1, 2. a) ¿Imatata Jehová Diosca gentecunaman yachachishca? b) Isaías 46:10, 11; 55:11pica ¿imatata Jehová Diosca nishca?

BIBLIAPICA cashna nishpami callarin: “Callaripica, Taita Diosmi jahua pachatapash cai pachatapash rurarca” nishpa (Génesis 1:1). Taita Dios tucuita rurashca cajpipash gentecunaca huaquin cosascunatallami paipa rurashcacunamandaca yachanchi. Huaquin ejemplocunata ricupashun. Ñucanchi Alpamanda ashtahuan jahuaman imacunapash tiajtaca yachanchimi. Shinapash chaicuna imashina cajtaca na ali intindi ushanchichu. Shinallata, gravedad nishca tiashcamanda, imatapash alpaman shitajpi alpaman urmajtaca gentecunaca yachanchimi. Shinapash imamanda shina cajtaca na ali intindi ushanchichu (Eclesiastés 3:11). Chaicunata na ali intindijpipash cai Alpatapash, gentecunatapash imapa rurashcatami Jehová Diosca ñucanchiman yachachishca. Gentecunataca paiman rijchajtami Jehová Diosca rurarca. Ashtahuangarin, tucuilla gentecuna cai Alpapi para siempre cushilla causachunmi munarca (Génesis 1:26). Ñucanchicunaca paipa huahuacuna caiman carcanchi, Taita Diospash ñucanchi Taitami canman carca.

² Génesis capítulo 3pi nishca shinaca, Jehová Diospa munai ama pactarichunmi chai punllacunapica shuj jarcai ricurirca (Génesis 3: 1-7). Shinapash Jehová Diosca siempremi paipa munaita pactachin. Paipa munaita ama pactachichun jarcaitaca pipash na ushanllu (Isaías 46:10, 11; 55:11). Callaripi Jehová Dios imata rurangapaj munashcataca pai agllashca tiempopimi maimanda pactachinga. Chaitaca tucui shunguhuanmi crinchi.

3. a) ¿Imacunatallata Bibliapica yachajupashcanchi? b) ¿Imamandata chai yachajushcacunata cunanbi cutin yaringapaj munapanchi? c) ¿Ima quimsa tapuicunatata cai temapica yachajupashun?

³ Bibliata yachajui callarishpaca, cai Alpatapash gentecunatapash Jehová Dios imapa rurashcatami yachajushca cashun. Shinallata Jehová Diospa munai pactarichun Jesús imashina ayudashcatami yachajushca cashun. Shinaca ¿nachu ñucanchi yachajushcataca shujcunapash yachajuchun munapanchi? Jesús Huañushcata Yarina Tandanajuica ñami chayamujun. Chaimandami shujcunapash Bibliapa yuyaicunata yachajuchunga tucuicunata chai tandanajuiman invitanajupanchi (Lucas 22:19, 20). Jesús Huañushcata Yarina Tandanajuiman shamushpaca, callaripi Jehová Dios imata rurangapaj munashcatami gentecunaca yachajunga. Chaimandami uchalla pensarina canchi, chai tandanajuiman shamuchunga ima tapuicunamandata gentecunahuanga parlai ushani nishpa. Cai temapica cai quimsa tapuicunatami yachajupashun: ¿Imapata Jehová Diosca cai Alpatapash, gentecunatapash rurarca? ¿Imamandata Taita Diospa callari munaica na pactarirca? Taita Diospa munai pactarichunga ¿imamandata Jesusca paipa causaita cuna carca?

4. ¿Imashinata Jehová Diospa rurashcacunaca Jehová Diosta jatunyachin?

⁴ Jehová Diosca tucuitami alipacha, juyaillaguta rurarca (Génesis 1:31; Jeremías 10:12). Imata rurashpapash tucuitami maipi cana pushtupi churashca. Chaimandaca ¿imatata yachajupanchi? Jehová Diosca imata rurashpapash ñucanchipa ali cachunmi rurashca. ¿Nachu tucuicunallata gushtu frutacunata, juyailla cascadacunata, jahua cielopi juyailla luzerocunata ricushpaca imashinashi Taita Diosca shina rurajurca nishpa pensarishcanchi? Juyailla cosascunata alicachishpa ricuchunmi Jehová Diosca gentecunata rurarca (Salmo 19:1; 104:24, liingui).

5. Paipa tucuilla rurashcacuna ali funcionachun, shinallata gentecuna imashina causanata yachachunga ¿imatata Jehová Diosca churashca?

⁵ Jehová Diosca paipa tucui rurashcacuna ali funcionachun, ayudarichunmi leyes de la naturaleza nishcata churarca. Gentecunapash imashina causanata yachachunmi Jehová Diosca huaquin mandamientocunata churashca (Salmo 19:7-9). Jehová Diospa tucui rurashcacunami maipi canapi pushtupi can, imapapash ali can. Shuj ejemplota ricupashun. Ley de la gravedad nishcami cai Alpapipash, ashtahuan jahuamanbash aire tiachun ayudan. Shinallata, ley de la gravedad nishcami ñucanchi Alpa muyujujpipash cai Alpapi tiashca yacucuna ama jicharichun ayudan. Ley de la gravedad nishca na tiajpica, cai Alpapi pipash na causai ushanchimanllu. Tucuita maipi cana pushtupi Jehová Dios churashcamandallami tucui ali funcionan. Imashinami ricupanchi, cai Alpapash, gentecunapash na yangamandachu tiashca. Chaimandami gentecunaman villachinajushpaca, Tucuita Alipacha Ruraj Jehová Diosta rijsichun ayudana canchi (Apocalipsis 4:11).

6, 7. ¿Imacunatallata Jehová Diosca Adán y Evamanga cararca?

⁶ Jehová Diosca gentecuna cai Alpapi para siempre causachunmi munarca (Génesis 1:28; Mateo 5:5). Chaimandami Jehová Diosca na  mitsashpa ashtaca cosascunata Adán y Evamanga curca (Santiago 1:17, liingui) *. Shinaca ¿imatallata paicunamanga curca? Pundapica imata ruranata agllai ushana bendiciondami curca (“¿Imatata nisha nin?” nishca recuadrota ricupangui). Shinallata, aliguta pensarinata, shujcunata juyanata, ali amigocunata charina bendiciongunatami paicunamanga curca. Ashtahuangarin, Adanhuan parlashpami Jehová Diosca alita ruranata yachachirca. Shinallata ali causangapaj imata ruranatami Adanmanga yachachirca. Cai Alpatapash animalcunatapash cuidanatami Jehová Diosca yachachirca (Génesis 2:15-17, 19, 20). Shinallata pai rurashca juyailla cosascunata ricuchun, tacarichun, malichun, uyachun, mutiji ushachunmi Jehová Diosca Adanda Evataca rurarca. Shina rurashcamandami paicunaca cushijushpa paraíso Alpagupi causana carca. Jehová Dios mingashcata pactachinajushpaca, mashna huatacuna yalijpipash Adán y Evaca siempremi yachajushpa catita ushana carca.

⁷ Chai tucuita carashca jahuapash jucha illaj huahuacunata charichunmi Jehová Diosca munarca. Adán y Evapa huahuacunapash jucha illaj huahuacunatami chari ushana carca. Shinami cai Alpapica jucha illaj gentecunalla jundana carca. Jehová Diosca shuj ali Taita cuendami Adán y Evataca juyarca. Chaimandami cai Alpapi taitamamacunapash paicunapa huahuacunata juyachun Jehová Diosca munarca. Imashinami ricunchi, Jehová Diosca cai Alpatapash cai Alpapi tiashca juyailla cosascunatapashmi gentecunamanga carashca. Chai juyailla Alpagupimi gentecunaca para siempre causaita ushana carca (Salmo 115:16).

8. ¿Imamandata Jehová Diosca Génesis 2:16, 17pi shimicunata Adán y Evamanga mandarca?

⁸ Jehová Diospa munai imamanda na pactarishcata yachangapaca, Adán y Evapa punllacunapi ima pasashcata ricupashun. Adán y Eva imata na rurana cashcata yachachunmi Jehová Diosca cashna nishpa paicunataca mandarca: “Huertapi tiaj tucui yuracunapi fucushcataca micui ushanguimi. Ashtahuangarin alita, nalita yachaita cuj yurapi fucushcataca ama micunguichu. Ima punlla cashpapash, chai yuramanda micushpaca huañunguipachami” nircami (Génesis 2:16, 17). Jardín de Edenbica ashtaca yuracuna, gushtu frutacuna, granocunami tiarca. Shinapash, Jehová Diosca shuj yuramandallami ama micunguichu nirca. Chai mandashcata intindina, cazunaca facilmi carca.

9, 10. a) Diabloca ¿ima nishpata Jehová Diostaca juchachirca? b) ¿Imata ruranatata Adán y Evaca agllarca? (Callari dibujota ricupangui).

⁹ Jehová Diosta ama cazuchunmi Diabloca, shuj culebrata parlachishpa Evataca umachirca (Génesis 3:1-5, liingui; Apocalipsis 12:9). Diablo umachijpica ¿imatashi Evaca pensashcanga? Evaca pensashcangami ¿imamandata na tucui yuracunamanda japishpa micui ushani? ¿Imamandata na ñuca munashcata rurai ushani? nishpa. Ashtahuangarin Diabloca, “na huañunguichica” nishpami Evataca llullarca. Chaita nishca jipapash, Taita Diosta cazunaca na minishtirishcachu nishpa pensachunmi Diabloca munarca. Chaimandami Evataca nirca: ‘Chai yuramanda ima punllapash micujpica, cangunapa ñavica pascaringami. Taita Diospash’ chaitaca yachanmi nishpa. Chaita nishpami Diabloca, chai yurapi imapash ali yachai tiashcata Adán y Evamanga crichingapaj munarca. Ashtahuangarin Diabloca llullashpami nirca, chai yuramanda  micushpaca ‘Taita Dios yachanshnallatami alitapash, nalitapash yachanguichi’ nishpa.

¹⁰ Adán y Evaca Jehovata cazunata o Diablota cazunatami agllana carca. Jehová Dios paicunapa Taita cashca cajpipash, Jehová Diostaca ladoman saquishpami paicunapa Taita cashpa catichunga na munarca. Ashtahuangarin, Diablopa lado tucushpami paitara cazurca. Chai punllamandami Adán y Evaca paicunalla quedarca. Jehová Diosca ñana paicunataca cuidarcachu (Génesis 3:6-13).

11. ¿Imamandata Jehová Diosca Adán y Evapa juchataca na yangata saquina carca?

¹¹ Jehová Diosta na cazushpaca, Adán y Evaca juchayucunami tucurca. Bibliapica ninmi, Taita Diosca ‘jucha illajpacha cashpami, nalitaca napacha ricunayachin’ nishpa. Chaimandami Adán y Evaca Jehová Diospa contra tucurca (Habacuc 1:13). Adán y Eva juchata rurajpipash yangata saquijpica, Jehová Diospa tucui rurashcacunami llaquipi canman carca. Angelcunapash gentecunapash yuyanmanmi carca, Jehová Diospi confiaitaca na ushanchichu nishpa. Shinapash Jehová Diosca siempremi pai imata nishcataca pactachin (Salmo 119:142). Adán y Evaca imata ruranata agllai ushashpapash, paicuna rurashca juchacunamanda libre quedaitaca na ushanachu carca. Chaimandami tiempohuanga huañushpa, ñutu alpamanllata tigrarca (Génesis 3:19).

12. Adán y Evapa huahuacunaca ¿ima llaquicunapita urmarca?

¹² Adán y Eva ñana cazujpimi, Jehová Diosca paipa familia cuenda cachunga ñana saquirca. Chaimandami paicunataca jardín de Edenmanda llujchishpa cacharca. Cutin chaiman yaicuchunbash ñana saquircachu (Génesis 3:23, 24). Jehová Diosca paicuna munashca shina causachunmi saquirca (Deuteronomio 32:4, 5, liingui). Paicuna munashca shina causashcamandaca Jehová Diospa ejemplota ali catitaca ñana usharcachu. Shamuj punllacunapi ali causashpa catina bendiciondapashmi chingachirca. Paipa huahuacunaman chai bendiciondata caraitapash Adanga ñana usharcachu. Paipa huahuacunamanga juchata, huañuitallami saquirca (Romanos 5:12). Adanba culpamandami paipa huahuacunapash para siempre causana oportunidadta chingachirca. Adán y Eva jucha illaj huahuacunata ñana chari ushajpimi, paipa huahuacunapash jucha illaj huahuacunataca na chari usharca. Diabloca Adán y Evata Jehová Dioshuan contrachishca jipapash, ñucanchitapashmi Taita Dioshuan contrachingapaj munan (Juan 8:44).

13. Adán y Eva caruyashca cajpipash ¿imatata Jehová Diosca munan?

¹³ Adán y Eva Jehová Diosmanda caruyajpipash, Jehová Diosca gentecunata juyashpami catirca. Chaimandami gentecuna paipa ali amigocuna cachun munarca. Gentecuna huañuchunbash na munarcachu (2 Pedro 3:9, NM). Chaimandami Adán y Eva juchata rurashca jipaca, gentecuna paipa amigo tucuchun uchalla shuj arreglota rurarca. Chai arreglota rurashpapash ¿imashinata paipa leycunata na huashaman saquishcata ricuchirca?

14. a) Juan 3:16pi nishca shinaca, juchamanda huañuimanda salvangapaca ¿imatata Jehová Diosca rurarca? b) ¿Ima tapuitata gentecunamanga yachachi ushapanchi?

¹⁴ (Juan 3:16, liingui). Jesús Huañushcata  Yarina Tandanajuiman invitanajushpaca, Juan 3:16pi shimicunata de memoria yachaj gentecunahuanmi tal vez tuparishun. Shinapash, gentecuna para siempre causaita ushachunga ¿imamandata Jesusca paipa causaita cuna carca? Chai tapuitaca gentecunaca na ali yachanllu. Chaimandami Jesús Huañushcata Yarina Tandanajuiman invitanajushpa, ña chai tandanajuipi cashpa o jipaman paicunata visitanajushpapash chai tapuita ali intindichun ayudai ushanchi. Jesús imamanda huañuna cashcata intindishpaca Jehová Dios paicunata ashtacata juyashcata, ali yachaita charishcatapashmi intindi ushanga. Shinaca Jesús paipa causaita cushcamanda parlajushpaca ¿imacunatallata parlai ushapanchi?

15. ¿Imamandata Jesusca na Adanshnalla carca?

¹⁵ Jehová Diosca ñucanchita salvangapami jucha illaj runapa causaita curca. Gentecunata salvangapaca, paipa Punda Churi Jesustami Jehová Diosca agllarca. Jesusca jucha illajmi carca. Jehová Diosta tucuipi cazushcatami ricuchina carca. Shinallata gentecunata salvangapami paipa causaita cungapaj munana carca (Romanos 5:17-19). Chaimandami, Jehová Diosca paipa Churi cai Alpapi nacirichunga, paipa causaitaca María shuti huarmigupa vijsapi churarca (Juan 1:14). Shinami Jesusca Adanshnallata jucha illaj nacirirca. Shinapash ¿imamandata Jesusca na Adanshnalla carca? Jesusca jatun llaquicunata charishpapash, tucuipimi Jehová Diosta cazurca. Shinami Jesusca ricuchirca, jucha illaj runaca Jehová Dios munashca shina tucuipi cazunalla cashcata.

16. Jesús paipa causaita cushpaca ¿imashinata ñucanchitaca ayudashca?

¹⁶ Paipa jucha illaj causaita cushpami Jesusca juchamandapash huañuimandapash ñucanchitaca salvarca. Adanga Jehová Diosmanda na caruyashpa, tucuipimi Jehovata  cazuna carca. Shinapash chaitaca na rurarcachu. Cutin Jesusca Jehovamanda na caruyashpa, tucuipimi Jehovata cazurca (1 Timoteo 2:6). Jesusca paipa causaita cushpami jaricunamanbash, huarmicunamanbash, huahuacunamanbash para siempre causana oportunidadta curca (Mateo 20:28). Imashinami ricupanchi, Jehová Diospa munai pactarichunga, Jesús paipa causaita cunami minishtirishcapacha cashca (2 Corintios 1:19, 20).

17. Jesús paipa causaita cushcamandaca ¿imatallata chari ushapashun?

¹⁷ Jehová Diosca paipa Churipa ninan valishca causaita cushpami ñucanchitaca salvarca (1 Pedro 1:19). Ñucanchicunaca Jehová Diospa ñaupajpica valishcapachami canchi. Chaimandami paica paipa shujlla Churita ñucanchimanda huañuchun cachamurca (1 Juan 4:9, 10). Imashinami ricunchi, Jesusmi Adanba cuenda ñucanchi Taita tucurca (1 Corintios 15:45). Jesusca paipa causaita cushpami ñucanchimanga para siempre causana oportunidadta cushca. Shinallata, cutin Jehová Diospa familia cuenda cana oportunidadtapashmi cushca. Ashtahuangarin, Jesús paipa causaita cushcamandami shamuj punllacunapica jucha illajcuna cashun. Jehová Diospash paipa leycunata na huashaman saquishpami ñucanchitaca paipa huahuacunata cuenda chasquinga. Shinaca pensaripai ¿nachu Jehovata tucuipi cazuimanda jucha illajcuna tucushpaca ashtacata cushijushun? Chai punllacunapimi jahua pachapi causajcunapash, cai Alpapi causajcunapash shujlla familia cuenda tucushun. Tucuillacunami Taita Diospa huahuacuna cashun (Romanos 8:21).

18. ¿Ima horata Jehová Diosca tucuita mandanga?

¹⁸ Ñucanchi callari taitamamacuna Jehovamanda caruyajpipash Jehová Diosca gentecunata juyashpa catimandami, paipa Churipa causaita cushpa ñucanchicunataca salvarca. Ñucanchicuna juchayucuna nacirishca cajpipash, Taita Diosta ama cazuchun obligaitaca Diabloca na ushanllu. Jehová Diosca Jesuspa causaita cushpami ñucanchitaca alita rurajcunashna ricurichun ayudanga. Jesusta chasquishpa, Jesuspi feta churaj gentecuna para siempre causanajujpica ashtaca cushijuimi tianga (Juan 6:40). Ñucanchita juyaj, ali yachaita charij Jehová Diosmi paipa munaita pactachishpa gentecunataca jucha illajcuna cachun ayudanga. Chai punllacunapimi Jehová Diosca tucuita mandanga (1 Corintios 15:28).

19. a) Jesús paipa causaita cushcamanda agradicishpaca ¿imatata rurana capanchi? (“ Ali shungu gentecunata mascashunchi” nishca recuadrota ricupangui). b) ¿Imatata cati temapica yachajupashun?

¹⁹ Jesús paipa causaita cushcata agradicishpaca, shuj gentecunamanbashmi Jesús paipa causaita cushcataca parlana canchi. Gentecunaca Jehová Dios paicunata juyaimanda, paipa Churipa causaita cushpa para siempre causachun ayudajujtaca yachanami can. Para siempre causana oportunidadta ñucanchiman cushpapash, Jesusca paipa causaita cushpami, jardín de Edenbi Diablo llullashcata ricuchirca. Chaitaca cati temapimi yachajupashun.