QUIQUINGA ¿maijan punllatata ashtahuan cushijushpa yaripangui? Huaquingunaca ninmi, cazarashca punllata, primer huahuata charishca punllata o bautizarishca punllatami ashtahuan cushijushpa yarini nishpa. Taita Diosta tucui ushaihuan, tucui almahuan, tucui shunguhuan, tucui yuyaihuan juyashpa quiquin bautizarijta ricushpaca ashtaca huauquicuna panicunami cushijurca (Marcos 12:30).

Quiquin bautizarishca punllamandaca ashtaca cushijuitami chaririangui. Shinapash huaquingunaca Taita Diosta cushijushpa sirvitaca ñana ushanajunllu. ¿Imamandata ñana ushanajun? ¿Imamandata Taita Diostaca cushilla sirvishpa catita ushapanchi? Huaquin yuyaicunata ricupashun.

Bibliapi ali villaicunata uyashpaca tucui shunguhuanmi cushijunchi. Bibliapimi Jehová Diosca nijun, ñallami ñuca Reinota mandachun churashpa, cai mundopi nali ruraicunata tucuchishpa shuj juyailla paraíso Alpaguta carasha nishpa. Sofonías 1:14​pica ninmi: “Mandaj Dios shamuna jatun punllami ña chayamujun” nishpa. Bibliapi shina nijpipash, huaquinbica Taita Diospa punllaca na ucha chayamunllu nishpachari Jehová Diosta cushilla sirvitaca ñana ushanajunchi (Proverbios 13:12).

Ñucanchi huauquipanicunahuan asha tiempoguta compartinami Jehovata cushilla sirvichun ayudan. Huaquingunaca Jehová Diosta sirvijcuna ali portarijta ricushpami testigo de Jehová tucurcanchi (1 Pedro 2:12). Chaimandami huaquinbica shuj huauqui imapash nalita rurashpa disciplinata chasquijpica ashata desanimarishcanchi, Jehovata cushijushpa sirvitapash ñana ushashcanchi.

Cutin huaquinbica ashtaca cosascunata, ashtaca culquita charina munaicunami desanimachin. Diablopash, paipa munaita ruraj gentecunapash ñucanchitaca crichingapaj munanmi, na minishtirishcata cosascunatapash minishtinipachami yashpa randichun. Shinapash Jesusca nircami: ‘Pipash ishcai amota sirvitaca na ushanllu. Ishcai amota sirvijushpaca shujtaca na ricunayachishpa, shujtallami juyanga. Na cashpaca shuj amotalla cazushpami, shujtaca yangapi churashpa puringa. Shinallatami cangunaca, Taita Diostapash, imata charishcacunatapash, ishcandita sirvitaca na ushanguichi’ nishpa (Mateo 6:24). Cai mundopi cosascunata ninanda charingapaj munashpaca Jehovata cushilla sirvishpaca catitaca na usharingachu.

Jehovata juyashpaca paita sirvinaca na shinllichu can (1 Juan 5:3). Jesusca nircami: ‘Imatapash rurashpa shaijushcashna, aparishcashna causajcunaca ñucapaman shamuichi. Ñucami cangunataca samachisha. Ñuca yachachishcataca yugota aparinshna yachajuichi. Ñucallami na ñapash fiñarij, jariyanata na yarij shunguta charini. Ñucamandami cangunapa almaca samanata taringa. Ñucapa yugoca fangallagumi, aparijpipash na llashangachu’ nishpa (Mateo 11:28-30). Jesusta catimandami cushilla, ali sintirinchi.  Shinaca Jehovata cushilla sirvishpa catingapaca quimsa yuyaicunata ricupashun (Habacuc 3:18).

Ñucanchita Ruraj, cushilla Taita Diosta sirvinchi (Hechos 17:28; 1 Timoteo 1:11, NM). Tucuicunami Jehová Diosmanda causanchi. Chaita yarishpami mashna huatacunata bautizarishca cashpapash Jehovataca cushilla sirvi ushashun.

Héctor huauquipa ejemplota ricupashun. Paica 40 huatacunatami superintendente carca. Cunanbi ña mayorllagu cashpapash cushijushpami Jehovataca sirvishpa catin (Salmo 92:12-14). Paipa huarmipash ungushca ungushcami can. Ñana pundashna imacunatapash rurai ushashpapash cushijushpami Jehovataca sirvishpa catin. Huauqui Hectorca ninmi, ñuca huarmigu ashtahuan ashtahuan anllayajujta ricushpaca ninandami llaquirini. Paita cuidana shinlli cajpipash Jehovata cushilla sirvishpa catingapami esforzarini. Jehová paipa munaita pactachichun gentecunata rurashcata yarishpami, Jehovata ashtahuan juyashpa paita tucui shunguhuan sirvingapaj munani nin. Chaimanda Héctor huauquiguca villachishpa catingapaj, Paraisopi tiana bendiciongunapi pensarishpa catingapaj esforzarin. Shinami huauqui Hectorca Jehovata cushilla sirvishpa catita ushashca.

Jehová Diosca paipa Churi Jesustami ñucanchimanda huañuchun cachamurca. Bibliapica ninmi: ‘Taita Diosca cai pachapi causajcunata ninanda juyashpami, paipa shujlla Churita caramurca. Pipash paita crishpaca na chingaita chingagringachu, ashtahuangarin causaitami causagringa’ (Juan 3:16). Jesús ñucanchimanda causaita cushcata crijpimi Jehová Diosca ñucanchi juchacunata perdonashpa para siempre causana oportunidadta cunga. Shinaca Jehová Diosta agradicishpami paitaca cushilla sirvishpa catita ushashun.

México llactamanda Jesús huauquipa ejemplotapash ricupashun. Nara Testigo cashpaca ninandami trabajanataca alicachin carca. Paica ashtahuan culquita ganangapaj munashpami ashtahuan ashtahuan horascunata trabajan carca. Shinapash tiempohuanga Jehovata rijsishpa, paipa juyashca Churita gentecunamanda huañuchun cachamushcatami huauqui Jesusca yachajurca. Jehová Diosta ashtahuan sirvingapaj munashpami Jehovataca, tucui causaipimi sirvisha nishpa Jehovaman mingarirca, bautizarircapash. 28 huatacunata chai trabajopillata trabajajushca cashpapash, trabajota saquishpami Jehovata ashtahuan sirvi callarirca. Huauqui Jesusca ninmi, chai punllamandami cushilla causai callarircani nishpa.

Jesusta catijcunaca limpio causatami charinchi. Jehovata nara rijsishpaca ¿imashinata causaparcanchi? Apóstol Pabloca Roma llactamanda huauquicunataca nircami: ‘Cangunaca [esclavoshna] juchatara cazushpa causashca cashpapash’ cunanga ‘[alita] rurajcunami tucushcanguichi’ nishpa. Limpio causaita charimandami romano huauquicunaca para siempre causana esperanzata charirca (Romanos 6:17-22).  Ñucanchicunapash Taita Diosta cazushpa causaimandami cai mundopa nali ruraicunapi na chapurishpa ashtaca llaquicunapi na urmashcanchi. Shinaca limpio causaita charishcamandaca ¿nachu cushilla sintirina capashcanchi?

Cunanga Jaime huauquipa ejemplotapash ricupashun. Nara Testigo cashpaca boxeadormi carca. Taita Dios tiajta, Taita Dios tucuita rurashcataca na crinllu carca. Shinapash tandanajuicunaman ri callarishpa, huauquicuna ninanda juyajta ricushpami huauqui Jaimeca paipa causaita cambiangapaj munarca. Jehovatapash mañarcami, quiquin tiajtapash cringapaj ayudahuangui nishpa. Jaimeca ninmi: “Asha ashami Jehová Dios juyaj, llaquij Taita Dios cashcataca yachajurcani. Paita cazuimandami ashtaca llaquicunamanda librarishcani. Na cambiashpaca ñucapa punda boxeador cumbacunashnami ña huañushca caiman carcani. Jehovata sirvi callarishca punllamandami cushilla causani” nishpa.

Cai mundopa nali ruraicuna tucuringacamanga ¿imatata rurana canchi? Ñucanchica ñami Jehovata cazushpa causanajushcanchi. Chaimandami para siempre causana esperanzata charinchi. Shinapash Gálatas 6:8, 9​pi shimicunataca pactachishpami catina canchi. Chaipica ninmi: “Imata cashpapash aliguta ruranataca, na shaijunachu canchi. Na cungashpa aligutalla rurashpaca japina punllacuna chayamujpimi, granota tandachinshna japinajushun” nishpa. Shinaca Jehovapi confiashpa llaquicunata aguantashunchi. Shinallata, Ninan Manllanai Llaqui Punllacunamanda salvaringapaj minishtirishca cualidadcunata charingapaj esforzarishunchi. Ashtahuangarin, Jehovata cushilla sirvishpa catingapaj esforzarishunchi (Apocalipsis 7:9, 13, 14; Santiago 1:2-4).

Aguantashpa catijpica Jehová Diosca ñucanchicuna imashina esforzarijujta ricushpa, paita juyajta, paipa shutita alicachijta ricushpami ashtacata bendicianga. Jehovata cushilla sirvishpa catishpaca rey Davidshna sintirishpami cai shimicunata nishun: “Ñuca tucui causaipica, Mandaj Diostami, ñuca yuyaipi charircani. Pai ñuca ali ladopi cajpimi, na cuyuchi tucusha. Chaimandami ñuca shunguca cushijurca” nishpa (Salmo 16:8, 9).