1, 2. ¿Imashinata Davidca Jehovata tucui shunguhuan cazushcata ricuchirca? (Callari dibujota ricupangui).

DAVIDCA rey Saúl paipa quimsa huaranga soldadocunahuan huañuchingapaj mascajujpimi, paipa soldadocunandi rishpa Judá llactapa chaquishca pambacunapi pacajushca carca. Shinapash shuj tutaca, rey Saúl paipa soldadocunahuan maipi puñunajujta yachashpami, Davidca paipa soldado Abisaihuan paicunapaman upallaguta rirca. Chaiman chayashpaca Abisaica Saulta huañuchingapami munarca. Shinapash Davidca, Saulta na huañuchichun saquishpami nirca: ‘¿Maijanshi Mandaj Dios agllashpa churashca jatun mandajta huañuchishpaca, ima nalitapash na rurashcashna ricuringa?’ nishpa. Jipamangarin nircami: “Mandaj Dios agllashpa churashca jatun mandajta ñuca maquihuan huañuchitaca na ushanichu” nishpa (1 Samuel 26:8-12, NM).

² Saulta rey cachun Jehová Dios agllashcataca Davidca alimi yacharca. Jehovata tucui shunguhuan cazushcata ricuchingapaj munashpami Saulta respetan carca. Chaimandami huañuchingapaca na  munarca. Cunanbipash Jehová Diosca huaquin jaricunata agllashpami autoridadta cushca. Chaimandami Jehová Diosca paita tucui shunguhuan cazushcata ricuchishpa paicunata respetachun munan (Salmo 18:25, liingui). ^[1] (Cai tema tucuripi notata ricupangui).

3. ¿Imashinata Abisaica Davidta siempre respetashcata ricuchirca?

³ Davidta rey cachun Jehová agllashcata yachashpami Abisaica Davidta respetan carca. Shinapash, David rey cashpaca shuj cazada huarmihuan puñushpami shuj jatun juchata rurarca. Chai jipapash Joab nishca soldadotami Davidca, chai huarmipa cusata shuj macanajuipi contra soldadocuna huañuchichun saquingui nishpa mandarca (2 Samuel 11:2-4, 14, 15; 1 Crónicas 2:16). Joabca Abisaipa huauquimi carca. Joabpa huauqui caimandaca David ima juchacunata rurashcataca Abisaica yachariangami. Ashtahuangarin, Abisaica soldadocunata mandaj caimandami autoridadta charirca. Autoridadta charishpapash chai autoridadta aprovechashpa rey tucungapaca Abisaica na munarcachu. Ashtahuangarin, siempremi Davidtaca respetarca, sirvirca, contracuna ama huañuchichunbash cuidariarca (2 Samuel 10:10; 20:6; 21:15-17).

4. a) ¿Imamandata ninchi, Davidca paipa tucui causaipimi Jehovata cazurca nishpa? b) ¿Imatata cai temapica yachajupashun?

⁴ Davidca paipa tucui causaipimi Jehovataca tucui shunguhuan cazurca. Joven cashpaca Jehovamanda, Jehovapa llactamandapash burlarijpimi Goliat nishca jatun jatun soldadota huañuchirca (1 Samuel 17:23, 26, 48-51). Ña rey cashpa juchapi urmajpicarin, profeta Natandami Jehová Diosca Davidta consejachun cacharca. Chaimandami Davidca consejota chasquishpa arripintirirca (2 Samuel 12:1-5, 13). Ña ruculla cashpacarin, Jehovapa templo huasita rurachunmi ashtaca valishca cosascunata Davidca curca (1 Crónicas 29:1-5). Imashinami ricupanchi, Davidca jatun juchacunata rurashpapash Jehovata tucui shunguhuan cazunataca na saquircachu (Salmo 51:4, 10; 86:2). Chaimandami cati parrafocunapica quimsa cosascunata yachajushun. 1) Davidpa ejemplomandapash, Davidpa punllacunapi causashca gentecunamandapash, 2) shuj gentecunatapash yali Jehovata pundapi cazuna cashcata, 3) Jehovata tucui shunguhuan cazungapaj ima cualidadcuna minishtirishcata.

5. ¿Imatata Abisaimandaca yachajupanchi?

⁵ Abisaica David paita alicachichun munashpami Saulta huañuchingapaj munarca. Shinapash ‘Mandaj Dios agllashcata’ huañuchishpa Jehovata na cazujushcataca Abisaica na intindircachu. Cutin Davidca Jehovata tucui shunguhuan cazushcata ricuchingapaj munashpami Saulta Abisai huañuchichunga na saquirca (1 Samuel 26:8-11). Shinaca ¿imatata Abisaimandaca yachajupanchi? Pita pundapi cazunata o na cazunata yachangapaca Bibliapa consejocunapi pensarishpami ali decisionda agllana canchi.

6. Ñucanchi familiacunata, rijsicunata juyashcata ricuchingapaj munashpapash ¿imapita cuidadota charina capanchi?

⁶ Tucuicunallatami ñucanchi familiata, rijsicunata juyashcata ricuchingapaj munanchi. Shinapash cuidadota charinami canchi. Ñucanchicuna juchayu caimandaca familiacunatara pundapi churashpami Jehovata tucui shunguhuan cazunataca huashaman saquinchiman (Jeremías 17:9). Chaimandami shuj familia o shuj rijsi imapash nalita rurashpa Jehovata cazunata  huashaman saquijpica, Jehovata tucui shunguhuan cazunata yaria cana canchi (Mateo 22:37, liingui).

7. ¿Imashinata shuj paniguca ninanda llaquirishpapash Jehovata tucui shunguhuan cazushcata ricuchirca?

⁷ Ñucanchi familiata congregacionmanda llujchijpi o expulsajpica pita pundapi churashcatami ricuchina canchi. Anita shuti panipa ejemplota ricupashun  ^[2] (cai tema tucuripi notata ricupangui). Shuj punllaca paipa mamami cayarca visitai ushanichu nishpa. Mamaca expulsashcami carca. Familiaca ñana parlahuanllu nishpami mamaca llaquillami cani nirca. Chaita uyashpaca Anitaca llaquillami sintirirca. Huasipi chasquinata o na chasquinataca shuj cartapimi escribisha nirca. Shinapash cartata nara escribishpallatami Anitaca aliguta pensarishpa Bibliapa huaquin textocunapi yuyarca (1 Corintios 5:11; 2 Juan 9-11). Ashtahuangarin, ali shimicunata escribishpami Anitaca, mamallata juchata rurashpa na arripintirishpa familiata saquishcata ricuchirca. Cushilla causangapaj munashpaca Jehovapamanmi tigrana cangui nircami (Santiago 4:8).

8. ¿Maijan cualidadcunata Jehovata tucui shunguhuan cazuchun ayudan?

⁸ Davidpa punllacunapi Jehovata huaquin sirvijcunaca humilde caimanda, llaquishpa juyaimanda, na manllashcamandami Jehovata tucui shunguhuan cazui usharca. Shinaca, chai quimsa cualidadcuna Jehovata tucui shunguhuan cazuchun ñucanchita imashina ayudajta ricupashun.

9. ¿Imamandata Abnerca Davidta huañuchingapaj munarca?

⁹ Jonatanga Saulpa churimi carca. Cutin Abnerca Saulpa soldadocunata mandajmi carca. Ishcandillatami Goliatta David huañuchishpa Goliatpa umata Saulpaman apajtaca ricurca. Shinapash Jonatanllami Davidpa amigo tucushpa paita siempre apoyashpa catirca (1 Samuel 17:57–18:3). Cutin Abnerca Saulta apoyashpami Davidta huañuchingapaj munashpa catiriarca (1 Samuel 26:1-5; Salmo 54:3). Jonatanbash, Abnerpash Davidta Israel llactapa rey cachun Jehová Dios agllashcataca alimi yacharca. Shinapash Saúl huañushca jipaca, Saulpa churi Is-bóset rey cachun munashpami Abnerca Davidta na apoyashpa Is-bosettara apoyarca. Ashtahuangarin, pai rey tucungapaj munashpami, Abnerca Saulpa shuj huarmihuan puñushcanga (2 Samuel 2: 8-10; 3:6-11). ¿Imamandata Jonatanga Davidpa amigo tucurca, cutin Abnerca Davidta  huañuchingapaj munarca? Jonatanga humilde caimanda, Jehovata tucui shunguhuan cazungapaj munaimandami Davidpa amigo tucurca. Cutin Abnerca na humilde carcachu, Jehovata tucui shunguhuan cazungapapash na munarcachu.

10. ¿Imamandata Absalonga Jehovata na tucui shunguhuan cazurca?

¹⁰ Absalonga Davidpa churimi carca. Paica na humilde carcachu. Chaimandami Jehovataca na tucui shunguhuan cazurca. Absalonga paipa taitata rey cachun Jehová agllashcata yachashpapash, paira rey tucungapaj munashpami ‘carretacunata rurachishpa caballocunatapash tandachirca. Paita ñaupashpa calpachunbash [50] runacunatami churarca’ (2 Samuel 15:1). Ashtahuangarin, paita apoyachunmi Absalonga ashtaca israelitacunata umachirca, paipa taita Davidtapash huañuchingapaj munarca (2 Samuel 15:13, 14; 17:1-4).

11. Abnerpa, Absalonba, Barucpa ejemplocunamandaca ¿imatata yachajupanchi?

¹¹ Imashinami Abnerpa, Absalonba ejemplopi ricunchi, humilde canaca minishtirishcami can. Ashtahuan autoridadta charingapaj munashpaca Jehovataca na tucui shunguhuan cazui ushashunllu. Abnerpash, Absalonbash paicunapillami pensarirca. Shinapash ñucanchica na paicunashnachu cangapaj munanchi. Ashtaca culquita, shuj ali titulota, importante sintiringapalla ali trabajota tarina munaicunamandaca cuidarinami canchi. Na cuidarishpaca Jehovapa ali cumbagu caitaca na ushashunllu. Profeta Baruc ima tucushcata ricupashun. Barucca Jeremiaspa secretariomi carca. Paica na charishca cosascunata munashpami Jehovataca llaquilla sirvi callarirca. Chaimandami Jehová Diosca nirca: ‘Ñuca shayachishcacunatami urmachijuni, ñuca tarpushcacunatami fitishpa shitajuni. Tucui cai llactapi causajcunatami chashna rurasha. ¿Shina rurajujta ricushca jahuachu, canllata jatun tucunata mascangui? Chaitaca ama mascaichu’ nirca (Jeremías 45:4, 5). Barucca humilde caimandami Jehovapa consejota cazurca. Ñucanchicunapash cai nali mundo ñalla tucurinata yachashpami chai ali consejocunataca cazuna canchi.

12. Ñucanchipilla pensarishpaca ¿Jehovata tucui shunguhuan cazui ushashunllu? Shuj ejemplomanda parlashpa intindichipai.

¹² México llactapi Daniel shuti huauquipa ejemplotapash ricupashun. Paica pita pundapi churashcatami ricuchina tucurca. Danielca shuj na Testigo cuitsata munashpami paihuan cazarangapaj munajurca. Paica ninmi: “Precursor tucushca cashpapash cartacunata escribijunllami carcani” nishpa. Shinapash Danielca  Jehovata na tucui shunguhuan cazujushcatami cuenta japirca. Na paipilla pensarishpa, humilde cana cashcatapashmi intindirca. Chaimandami ashtaca huatacunata anciano cashca huauquitaca ayudahuai nirca. Danielca ninmi: “Chai huauquimi intindichihuarca, Jehovata tucui shunguhuan cazungapaj munashpaca ñana cartacunata chai cuitsaman escribijuna cashcata. Jehovata ashtacata mañashca jipa, ninanda huacashca jipami chai cuitsahuan escribirinataca saquircani. Shinami jipamanga villachinapi ashtaca cushijuita tarircani” nin. Cunanbica Danielca ñami superintendente de circuito can, Jehovata juyaj huarmiguhuanmi cazarashca can.

13. ¿Imashinata Natanga Jehovata tucui shunguhuan cazushcatapash, Davidta llaquishpa juyashcatapash ricuchirca?

¹³ Jehovata tucui shunguhuan cazushpaca shujcunatapash llaquishpa juyashcatami ricuchishpa ayudashun. Profeta Natán imata rurashcata ricupashun. Rey David cazada huarmihuan juchapi urmajpi, chai huarmipa cusata huañuchichun cachajpica Jehovata tucui shunguhuan cazushcamandami na manllashpa Natanga rey Davidhuan parlangapaj rirca. Shinallata Jehovata tucui shunguhuan cazuimanda Davidtapash llaquishpa juyashpa consejarca. Chaimandami, David pandarishcata aliguta intindichingapaca, shuj charij runami pobre runagupa shujlla huarmi llamaguta shuhuarca nishpa parlarca. Chaita uyashpaca Davidca ninanda culirashpami chai charij runaca huañunami can nirca. Shina nijpimi Natanga nirca, chai charij ‘runaca canllatami cangui’ nishpa. Shinami Davidca Jehovapa ñaupajpi shuj jatun juchata rurashcata cuenta japirca (2 Samuel 12:1-7, 13).

14. ¿Imashinata Jehovata tucui shunguhuan cazushcata, shujcunatapash llaquishpa juyashcata ricuchi ushapanchi?

¹⁴ Llaquishpa juyanaca Jehovata tucui shuguhuan cazuchunmi ayudan. Shinallata llaquishpa juyanami shujcunatapash ayudangapaj munachun ayudan. Pensaripai. Quiquinga shuj huauqui o pani juchapi urmashcata ali yachashcanguiman. Tal vez chai huauqui o pani quiquinba familia o rijsi cajpicarin paita llaquishpa juyaimandachari upalla quedangapaj munanguiman. Shinapash Jehovata tucui shunguhuan cazuna minishtirishca cashcata intindishpaca ¿imatata ruranguiman? Natanba ejemplota catishpami Jehovata tucui shunguhuan cazushpa chai huauquita juyashcatapash ricuchina cangui. Chaimandami chai huauquitaca ancianocunapa ayudata uchalla mascai nina cangui. Ancianocunahuan na parlajpica quiquinmi ancianocunahuan parlana cangui. Shinami ancianocunaca chai huauquita juyaihuan consejashpa Jehovahuan cutin ali cumbagu cachun ayudanga (Levítico 5:1; Gálatas 6:1, liingui).

15, 16. ¿Imamandata Husaica Jehovata tucui shunguhuan cazushcata ricuchingapaca na manllana carca?

¹⁵ Husai nishca runapash Davidpa ali cumbagumi carca. Paica Davidtapash juyashpa llaquishcata, Jehovatapash tucui shunguhuan cazushcata ricuchingapaca na manllaita charinachu  carca. ¿Imamandata shina cana carca? Israelitacunaca Davidpa churi Absalón rey cachunmi munanajurca. Absalonbash pai rey cangapaj munashpami soldadocunahuan Jerusalenman rirca. Chaimandami Davidpash pacajushpa rirca. Chai tucui cosascuna pasajujtaca Husaica alimi yacharca (2 Samuel 15:13; 16:15). Chaita ali yachashpaca ¿imatata Husaica rurarca? ¿Husaica Davidta na apoyashpachu Absalondara apoyarca? Na. David ña ruculla cajpipash, ashtacacuna Davidta huañuchingapaj munanajujpipash, Davidta rey cachun Jehová agllashcata yachashpami Husaica Davidta apoyarca. Davidta ayudangapaj munashpami Husaica Olivos nishca urcupi Davidta mascangapaj rirca (2 Samuel 15:30, 32).

¹⁶ Husaihuan tuparishpaca Davidca nircami, Jerusalenman tigrashpa Absalonba ali amigoshnalla tucupai nishpa. Shinami Husaica Ahitofelpa consejota na uyashpa paipa consejota uyachun Absalondaca animana carca. Shinaca ¿imashinata Husaica Davidtapash Jehovatapash cazushcata ricuchirca? David nishcata cazushpa Absalonbaman rishpaca, paipa causaitami Husaica peligropi churajurca. Chaimandami Davidca Husaita ayudapai nishpa Jehovata mañarca. Jehovapash Davidpa mañashcataca uyarcami. Absalonga Husaipa consejota uyashpami Ahitofelpa consejotaca na uyarca (2 Samuel 15:31; 17:14).

17. ¿Imamandata Jehovata tucui shunguhuan cazungapaca na manllaita charina capanchi?

¹⁷ Ñucanchicunapash Jehovata tucui shunguhuan cazungapaca na manllaita charinachu canchi. Huaquinbica familiapi, escuelapi, trabajopi cumbacuna o gobiernopa autoridadcunami Jehovapa mandashcata ladoman saquishpa paicunatara cazuchun munan. Japón llactamanda Taro nishca huauquipa ejemplota ricupashun. Paica huahuamandapachami taitamama ima nishcata rurashpa, paicunata juyashpa cushichinata gushtan carca. Shinapash Testigocunahuan Bibliata yachajui callarijpica paipa taitamamaca Bibliata yachajushpa catichunga na munarcachu. Chaimandami Taroca llaquilla sintirirca. Shinlli cajpipash tandanajuicunaman rinataca na saquircachu. Paica ninmi: “Paicunaca ashtacatami culirarca. Tauca huatacunatami paicunataca na visitai usharcani. Jehovataca ñuca decisionda ama cambiangapaj ayudahuangui nishpami mañan carcani. Cunanbica ñuca taitamamaca ñami ashata cambiashca. Ñami tauca viajeta visitai ushani” nishpa (Proverbios 29:25, liingui).

18. ¿Imatata cai temapica yachajupashcanchi?

¹⁸ Davidpa, Jonatanba, Natanba, Husaipa ejemplota catishpaca Jehovata tucui shunguhuan cazushpami cushijuita ushashun. Cutin, Abnerpa, Absalonba chaquitaca na catinachu canchi. Paicunaca Jehovata tucui shunguhuan cazungapaca na munarcachu. Shinaca ñucanchicunaca juchayu caimanda pandarishpapash Jehovata tucui shunguhuan cazuna minishtirishcapacha cashcatami ricuchi ushapanchi.