1-3. a) ¿Imamandata yachanchi, ñucanchipash Jehovapa ali cumbagucuna tucuita ushashcata? b) Cai temapica ¿picunamandata yachajupashun?

BIBLIAPICA quimsa viajetami Abrahandaca nin, Diospa ali cumbagumi carca nishpa (2 Crónicas 20:7; Isaías 41:8; Santiago 2:23). Paitallami Bibliapica Diospa ali cumbagumi carca nin. Shinaca chaishuj gentecunaca ¿nachu Jehovapa ali cumbagucuna caita ushanchi? Tucui gentecunallatami Jehovapa ali cumbagu cana bendicionda chari ushanchi. ¿Imamandata shina ninchi?

² Bibliapica yachachinmi ashtaca huarmicuna, jaricunami Jehovata cazungapaj, paipi feta charingapaj esforzarishpa Jehovapa ali cumbagucuna tucurca nishpa (Salmo 25:14, liingui). Chai tucuilla gentecunatami apóstol Pabloca nirca, ‘Diospi alipacha crishcatami ricuchishca’ nishpa (Hebreos 12:1).

³ Cai temapica Rutpash, Ezequiaspash, Mariapash Diospa ali cumbagucuna cashcatami yachajushun. Rutca Moab llactamanda viuda, joven huarmigumi carca. Ezequiasca Judá llactata mandajuj ali reymi carca. Mariaca Jesuspa mamami carca, humilde huarmigumi carca. Shinaca, Jehová Diospa ali cumbagucuna cangapaca paicuna imata rurashcata ricupashun.

4, 5. a) ¿Ima shinlli decisiondata Rutca agllana carca? b) ¿Imamandata chai decisionda agllanaca shinlli cashcanga? (Callari dibujota ricupangui).

⁴ Noemica Rut, Orpá nishca ishcai jachungunahuanmi Moab llactamanda Israel llactaman rinajurca. Shinapash Orpá nishca jachunga Moab llactamanmi tigrarca. Cutin Noemica Israel llactaman chayangapami munajurca. Shinaca ¿imatata Rutca rurarca? ¿Moab llactapi paipa familiapaman tigrarcachu? ¿Noemita catishpachu rirca? (Rut 1:1-8, 14). Llactaman tigranata o Noemita catinata decidinaca shinllimi cashcanga. ¿Imamandata shinlli cashcanga? Ricupashun.

⁵ Moab llactaman tigrashpaca, paipa huasipimi Rutca caita ushanman carca, paipa familiapash ayudaita ushanmanmi carca, pai rijsishca costumbrecunatallami catinman carca, pai parlashca shimitallatami parlanman carca. Shinapash Israel llactaman Noemihuan rishpaca chai tucuilla ayudacunataca na charinmanllu carca. Ashtahuangarin, Israel llactapi shuj ali cusata o ali familiata mascashpa ayudaitapash Noemica na ushanmanllu carca. Chaimandami Noemica Ruttaca camba llactaman tigrailla nirca. Imashinami yachajuparcanchi, Orpaca ‘paipa llactaman, paipa dioscunapamanmi tigrarca’ (Rut 1:9-15). Shinapash Rutca chaita rurangapaca na munarcachu.

6. a) Rutca ¿ima ali decisiondata agllarca? b) ¿Imamandata Boazca Ruttaca nirca, Taita Diospa “alas” ucupi pacajunatami mascashcangui nishpa?

⁶ Rutca paipa cusa o paipa suedra Noemí parlajpimi Jehovataca rijsishcanga. Moab llactamanda dioscunahuan ricujpi Jehová Dios shican cashcatami Rutca alimi cuenta japirca. Chaimandami Jehovata juyai callarishpa, paitalla juyangapaj, adorangapaj munashpa Noemitaca nirca: “Cambaj llactapash, ñuca llactami canga. Cambaj Taita Diospash, ñuca Taita Diosmi canga” nishpa (Rut 1:16). Ñucanchicunaca Noemita juyashcata yachashpami Ruttaca alicachinchi. Shinapash, Jehovata juyashcamandami Ruttaca ashtahuan alicachinchi. Jehovata tucui shunguhuan juyajta ricushpami Boazca Ruttaca nirca, Taita Diospa “alas” ucupi pacajunatami mascashcangui nishpa (Rut 2:12, liingui). Boazpa shimicunata liishpaca, shuj huahua pajarogu taitamamapa alas ucupi pacajujujtami pensarinchi (Salmo 36:7; 91:1-4). Shina juyashcamanda, confiashcamandami Jehová Diosca shuj taita cuenda Ruttaca ayudarca, cuidarcapash. Noemita catishpa rina decisionda agllashcamandaca Rutca nunca na arripintirircachu.

7. Jehovaman mingarishpa, bautizarinata ishcai shungu tucushcacunataca ¿imapi pensarinata ayudai ushan?

⁷ Ashtaca gentecunaca Jehovamanda yachajushpapash Jehovapa “alas” ucupi pacajunataca na mascashpami Jehovaman mingarishpa, bautizarinataca ishcai shungu tucun. Quiquinbash shina cajpica ¿imata ayudai ushan? Pundapica pensaripai ¿imamandata Jehovaman mingarinataca manllani? nishpa. Chai jipaca pensaripai, cai nali mundopica tucuicunami Jehovata cashpa o shuj dioscunata cashpapash sirvinajunchi (Josué 24:15). Chaimandami Jehovata sirvinata agllana canchi. Ashtahuangarin pensaripai, Jehovaman mingarishpaca ima problemata charishpapash Jehová Dios cuidanapi, ayudanapi feta charishcatami ricuchinajunchi. Jehovapi Rut confiashcamandami paitaca cuidarca, ayudarcapash.

8. Ezequías huahua cashpaca ¿ima nali cosascunatallata ricurca?

⁸ Ezequiasca Jehovatallami sirvishpa causashun nij llactapimi viñarca. Shinapash huaquin israelitacunaca na Jehovata cazunllu carca. Ezequiaspa taitapash nalipacha reymi carca. Jehovapa templo huasitapash na respetanllu carca, shuj gentecunamanbash yanga dioscunata adoranatami Ezequiaspa taitaca yachachirca. Ezequiaspa huauquicunatapashmi yanga dioscunaman carani nishpa rupachirca. Chai nali cosascunata ricushpa viñanaca Ezequiaspaca llaquimi cashcanga (2 Reyes 16:2-4, 10-17; 2 Crónicas 28:1-3).

9. ¿imamandata Ezequiasca Jehovahuan fiñarita ushanman carca?

⁹ Ezequiasca paipa taitapa nali ejemplota ricushpapash Jehovahuanga nunca na fiñarircachu. Cunanbipash ashtacacunami Ezequías cuenda llaquilla causaita charishca. Huaquingunaca uchilla problemacunamandami Jehovahuan, paipa organizacionhuanra fiñarishca (Proverbios 19:3). Cutin shujcunaca yanmi, huahua cashpa nali cosascunata ricushcamandami ñucapash nali cosascunata rurasha, o ñuca taitamacunashnallatami pandarisha nishpa (Ezequiel 18:2, 3). Shinapash ¿chaica ciertochu can?

10. a) ¿Imamandata Jehová Dioshuanga nunca na culirana capanchi? b) Ñucanchi taitamacuna alita o nalita yachachijpipash ¿imatata cada uno ruraita ushapanchi?

¹⁰ Ezequiaspa ejemplopi yachajushca shinaca, chaica na ciertochu can. Ñucanchicunaca nunca na Jehová Dioshuanga culiranachu canchi. Nali cosascuna pasajpica Jehová Diosca na culpata charinllu (Job 34:10). Ashtahuangarin, gentecunallata alita ruranata o nalita ruranata agllachunmi Jehová Diosca gentecunata rurarca (Deuteronomio 30:19). Chaimandami ñucanchi taitamamacuna alita o nalita yachachijpipash ñucanchillata alita ruranata o nalita ruranata agllaita ushanchi (Proverbios 22:6; Colosenses 3:21). Shinaca ¿imata ruranatata Ezequiasca agllarca?

11. ¿Imamandata Ezequiasca ali rey carca?

¹¹ Ezequiaspa taita Judá llactapi nali rey cajpipash Ezequiasca ali reymi carca (2 Reyes 18:5, 6, liingui). Ezequiasca paipa taitapa chaquita catinapa randica Isaías, Miqueas, Oseas nishca ali profetacunapa shimicunata, consejota catishpami paipa taitapa nali  rurashca cosascunata arreglarca. Pundapica Jehová Diospa templo huasita limpiashpami, Jehovatapash gentecunapa juchacunata perdonapai nishpa mañarca, tucuilla llactapi maquihuan rurashca yanga dioscunatapash tucuchichunmi mandarca (2 Crónicas 29:1-11, 18-24; 31:1). Jipamangarin, shuj contra rey atacanata uyashpaca shinlli feta charishcata, na manllashcata ricuchishpami Ezequiasca Jehová cuidanata confianami canguichi nishpa israelitacunataca animarca (2 Crónicas 32:7, 8). Jipamanga, shungupi jariyashca jatun tucushcami Ezequiasca tucurca. Shinapash Jehová consejajpica pandarishcata intindishpami cambiarca (2 Crónicas 32:24-26). Imashinami ricupanchi, Ezequiasca paipa familia nali cashca cajpipash Jehovapa ali cumbagu cangapami esforzarirca. Chaimandami ñucanchicunapash paipa ejemplota catingapaj munana capanchi.

12. Ashtaca huauquicuna, panicunaca ¿imatata Ezequías cuenda rurashca?

¹² Cai mundopi causaica llaquinaimi can. Ashtaca huahuacunami taitamamacunapash na juyajpi, na cuidajpi llaquilla viñan (2 Timoteo 3:1-5). Ashtaca huauquicuna, panicunapash familiapica ashtaca llaquicunata charishpami viñashca. Shinapash Jehovapa ali cumbagu canatami agllashca. Paicunaca Ezequías shinami, taitamacuna ashtacata pandarijpipash, ali ñanda agllashca. Gentecunata alita, nalita ruranata agllai ushachun Jehová rurashcamandami, ñucanchicunaca Ezequías cuenda Jehovata sirvinata, alabanata agllaita ushanchi.

13, 14. a) ¿Imacunamandallashi Mariaca preocuparijushcanga? b) ¿Imatata Mariaca ángel Gabrielmanga nirca?

¹³ Ezequiaspa punllacunamanda ashtaca huatacuna jipaca, María nishca ali cuitsagumi causarca. Paipash Jehovapa ali cumbagumi carca. Chaimandami Mariaca Jehová Diospa Churita unguna, viñachina bendicionda chasquirca. Jehová Diosca Mariata ninanda juyashpa, paipi confiashpami chai bendicionda curca. Chai bendicionda chasquinata yachashpaca ¿imashinata Mariaca sintirica?

¹⁴ Mariata Jehová Dios bendiciashcataca tucuicunami yachanchi. Shinapash ¿imacunapillashi Mariaca preocuparijushcanga? Pensaripai. Ángel Gabrielca Mariamanga villarcami, shuj jarihuan nara cashpallatami vijsayu tucugringui nishpa. Chaita villashpapash ángel Gabrielca María imashina vijsayu quedashcataca gentecunamanga na villachigrijurcachu. Chaimandami Mariaca, imatashi gentecunaca ninga nishpa preocuparijushcanga. Shinallata na shuj jarihuan cashcataca ¿imashinashi Josemanga ninman carca? Ashtahuangarin, Taita Diospa Churita viñachinaca shuj jatun responsabilidadmi carca.  Imacunapilla María preocuparijushcataca na yachanchichu. Shinapash Mariaca ángel Gabrieltaca nircami: ‘Ricui, Jatun Diosta sirvijca, caipimi capani. Can villashcashna, Diosca ñucaman carahuachun nircami’ (Lucas 1:26-38).

15. ¿Imamandata Mariaca shinlli feta charirca?

¹⁵ Mariaca shinllipacha feta charimandami esclavocunashna tucui mandashcata cazungapaj decidirishca carca. Shinallata Jehová cuidanataca tucui shunguhuanmi crirca. Shinapash ¿imamandata tucui shunguhuan crirca? Tucui shunguhuan cringapaca ashtahuan shinlli feta charingapami esforzarirca. Chaimandami Jehová Diospash shinlli feta charichun Mariataca bendiciarca (Gálatas 5:22). Shinaca ashtahuan shinlli feta charingapaca ¿imatata Mariaca rurarca? Chaipaca María imashina uyaj cashcata, imata parlaj cashcata ricupashun.

16. ¿Imashinata yachanchi Mariaca ali uyaj cashcata?

¹⁶ ¿Imashinata Mariaca uyan carca? Santiago 1:19​pica ninmi: ‘Imaguta cashpapash tucuicunallatami aliguta uyajcuna, aliguta yarishpara rimajcuna’ cana canguichi nishpa. Chaimandami Mariamanda parlashpaca Bibliapica nin, Mariaca Taita Diosmanda imaguta uyashpapash aligutapacha yarishpami paipa shungupi alichin carca nishpa. Chai jipapash minishtirishca cosascunapi pensangapami Mariaca tiempota llujchin carca. Ishcai ejemplocunata ricupashun. Jesús nacirijpica llamacunata michijcunami huaquin shimicunata Mariaman nirca. Shinallata, Jesús 12 huatacunata charishpaca shuj ali shimicunatami Jesusca Mariaman nirca. Mariaca ali uyaj cashpami, uyashca shimicunapi pensarishpa, chai shimicunataca shungupi tarpurca (Lucas 2:16-19, 49, 51).

17. Mariapa shimicunamandaca ¿imatata yachajupanchi?

¹⁷ ¿Imacunamandata Mariaca parlan carca? Bibliapica huaquin textocunapillami Mariapa shimicunaca escribishca tiajun. Ashtahuanbachaca, Lucas 1:46-55​pimi Mariapa shimicunaca tiajun. Huaquin textocunalla cajpipash chai textocunata ricushpami yachanchi, Mariaca Escrituras Hebreasta ali rijsishcata. Chai textocunapi Mariapa shimicunata liishpaca Samuelpa mamapa shimicunatami yarinchi (1 Samuel 2:1-10). Ashtahuangarin, casi 20 viajetami Taita Diospa escribichishcacunamandaca shuj shuj shimicunata yarishpa Mariaca parlarca. Imashinami ricupanchi, Mariaca paipa ali cumba Jehovamanda yachajushcata parlanatami alicachin carca.

18. ¿Imashinata Mariapa ejemplota cati ushapanchi?

¹⁸ Huaquinbi imapash shinlli responsabilidadta Jehová Dios cujpica Mariapa ejemplota catishpa, Jehová Dios ayudanata confiashpami Jehová mingashcataca pactachina canchi. Shinallata, Jehová imata nijta ali uyashpa, Jehovamanda imata yachajushcapi, shamuj punllacunapi Jehová imata ruranatami pensarina capanchi. Ashtahuangarin, imata yachajushcataca cushijushpami shujcunamanbash parlana capanchi (Salmo 77:11, 12; Lucas 8:18; Romanos 10:15).

19. Jehovapa ali cumbagucunapa ejemplota catishpaca ¿ima bendiciondata charishun?

¹⁹ Imashinami ricupanchi Rut, Ezequías, Mariapash Abrahanshnallatami Taita Diospa ali cumbagucuna carca. Paicunapashmi ‘Diospi alipacha crishcata ricuchishpa’ Jehovapa ali cumbagucuna cana bendicionda chasquishca. Shinaca paicunapa ali ejemplota catipashunchi (Hebreos 6:11, 12). Shina rurashpami ñucanchipash unai unaicaman Jehovapa ali cumbagu cana bendicionda charishun.