1, 2. Jehová Diosca ¿imashinata tucuita caraj Dios cashcata ricuchin?

JEHOVÁ DIOSCA tucuita caraj Diosmi can. Jehová Dios carajpimi imagutapash charinchi. Culquipash, oropash cai alpapi tucui cosascunapash Jehovapami can. Chaimi Jehová Diosca cai alpapi causai tiachunga tucuita utilizan (Sal. 104:13-15; Ageo 2:8). Shinallata Bibliapica ninmi, Jehová Diosca ashtaca viajetami cai alpapi tucui cosascunata utilizashpa paita sirvijcunata ayudarca nishpa.

² Israelitacuna chaquishca pambacunapi causanajujpimi Jehová Diosca yacuta, maná nishcata carashpa 40 huatacunata cuidarca (Éx. 16:35). Israelitacunaca ‘imapash illajca’ na causanajurcachu (Neh. 9:20, 21). Jehovata sirvij shuj viuda huarmigupa ashalla aceite mirachunmi, Jehová Diosca profeta Eliseota utilizashpa shuj milagrota rurarca. Chaimi chai huarmiguca dibicunata pagai usharca. Shinallata paipa huahuacunata mantinichunbashmi culquiguca pactarca (2 Rey. 4:1-7). Shinallata Jehová Diosca Jesusmanbashmi milagrocunata rurachun ushaita curca. Chaimi Jesusca shuj milagrota rurashpa ashtaca gentecunaman  micunaguta cararca. Shuj viajecarin shuj milagrota rurashpami impuestota pagarca (Mat. 15:35-38; 17:27).

3. Cai temapica ¿ima tapuicunatata yachajupashun?

³ Jehová Diosca paipa rurashcacunata utilizashpami cai alpapi tucui tiashcacunata ali cuidaita ushan. Jehová Diosca paipa sirvijcunapash paicunapa charishca cosascunata utilizashpa paipa organizacionda apoyachunmi munan (Éx. 36:3-7; Proverbios 3:9, liingui). Jehová Diosca ¿imamandata paillata carashcacunamanda ashtahuan valishcata paiman carachun munan? Punda tiempopi Jehovata sirvijcunaca ¿imashinata Jehovata ali adorangapaj culquihuan apoyarca? Jehovapa organizacionga ¿imashinata contribuciongunataca utilizan? Cai temapimi cai tapuicunamanda ashtahuan yachajupashun.

4. Jehovapa organizacionda apoyashpaca ¿imatata ricuchinchi?

⁴ Jehovata juyaimanda, ñucanchimanda pai imatalla rurashcata agradicishcamandami, ñucanchi charishcacunata Jehovaman carana capanchi. Jehová imatalla carashcata pensarishpaca tucui shunguhuanmi agradicinchi. Rey David cuendami sintirinchi. Paica Diospa templo huasita shayachingapaj imacunalla minishtishcata parlajushpami cashna nirca, tucui imagupash Jehová Diospallatami, pai caramujpi japishcatallatami paiman caranajunchi nishpa (1 Crónicas 29:11-14, liingui).

5. Tucui shunguhuan caranamandaca ¿imatata Bibliapica yachachin?

⁵ Ñucanchi charishcacunata Jehovaman carashpaca paita ali adorashcatami ricuchipanchi. Apóstol Juanga shuj muscuipishnami jahua cielopi angelcuna cashna nijta uyarca: “Jatun Dioslla, canmi tucui imatapash rurashcangui. Can munashcamanda rurashcami, tucui ima cashpapash tian. Chaimandami canga, ninan punchapamba tiajunata, ninanda alicachi tucunata, ninan ushaihuan tiajunata chasquinapacha cangui” nishpa (Apoc. 4:11). Jehová Diosllami ninan punchapamba tiajunata, ninanda alicachi tucunatapash chasquina can. Chaimi ñucanchi charishcacunamanda ashtahuan valishcata tucui shunguhuan carana capanchi. Jehová Diosca Moisesta cachashpami israelitacunamanga huatapi quimsa viajeta fiestata rurachun mandarca. Moisesman cushca Leypica nijurcami: “Chaiman shamushpaca, Mandaj Diospaj ñaupajpica, pipash chushaj maquihuanga na ricurimungachu” nishpa (Deut. 16:16). Chaimi chai fiestacunamanga imagutapash Jehovaman carangapaj apashpa rina carca. Cunanbipash Jehovata ali adorangapaca imatapash tigrachichun yashpallaca na caranachu canchi. Tucui shunguhuan carashpaca cai alpapi Jehovapa organizacionda alicachishcata, apoyashcatapashmi ricuchishun.

6. ¿Imamandata caranaca ñucanchipallata ali can? (Callari fotota ricupangui).

⁶ Ñucanchiman carachunllaca na shuyanachu capanchi. Ñucanchipashmi tucui shunguhuan carana capanchi (Hechos 20:35, liingui). Caipi pensaripashunchi. Shuj huahuaca paipa taitacuna carashca culquihuanllatami shuj regalota paicunaman caran. Shina carajpica taitamamacunaca ninandami cushijun. Cunanga shuj precursor joven huauquipi pensaripashunchi. Chai huauquica paipa taitamamacunahuan  causaimandami paipa taitamamacunata culquiguhuan ayudan. Paipa taitamamacunaca paipa churi carachunga na shuyanllu. Shinapash paipa churi carana ali cashcata cuenda japichunmi chai culquitaca paicunaca chasquin. Jehová Diosca alimi yachan, ñucanchi charishcacunamanda ashtahuan valishcata paiman carana ali cashcata.

7, 8. a) Jehovata sirvijcunaca ¿imashinata paicunapa charishcacunahuan ayudarca? b) Cutin Jehovata adoranapica ¿imashinata ayudarca?

⁷ Bibliapica ricuchinmi punda tiempopi Jehovata sirvijcunapash paicunapa charishcacunahuan ayudashcata. Huaquinbica imagutapash rurangapapachami contribuciongunata cun carca. Por ejemplo Moisesca tabernáculo nishcata rurangapaj imaguhuanbash ayudachunmi israelitacunataca animarca. Rey Davidpashmi templota rurachunga shinallata animarca (Éx. 35:5; 1 Crón. 29:5-9). Jehoás shuti reypa punllacunapi sacerdotecunaca, israelitacuna carashca culquiguhuanmi Diospa huasitaca arreglarca (2 Rey. 12:4, 5). Apostolcunapa punllacunapi Judea llactapi huauquipanicuna yarjai punllacunapi causanajujta yachaj chayashpami, shuj huauquipanicunaca paicunata ayudarca (Hech. 11:27-30).

⁸ Shinallata Jehovata adoranapi ñaupaman pushaj huauquicunataca culquiguhuanmi ayudarca. Moisesman cushca Leypi nishca shinaca chaishuj israelitacuna herenciata japinajujpipash levitacunaca na japinachu carca. Chaimi chaishuj israelitacunaca levitacunaman diezmota cuna carca. Shina cujpimi levitacunaca tabernáculo nishcapi sirvishpa catita usharca (Núm. 18:21). Ashtaca huatacuna jipaca Jehovata sirvij huaquin huarmicunaca Jesustapash, apostolcunatapash ‘imaguhuanllapash sirvishpami’ ayudarca (Luc. 8:1-3).

9. Contribuciongunata carangapaca ¿imatata Jehovata sirvijcunaca rurarca?

⁹ Contribuciongunataca shuj shuj ladocunamandami chasquin carca. Por ejemplo, chaquishca pambapi tabernáculo nishcata rurangapaca Egipto llactamanda apashca cosascunahuanmi israelitacunaca ayudashcanga (Éx. 3:21, 22; 35:22-24). Apostolcunapa punllacunapi huaquin Jehovata sirvijcunaca paicunapa huasicunata, alpacunata jatushpami culquitaca apostolcunaman curca. Chaimi apostolcunaca pobrella huauquipanicunata ayudarca (Hech. 4:34, 35). Cutin shujcunaca Jehovata adoranata apoyangapami culquiguta caran carca (1 Cor. 16:2). Shinaca charij cashpa o pobrella cashpapash Jehovata sirvijcunaca tucuicunallatami usharishcaguhuan ayudan carca (Luc. 21:1-4).

10, 11. a) Punda tiempopi Jehovata sirvijcunapa ejemplotaca ¿imashinata cati ushapanchi? b) Diospa Reinota apoyajuimandaca ¿imashinata sintiripangui?

¹⁰ Cunanbica imagutapash rurangapapachami contribuciongunata cuna minishtirin. Por ejemplo Tandanajui Huasita shayachingapaj o arreglangapachari ñucanchi congregacionga arreglocunata ruranajun. Shinallata Betelta, Jatun Tandanajui Huasicunata shayachingapaj o jatun llaquicunata charishca huauquipanicunata ayudangapaj, Jatun Tandanajuipa gashtocunata pagangapami contribuciongunata churachun minishtin. Ñucanchi  contribuciongunaca misionerocunata, precursor especialcunata, superintendente de circuito huauquicunata, mundo entero Betelcunapi sirvijcunata, Jatun Betelpi trabajaj huauquipanicunata ayudangapami can. Ashtahuanbash Tandanajui Huasicunata o Jatun Tandanajui Huasicunata shayachichunmi cada quilla ñucanchi congregacionga culquita cachan. Chai Tandanajui Huasicunami mundo enteropi ñucanchi huauquipanicunata ninanda ayudan.

¹¹ Cai tucurimui punllacunapi tucuicunallatami Diospa Reinota apoyai ushanchi. Contribucionda churana cajagupi mashna culquita churajujtaca nipi na yachanllu. Huaquingunaca Internetpi jw.org paginaman yaicushpami contribuciongunata cachan. Huaquinbica pensanchipashchari, ñuca cushca culquiguca nimapa na pactangachu nishpa. Jehovapa organizacionga tucuicunapa contribuciongunatami chasquin. Pobrella cashpa o charij cashpapash tucuicunallatami, apostolcunapa punllacunapi Macedonia llactamanda huauquipanicunapa ejemplota cati ushapanchi. Paicunaca carangapaj ninanda munashpami carachun saquihuaichi nishpa mañanajurca. Macedonia llactamanda huauquipanicunaca “imaguta na charishpapash”cushijushpami caranajurca (2 Cor. 8:1-4).

12. ¿Imashinata Jehovapa organizacionga contribuciongunata utilizashca?

¹² Cuerpo Gobernante huauquicunaca Jehovapa organización chasquishca contribuciongunataca maipashcachunga na yangata gashtanllu (Mat. 24:45). Pundapica chai huauquicunaca Jehová Diostami mañan. Chai jipami culquigu pactanata o na pactanatapash ali utilizangapaj ricun (Luc. 14:28). Punda tiempopica Jehovata adoranapilla contribuciongunata ali utilizachunmi, Jehovata ali sirvij huaquin jaricunata agllarca. Shuj viajeca, Persia llactamanda rey carashca culqui, oro, shuj valishca cosascunatapash apashpami Esdrasca Jerusalenman tigrajurca. Cunanbica chai tucui cosascunaca 100 millón yalimi valinman. Jerusalenman tigrana ñan peligroso cajpimi, Jehovaman carashca contribucionguna ama imapash pasachun Esdrasca huaquin instrucciongunata curca (Esd. 8:24-34). Ashtaca huatacuna jipaca, Judea llactapi huauquipanicunata ayudangapami apóstol Pabloca culquiguta tandachirca. Chai tandachishca culquita caranajushpa ‘Diospa ñaupapipash, gentecunapa ñaupapipash ama juchachi tucuchunmi’ apóstol Pabloca ricuriajurca (2 Corintios 8:18-21, liingui). Cunanbipashmi Jehovapa organizacionga Esdraspa, apóstol Pablopa ejemplota catin. Chaimi contribuciongunata ali ricushpa ama yangata gashtachun huaquin instrucciongunata Jehovapa organizacionga cushca.

13. Jehovapa organizacionga ¿imamandata cai último huatacunapica huaquin cambiocunata rurashca?

¹³ Huaquin familiacunaca culquita ama yangata gashtangapami imapash minishtirishcatalla randin. Cutin shuj familiacunaca Jehovata ashtahuan sirvingapami minishtirishcahuanlla causangapaj huaquin cambiocunata rurashca. Jehovapa organizacionbash shinallatami rurashca. Cai último huatacunapica shuj shuj proyectocunami tiashca. Huaquinbica chaicunata rurangapami contribuciongunapi carashca culquitapash yali gashtashca. Chaimi Jehovapa organizacionga minishtirishca cosascunatalla rurangapaj, ama yapata gashtangapaj huaquin cambiocunata rurashca. Shinami contribuciongunataca ali utilizai ushashca.

14-16. a) Ñucanchi contribuciongunataca ¿imapillata utilizanajun? b) Jehovapa organizacionga ¿imashinata ayudashca?

¹⁴ Jehovata ashtaca huatacunata sirvinajuj huauquipanicunaca ninmi, cunanbimi Jehovapa  organizacionmandaca ashtahuan bendiciongunata chasquishcanchi nishpa. Chai huauquipanicunapa shimicunaca ciertomi can. Chaimi cai último huatacunapica JW Broadcasting, Internetpi jw.org paginatapash charinchi. Shinallata Traducción del Nuevo Mundo de las Santas Escrituras Bibliapashmi ashtahuan shimicunapi llujshishca. Ashtahuanbash 2014, 2015 huatapica “Sigamos buscando primero el Reino de Dios” nishca Asamblea Internacionaltami charircanchi. Chai asambleataca mundo enteropi 14 llactacunapa ashtahuan jatun estadiocunapimi rurarca. Chai asambleaman rishca gentecunaca ninandami cushijurca.

¹⁵ Jehovapa organización chai bendiciongunata cushcamandaca ashtacacunami ninanda agradicin. Asia llactapa uchilla pueblogupi sirvinajuj shuj cusahuarmica JW Broadcasting programamanda parlashpaca nircami: “Huaquinbica ñucanchilla sintirimandami Jehovapa munaita mundo enteropi ruranajushcataca cunganchi. Shinapash JW Broadcasting programata ricushpaca mundo enteropi huauquipanicunata charishcatami yarinchi. Cai pueblopi huauquipanicunaca JW Broadcasting programata ricushpaca ninandami cushijun. Chaimi chai programata ricushpaca Cuerpo Gobernante huauquicunata ashtahuan rijsi ushanchi nin. Jehová Diospa organizacionbi cashcatapashmi ninanda alicachin” nishpa.

¹⁶ Mundo enteropimi casi 2.500 Tandanajui Huasicunata shayachinajun, arreglanajun. Honduras llactapi huauquipanicunaca paicunapa propio tandanajui huasita utilizai callarishpami cashna escribirca: “Jahua cielopi Jehovapa angelcunahuan, mundo enteropi huauquipanicunahuan shuj familiashna caimandami cushilla sintirinchi. Cunanbica ñucanchipashmi shuj tandanajui huasiguta ñucanchi comunidadpi charinchi” nishpa. Shinallatami ashtacacunaca Bibliata, shuj publicaciongunatapash paicunapa propio shimipi chasquishpa cushilla sintirin. Shinallata jatun llaquicunata charishcapi ayudajpi, paicunapa comunidadcunapi predicación publicata charimanda o apashpa rinalla cochecunahuan jatun llactacunapi villachi ushashcamandami ninanda agradicin.

17. Cunan punllacunapi Jehová Dios paipa organizacionda apoyajushcataca ¿imashinata yachapanchi?

 ¹⁷ Contribuciongunata cushcahuanlla Jehovapa organización ashtaca cosascunata rurashcataca na Testigo gentecunaca na cri ushanllu. Shuj empresata ñaupaman pushaj jarica, ñucanchi publicaciongunata imprimij sucursaltami visitarca. Chaipi trabajajcuna na cobrashpa trabajajta, contribuciongunahuanlla chai tucuita rurajta, na imatapash jatushpa culquita tandachijta yachaj chayashpaca chai jarica manllarircami. Chaimi cashna nirca, cashna contribuciongunahuanlla chai tucuita rurashcataca na crinichu nishpa. Ñucanchicunaca Jehová Diospa ayudahuanllami shina rurai ushashcanchi (Job 42:2).

18. a) Diospa Reinota apoyashpaca ¿ima bendiciongunatallata charishun? b) Huahuacunapash, Bibliamanda yachajujcunapash contribuciongunata cuchunga ¿imashinata ayudai ushapanchi?

¹⁸ Jehová Diosca cai punllacunapi paipa Reinota apoyana privilegiotami ñucanchicunamanga cushca. Jehová Diosca paipa Reinota apoyajpica ashtacatami bendicianga (Mal. 3:10). Jehová Diosca ninmi, tucui shunguhuan caraj gentecunataca ali causaiguta charichunmi ayudasha nishpa (Proverbios 11:24, 25, liingui). Shujcunaman carashpaca ñucanchillatami cushilla sintirishun. Bibliapica ninmi: “Carajpi japijcunatapash yalimi carajcunaca, ninanda cushijun” nishpa (Hech. 20:35). Shinallata ñucanchi huahuacunata o Bibliamanda yachajujcunataca ñucanchi ruraicunahuan, parlocunahuanmi contribuciongunata cuchun animana capanchi. Contribuciongunata cushpaca ashtaca bendiciongunata charinatapashmi yachachina capanchi.

19. Cai temaca ¿imashinata ayudapashca?

¹⁹ Jehová Diosmi tucuita ñucanchimanga carashca. Chaimi ñucanchi charishcacunata paiman carashpaca paita juyashcata, pai ñucanchimanda imata rurashcata agradicishcatapash ricuchinchi (1 Crón. 29:17). Diospa templo huasita shayachingapaj ‘tucui shunguhuan, paicunapa tucui munaihuan Mandaj Diosman carashcamandami’ israelitacunaca ninanda cushijunajurca (1 Crón. 29:9). Jehová Dios carashcacunamanda paiman carashpami catina capanchi. Shina rurashpaca cushillami sintirishun.