1, 2. a) Huata 2018​pica ¿maijan tandanajuita ashtaca gentecuna tandanajushca cachun ayudanga? b) ¿Imamandata chai tandanajuica importante can? (Callari fotota ricupangui).

HUATA 2018​pica 31 de marzota Indi huashajushca jipami ashtaca millón Jehovata sirvijcuna, shuj gentecunapash Jesús Huañushcata Yaringapaj tandanajunga. Cai tandanajuica huatapi shuj viajellami tian. Jesús Huañushcata Yarina tandanajuillami ashtaca ashtaca gentecuna shujllashna tandanajuchun ayudashca.

² Mundo enteropi ashtaca millón gentecuna chai importante tandanajuiman rinajujta ricushpaca Jehovapash, Jesuspash ninandami cushijunga. Bibliapica ‘ashtaca gentecunamandami’ parlan. Chai gentecunaca ‘pipash na cuentai ushanalla tucui llactacunamanda, aillupuracunamanda, gentepuracunamanda, shuj shuj shimita parlajcunami’ can. Paicunami cashna ninga: “Quishpichinaca, mandangapaj tiarinapi tiajuj ñucanchi Taita Diospaj, maltun Llamapajpashmi” can nishpa (Apoc. 7:9, 10). Cada huatami Jesús Huañushcata Yarina tandanajuipica ashtaca gentecuna Jehovatapash, Jesustapash jatunyachin.

3. Cai temapica ¿maijan tapuicunamandata yachajupashun?

 ³ Cai temapica cai chuscu tapuicunamandami yachajupashun: Jesús Huañushcata Yarina tandanajuiman rishpa beneficiaringapaca ¿imashinata prepararina capanchi? Chai tandanajuica ¿imashinata Jehovata sirvijcuna shujllashna tandanajushca cachun ayudan? Huauquipanicunahuan tandanajushca cangapaca ¿imatata rurana capanchi? ¿Ima horashi ultimota Jesús Huañushcata Yaringapaj tandanajushun?

4. Jesús Huañushcata Yarina tandanajuiman rinaca ¿imamandata importante can?

⁴ Jesús Huañushcata Yarina tandanajuiman rinaca ¿imamandata importante can? Jehovata ali adorangapaca tandanajuicunaman rinaca minishtirishcapachami can. Chai tandanajuiman ringapaj esforzarijujtaca Jehovapash, Jesuspashmi ricujun. Huaquinbica imapash ungüihuan caimanda o imapash pasajpimi chai tandanajuiman ritaca na ushashcanchi. Shina cajpipash chai tandanajuipi cangapami esforzarina capanchi. Ñucanchi ruraicunahuan tandanajuicuna importante cashcata ricuchijpimi, Jehová Diosca ‘paipa yarina libropi’ ñucanchi shutita escribinga. Chai librotallatami ‘causaita causagrinata villajuj libro’ nin. Chai libropi escribishca shuticunallami para siempre causanata chasquinga (Mal. 3:16; Apoc. 20:15).

5. Jesús Huañushcata Yarina punlla nara chayamujpillata ¿imatata rurana capanchi?

⁵ Jesús Huañushcata Yarina tandanajuipa huaquin punllacuna faltajpillatami Diosta mañangapaj, Jehovapa ñaupajpi ali o nali cashcata ricungapaj tiempota llujchina capanchi (2 Corintios 13:5, liingui). Apóstol Pabloca nircami, ñucanchi fe shinlli cashcata o na shinlli cashcataca ñucanchillatami cuenta japina canchi nishpa. Chaipaca ¿imatata rurana capanchi? Tapuripashunchi: “Jehovapa organizacionlla alipacha cashcata, paipa munaita pactachingapaj chai organizacionda Jehová utilizajushcataca ¿tucui shunguhuanllu crini? Diospa Reinomanda ali villaigucunata ¿tucui shunguhuan villachingapaj, yachachingapachu esforzarijuni? Diablo ñalla tucuchi tucunata, tucurimui punllacunapi causajushcataca ¿ciertopacha crishcatachu ricuchijuni? ¿Jehovaman mingarishca punllapishna, cunangaman Jehovapipash, Jesuspipash confiashpachu catijuni?” nishpa (Mat. 24:14; 2 Tim. 3:1; Heb. 3:14). Cai tapuicunaca ñucanchillata ‘imashna cashcata’ cuenta japichunmi ayudanga.

6. a) Para siempre causai ushangapaca ¿imatata rurana capanchi? b) Cada huata Jesús Huañushcata Yarina tandanajuipa prepararingapaca ¿imatata shuj ancianoca ruran? c) ¿Imashinata chai huauquipa ejemplota cati ushapanchi?

⁶ Jesús Huañushcata Yarina tandanajuipa prepararingapaca, chai tandanajui imamanda importante cashcata parlaj Bibliamanda publicaciongunata liina, liishcapipash yuyanami capanchi (Juan 3:16; 17:3, liingui). Jehovata ali rijsishpalla, paipa churi Jesuspi feta charishpallami para siempre causaita ushashun. Ashtahuanbash ñucanchi estudio personalpimi chai tandanajuimanda parlaj temacunata  ashtahuan yachajuna capanchi. Chaimi Jehovamanbash, Jesusmanbash ashtahuan quimirishun. Ashtaca experienciata charij anciano huauquipa ejemplota ricupashunchi. Chai huauquica Jesús Huañushcata Yarinamanda parlaj Villajun revistacunatami alichishpa charin. Chai temacunaca Jehovapash, Jesuspash gentecunata juyashcatami ricuchin. Chaimi cada huata chai tandanajuipa huaquin punllacuna faltajpillata chai revistacunata cutin liin. Liishca jipaca chai tandanajui imamanda importante cashcatami yuyan. Huaquinbica shina temacunamanda parlaj shuj o ishcai revistacunatami alichishpa catin. Chai revistacunata liina, Jesús Huañushcata Yarina tandanajuipa Bibliapa textocunata liina, liishcapi yuyanaca cada huata mushuj yuyaicunata yachajuchun ayudashcatami chai huauquica cuenta japishca. Ashtahuanbachaca Jehovata, Jesustapash ashtahuan juyachunmi ayudashca. Ñucanchipash chai huauquipa ejemplota catishpaca Jehovata, Jesustapash ashtahuanmi juyashun. Shinallata Jehovapash, Jesuspash ñucanchimanda imata rurashcata alicachichunmi ayudanga. Shinami Jesús Huañushcata Yarina tandanajuimanda ashtahuan beneficiarishun.

7. a) Jesús Huañushcata Yarina tandanajuita callarichijushpaca Jesusca ¿imatata Jehová Diostaca mañarca? b) Jehová Dios Jesuspa mañaita uyashcataca ¿imashinata yachapanchi?

⁷ Jesús Huañushcata Yarina tandanajuita callarichijushpami Jesusca Diosta mañarca. Jesusca Jehová Dioshuanga alipacha amigomi can. Jesusca paipa catijcunapash shinallata paicunapura ali llevarishpa shujllashna tandanajushca cachunmi Diosta mañarca (Juan 17:20, 21, liingui). Jehová Diosca Jesuspa mañaitaca uyarcami. Chaimandami Jesús Huañushcata Yarina tandanajuica Jehovata sirvijcuna shujllashna tandanajuchun ayudan. Chaimi mundo enteropi shuj shuj llactamanda, shuj shuj shimita parlaj ashtaca millón gentecuna tandanajun. Paicunaca Jehová Dios paipa churita cai alpaman cachamushcatami crin. Cutin shuj religionmanda gentecunaca shuj shuj llactamanda gentecunahuan tandanajushca caitaca na ushanllu. Shina tandanajuicunataca nalicachishpami ricun. Shinapash Jesús Huañushcata Yarina tandanajuipi shujllashna tandanajujta ricushpami Jehovapash, Jesuspash alicachishpa ricun.

8. Jehová Diosca ¿imatata Ezequielmanga villarca?

⁸ Jehovata sirvijcunaca ñucanchi huauquipanicunahuan shujllashna tandanajushca canataca alimi yachanchi. Jehová Diosca paita sirvijcuna paicunapura tandanajushca canataca, profeta Ezequielmanga ñami villashcarca. Chaimi Ezequiel libropica cashna nin, ‘Judá llactapa caspica’, ‘Josepa caspihuan’ tandanajushpami shujllashna tucunga nishpa (Ezequiel 37:15-17, liingui). La Atalaya de julio de 2016 revistapi “Preguntas de los lectores” partepimi cashna nin: “Jehová Diosca Ezequielmanga nircami, prezushna causashca cutin ñuca carasha nishca alpacunaman tigramujpimi, israelitacunataca shujllashna tandachisha nishpa. Jehová Diosca chai shimicunahuanga tucurimui punllacunapipash, paita sirvijcuna shujllashna tandanajushca canatami ricuchirca” nishpa.

9. Ezequielpa profecía pactarijushcataca ¿imashinata Jesús Huañushcata Yarina tandanajuica ricuchin?

⁹ Huata 1919mandami Jehová Diosca ungidocunataca asha asha tandachishpa organizarca. Ungidocunami ‘Judá llactapa caspishna’ can. Chai jipaca cai alpapi causana esperanzata charij ashtaca ashtaca gentecunami ungidocunahuan shujllashna tandanajui callarirca.  Cai alpapi causana esperanzata charij gentecunami ‘Josepa caspishna’ can. Jehová Diosca nircami, chai ishcai caspicunata tandachijpimi ‘ñuca maquipica shujlla caspi tucunga’ nishpa (Ezeq. 37:19). Jehová Diosca ungidocunahuan, ‘shuj llamagucunahuan’ “shujlla corral” cuenda cachunmi tandachirca (Juan 10:16; Zac. 8:23). Cunanbica ungidocunapash, shuj llamagucunapashmi pacta sirvinajun. Paicunataca Jesusmi Rey shina mandajun. Jesustami Ezequielpa profeciapi Jehová Diosca ‘ñucata sirvij David’ nirca (Ezeq. 37:24, 25). Cada huatami ungidocunapash, shuj llamagucunapash Jesús huañushcata yaringapaj tandanajun. Shina tandanajujpimi Jehovapa shimicuna pactarijujta ricui ushapanchi. Shinaca huauquipanicuna tandanajushca cachunga ¿imashinata ayudai ushapanchi?

10. Huauquipanicunahuan tandanajushca cangapaca ¿imata ayudanga?

¹⁰ Huauquipanicuhuan tandanajushca cangapaca humilde canami minishtirin. Jesús cai alpapi cashpaca paita catijcunataca humildemi cana canguichi nircami (Mat. 23:12). Cai mundopi gentecunaca shujcunata yali canchi nishpami pensarin. Shinapash ñucanchicunaca humilde cangapami esforzarina capanchi. Shinami congregacionda ñaupaman pushaj huauquicunatapash respetashun. Congregacionbi huauquipanicuna shujllashna tandanajushca cachunga na jariyashpa tucui shunguhuanmi cazuna capanchi. Shina rurashpaca Jehová Diospa ñaupajpica alimi ricurishun. Bibliapica  ninmi: “Taita Diosca, jariyashpa jatun tucujcunahuanga, shinllitapachami macanajujun. Ashtahuangarin na jariyashpa causajcunataca, ninandami juyajun” nishpa (1 Ped. 5:5).

11. Jesús Huañushcata Yarina tandanajuipa tandapash, vinopash ima cashcata pensarinaca ¿imashinata ayudan?

¹¹ Jesús Huañushcata Yarina tandanajuipa tandapash, vinopash ima cashcata pensarinami huauquipanicunahuan shujlla shina cachun ayudanga. Chaitaca chai tandanajui nara chayamujpillata, o chai tutallatami pensarina capanchi (1 Cor. 11:23-25). Levadura illaj tandaca Jesuspa jucha illaj cuerpotami ricuchin. Cutin vinoca Jesuspa yahuartami ricuchin. Chaita yachanallaca na minishtirinllu. Yaripashunchi. Jehová Diosca ñucanchita salvangapaj paipa churita cushpami ñucanchita juyashcata ricuchirca. Shinallata Jesuspash ñucanchimanda paipa causaita cushpami ñucanchita juyashcata ricuchirca. Jehová Diospash, Jesuspash ñucanchita ninanda juyashcapi pensarinami, paicunata ashtahuan juyachun ayudanga. Jehovata, huauquipanicunata juyashpallami paicunahuan shujllashna tandanajushca caita ushashun.

12. Mateo 18:23-34​pi Jesuspa shimicunaca ¿imatata yachachin?

¹² Huauquipanicunahuan tandanajushca cangapaca tucui shunguhuanmi perdonana capanchi. Pipash nali sintichijpi paicunata perdonashpaca, Jehová Dios paipa churita cushpa ñucanchi juchacunata perdonashcatami agradicinajunchi. Jesús imata nishcata Mateo 18:23-34​pi liishca jipaca, cashna tapuripashunchi: “¿Jesús ima nishcata pactachichun ayudahuanllu? ¿Huauquipanicunahuan ñapashchu culiranilla o paicunata intindingapachu esforzarini? ¿Ñucata nali sintichijcunataca tucui shunguhuanllu perdonani?” nishpa. Juchayucuna caimandaca perdonanaca huaquinbica shinllimi ricurin. Huaquin juchacunaca nalipachami can. Shinapash Jesusca nircami, Jehová Diosca shujcunata perdonachunmi munan nishpa (Mateo 18:35, liingui). Shujcunata na perdonajpica Jehová Diospash ñucanchi juchacunataca na perdonangachu. Chaimi ali ali pensarina capanchi. Jesús ima nishcata pactachishpa shujcunata perdonashpaca huauquipanicuna tandanajushca cachunmi ayudanchi.

13. Huauquipanicunata perdonanaca ¿imashinata ayudan?

¹³ Huauquipanicunata perdonashpaca paicunahuan tranquilomi cai ushashun. Apóstol Pablopa shimicunata pactachingapami tucui shunguhuan esforzarina capanchi. Paica nircami: “Diospaj espíritu yachachijujtami catina canguichi. Casilla aliguta causashpami, shujllashnalla causanguichi” nishpa (Efes. 4:3). Jesús Huañushcata Yarina punlla nara pactajpillata o chai tutallata shujcunata imashina tratajushcata pensaripashunchi. Chai jipaca cashna tapuripashunchi: “¿Ñuca ruraicunahuanga perdonaj cashcatachu ricuchijuni? ¿Huauquipanicunahuan tandanajushca cangapaj esforzarijujtaca shujcunaca cuenta japinllu?” nishpa. Cai tapuicunapi pensarinaca minishtirishcapachami can.

14. Jehová Diosca ¿imashina causachunda munan?

¹⁴ Jehovapa ejemplota catishpami juyaita ricuchina capanchi. Shinami huauquipanicuna tandanajushca cachun ayudashun (1 Juan 4:8). Ñucanchicunaca nunca na cashna ninachu capanchi: “Huauquipanicunata juyana cashcataca alimi yachani. Shinapash paicunahuan ali llevarinaca na minishtirinllu” nishpa. Shina pensarishpaca apóstol Pablopa shimicunata na pactachishcatami ricuchinajunchiman. Paica nircami: “Caishujhuan chaishujhuan na ñapash fiñarishpami, juyarishpa aliguta causana canguichi” nishpa (Efes. 4:2). Apóstol Pabloca caishujhuan chaishujhuan na ñapash fiñarishpa  causanatallaca na nijurcachu. Ashtahuangarin “juyarishpa aliguta causana” cashcatami nijurca. Tucuicunatami Jehová Diosca chasquin. Congregaciongunapica diferente gentecunami tian (Juan 6:44). Paicunata Jehová Dios juyajpica, ¿nachu ñucanchipash shinallata juyana capanchi? Jehová Diosca ñucanchi huauquipanicunata juyachunmi munan (1 Juan 4:20, 21).

15. Jesús Huañushcata Yaringapaj ultimota tandanajunataca ¿imashinata yachapanchi?

¹⁵ Shuj punllaca Jesús Huañushcata Yaringapaj ultimotami tandanajushun. ¿Imamandata shina nipanchi? Corinto llactamanda ungidocunamanga apóstol Pabloca cashnami nirca, chai tandanajuita cada huata rurashpami ‘Jesús huañushcata pai tigramungacaman villanajunguichi’ nishpa (1 Cor. 11:26). Jesusca tucurimui punllacunapi ima hora pai tigramunatami parlarca. Jesusca Ninan Manllanai Llaqui Punllacunamanda parlashpaca cashnami nirca: “Runa Aichayu tucushca ñuca shamunata ricuchinaca jahua pachapi ricuringa. Runa Aichayu tucushca ñucami, fuyu jahuapi ninan ushaihuan, juyailla punchapamba shamusha. Shina shamujujta ricushpami, cai pachapi tiaj tucui aillucunaca ninanda huacanajunga”. Shinallata “ñuca angelcunatami, trompetata ninanda tocachun cachamusha. Paicunami, ñuca agllashcacunataca cai pacha tucuri chuscundi ladomanda tandachimunga” nishpa (Mat. 24:29-31). Cai alpapi causanajuj ungidocunata cieloman apashpami Jesusca ‘agllashcacunata’ tandachishcata ricuchinga. Ninan Manllanai Llaqui Punllacuna callarishca jipallami, Armagedón macanajui punlla nara callarijpillata ungidocunata tandachinga. Armagedón macanajuipimi Jesusca, 144 mil ungidocunahuan cai alpapi mandajcunata tucuchinga (Apoc. 17:12-14). Shinaca Jesús Huañushcata Yaringapaj último tandanajuica cai alpapi causanajuj ungidocunata, Jesús cieloman nara apajpillatami canga.

16. Cai huatapa Jesús Huañushcata Yaringapaj tandanajuimanga ¿imamandata na faltana capangui?

¹⁶ Huata 2018​pica Jesús Huañushcata Yaringapaca 31 de marzotami tandanajupashun. Chai tandanajuiman ama faltangapaj esforzaripashunchi. Shinallata huauquipanicunahuan tandanajushca cangapami Jehovata mañana capanchi (Salmo 133:1, liingui). Caitapash yaripashunchi, shuj punllaca Jesús Huañushcata Yaringapaj ultimotami tandanajuringa. Chai punlla chayamungacamanga Jesús Huañushcata Yaringapaj tandanajuipi, huauquipanicunahuan shujllashna tandanajunata ninanda alicachishcata ricuchipashunchi.