GÉNESIS capítulo 22pica ninmi, Taita Diosmi Abrahandaca shuj carulla pushtuman rishpa shuj sacrificiota rurachun mandarca nishpa. Génesis 22:6pica ninmi: ‘Abrahanga Diosman animalta cushpa rupachina yamdata japishpami, paipa churi Isaacman apachirca. Shinallata paipash ninata japichinata, cuchillotapash apashpami ishcandi rinajurca’ nishpa.

Chai punllacunapi gentecuna yamdata imashina japichishcataca Bibliapica na parlanllu. Shinaca ¿ninata japichishpachu rupajuj ninata Abrahanbash Isaacpash apashpa rirca? Bibliamanda alipacha estudiashca shuj runaca ninmi, rupajuj ninata apashpa carulla pushtuman apashpa rijpica ninaca huañunmanmi carca. Chaimandami, Abrahanbash Isaacpash ninata japichingapaj imata minishtishcacunata apashpa rishcanga nishpa.

Cutin Bibliamanda alipacha estudiashca shuj runacunaca ninmi, chai punllacunapica ninata japichinaca na facilchu carca nishpa. Chaimandami huaquin gentecunaca shuj gentecunapa rupajuj carbonda mañashpa ninataca japichin carca nishpa. Chai punllacunapica vecinocunatami mañan cashcanga. Cutin shuj runacunaca ninmi, Abrahanga nara rishpallatami rupajuj carbongunataca imagupipash churashpa aparianga nishpa. Ashtahuangarin ninmi, cadenahuan aisashpa rinalla mangagupishnami rupajuj carbongunataca churashpa aparianga nishpa (Isaías 30:14). Shinaca Abrahán ninata japichigrijushpaca, pai apashca rupajuj carbonguhuanllata, chaquishca uchilla yamdagucunahuallatami ninataca japichishcanga.