1. Ñucanchi minishtishcacunamanda, munaicunamanda parlashpaca ¿imatata nipanchiman?

GENTECUNACA causangapaj ashatalla minishtishpapash ashtaca cosascunata charingapami munan. Chaimandami ashtacacunaca causangapaj imata ciertopacha minishtijushcataca na intindi ushan. Shinaca ¿imatata causangapaca minishtinchi? Causangapaca causana pushtuguta, micunata, ropatami minishtinchi.

2. Gentecunaca ¿imatata charingapaj munan?

² Pobrella llactapi causaj gentecunapash, charij llactapi causaj gentecunapash shuj shuj cosascunatami munan. Huaquin llactacunapi gentecunaca teléfono celularta, motota o uchilla alpaguta charingapami munan. Cutin shuj llactamanda gentecunaca valishca ropata, jatun huasita o shuj ashtahuan ali carrota charingapami munan. Maipi causashpa o mashna culquita charishpapash na minishtishca cosascunata o na randi ushana cosascunatami ashtahuan charingapaj huaquinbica munai callarinchi.

3. Ansiarishpa ashtahuan charingapaj munajcunaca ¿imashinata can?

³ Ansiarishpa ashtahuan charingapaj munajcunaca ¿imashinata can? Ansiarishpa ashtahuan charingapaj munajcunaca shuj cosascunatara pundapi churashpami Jehovapa amigo canataca ladoman saquin. Ashtahuangarin,  charishca cosascunahuan na contendashpami ashtahuan ashtahuan charingapaj munan. Na ashtaca culquita charishpapash, valishca cosascunata na randishpapash, cuidado na charishpaca ñucanchicunapashmi ansiarishpa ashtahuan charingapaj munajcunashnalla tucuita ushanchiman. Diospa Reinota pundapi churanatapash ladomanmi saquinchiman (Hebreos 13:5).

4. Ñucanchicuna ‘imatapash ricushcandi’ munachunga ¿imatata Diabloca ruran?

⁴ Diabloca ñucanchitaca pensachingapaj munanmi, cushilla causangapaca ashtaca cosascunatami charina cani nishpa. Chaimandami ñucanchicuna ‘imatapash ricushcandi’ munachunga Diabloca cai mundopi ashtaca cosascunata utilizan (1 Juan 2:15-17; Génesis 3:6; Proverbios 27:20). Mushuj cosascunata randichunmi propagandacunapica cada rato imacunatapash ricuchin, uyachinbash. Chaimandami huaquinbica shuj almacenbi imapash juyailla cosasguta ricuimandalla o propagandapi uyaimandalla imatapash randishcanchi. Shinapash ¿nachu randishca jipara cuenta japircanchi na minishtijushcata? Na minishtishca cosascunata randinata na saquishpaca ñucanchillata llaqui apashpami Jehovata ali sirvitaca na ushashun. Shinami Bibliata liingapaj, tandanajuicunapa prepararingapaj, tandanajuicunaman ringapaj, cutin cutin villachingapaca na tiempota charishun. Apóstol Juanga advirtircami cai pachapash, cai pachapi tiashca munaicunapash chingaringami nishpa.

5. Ashtacata esforzarishpa ashtahuan charingapaj munajcunaca ¿imata tucun?

⁵ Diabloca ñucanchicuna ashtacata esforzarishpa ashtahuan culquita o ashtahuan cosascunata charichunmi munan. Jehovata sirvingapaj fuerzata charichunga na munanllu (Mateo 6:24). Cosascunatalla charingapaj esforzarishpaca ñucanchi causaipi cushilla sintiritaca na ushashunllu. Ashtahuangarin, ñucanchi munashca cosascunapilla yapata preocurishpaca, ñucanchillata llaqui apashpami culquimandapash problemacunata charishun. Jehovapi, paipa Reinopi confianatapash saquishunmi (1 Timoteo 6:9, 10; Apocalipsis 3:17). Jesusca nircami: ‘Ña charishpapash ashtahuan charingapaj munaicunaca’ pambapi casha cuendami can nishpa. Cashaca tarpushca muyugu viñashpa fucuchunga na saquinllu (Marcos 4:14, 18, 19).

6. ¿Imatata Barucpa ejemplomandaca yachajupanchi?

⁶ Cunanga Baruc shuti runaguta yaripashun. Paica profeta Jeremiaspa secretariomi carca. Paica ‘jatun tucunata’ o jatun cosascunata charingapami munarca. Shina munajujpimi Jehová Diosca paitaca yarichirca, Jerusalenda tucuchingapaca ashallami faltajun, shinapash candaca quishpichishami nishpa (Jeremías 45:1-5). Imashinami ricupanchi, Jerusalenda Jehová Dios tucuchishpa gentecunapa charishca cosascunata salvanataca na shuyanachu carca (Jeremías 20:5). Shinaca ¿imatata Barucpa ejemplomandaca yachajunchi? Diablo mandajuj mundoca ñallami tucuchi tucunga. Chaimandami, ashtaca cosascunata charinapica na yapata preocuparina canchi. Ninan Manllanai Llaqui Punllacuna tucurishca jipaca, cunanbi ñucanchicuna alicachishca cosascunata cutin charinataca na shuyanachu canchi (Proverbios 11:4; Mateo 24:21, 22; Lucas 12:15).

7. ¿Imatata yachajugripanchi? Chaita yachajunaca ¿imashinata ayudanga?

⁷ ¿Imashinata Jehovata sirvinata na ladoman saquishpa ñucanchipash, ñucanchi familiapash minishtirishca cosascunahuanlla causai ushanchi? Ansiarishpa ashtahuan charingapaj munajcunashna ama cangapaca ¿imatata rurana canchi? Minishtirishca cosascunapi ama yapata preocuparijungapaca ¿imatata rurana canchi? Jesusca paipa catijcunaman yachachijushpaca shuj ali consejotami curca (Mateo 6:19-21). Shinaca Mateo 6:25-34​ta liishpa aliguta yachajushun. Chaita yachajunami shuj cosascunata pundapi churashpa chaicunata mascajunapa randica, Diospa Reinotara pundapi churashpa mascana cashcata intindichun ayudanga (Lucas 12:31).

8, 9. a) ¿Imamandata minishtirishca cosascunamandaca na yapata preocuparina capanchi? b) ¿Gentecuna imatalla minishtijushcatata Jesusca ali yacharca?

⁸ (Mateo 6:25, liingui). Jesusca paipa catijcuna  micunaguta tarinamanda o ropamanda preocuparinajujtaca alimi yacharca. Shinapash chaicunamanda ama yapata preocuparinajuchunmi paicunata yachachijushpaca nirca: “Na chaitalla yarishpa musparinachu canguichi” nishpa. Ropapash, micunapash minishtirishca cosascunami can. Shinapash chaicunapi yapata preocuparishpaca Jehovata sirvinatami paicunaca ladoman saquita ushanman carca. Chaita ali yachashpami Jesusca chuscu viajecaman advirtirca, ama chaicunata munanajuichichu, ama musparinajuichichu nishpa (Mateo 6:27, 28, 31, 34).

⁹ Shinapash ¿imamandata Jesusca nirca, chai cosascunamandaca na preocuparinajunachu canguichi nishpa? ¿Nachu micunagupash, ropapash minishtirishca can? Ari minishtirishcami can. Culqui na pactajujpi chai cosascunamanda preocuparinaca alimi can. Chaitaca alimi Jesusca intindirca. Gentecuna cada punlla imata minishtijujtaca Jesusca alimi yacharca. ‘Cai tucurimui punllacunapi’ causana shinlli cashcatapash Jesusca alimi yacharca (2 Timoteo 3:1). Cunan punllacunapi gentecunaca na trabajota tari ushanllu, cosascunapash ashtahuanmi valishpa catin. Huaquin llactacunapi gentecunacarin pobre pobrecunami can. Asha micunagutallami charin. Huaquinbicarin, micungapajpash nimata na charinllu. Shinapash Jesusca alimi yacharca, gentecunapa causaica micunamanda ashtahuan importante cashcata, cuerpopash ropamanda ashtahuan importante cashcata.

10. Jesús yachachishca shinaca ¿imata ashtahuan importante can?

¹⁰ Mateo 6:25-34​pi shimicunata nara yachachishpaca Jesusca Taita Diostaca cashna nishpa mañanguichi nishpami yachachirca: “Punllandi ñucanchi micunagutaca, cunan punllapash carahuailla” nishpa (Mateo 6:11). Cutin shuj punllapash Jesusca yachachircami, cada punlla imata minishtishcatami mañana canguichi nishpa (Lucas 11:3). Shinapash na ñucanchi minishtishca cosascunamandallachu mañana canchi. ¿Imamandata shina ninchi? Jesús paipa catijcunaman yachachijushpaca, Taita Diospa Reino shamuchunmi pundapica mañana canguichi nircami (Mateo 6:10; Lucas 11:2). Jesusca paipa catijcuna ama yapata preocuparinajuchunmi Jehová Dios tucuilla paipa rurashcacunata cuidajushcata yarichirca.

11, 12. Pajarogucunata Jehová Dios cuidajushcamandaca ¿imatata yachajupanchi? (Callari fotota ricupangui).

¹¹ (Mateo 6:26, liingui). “Alasyu animalcunata” o pajarogucunata yaripashun. Paicunaca uchillagu cashpapash ashtacatami micun. Uchilla pajarogu gentecunashna jatun cashpaca ñucanchi micushcatapash yalimi micunman. Pajarogucunaca frutacunata, muyugucunata, jurugucunatami micun. Paicunaca na alpata trabajanllu, na tarpunllu. Shinapash Jehová Diosmi paicuna tucui imata minishtijushcata cun (Salmo 147:9). Tucui imata minishtijushcata cushpapash Jehová Diosca na paicunapa picogupichu micunataca churan. Pajarogucunallatami micunataca mascangapaj rishpa micunataca tarin.

¹² Pajarogucunatapash cuidashpaca gentecunatapash Jehová Dios cuidanataca Jesusca alimi yacharca (1 Pedro 5:6, 7) ^[1] (cai tema tucuripi nota ricupangui). Shinapash imashinami pajarogucunaca paicunallata rishpa micunaguta mascana can, shinallatami ñucanchicunapash ali trabajana canchi. Ñucanchillata tarpuna cashpa o trabajashpa micunata randina cashpapash, shinllita esforzarijpimi Jehová Diosca bendicianga. Culquita o micunata na yapallaguta charijpica Jehová Diosllatami ñucanchicuna imata minishtinajujtaca cunga. Huaquinbica shujcunami paicuna ima charishcaguta ñucanchiman caran. Shinallata, Jehová Diosca pajarogucunamanga maipi causanagutami caran. Paicunataca paicunallata tazingucunata rurachunmi Jehová Diosca rurarca. Shinallata, tazinguta rurangapaj ima minishtirishcacunatapash Jehová Diosllatami rurarca. Shinaca, imashinami pajarogutapash ayudashca, shinallatami Jehová Diosca ñucanchi familiahuan causachunga maipi causana pushtuguta charichun ayudanga.

13. ¿Imamandata yachanchi, ñucanchicunaca pajarogucunamandapash yali valishca cashcata?

¹³ Mateo 6:26​pica, pajarogucunata Jehová Dios cuidajujta yachachishca jipami Jesusca tapurca: “¿Nachu cangunaca, chaicunatapash ashtahuan yali valishca canguichi?” nishpa (Lucas 12:6, 7​ta  ricupangui). Chai shimicunata nishpaca, Jesusca huaquin punllacuna jipalla paipa causaita cushpa gentecunamanda huañuna cashcata yarishpami parlajushcanga. Jesusca shuj pajarogumanda o shuj animalmandaca na huañurcachu. Paica gentecuna para siempre causai ushachunmi huañurca (Mateo 20:28). Shinaca ¿nachu ñucanchicunaca pajarogucunamanda yali valishca cashcanchi?

14. Yapa preocuparishpapash ¿imatata na chari ushapanchi?

¹⁴ (Mateo 6:27, liingui). Jesusca nircami, minishtirishca cosascunamanda preocuparijcunaca paicunapa causaita “chuscu chunga picha centimetrostallapash” na mirachita ushanllu nishpa. ¿Imamandata Jesusca shina nirca? Ashtacata preocuparishpapash causaita na mirachi ushashcata intindichunmi shina nirca. Yapata preocuparijpicarin imapash ungüimi japin o huañui ushanchipashmi.

15, 16. a) Pambapi viñashca lirio sisacunata Jehová Dios cuidashcata yarishpaca ¿imatata yachajupanchi? (Callari fotocunata ricupangui). b) ¿Imatata tapurina capanchi? ¿Imapita tucui shunguhuan cripangui?

¹⁵ (Mateo 6:28-30, liingui). Tucuicunami villachinaman ringapaj, tandanajuicunaman o jatun tandanajuicunaman ringapaca juyailla ropaguta churajushpa ringapaj munanchi. Shinaca ¿ropata charinamanda ashtacata preocuparinachu canchi? Jesusca Jehová Dios paipa tucuilla rurashcacunamanda preocuparishcata yarichunmi paipa catijcunamanga pambapi viñashca ‘lirio sisacunamanda’  parlarca. Lirio sisagucunaca tucuillacunami juyailla ropaguta churajushcashna can. Paicunaca ropaguta ruranataca na minishtinllu. Shinapash juyaillagucunapacha ricurijpimi Jesusca nirca: “Salomonga, ninan charij cashpapash, na chai sisacunashna churajuita usharcachu” nishpa.

¹⁶ “Jihuagutapash” Jehová Dios ‘juyailla viñachishpa sisachijta’ parlashca jipami Jesusca tapurca: “Na tucui shunguhuan crishpa causajcuna, ¿nachu cangunamangarin churajunaguta caramunga?” nishpa. Jehová Diosca paita sirvijcunamanga minishtishca ropaguta cunami carca. Shinapash, Jesusta catijcunaca chaita cringapaca shinlli fetami charina carca (Mateo 8:26; 14:31; 16:8; 17:20). Jesusta catijcunaca Jehová Dios paicunata cuidangapaj munajujta, ciertopacha cuidanataca seguromi cana carca. Chaimandami aliguta pensarishpa tapurina canchi: “Jehová Dios ñucata cuidanataca ¿tucui shunguhuanllu crini?” nishpa.

17. ¿Imata rurashpata Jehovapa amigo cashpa catitaca na ushanchiman?

¹⁷ (Mateo 6:31, 32, liingui). Ashtaca gentecunaca Taita Diosta na rijsimandami ashtahuan culquita o ashtaca cosascunata charingapaj esforzarin. Ñucanchicunapash shinallata rurashpaca Jehovapa ali amigo cashpa catitaca na ushashunllu. Paipa munaita, paipa Reinota pundapi churajpica Jehová Diosca tucui ñucanchi minishtishcata cunataca alimi yachanchi. Huaquinbicarin yapallapashmi caranga. Shinallata, Jehovapa amigo caimanda cushilla causai ushashcatapash tucui shunguhuanmi  crinchi. Jehová Dios ayudanata tucui shunguhuan crinami minishtirishca ropahuanlla, minishtirishca micunaguhuanlla cushijushca cachun ayudan (1 Timoteo 6:6-8).

18. Jehová Diosca ¿imatallata ñucanchimandaca yachan? Chaimanda ¿imatata ruran?

¹⁸ (Mateo 6:33, liingui). Paipa Reinota pundapi churajpica Jehová Diosca canguna tucui minishtishcacunatami cusha nin. Shinapash ¿ciertopachachu Jehová Dios cuidanataca crinchi? ¿Imamandata seguro caita ushanchi? Mateo 6:32​pica Jesusca nircami: “Canguna chaicunata minishtinajujtaca jahua pachapi tiajuj cangunapa Taitaca ña yachanmi” nishpa. Ñucanchicuna nara yachajpillatami Jehová Diosca ñucanchicuna imata minishtijujtaca ali yachan (Filipenses 4:19). Maijan ropa ña tucurijujta, ima micunata minishtijujtaca alimi yachan. Ñucanchi familia maipi causana pushtuguta minishtijujtapash alimi yachan. Chaimandami Jehová Diosca tucui ñucanchi imata minishtishcata charichun ricuriajun.

19. ¿Imamandata shamuj punllacunapi ima pasanataca na yapata preocuparina capanchi?

¹⁹ (Mateo 6:34, liingui). Jesusca cutinbashmi paipa catijcunataca nirca: “Na cayandi punllamanda yarishpa musparinachu canguichi” nishpa. Jehová Diosca ñucanchicuna cada punlla imata minishtijujtami cunga. Chaimandami shamuj punllacunapica ¿imashi tucusha? nishpaca na preocuparina canchi. Yapata preocuparishpaca, Jehovapi confianapa randica ñucanchipira confiashpami Jehovapa amigo cashpa catitaca na ushashun. Chaimandami Jehovapi tucui shunguhuan confiana canchi (Proverbios 3:5, 6; Filipenses 4:6, 7).

20. a) Jehovata ashtahuan sirvingapaca ¿imatata rurai ushapangui? b) Minishtirishca cosascunahuanlla causangapaca ¿imata rurai ushapangui?

²⁰ Ashtaca cosascunata charinamandalla na tucui fuerzahuan ashtacata esforzarishpa sirvijushpaca llaquimi canman. Ashtahuangarin, Jehovata tucui ñucanchi fuerzacunahuan sirvingapami esforzarina canchi. ¿Imashinata chaita ruraita ushanchi? Pensaripai: ¿Villachingapaj ayudata minishtijuj congregacionbi sirvingapaj rita ushanichu? ¿Precursor caita ushanichu? Precursorcuna cashpapash pensaripashun ¿Diospa Reinomanda Villachijcunapa Escuelaman rita ushanichu? ¿Betelpi, o shuj Oficina de Traduccionbi huaquin punllacunata sirvi ushanichu? ¿Tandanajui Huasicunata rurashpa sirvi ushanichu? nishpa. Chai cosascunata rurangapaca minishtirishca cosascunahuan causangapami pensarina canchi. Minishtirishcalla cosascunahuan causashpami Diospa Reinota pundapi churangapaj tiempota, fuerzatapash charishun. “ ¿Imashinata minishtirishca cosascunahuanlla causaita ushanchi?” nishca recuadromi huaquin yuyaicunata cun. Shinaca Jehová Diosta mañashunchi, imata ruranata intindingapaj ayudahuai nishpa. Chai jipaca minishtirishca cambiocunata rurashunchi.

21. Jehovaman ashtahuan quimirichunga ¿imata ayudanga?

²¹ Jesusca Taita Diospa Reinota ñucanchi causaipi pundapi churachunmi yachachirca. Shina rurashpaca minishtirishca cosascunamandaca na yapata preocuparishpami Jehová ñucanchita cuidanataca ashtahuan confiashun. Ashtahuangarin, ñucanchillata jarcarinata yachajushpami randingapaj culquita charishpapash na tucui ricurishcata randishun. Shina ruranami Jehovaman ashtahuan quimirichun ayudanga. Minishtirishca cosascunahuanlla causanami Jehovata tucui shunguhuan sirvishpa catichun, Jehová carasha nishca causaita unai unaicaman charichun ayudanga (1 Timoteo 6:19).