1, 2. a) ¿Imatata Jesusca uvas pambata charij runagumandaca parlarca? Ashalla shimicunapi nipai. b) Chai chimbapuraica ¿imashinata ricuchirca uvas pamba dueñoca na mitsa cashcata, llaquishpa jahuan jahuan caraj cashcata?

SHUJ runaguca uvas pambata charishpami, shuj punllaca tutamandata jatarishpa trabajadorcunata plazapi mascangapaj rirca. Trabajadorcunaca mashna pagasha nishcata ari nishpami trabajangapaj rirca. Jipamanga ashtahuan trabajadorcuna minishtirijpimi dueñoca shuj trabajadorcunatapash mascangapaj rirca. Shinami punlla enteropica cutin cutin trabajadorcunata mascangapaj rirca. Tucuicunamanmi trabajashcamandaca pagashami nirca. Ña chishajpica, pagangapami tucuilla trabajadorcunata tandachirca. Huaquingunaca punlla enteromi trabajashcarca. Cutin shujcunaca shuj horasgutallami trabajashcarca. Shinapash uvas pamba dueñoca tucuicunamanmi igual pagarca. Chaita ricushpami punlla entero trabajashca runacunaca quejarirca. Chaimandami dueñoca nirca, cangunamanga mashnatami pagasha nishcatami pagarcani. Ñuca culquitaca ñuca munashcashna cunallami cani, na mitsashpa carangapaj munajpichu ñucataca nalicachinguichi nishpa (Mateo 20:1-15).

² Jesusca Jehová Dios llaquishpa jahuan jahuan caraj Dios cashcata ricuchingapami chai chimbapuraimanda parlarca (2 Corintios 6:1, liingui). Huaquingunaca ninmi, punlla entero trabajashca runacunami yapalla culquita japina can nishpa. Shinapash uvas pamba dueñoca ashalla horasta trabajajcunamanbash llaquishpami jahuan jahuan carangapaj munashcatami ricuchingapaj munarca. Shuj ali yachajushca runaca ninmi, Bibliapi “llaquishpa jahuan jahuan” carana nishpaca, “imatapash gratis japinata, na merecijpita caranata, o na merecijpipash shuj runaman imatapash cunatami shina nin” nishpa.

3, 4. a) ¿Imamandata Jehová Diosca ñucanchita llaquishpa jahuan jahuan carashcata ricuchishca? b) ¿Imashinata Jehová Diosca ñucanchita llaquishpa jahuan jahuan carashcata ricuchishca?

³ Bibliapica, Taita Dios llaquishpa jahuan jahuan carashcataca shuj regalohuanmi chimbapuran (Efesios 3:7, NM). Jehovata tucuipi cazuitaca pipash na ushanchichu. Chaimandami causana derechotaca pipash na charinchi. Jehová Dios ñucanchita llaquichunmi minishtinchi. Rey Salomonga nircami: ‘Cai pachapica, alitalla ruraj ima horapash juchata na ruraj runaca shujllapash napacha tianllu’ nishpa (Eclesiastés 7:20). Ashtaca huatacuna jipapash apóstol Pabloca nircami: “Tucuicuna juchata rurashcamandami, Taita Diospaj punchapambagumanda anchuchi tucushca” nishpa. Ashtahuangarin nircami: ‘Juchaca huañushpa chingagrinatami cujun’ nishpa (Romanos 3:23; 6:23​a).

⁴ Jehová Diosca tucuilla gentecunata ashtacata juyaimandami paipa shujlla Churita ñucanchimanda huañuchun cachamurca. Shina rurashpami ñucanchita llaquishpa jahuan jahuan carashcata ricuchirca (Juan 3:16). Apóstol Pabloca nircami: ‘Ninan llaquita apashpa huañushcamandami Jesusca juyailla coronata churajushca’ can. ‘Taita Diospa ninan juyaimandami tucuicunamanda huañurca’ nishpa (Hebreos 2:9). Shinaca “Jesusmandami causaita causagrinata Taita Diosca yanga caramujun” (Romanos 6:23​b).

5, 6. a) Jucha ñucanchita mandajushcamandaca ¿imashinata causanchi? b) Taita Dios ñucanchita llaquishpa jahuan jahuan carashcamandaca ¿imashinata causanchi?

⁵ ¿Imamandata juchata ruranchi huañunchipash? Bibliapica ninmi, Adán juchata rurajpimi “huañuica mandajurca” nishpa. Tucuicunami Adanba huahuacuna caimandaca juchata ruranchi, huañunchipash (Romanos 5:12, 14, 17). Shina cajpipash, Jesús ñucanchimanda huañushcata crishpami jucha ñucanchita na mandachun munashcata ricuchita ushanchi. Shina rurashpami llaquishpa jahuan jahuan caraj Dios ñucanchita mandachun saquinajunchi. Bibliapica ninmi: ‘Jucha ashtahuan yaicumujpimi, Diospa ninan juyaipash ashtahuan ninandapacha shamurca. Imashinami juchata rurajpi huañuica mandajurca, shinallatami Diospa ninan juyaipash Jesucristomanda causaita causagrinata charichun’ ayudanga nishpa (Romanos 5:20, 21).

⁶ Juchayucuna cashpapash jucha ñucanchita mandachunga na saquinachu canchi. Imapash nalita rurashpaca perdonahuai nishpami Jehovata mañana canchi. Apóstol Pabloca nircami: ‘Juchaca na ashtahuan mandashpa chari ushangachu. Cangunaca mandashca shimicuna mandajpica, na causanajunguichichu. Ashtahuangarin Dios ninanda juyajujpimi causanajunguichi’ nishpa (Romanos 6:14). Taita Dios ñucanchita llaquishpa jahuan jahuan carachun saquishpaca ¿ima bendiciongunatata charishun? Apóstol Pablo nishca shinaca, ‘cai pachapa nali munaicunatapash’, Taita Diosta ‘na manllashpa causanatapashmi’ millanayachishun. Shinami ‘aliguta yarishpa, imatapash [alita] rurashpa, Diosta yariashpa’ causashun (Tito 2:11, 12).

7, 8. ¿Imamandata apóstol Pedroca nirca, ‘Taita Diosca ninanda juyashpami [shuj shuj cosascunatapash] rurai ushachun cangunaman carashca’ nishpa? (Callari fotocunata ricupangui).

⁷ Apóstol Pedroca nircami: ‘Taita Dios cangunata ninanda juyashpa [shuj shuj cosascunata] rurai ushachun cangunaman carashcashnallatami, shujcunamanbash alita rurana canguichi’ nishpa (1 Pedro 4:10). ¿Imamandata apóstol Pedroca nirca, ‘Taita Diosca ninanda juyashpami [shuj shuj cosascunata] rurai ushachun cangunaman carashca’ nishpa? Ima problemata charijpipash, chai problemata aguantachun ñucanchi imata minishtijujta cushpa Jehová Dios ayudajtami shina nin (1 Pedro 1:6).

⁸ Imashinami ricupanchi, Jehová Dios ñucanchita llaquishpa jahuan jahuan carashcataca shuj shuj cosascunapimi ricuchishca. Apóstol Juanga escribircami: Taita Dios ‘ninanda juyajujpimi, ñucanchica ashtahuan ashtahuan japinajurcanchi’ nishpa (Juan 1:16). Jehová Dios ñucanchita llaquishcata shuj shuj cosascunapi ricuchijpimi ashtaca bendiciongunata charinchi. Cunanga ima bendiciongunata charishcata ricupashun.

9. a) Jehová Dios llaquishpa jahuan jahuan carashcamandaca ¿ima bendiciondata charipanchi? b) Jehová Diosta agradicishcataca ¿imashinata ricuchi ushapanchi?

 ⁹ Jehová Diosca juchacunata perdonanmi. Jehová Diosca ñucanchita llaquishpa jahuan jahuan carashcamandami ñucanchi juchacunata perdonan. Shinapash arripintirishpa, nali cosascunata ama rurangapaj esforzarijpillami perdonan (1 Juan 1:8, 9, liingui). Apóstol Pabloca juchacunata Jehová Dios imashina perdonajta parlashpami chai punllapi ungidocunataca nirca: “Yanapi huatashpa charijujpaj maquimandaca, Diosmi ñucanchita cacharichishpa, paipaj juyashca Churi mandajuj llactaman yalichishca. Paipaj Churipaj yahuarmandami, Diosca ñucanchipa juchacunata anchuchishpa quishpichirca” nishpa (Colosenses 1:13, 14). Jehová Diosta agradicishcata ricuchingapaj munashpaca, paita alabanami canchi. Pai ñucanchi juchacunata perdonajpimi ashtaca bendiciongunata chasqui ushanchi.

10. Taita Dios ñucanchita llaquishpa jahuan jahuan carashcamandaca ¿ima bendiciondata chari ushapanchi?

¹⁰ Taita Dioshuan tranquilo ali caita ushanchi, paipa amigocunapash caita ushanchi. Juchayucuna caimandami nacirishca punllamandapacha Taita Diosta fiñashcashna o paipa contracunashna canchi. Shina cajpipash apóstol Pabloca nircami: “Diosta fiñajcuna cashpapash, paipaj Churi Cristo huañujpimi, Taita Dioshuan ali tucurcanchi” nishpa (Romanos 5:10). Jesús paipa causaita cushcamandami ñucanchicunaca Taita Dioshuan ali tucushpa paipa amigocuna caita ushanchi. Apóstol Pabloca Jehová Dios llaquishpa jahuan jahuan carashcamandami paihuan ali caita ushanguichi nishpa cashna ungidocunataca nirca: “Jesusta crijpi [alita] rurashcatashna ñucanchita Dios chasquijpimi, Jesucristomandaca Taita Dioshuan casilla ali causaita charinchi. Paimandami ñucanchica, Dios ninanda juyajujpi, paita crishpa shinllitapacha catinatapash charinchi” nishpa (Romanos 5:1, 2). Jehová Dioshuan tranquilo ali caita ushashcamanda, paipa amigo caita ushashcamandaca ashtacatami Jehová Diostaca agradicina canchi.

11. Ungidocunaca ¿imashinata ‘shuj llamagucuna’ nishca gentecunataca Jehovapa ñaupajpi alita rurajcunashna ricurichun ayudan?

¹¹ Alita rurajcunashnami Jehová Diospa ñaupajpica ricuri ushanchi. Profeta Danielca escribircami, tucurimui punllacunapi ungidocunaca ‘[alita] rurashpa causanajuchunmi ashtaca gentecunaman yachachinga’ nishpa (Daniel 12:3, liingui). ¿Imashinata ungidocunaca chai shimicunata pactachin? Ungidocunaca ‘shuj llamagucuna’ nishca ashtaca millón gentecunaman Diospa Reinomanda villachishpa, Diospa leycunamanda yachachishpami profeta Danielpa shimicunataca pactachin (Juan 10:16). Shinami ungidocunaca chai gentecunapash Jehovapa ñaupajpi alita rurajcunashna ricurichun ayudan. Shinapash paicunaca Jehová Dios llaquishpa jahuan jahuan carashcamandallami Jehovapa ñaupajpica alita rurajcunashna ricurita ushan. Apóstol Pabloca nircami: ‘Dios ninanda juyashpa, Cristo Jesusmanda quishpichijpimi [alita] rurashcatashna chasquishca’ nishpa (Romanos 3:23, 24).

12. Jehová Dios llaquishpa jahuan jahuan carashcamandaca ¿imatata mañajushpaca rurai ushapanchi?

¹² Oracionda rurashpami Jehovaman quimirita ushanchi. Jehová Dios llaquishpa jahuan jahuan carashcamandami ñucanchicunaca paita mañai ushanchi. Apóstol Pabloca nircami: Taita Diosca ‘llaquishpa jahuan jahuan tiarinapi tiarishpami’ ñucanchitaca tucui shunguhuan mañashpa paipaman quimirichun invitajun (Hebreos 4:16​a, NM). Jesusmandami ñucanchicunaca ima horapash Jehová Diosta mañana bendicionda chari ushanchi. Apóstol Pabloca nircami: ‘Jesuspi crimandami tucui shunguhuan confiaita ushanchi’ (Efesios 3:12, NM).

13. Jehová Dios llaquishpa jahuan jahuan carashcamandaca ¿imashinata minishtijuj tiempopi ayudata chasquishcanchi?

¹³ Minishtijuj tiempopimi ayudata chari ushanchi. Ayudachun minishtijushpaca, Jehová Diostami mañana canguichi nishpami apóstol Pablo animarca. Paica nircami: ‘Ayudachun minishtijuj tiempopi llaquishpa jahuan jahuan carachunmi’ shina rurana canguichi nishpa (Hebreos 4:16​b, NM). Imapash problemata charishpaca Jehová Diostami ayudahuai nishpa mañaita ushanchi. Paica ñucanchi mañashcacunata uyana obligacionda na charishpapash, ñucanchi mañashcacunataca uyanmi. Chaimandami paica ñucanchicunata ayudangapaca congregacionbi huauquicunata cutin cutin utilizan. Ñucanchi mañashcacunata uyajpimi ñucanchicunaca cushijushpa nita ushanchi: “Ñucata ayudajca, Jatun Diosmi. Shina cashcamandaca, gentecuna imata ruranatapash, na manllashachu” nishpa (Hebreos 13:6).

14. Jehová Dios llaquishpa jahuan jahuan carashcamandaca ¿ima bendiciondata charinchi?

 ¹⁴ Cushilla sintirita ushanchi. Jehová Dios llaquishpa jahuan jahuan caraj cashcamandami ñucanchicuna llaquilla sintirijujpica cushilla sintirichun ayudan. Tesalónica llactamanda huauquipanicuna catiriashpa llaquichi tucunajujpimi, apóstol Pabloca cashna escribirca: ‘Ñucanchi Apunchi Jesucristopash, ñucanchi Taita Diospash ninanda juyashpami, causaita causaicaman cushijushpa causanataca aliguta yariashpa shuyanajuchun, shungupi aligutapacha yarichun’ ayudan nishpa (2 Tesalonicenses 2:16, 17). Shinaca, Jehová Dios ñucanchita llaquishpa jahuan jahuan carashcamanda, ñucanchita juyashpa cuidajushcata yachashpaca ¿nachu cushilla sintirinchi?

15. Jehová Dios llaquishpa jahuan jahuan carashcamandaca ¿ima esperanzatata chari ushapanchi?

¹⁵ Para siempre causana esperanzatami chari ushanchi. Juchayucuna cashpapash Jehová Dios ayudashcamandallami esperanzata chari ushanchi (Salmo 49:7, 8, liingui). Shinapash ¿ima esperanzatata Jehová Diosca cushca? Jesusca nircami: “Ñucata cachamuj Taitami, cangunataca cashna causachun munan: Paipaj Churi ñucata ricushpa maijambash crishpaca, causaita causagrichunmi munan” nishpa (Juan 6:40). Jehová Dios llaquishpa jahuan jahuan carashcamandami ñucanchicunaca shamuj punllacunapi para siempre causaita ushashun. Apóstol Pabloca nircami: “Taita Diosca, tucui gentecunata quishpichingapajmi, pai ninanda juyajushcata ricuchimurca” nishpa (Tito 2:11).

16. Punda tiempocunapi Jesusta huaquin catijcunaca ¿imashinata Jehová Dios llaquishpa jahuan jahuan carashcamandaca aprovecharinajurca?

¹⁶ Imashinami ricupashcanchi, Jehová Dios llaquishpa jahuan jahuan carashcamandami ashtaca bendiciongunata charishcanchi. Jehová Dios ñucanchita llaquishpa jahuan jahuan carashcataca na aprovecharinachu canchi. ¿Imashinata na aprovecharina canchi? Huaquinbica pensanchipashchari, juchapi urmajpipash Jehová Diosca perdonahuangallami nishpa. Jesusta punda catijcunata yaripashunchi. Huaquingunaca Jehová Dios llaquishpa jahuan jahuan caraj caimandaca juchacunata perdonangallami nishpami mapa pinganai cosascunata ruran carca (Judas 4). Jesusta nali catijcuna caimandami paicunaca pensarca, juchata rurashpa catijpipash  Jehová Diosca perdonajungallami nishpa. Ashtahuangarin, shujcunapash paicunashnalla juchata rurachunmi pandachingapaj munan carca. Cunan punllacunapipash, shina gentecunaca ‘ninanda juyaj Diospa espiritutami nalicachishpa’ na respetashcata ricuchinajun (Hebreos 10:29).

17. Apóstol Pedroca ¿ima consejotata curca?

¹⁷ Cunan punllacunapipash Diablo pandachijpimi Jesusta huaquin catijcunaca yuyan, juchata rurajpipash Jehová Diosca perdonangallami nishpa. Jehová Diosca perdonanmi. Shinapash juchacunamanda arripintirishpa juchacunapi ama urmangapaj cutin esforzarijcunatallami perdonan. Chaimandami apóstol Pedroca cashna consejarca: ‘Pundata ña yachashcamandaca, aligutapacha cuidarinami canguichi. Nalita rurajcuna pandata yachachijpira canguna shinllita catinajushcataca saquinguichiman. Ashtahuangarin viñanshnami Diospa ninan juyaimanda, ñucanchita Quishpichij, Apunchi Jesucristomanda ashtahuan yachashpa catina canguichi’ nishpa (2 Pedro 3:17, 18).

18. Jehová Dios ñucanchita llaquishpa jahuan jahuan carashcamandaca ¿imatata rurashun?

¹⁸ Jehová Dios llaquishpa jahuan jahuan carashcamanda agradicishcata ricuchingapaca Jehová Diosta alabangapaj, shujcunata ayudangapami esforzarina canchi. ¿Imashinata esforzarina canchi? Apóstol Pabloca nircami: ‘Diosca, pai munashcashnallata ñucanchita ninanda juyashpa, imatapash [shuj shuj cosascunata] rurachun ushaita carashcatami charinchi’ nishpa. Shinallata nircami: ‘Sirvishpa causaj cashpaca, sirvishpa causanata yariaj cachun’ nishpa. Ashtahuanbash nircami: ‘Yachachij cashpaca yachachinatalla yariashpa causachun. Aliguta yarichishpa rimaj cashpaca, chaitalla yariashpa causachun’ nishpa. Jipamangarin nircami: “Llaquishpa ayudajpash, cushijushpa ayudaj cachun” nishpa (Romanos 12:6-8). Shinaca, Jehová Dios ñucanchita llaquishpa jahuan jahuan carashcamandami villachingapaj, Bibliata shujcunaman yachachingapaj, huauquipanicunata animangapaj, ñucanchita llaquichijcunata perdonangapaj esforzarina canchi.

19. Shamuj temapica ¿imatata yachajupashun?

¹⁹ Jehová Dios llaquishpa jahuan jahuan ashtaca bendiciongunata carashcamandami ñucanchicunapash ‘Taita Dios llaquishpa jahuan jahuan carashca ali villaitaca tucuicunaman villachishpa ali pactachina canchi’ (Hechos 20:24). ¿Imashinata chaitaca rurashun? Chaitaca shamuj temapimi yachajupashun.