1. ¿Imamandata punda tiempohuan, cunan tiempohuan ricujpica diferentepacha can?

PUNDA tiempohuan, cunan tiempohuan ricujpica diferentepachami can. ¿Imamandata shina nipanchi? Bibliapi nishca shinami Jehová Diosca ‘cai pachapi tiaj tucui llactacunamanda, aillupuracunamanda, gentepuracunamanda, shuj shuj shimita parlajcunamanda’ ashtaca gentecunata tandachijun. Chai ashtaca gentecunaca ‘ninan shinlli llactashnami’ can. 8 millón yali gentecunami cushijushpa ‘tutapash, punllapash Taita Diospa huasipi paita sirvinajun’ (Apoc. 7:9, 15; Is. 60:22). Cunanbimi ashtaca gentecuna Diosta, shuj gentecunatapash juyashcata ricuchinajun.

2. Diosmanda caruyashca gentecunaca ¿imashinata causan? (Callari dibujota ricupangui).

² Bibliapica ña nishcarcami, Diosmanda caruyashca gentecunaca paicunapilla pensarishpami causanga nishpa. Apóstol Pabloca cashnami escribirca: “Tucurimui punllacunapica” “paicunalla ali cangapaj munajcuna”, “charijyangapaj munajcuna”, “Taita Diostapash na juyashpa, yanga cushijushpa causanatalla juyajcunami” tianga nishpa (2 Tim. 3:1-4). Taita Diosta juyanapa randica paicunapilla yapata pensarishpa causaimandami gentecunaca na cushilla causaita ushan. Shina gentecunaca shujcunatapashmi llaquichin.

3. Cai temapica ¿imatata yachajupashun? ¿Imamandata chaita yachajupashun?

 ³ Apóstol Pabloca alimi yacharca, paicunapilla yapata pensarishpa causaj gentecunaca, ashtahuan ashtahuan mirashpa catinata. Chaimandami Jesusta ali catijcunaca ama ñucanchipilla yapata pensarishpa causangapaj cuidarina capanchi. Apóstol Pabloca paicunapilla pensarishpa causaj gentecunamanda caruyachunmi consejarca (2 Tim. 3:5). Chashna gentecunapurapi causanajushpapash paicunashna ama pensangapaj, juyaj Jehová Diospa ñaupajpi ali cangapaca ¿imatata rurana capanchi? Dios munashcashna juyaihuan, 2 Timoteo 3:2-4​pi parlashca juyaihuan imapi diferente cajtami, cai temapica yachajupashun. Caita yachajunaca imata ashtahuan juyashcata cuenda japichunmi ayudanga. Shinallata cushilla ali causangapaj imashina juyanata yachachunmi ayudanga.

4. Ñucanchillata juyaita charinaca ¿imamandata minishtirishca can?

⁴ Apóstol Pabloca nircami: Gentecunaca ‘paicunalla ali cangapaj munashpami’ paicunapilla pensarishpa causanga nishpa. ¿Ñucanchipi pensarina nali cashcatachu nijun? Na, na chaita ningapaj munanllu. Ñucanchipillata yapata pensarinami nali can. Jehová Diosca ñucanchipilla yapata pensarishpa causachunga na rurarcachu. Jesusca nircami: “Cambaj cumba runagutaca, imashna can juyarinshnallata juyangui” nishpa (Mar. 12:31). Ñucanchillata na juyarishpaca shujcunata juyaitacarin na ushashunllu. Ashtahuanbash Bibliapica ninmi: ‘Cusacunapash, quiquinba huarmitaca cangunapa cuerpotashna juyana canguichi. Huarmita juyashpaca, quiquingunallatami juyaringuichi. Pipash paipa cuerpotallataca na millanayachinllu. Ashtahuangarin aliguta micushpa alichirinatami yachan’ nishpa (Efes. 5:28, 29). Imashinami ricupanchi ñucanchillata juyaita charinaca minishtirishcami can.

5. Paicunapilla yapata pensarij gentecunaca ¿imashinata can?

⁵ Paicunalla ali cangapaj munajcunamandami 2 Timoteo 3:2​pica parlan. Shina gentecunaca paicunapilla yapata pensarimandami paicunallata alicachirishpa causan. Shina canaca nalipachami can (Romanos 12:3, liingui). Shina gentecunaca shujcunapi preocuparinapa randica paicunapillami yapata preocuparin. Chaimi imapash problemacuna tiajpica paicuna culpata charishpapash shujcunatara juchachin. Bibliapa shimicunata intindichijcunaca ninmi, ‘shuj animalgupa cashacunaca chai animal bolagu tucujpimi paipa cashacunaca filo filo tucun. Chashnallatami gentecunaca paicunapilla yapata pensarishpaca chai animalgu cuenda can’ nishpa. Shina gentecunaca cushilla causaitapash na ushanllu.

6. Taita Diosta juyanaca ¿imamandata ali can?

⁶ Bibliapa shimicunata intindichijcunaca ninmi, apóstol Pabloca tucurimui punllacunapi imashina gentecuna tianamanda nara parlashpallatami, paicunapilla yapata pensarishpa nali cualidadcunata charij gentecunamanda parlarca nishpa. Shinapash Diosta juyaj gentecunaca paicunapa causaipimi ali cualidadcunata ricuchin. Bibliapi nishca shinaca Diosta juyashpaca, cushijushpa, casilla, na ñapash fiñarishpa, llaquishpa, imagutapash carashpa, crishpa, na jariyashpa, nali munaicunatapash mishashpami causana can (Gál. 5:22, 23). Salmo librota escribijca cashnami candarca: “Gentecunaca, paicunapaj  Taita Diosca Mandaj Dios cajpimi, ninanda cushijun” nishpa (Sal. 144:15). Jehová cushi Dios cajpimi paita sirvijcunapash cushilla causan. Shinapash paicunapilla pensarij gentecunaca shujcuna carachunllami shuyan. Cutin Jehovata sirvijcunaca shujcunata ayudangapaj esforzarishpami cushilla causan (Hech. 20:35).

7. Taita Diosta juyashcata o na juyajushcata yachangapaca ¿imatata tapurina capanchi?

⁷ Taita Diosta juyashcata o ñucanchipilla yapata pensarijushcata yachangapaca ¿imatata rurana capanchi? Filipenses 2:3, 4​pa shimicunapi pensaripashun. Chaipica ninmi: ‘Randimanda fiñanajungapalla, na cashpaca yanga jariyangapallapash na imatapash ruranachu canguichi. Ashtahuangarin ñucatapash yali ashtahuan ali yashpami, na jariyashpa tucuicunatallata alicachina canguichi’ nishpa. Caitapashmi nin: “Maijan cashpapash quiquimbajlla ali cachunga, na yarinachu canguichi. Ashtahuangarin shujcunapajpash ali cachunmi, tucuicunallata yarina canguichi” nishpa. Tapuripashunchi: “¿Ñuca causaipi chai shimicunata pactachijunichu? ¿Diospa munaita rurangapachu esforzarijuni? ¿Congregacionbipash, villachinapipash shujcunata ayudangapachu esforzarijuni?” nishpa. Chaicunata pactachinaca na fácil canllu. Shujcunata ayudangapaca ñucanchi munaicunatapash huashaman saquingapami esforzarina capanchi. Shinami Tucuita Mandaj Taita Diospa ñaupajpi ali ricurishpa cushilla causashun.

8. Jehovata juyaimandaca ¿imatata huaquin huauquipanicunaca rurashca?

⁸ Jehovata juyaimanda, ashtahuan sirvingapaj munaimandami huaquin huauquipanicunaca ashtahuan estudiashpa ali trabajocunata charinatapash saquishca. Cunanga Ericka shuti panigumanda ricupashunchi. Paica doctorami can. Shinapash cai mundopi rijsishca rijsishca canapa randica, chai paniguca precursora regular shinami paipa cusandi shuj shuj llactacunapi sirvigrirca. Chai paniguca ninmi: “Shuj shuj  llactacunapi Jehovata sirvijuimandami ashtaca amigocunata chari ushashcanchi. Shinallata ashtaca ali experienciacunatapashmi charishcanchi. Chaimi cushilla causachun ayudashca. Cunangamanmi doctora cani. Shinapash shuj gentecunata Jehovamanda yachachingapaj, congregacionbi turiñañacunata ayudangapaj ñuca tiempota, ñuca fuerzata utilizashpami cushilla sintirini” nishpa.

9. Charijyangapaj munajcunaca ¿imamandata cushilla causaitaca na ushan?

⁹ Apóstol Pabloca ‘charijyangapaj munaj’ gentecunamandapashmi parlarca. Irlanda llactapica shuj precursor huauquimi Diosmanda shuj jariman parlarca. Chai jarica paipa billeterata llujchishpami jariyashpa cashna nirca: “Caimi ñuca dios can” nishpa. Ashtaca gentecuna shinallata yuyaimandami culquita, randishca cosascunatapash ninanda alicachishpa causan. Shinapash Bibliapica ninmi: “Culquita ninanda juyaj runaca, culquita mashnata charishpapash na cushijunllu. Imatapash charinacunata ninanda juyaj runapash chai charishcahuanga, ima alitapash na japinllu” nishpa (Ecl. 5:10). Charijyangapaj munaj gentecunaca culquipilla pensarishpa causaimandami ashtahuan charijyangapaj munashpa imatapash ruran. Chaimi chai gentecunaca ashtaca ‘llaquicunahuan’ causan (1 Tim. 6:9, 10).

10. Charij tucunamandaca ¿imatata Bibliaca nin?

¹⁰ Tucuicunallatami culquitaca minishtinchi. Culquica jarcarina jirrushnami can. Chaimi imagupipash ñucanchicunataca ayudan (Ecl. 7:12). ¿Minishtirishca cosascunahuanlla pipash cushilla causaita ushanllu? Ari (Eclesiastés 5:12, liingui). Jaqué shuti jaripa Agur shuti churimi Diosta cashna mañarca: “Imagutapash na charij canatapash, ninan charij canatapash ama cuhuaichu. Micungapaj pactanagutalla carahuayari” nishpa. Chaita nishpaca chai jarica pobre cangapaj munashcataca na nijurcachu. Paillatami jipamanga cashna nirca, shuhuashpa causangapaca na munanichu. Shina causashpaca Taita Diostami nalipi churaiman nishpa. Shinaca ¿imamandata charij canatapash ama cuhuaichu nirca? Chai jarica cutinmi cashna nirca: “Na ushajta micushpara, canda cungashpa: “¿Mandaj Diosca pitayari?” nijupaiman” nishpa (Prov. 30:8, 9). Taita Diospi confianapa randica, culquipi o shuj cosascunapira confiashpami gentecunaca causan. ¿Nachu shina gentecunata rijsipangui?

11. Culquimanda parlashpaca ¿imatata Jesusca nirca?

¹¹ Charijyangapaj munaj gentecunaca Diospa ñaupajpi ali ricuritaca na ushanllu. Jesusca nircami: “Pipash ishcai amota servitaca, na ushanllu. Ishcai amota servijushpaca, shujtaca na ricunayachishpa, shujtallami juyanga. Na cashpaca shuj amotalla cazushpami, shujtaca yangapi churashpa puringa. Shinallatami cangunaca, Taita Diostapash, imata charishcacunatapash, ishcandita servitaca na ushanguichi” nishpa. Jesusca chai shimicunata nara nishpallatami caita nirca: “Cangunaca, na cai pachapi charijyangapajlla, imatapash ninanda mirachinachu canguichi. Cai pachapica, polilla jurucuna micushpa tucuchinllami, ismushpapash tucurinllami. Shuhuacunapash, huasita utujushpa apanllami. Ashtahuangarin jahua pachapi charij cangapajmi, imagutapash aliguta rurana canguichi. Jahua pachapica, polilla jurucunapash na micushpa tucuchinllu, na ismushpa tucurinllu. Shuhuacunapash, na allashpa apanllu” nishpa (Mat. 6:19, 20, 24).

12. Minishtirishcahuanlla causanaca ¿imamandata Diosta ashtahuan sirvichun ayudan? Shuj ejemplomanda parlapai.

¹² Ashtacacunami minishtirishca cosascunahuanlla cushilla causan. Jehovatapashmi ashtahuan sirvi ushashca. Estados Unidos llactamanda  Jack shuti huauquica precursor tucungapami jatun huasita, negociotapash jaturca. Paica ninmi: “Chai juyailla huasiguta, alpatapash jatunaca ñucapaca shinllimi carca. Ñucaca ashtaca huatacunatami trabajopi problemacunata charimanda huasimanga llaquilla nali chayan carcani. Cutin ñuca huarmiguca precursora caimandaca siempremi cushilla can carca. Paica ninmi carca: ‘Jehovata sirvinami tucuimanda ashtahuan yali ali can’ nishpa. Cunanbica ñucapash precursor caimandami ishcandi Jehová Diosta sirvinajunchi” nishpa.

13. Charijyangapaj munashcata o na munashcata yachachunga ¿imata ayudanga?

¹³ Charijyangapaj munashcata o na munashcata yachachunga ¿imata ayudanga? Tucui shunguhuanmi cashna tapurina capanchi: “¿Culquimanda Biblia ima nijta crishcatachu ñuca causaihuan ricuchijuni? ¿Culquita charinachu ñucapaca ashtahuan importante can? ¿Ashtahuan cosascunata charinapichu ashtahuan preocuparini? O ¿Jehovahuan ali amigo canapi, shujcunahuan ali canapichu ashtahuan preocuparini? ¿Jehová ayudanataca tucui shunguhuanllu confiani?” nishpa. Tucui shunguhuan Jehová Diospi confiajpica Jehová Diosca nunca na saquingachu (Mat. 6:33).

14. Imatapash rurashpa ali yalinaca ¿alichu can?

¹⁴ Bibliapi nishcashnaca cunan punllacunapica ‘yanga cushijushpa causanatalla juyaj’ gentecunami tian. Ñucanchipi pensarina, minishtirishca culquihuanlla causanaca imapash nalica na canllu. Shinallata huaquinbi imatapash rurashpa ali yalinaca imapash nalica na canllu. Huaquin gentecunaca yuyanmi imatapash rurashpa ali yalinaca nalimi can nishpa. Gentecuna shina yuyajpipash Jehová Diosca chaitaca na yachachinllu. Jehovata sirvijcunamanga Bibliapica ninmi: “Cunanga, cushijushpa cambaj micunata micugrilla, cushilla shunguhuan cambaj vinotapash ufiailla” nishpa (Ecl. 9:7).

15. ‘Yanga cushijushpa causanatalla juyajcuna’ nishpaca ¿imata ningapaj munan?

¹⁵ Bibliapi 2 Timoteo 3:4​pica yanga cushijushpa causanatalla juyashpa, Jehovata ladoman saquij gentecunamandami parlajun. Chai textopica yanga cushijushpa causanata Diostapash yalimi juyan nishpaca, ishcandita juyashcatami ricuchijunman. Ashtahuanbash Bibliapica cashnami nijun: ‘Taita Diostapash na juyashpami, yanga cushijushpa causanatalla juyanga’ nishpa. Shuj ali yachajushca jarica ninmi, ‘cai textoca yanga cushijushpa causaj gentecunaca Taita Diosta napacha juyashcatami ricuchijun’ nishpa. Chaimi yanga cushijushpa causanatalla juyanamandaca cuidarina capanchi. Bibliapica ‘cai causaipajtalla rurashpa ninanda cushijushpa causanamanda’ ‘imatapash rurashpa musparij’ gentecunamanda parlangapami ‘yanga cushijushpa causanatalla juyajcuna’ nirca (Luc. 8:14).

16, 17. Imatapash rurashpa ali yalinamandaca ¿imatata Jesusca nirca?

¹⁶ Imatapash rurashpa ali yalina nalimi can nishpaca Jesusca na nircachu. Jesusca ‘cazarai bodaman’, ‘jatun micuimanbashmi’ rirca (Juan 2:1-10; Luc. 5:29). Chai boda huasipi vino tucurijpimi, shuj milagrota rurashpa Jesusca yacuta vinoman tigrachirca. Shuj viajeca gentecunaca Jesustaca nalicachishpami cashna ninajurca, micunatapash micushpa, vinotapash ufiashpa purin nishpa. Jesusca shina pensarina nali cashcatami intindichirca (Luc. 7:33-36).

 ¹⁷ Shinapash Jesusca imatapash rurashpa ali yalinapilla pensarishpaca na causajurcachu. Jesusca paipa causaipica Jehová Diosta sirvinata, shuj gentecunata ayudanatami pundapi churarca. Shinallata gentecunata salvangapami llaquinaita shuj racu caspipi huarcushpa huañuchi tucurca. Jesusca paita catijcunamanga cashnami nirca: “Ñucata catinajujpi cangunata na ricunayachishpa catiriashpa llaquichijpi, imatapash llullashpa nalicachijpica, ninanda cushijunguichi. Ninandapacha cushijunguichilla. Canguna juyailla japinaca, jahua pachapimi. Dios ima nishcata villajcunatapash, chashnallatami catiriashpa llaquichinajurca” nishpa (Mat. 5:11, 12).

18. Ali yalinatalla alicachishcata o na alicachishcata yachangapaca ¿imatata tapurina capanchi?

¹⁸ Imatapash rurashpa ali yalinatalla alicachishcata o na alicachishcata yachachunga ¿imata ayudanga? Tapuripashunchi: “¿Imatapash rurashpa ali yalinachu tandanajuimanda, villachinamanda ashtahuan importante can? ¿Ñuca munaicunata saquishpachu Diosta sirvijuni? Imapash diversiongunata agllajushpaca ¿Jehová Diosca cai diversionda alicachingachu nishpachu tapurini?” nishpa. Taita Diosta tucui shunguhuan juyashpaca pai na ricunayachishca cosascunamanda caruyangapami esforzarishun. Shinallata Taita Diospa ñaupajpi nalishnalla ricurij cosascunatapashmi saquishun (Mateo 22:37, 38, liingui).

19. ¿Imashina gentecunata na cushilla causaita ushan?

¹⁹ Cai mundota Diablo mandajuimandami casi 6 mil huatacunata gentecunaca sufrishpa causanajun. Tucurimui punllacunapi causajuimandami cunanbica paicunapilla yapata pensarishpa causaj gentecuna, charijyangapalla munajcuna, yanga cushijushpa causanatalla juyaj gentecuna ashtahuan mirashca. Cunanbi gentecunaca paicunapa munaitalla rurashpami causanajun. Chai gentecunaca nunca na cushilla causai ushangachu. Bibliapica ninmi: “Taita Dios ayudajpi causaj runaca, ninandami cushijun. Paica, paita Mandaj Taita Diostallami shuyashpa causan” nishpa (Sal. 146:5).

20. Taita Diosta juyashpa causanaca ¿imashinata cushilla causachun ayudashca?

²⁰ Jehovata sirvijcunaca cada punllami Jehovata juyan. Shinallata cada huatami ashtaca gentecuna Jehovata rijsishpa, Jehovata juyai callarin. Chaica Diospa Reino ña mandajushcatami ricuchin. Ñallapachami ashtaca bendiciongunata charishun. Ashtahuanbash Jehovapa munaita rurashpa, paipa ñaupajpi ali ricurishpaca cunanbipash, shamuj punllacunapipash cushillami causashun. Cati temapica paicunapilla pensarishpa causaj gentecuna imashina cajtami yachajupashun. Shinallata Jehovata sirvijcuna ima cualidadcunata charishcatapashmi ricupashun.