1. Jehová Diosca ¿imacunatata gentecunamanga cushca?

JEHOVÁ DIOSCA pensari ushachunmi gentecunataca rurarca. Pensari ushaimandami problemacunata arreglashpa jipaman imata ruranatapash pensari ushanchi (Proverbios 2:11, NM). Shinallata imata pensashcata pactachi ushachunmi Jehová Diosca gentecunata rurashca (Filipenses 2:13). Jehová Diosca concienciatapashmi gentecunamanga cushca. Concienciata charimandami ima ali cajta ima nali cajta cuenta japi ushanchi, juchamandapash caruyanchi, pandarishpapash ali ñanman tigraita ushanchi (Romanos 2:15).

2. Jehová Dios munashca shinaca ¿imatata rurana capanchi?

² Jehová Diosca ashtacatami ñucanchitaca juyan. Ñucanchicuna ali causachunmi munan. Chaimandami imata rurai ushashpapash ayudana munaihuan rurachun munan. Bibliapica ninmi: ‘Tucui imata rurana canba maquiman shamujpipash rurailla’ nishpa. Shinallata ninmi: “Ima aliguta maijanman rurai ushashpapash, tucuicunaman rurashunchi” nishpa. Ashtahuangarin ninmi: “Taita Dios cangunata ninanda juyashpa, shican shican imagutapash ru rai ushachun cangunaman carashcashnallatami, shujcunamambash aliguta rurana canguichi” nishpa (Eclesiastés 9:10; Gálatas 6:10; 1 Pedro 4:10). Imashinami ricupanchi, shujcunata ayudangapaj, ñucanchipa alipallata esforzarichunmi Jehová Diosca munan.

3. Gentecunaca ¿imacunatata na rurai ushapanchi?

³ Imata ali rurai ushashpapash na tucuita ñucanchillata rurai ushanchichu. Chaitaca alimi Jehová Diosca yachan. Huaquin ejemplocunata ricupashun. Tucuicunami juchayu nacirishca caimandaca juchata ruranchi, huañunchipash. Chaita cambiaitaca pipash na ushanchichu (1 Reyes 8:46). Shinallata gentecunaca cada unomi ima decisionda agllangapaj munashpapash agllanalla canchi. Chaimandami gentecuna paicunapa decisionda cambiachunga na pitapash obligai ushanchi. Ashtahuangarin, ashtacata yachajushca cashpa, ashtaca experienciata charishpapash Jehová Dioshuan igualaitaca na ushanchichu (Isaías 55:9).

4. ¿Imatata cai temapica yachajupashun?

⁴ Ñucanchicunaca siempremi Jehová Dios ñucanchi causaipi ñaupaman pushachun saquina canchi. Shinallata, ñucanchi na rurai ushashcacunapi Jehová Dios ayudanataca confianami canchi. Shinapash Jehová Diosca ñucanchi problemacunata arreglangapaj, shujcunata ayudangapaj imata ruranatapash pensarichunmi munan (Salmo 37:3, liingui) * (notata ricupangui). Ñucanchicunaca ‘Jehová Diospimi confiana canchi’, ima ‘ali cajtami rurana’ canchi, ‘paipi confiashcatapashmi tucuipi ricuchina canchi’. Shinapash ¿imashinata chaitaca rurashun? Chaita yachangapaca Noepa, rey Da vidpa, Jehovata ali sirvijcunapa shuj ejemplocunatapashmi cai temapica yachajupashun. Paicunaca Jehová Diospimi confiarca. Shinapash, paicuna imata na rurai ushashcapi preocuparijunapa randica, imata ali rurai ushashcapi ashtahuan preocuparishcatami yachajupashun.

5. Noeca ¿imashina punllacunapita causarca?

⁵ Bibliapica ninmi, Noepa punllacunapi gentecunaca shujcunata ‘ninanda llaquichishpa’, huainayashpami causan carca nishpa (Génesis 6:4, 9-13). Noeca chai nali gentecunata Jehová Dios tucuchinataca alimi yacharca. Shinapash, chai punlla chayamungacamanga gentecuna nalitalla ruranajujta ricushpami Noeca ninanda llaquirishcanga. Shina cashpapash, imata na rurai ushashcapi preocuparijunapa randica, imata rurai ushashcapi preocuparina cashcatami Noeca intindirca.

6, 7. a) ¿Imacunatata Noeca na rurai usharca? b) ¿Imashinata ñucanchicunapash Noeshna causanajupanchi?

⁶ ¿Imacunatata Noeca na rurai usharca? Noeca, Jehová Diosca nali gentecunata tucuchingrinmi nishpami villarca. Shinapash gentecuna paita uyachun obligaitaca na usharcachu. Shinallata, Jatun Manllanai Tamia uchalla chayamun nishpa imata ruraitapash na usharcachu. Noeca Jehová Dios paipa nishcata pactachishpa, nali gentecunata pai agllashca tiempopi tucuchinataca crishpami causarca (Génesis 6:17).

⁷ Ñucanchicunapash nali gentecunapurapimi causanchi. Paicunata Jehová Dios tucuchinataca alimi yachanchi (1 Juan 2:17). Chai punlla chayamungacaman ‘ali villaicunata’ villachishpapash, gentecuna ali villaicunata uyachunga na obligaita ushanchichu. Shinallata, ‘Ninan Manllanai Llaqui Punllacuna’ uchalla chayamuchun  nishpa imatapash ruraitaca na ushanchichu (Mateo 24:14, 21). Chaimandami Noepa ejemplota catishpa shinlli feta charina canchi. Nali gentecunata Jehová Dios ñalla tucuchinatapash confianami canchi (Salmo 37:10, 11). Jehová Dios agllashca punllacamanlla nali gentecuna tianataca seguromi canchi (Habacuc 2:3).

8. ¿Imapita Noeca ashtahuan preocuparirca? (Callari dibujota ricupangui).

⁸ ¿Imacunatata Noeca rurai usharca? Imata na rurai ushashcapi preocuparishpa desanimarinapa randica, imata rurai ushashcapimi Noeca ashtahuan preocuparirca. Noeca Jehová Dios nali gentecunata tucuchingrinmi nishpami villachishpa catirca (2 Pedro 2:5). Villachishpami Noeca shinlli feta chari usharca. Villachishca jahuapash, Jehová Dios nishcata cazushpami Noeca shuj arcata rurarca (Hebreos 11:7, liingui).

9. ¿Imashinata Noepa ejemplota cati ushapanchi?

⁹ Ñucanchicunapash Noeshnami ñucanchiman ‘imata rurachun mingashcata’ rurashpa ocupado canchi (1 Corintios 15:58). Huaquin ejemplocunata ricupashun. Huaquingunaca Tandanajui Huasicunata, o Jatun Tandanajui Huasicunata rurashpa, arreglashpami ayudan. Cutin huaquingunaca jatun tandanajuicunapi, Betelpi, Oficina de Traducciongunapimi ayudan. Shinapash ashtahuanbachaca villachinapimi ocupado canchi. Villachinami shamuj punllacunapi bendicionguna tianata seguro cachun ayudan. Shuj paniguca nircami: “Taita Diospa Reinopi ima bendicionguna tianata gentecunaman villachimandami cuenta japishcani, gentecunaca llaquilla causashcata, llaquicuna nunca na tucuringachu nishpa causashcata”. Ñucanchicunaca Taita Diospa Reinopi ima bendicionguna tianata villachishpami, shamuj punllacunapi ali causai tianataca ashtahuan seguro canchi. Ali causai tianata crimandami ashtahuan esforzarishpa cati ushanchi (1 Corintios 9:24).

10. Davidca ¿imatallata rurarca?

¹⁰ Rey Davidca shinlli fetami charirca. Chaimandami Jehová Diospash ashtacata Davidtaca juyarca (Hechos 13:22). Shinapash rey Davidca Bat-seba shuti cazada huarmihuan puñushpami jatun juchata rurarca. Ashtahuangarin, paipa juchata pacangapaj munashpami Bat-sebapa cusa Uriasta imashina huañuchinata pensarirca. Shina pensashpami soldadocunata mandajmanga, Urías huañuchunga macanajujcunapa ñaupajpi Uriasta churai nishpa shuj carta escribirca. Chai cartataca Uriasmanllatami apapai nishpa Davidca curca (2 Samuel 11:1-21). Jipamanga paipa juchataca Davidca ñana pacai usharcachu (Marcos 4:22). Shinaca ¿imatata Davidca rurarca?

11, 12. a) Juchata rurashca jipaca ¿imatata rey Davidca na rurai usharca? b) Ñucanchicuna tucui shunguhuan arripintirijpica ¿imatata Jehová Diosca ruranga?

¹¹ ¿Imacunatata Davidca na rurai usharca? Davidca juchata rurashca jahua imatapash na rurashca cuenda causaitaca na usharcachu. Paipa tucui causaipimi paipa juchacunamandaca llaqui apana carca (2 Samuel 12:10-12, 14). Chaimandami Davidca shinlli feta charina carca. Shinallata tucui shunguhuan arripintirijpi Jehová Dios perdonanatapash, llaquicunata aguantachun Jehová Dios ayudanatapashmi Davidca confiana carca.

 ¹² Juchayucuna nacirishca caimandaca tucuicunallatami pandarishpa juchata ruranchi. Chaimandami huaquinbica pandarinchi o jatun juchacunapi urmanchi. Pandarishca cashpa o jatun juchapi urmashca cashpapash, huaquinbica imatapash na rurashca cuenda causaitaca na ushanchichu. Nalita rurashca cashpaca tal vez llaqui apashunmi (Gálatas 6:7). Shinapash, Jehová Diospimi confiana canchi. Paica nishcami, tucui shunguhuan arripintirijpica, nalita ruraimanda llaqui apajujpipash aguantachun ayudashami nishpa (Isaías 1:18, 19; Hechos 3:19, liingui).

13. Jehová Diospa ñaupajpi cutin ali ricuringapaca ¿imatata Davidca rurarca?

¹³ ¿Imacunatata Davidca rurai usharca? Davidca Jehová Diospa ñaupajpi cutin ali ricuringapami munarca. Shinaca ¿imatata rurarca? Davidca Jehová ayudachunmi saquirca. Chaimandami Jehová Diospa profeta Natán consejashpa intindichijpica Davidca ali uyarca (2 Samuel 12:13). Shinallata Jehová Diosman shuj oracionda rurashpami paipa juchacunata villarca. Shina rurashpami Davidca ciertopacha Jehová Diospa ñaupajpi cutin ali ricuringapaj munajushcata ricuchirca (Salmo 51:1-17). Paipa juchacunamanda cutin cutin nali sintirijunapa randica, juchata rurana na ali cashcata intindishpami chai juchacunata cutin ama rurangapaj esforzarirca. Huañungacamanmi Davidca shinlli feta charirca. Chaimandami Jehová Diospash alicachishpa Davidca yarin (Hebreos 11:32-34).

14. ¿Imatata Davidpa ejemplomandaca yachajupanchi?

¹⁴ ¿Imatata Davidpa ejemplomandaca yachajunchi? Jatun juchata rurashpaca tucui shunguhuan arripintirishpami, ñucanchi juchata Jehová Diosman villashpa perdonahuai nishpa mañana canchi (1 Juan 1:9). Shinallata ancianocunahuanbash parlanami canchi. Ancianocunami Jehová Diospa ñaupajpi cutin ali ricurichun ayudaita ushan (Santiago 5:14-16, liingui). Jehová Dios ayudachun saquishpaca, Jehová Dios perdonanata confiashcatami ricuchinchi. Ashtahuangarin, juchata rurana na ali cashcata intindishpami Jehová Diosta ali sirvishpa catina canchi (Hebreos 12:12, 13).

15. ¿Imatata Anapa ejemplomandaca yachajuita ushapanchi?

¹⁵ Bibliapica Jehovata sirvijcuna Jehovapi confiashcata, llaquicunapi cashpa imata rurashcatami parlan. Quiquinga huaquingunapa ejemplota yaripanguipashchari. Shinapash cunanga Ana shuti huarmigupa ejemplota yaripashun. Paica huaquin huatacunatami huahuata na chari ushashpa causarca. Chai llaquita cambiaitaca na usharcachu. Shinapash paica Jehová Dios ayudanatami confiarca. Chaimandami Anaca tabernáculo nishca carpa huasigupi Jehovata adorashpa catirca, pai imashina sintirishcatapash Jehovaman parlashpami catirca (1 Samuel 1:9-11). Shina rurashpami Anaca ali ejemplota ñucanchiman saquishca. Shinaca, imapash ungüita charishpa o imapash llaquipi cashpa na imatapash rurai ushashpaca, tucui ñucanchi preocupaciongunatami Jehovapa maquipi saquishpa pai ayudanata confiana canchi (1 Pedro 5:6, 7). Shinallata tandanajuicunapi yachachishcacunata, Jehovapa orga nización cushca shuj ayudacunatapash ali aprovechangapaj esforzarishunchi (Hebreos 10:24, 25).

16. ¿Imatata taitamamacunaca profeta Samuelmandaca yachajuita ushan?

¹⁶ Jehovata ali sirvinajuj taitamamacunaca paicunapa huahuacuna Jehovata sirvinata saquijpica ¿imatata rurai ushan? Paicunaca profeta Samuelpa ejemplotami cati ushan. Samuelca paipa churicuna munai na munai Jehovata ali sirvishpa catichunga na obligai usharcachu (1 Samuel 8:1-3). Shinapash Jehovapa maquipimi saquirca. Jehovapa maquipi saquishpapash Samuelca Jehovata tucuipi cazushpa, Jehovapa munaita pactachishpa catingapami esforzarirca (Proverbios 27:11). Cunan punllacunapi ashtaca taitamamacunapa churicunapash Samuelpa churicunashnami Jehovata sirvinata saquishca. Shinapash taitamamacunaca Jesuspa chimbapuraita yarishpami, juchayucuna arripintirijpi Jehová Dios perdonangapaj shuyajujta confiana can (Lucas 15:20). Huahuacuna Jehovaman tigrangacamanga, Jehovata tucuipi cazushpa catingapami taitamamacunaca esforzarin. Shinallata, paicunapa ali ejemplota ricushpa huahuacuna congregacionman tigrachunmi munan.

17. ¿Imashinata viuda huarmigupa ejemploca ñucanchita ayudan?

¹⁷ Jesuspa punllacunapi causashca viuda huarmigupa ali ejemplotapash ricupashun (Lucas 21:1-4, liingui). Paica Jehovapa templopi nalita ruranajujtami ricurca. Shinapash paica na imatapash rurai ushanachu carca. Shinallata paica pobremi carca. Pobre causaita saquitapash na usharcachu (Mateo 21:12, 13). Shinapash Jehová Diospi confiaimandami Jehovata ali adorashpa catirca. Paica imatapash na mitsashpa caranata alicachishpami ‘ishcai yuraj culquigutalla’ charishpapash Jehovapa templopi churarca. Shinami chai viuda huarmiguca Jehovapi tucui shunguhuan confiashcata ricuchirca. Paica alimi yacharca, Jehovata pundapi churajpica Jehová Dios paipa tucui minishtishcacunata caranata. Ñucanchicunapash Jehová Diospa Reinota pundapi churajpi, Jehová Dios tucui ñucanchi minishtishcacunata caranataca seguromi cana canchi (Mateo 6:33).

18. Shuj huauquipa ali ejemplomanda parlapai.

¹⁸ Cunan punllacunapi ashtaca huauquipanicunaca imata na rurai ushashcapi preocuparinapa randica, imata rurai ushashcapi ashtahuan preocuparishpami Jehovapi confiashcata ricuchin. Cunanga Malcolm shuti huauquipa ejemplota ricupashun. Paica 2015 huatapi huañungacamanmi Jehovata tucuipi cazurca. Paipash paipa huarmipash ashtaca huatacunatami Jehovata sirvirca. Chai tucuilla huatacunapica huaquin tiempotaca cushillami causarca. Cutin huaquin tiempopica llaquicunatapashmi charirca. Paica nircami: “Cunan punllacunapi causanaca shinllipachami can, llaquicunaca cungashcapimi ricurinlla. Shinapash Jehová Diosca paipi confiajcunataca bendicianmi” nishpa. Shinaca ¿ima consejotata chai huauquiguca curca? Paica nircami: “Jehovata ashtahuan sirvishpa catingapami paita mañana canchi. Shinallata na rurai ushashcapi preocuparijunapa randica, imata rurai ushashcapi ashtahuan preocuparinami ali can” nishpa * (notata ricupangui).

19. a) ¿Imamandata 2017 huatapa textoca ali can? b) 2017 huatapa textotaca ¿imashinata quiquinba causaipi pactachigripangui?

¹⁹ Cunan punllacunapi causai ‘ashtahuan ashtahuan naliman’ tigrajpimi ashtahuan llaquicunata charishun (2 Timoteo 3:1, 13). Chaimandami llaquicunapi yapata preocuparijunapa randica, Jehovapi ashtahuan confiashpami ñucanchi imata rurai ushashcapi ashtahuanga preocuparina canchi. Chaimandami 2017 huatapa textoca cashna nijun: “Jehovapi confiashpami alita rurana cangui” (Salmo 37:3, NM).