtahuangarin, Jehová Dios imata mingajushcata ali intindingapaj munashpami Jehová Diosta ayudahuai nishpa Gedeonga mañarca (Jueces 6:36-40). Gedeonga macanajunata na manllashpapash seguro cangapami munarca (Jueces 6:11, 27). Jipamanga gentecuna paita mandachun churangapaj munajpipash Gedeonga na munarcachu. Shinami Jehová Dios mingashcata pactachishca jipaca, paipa huasiman Gedeonga tigrarca (Jueces 8:22, 23, 29).

16, 17. Jehovata ashtahuan ali sirvingapaj munajcunaca ¿imacunapita aliguta pensarina can?

¹⁶ Mushuj asignacionda chasquishpa o Jehovata ashtahuan sirvingapaj esforzarijushpaca ¿jariyashcacuna cashcatachu ricuchinajunchi? Na. Bibliapica ninmi, Jehovata ashtahuan sirvingapaj, huauquipanicunata ashtahuan ayudangapaj esforzarinaca alimi can nishpa (1 Timoteo 4:13-15). Shinapash ¿mushuj responsabilidadcunata chasquimandallachu Jehová Diostaca ali sirvita ushanchi? Na. Jehovata sirvijcunaca tucuicunami ñucanchi causaipi Jesuspa ejemplota ashtahuan ali catingapaj esforzarina canchi. Shinallata, Jehová Diospa bendicionhuan imata ali rurai ushashpapash Jehovata ashtahuan ali sirvingapaj, shujcunata ashtahuan ayudangapami imatapash ashtahuan ali rurana canchi.

¹⁷ Humildecunaca shuj responsabilidadta nara chasquishpallatami chai responsabilidadta chasquishpa imatalla ruranata ricun. Ashtahuangarin, Jehová Diosta mañashpami pensarin, cai responsabilidadtaca pactachi ushagrinichu nishpa. Shinallata pensarinami can: “Cai responsabilidadta chasquishpaca ¿minishtirishca shuj cosascunatapash pactachishpa catingapaj tiempotapash, fuerzatapash charigrinichu? nishpa. Minishtirishca cosascunata ñana pactachi ushana cashpaca tapuripai: “¿Cunanbi charishca huaquin responsabilidadcunataca shujcunaman mingaita ushanichu?” nishpa. Shina aliguta pensarishpami humildecunaca, mushuj responsabilidadcunata na pactachi ushanata cuenta japinga. Shina cuenta japishpami huaquinbica na ashtahuan responsabilidadcunata chasquingapaj munanga.

18. a) Shuj mushuj asignacionda cujpica ¿imatata humildecunaca ruran? b) Humilde cachunga ¿imashinata Romanos 12:3pi shimicunaca ayudan?

¹⁸ Jehová Diosca paipa munaita rurashpapash humilde cachunmi munan (Miqueas 6:8). Chaimandami shuj mushuj asignacionda cujpica, Gedeonba ejemplota catishpa Jehová Diostaca mañana canchi, imatata rurasha ayudahuai nishpa. Ñucanchicunaca Jehová Dios Bibliapi imata nijta, paipa organizacionbi imata yachachijtami aliguta pensarina canchi. Shinallata na cunganachu canchi, Jehová Dios humilde cashcamanda, pai ñucanchita ayudajushcamandallami imatapash rurashpa paita sirvi ushanchi (Salmo 18:35). Humilde cashpaca na ñucanchipa yuyaicunatallachu ‘alicachishpa jariyanajushun’ (Romanos 12:3, liingui).

19. ¿Imamandata humilde cana capanchi?

¹⁹ Imashinami ricushcanchi, Jehová Diosmi Tucuita Ruraj Dios can. Paillami tucui Alpamanda ashtahuan jatun Dios can. Chaimandami ñucanchicunaca humilde cana canchi (Apocalipsis 4:11). Humilde cashpaca imata rurai ushashcata rurangapaj esforzarishpami cushilla cashun. Shinallata humilde cashpaca, ñucanchi huauquipanicuna imata yuyashcata, imashina sintirishcatapash respetashpami tucuilla huauquipanicunahuan shujllashna tandanajushca cashun. Humilde cashpaca, imatapash nara rurashpallatami aliguta pensarishpa jatun llaquicunapi na urmashun. Ashtahuangarin, Jehová Diosca humilde gentecunatami alicachishpa ricun. Imashinami ricushcanchi, humilde canaca minishtirishcapachami cashca. Cati temapica shinlli cajpipash humilde cashpa catinatami yachajupashun.