Apóstol Pabloca, Diablo imacunatapash nishpa llaquichijtaca alimi cuenta japirca. Shinapash shuj huauquipanicunaca na cuenta japircachu. Chaimandami chai huauquipanicunaca, paicunapilla ashtahuan confiarishpa yan carca, ñucanchica shinlli fetami charinchi, na imapipash nitijarishunllu nishpa (1 Cor. 10:12). Shina yuyanajujpimi apóstol Pabloca cashna nishpa paicunataca advirtirca: ‘Imata umachinata ali yachaj culebra, Eva huarmita umachishcashna, cangunatapash umachijpica, Cristota na tucui shunguhuan juyashpa cazungachu yashpami manllani’ nishpa (2 Cor. 11:3).

Apóstol Pabloca ama ñucanchipilla confiarichun, rijchariashna causachunmi munarca. Imacunatapash nishpa Diablo ñucanchi yuyaita ama pandachichunga, imacunahuan Diablo pandachijujta, ama pandachi tucungapaj imata ruranatami yachajupashun.

Llullacunata nishpami gentecunapa yuyaicunata, ruraicunata pandachin. Shuj libropica nijunmi: “Mapa, nali munaicunata ashtahuan munachishpa pandachingapami, llullacunata nin, imatapash cabal cajpishna crichin” nishpa.

¿Imamandata llullacunaca nali can? Pensaripashun. Nali gastaca, ricuita, mutijitaca na ushanchichu. Chaimandami chai nali gasca na cuenta japijta gentecunataca llaquichin. Nali gas shinami, llullacunaca asha asha ñucanchi concienciata huaglichin. Vance Packard shuti sociologoca ninmi: “Llullacunaca ashtacatami ñucanchitaca pandachinlla” nishpa. Shuj estudiashca runapash nircami, jari cashpa huarmi cashpapash, imacunatapash uyaimandami, shuj religión gentecunata, shuj llactamandacunataca llaquinaita  huañuchishca. Shinallata, guerracunatapash rurashca, shuj nali cosascunatapash rurashca nishpa.

Gentecunapash umachita ushajpica, Diablocarin ashtahuanmi umachita ushan. Paica gentecuna tiai callarishca punllamandapachami gentecuna imashina cajta ali ricujushca. Ashtahuangarin, cai mundota mandajushcamandami Diabloca shuj shuj llullacunata caiman chaiman yachachishca (1 Juan 5:19; Juan 8:44). Ashtaca gentecunapa yuyaicunata yanayachishpa amsayachishcamandami Bibliapica nin: ‘Tucui cai pachapi causajcunatami umachin’ nishpa (Apoc. 12:9; 2 Cor. 4:4;). Shinaca, Diablo ama pandachichunga ¿imatata rurana capanchi?

Diablo ama pandachi ushachunmi Jesusca nirca: ‘Na llullashpa villashca’ yachachishcataca ‘rijsinguichimi. Chai na llullashpa villashcami, cangunataca cacharichinga’ nishpa (Juan 8:31, 32). Shinapash, cai mundopica llullacunatarami ñaupachin. Chaimandami guerracuna tiajpica shuj lado llactapash, chaishuj lado llactapash llullacunata randimanda nin. Shina cajpimi soldadocunaca, ama pandachi tucungapaca ima cierto cajta yachana can. Ñucanchicunapash Diablopa llullacunahuan ama pandachi tucungapaca, cabaltami yachana canchi. Chaimandami Jehová Diosca, Bibliapi cabalta ñucanchimanga yachachin (2 Tim. 3:16, 17).

Biblia cabalta nijujtaca, Diabloca alimi yachan. Chaimandami gentecunataca Bibliata ama liichun, ama yachajuchun imatapash ruran. Diablo pandachichunga na saquinachu capangui (Efes. 6:11). Chaipa randica, Bibliapi yachachishcacunatami ‘aliguta yachana’ capanchi (Efes. 3:18). Noam Chomsky shuti profesorca ninmi: “Pipash paipa yuyaicunata ñucanchi umapi churachunga, na saquinachu canchi. Ñucanchillatami ima cabal cajtaca yachana canchi” nishpa. Shinaca, cabalta yachangapaca, ‘¿Dios escribichishca Shimipipash, shinallatachu nijun?” nishpami, punllandi aliguta mascashpa liina’ capangui (Hech. 17:11).

Diabloca ñucanchicuna aliguta pensarichunga na munanllu. ¿Imamandata na munan? Shuj libropica ninmi: “Na aliguta pensarij gentecunaca imata nijpipash crinllami” nishpa. Shinaca, gentecuna imata nijtaca, na yangata crinallachu capangui (Prov. 14:15). Cabalta yachangapaca, Jehová Dios munashcashnami aliguta pensarina capangui (Prov. 2:10-15; 3:21).

Mishangapami guerracunapica, chaishuj llactamanda soldadocunataca desanimachin. Huaquinbicarin, chaishuj lado soldadocunatami paicunapura macanajuchun, o paicunapura caruyachun imacunatapash nin. Alemania llactamanda shuj generalca ninmi: “Primera Guerra Mundialpica, imashinami shuj culebraca conejota upayachinlla, shinallata ñucanchi gentecunata upayachijpimi mishai tucurcanchi” nishpa. Diablopash ñucanchicunata upayachishpa mishangapami, congregacionbi tucuicuna shujllashna tandanajushca cachunga na munan. Chaipaca congregacionbi problemacuna tiachun, imacunamandapash risintirichun, imamandapash nanarishpa congregacionmanda caruyachunmi, Diabloca imacunatapash ruran.

Shinapash na pandachi tucunachu capangui. Biblia ayudachunmi saquina capangui. Shujllashna tandanajushca cachunmi, Bibliapica ‘caishujmanda chaishujmanda perdonarishpami’ uchalla ali tucuna canguichi nin (Mat. 5:23, 24; Efes. 4:32). Shinallata, congregacionmanda caruyashpaca llaqui apanguichimi nishpami Bibliapica advirtin (Prov. 18:1, NM). ¿Diablopa llullacunaca quiquindapash pandachijunllu? Chaita yachangapaca pensaripai, ¿ima horata risintirishca carcani? Risintirishpaca ¿imatata rurarcani? ¿Cai mundopa yuyaicunata, na cashpaca Jehová Diospa yachachishcacunatachu catircani?” nishpa (Gál. 5:16-26; Efes. 2:2, 3).

Soldadocunata madajuj soldadota desconfiashpaca, soldadocunaca na ali macanajui ushanllu. Chaimandami huaquingunaca nin, “cangunata ñaupaman pushajcunapica na confianachu canguichi”. “Yangami umachinajun” nishpa. Ñaupaman pushajcuna imapipash pandarijpicarin, paicuna ciertota nijunshnalla ricuringapami contracunaca imacunatapash nin. Diablopash shinallami can. Jehová Diospa organizacionda ñaupaman pushajcunata desconfiachunmi imacunatapash nin.

Shinaca ¿imatata rurana capangui? Jehová Diospa organizacionda ñaupaman pushajcuna juchayucuna cajpipash, paicunata cazushpa, apoyashpami catina capangui (1 Tes. 5:12, 13). Congregacionmanda caruyashpa pandata yachachijcuna, o shuj gentecuna ciertota nijunshnalla ricurijpipash, na crinachu capangui (2 Tes. 2:2; Tito 1:10). Chaipa randica, Timoteoman apóstol Pablo nishca shinami, imata yachajushcataca, aliguta catijunalla capangui (2 Tim. 3:14, 15). Aliguta cazushpa aliguta yarishpa sirvij esclavota agllashpami  Jehová Diosca, 100 yali huatacunata ñucanchimanga cabalta yachachijushca. Shinaca ¿nachu aliguta cazushpa aliguta yarishpa sirvij esclavopi confiana capashcanchi? (Mat. 24:45-47; Heb. 13:7, 17).

Huaquinbica, manllachishpami Diabloca ñucanchita pandachingapaj munan. Shuj libropica ninmi: “Gentecunaca pundamandapachami manllachishpa pandachin cashca” nishpa. Gran Bretañamanda Philip Taylor shuti profesorca ninmi: “Asiria llactamanda gentecunaca imacunatapash nishpa, manllachishpami contracunataca misharca” nishpa. Diablopash shinallatami can. Catiriashpa llaquichi tucunata, gentecunata, huañuita, o imacunatapash manllaimanda Jehová Diosta sirvinata saquichunmi Diabloca manllachin (Is. 8:12; Jer. 42:11; Heb. 2:15).

Shinaca, Diablo manllachichun, desanimachichun, o jatun juchata rurachichunga na saquinachu capangui. Jesusca nircami: “Cangunapaj cuerpota huañuchingapaj munaj runacunataca, na manllanachu canguichi. Huañuchishca jipaca, imata ruraitapash na ashtahuan ushanllu” nishpa (Luc. 12:4). Ama cungapanguichu, Jehová Diosca paita ali sirvishpa catichun, ama manllaita charichunmi paipa “ninan ushaita” carashpa ayudanga (2 Cor. 4:7-9; 1 Ped. 3:14).

Huaquinbica manllarishca, desanimarishcami sintirinchi. Shina sintirishpaca, Josueman Jehová Dios imata nishcatami yarina capangui. Josuetaca nircami: “Ricui, ñucami candaca ama manllashpa, shinllipacha tucungui nishpa mandani. Na manllashpa, na shaijunachu cangui. Canda Mandaj Taita Dios ‘ñucaca, can maita rijpipash, canhuanmi casha’” nishpa (Jos. 1:9). Imamandapash preocupado cashpaca, uchami Jehová Diosta mañashpa tucuita paiman parlana capangui. Shina rurajpimi Jehová Diosca, quiquinba yuyaita, shunguta Diablo ama pandachichun, ‘casilla ali causaita caranga’ (Filip. 4:6, 7, 13).

Yaripashun, Taita Diospa llactata manllachingapami, Asiria llactamanda reypa sirvijca, asiriocuna llaquichijpica pipash cangunataca na ayudai ushangachu, cangunapa Jehová Diospash na ayudai ushangachu nirca. Jipamangarin burlarishpami nirca: ‘Mandaj Diosllatami cai llactaman vichai rishpa tucuchigri nihuarca’ nishpa. Shinapash Jehová Diosca Judá llactamanda reyta animangapami nirca: ‘Asiria llactata jatun mandajta sirvijcunami, nali shimicunahuan ñucata ninanda rimarca. Chaita uyashcamandaca ama manllaichu’ nishpa (2 Rey. 18:22-25; 19:6). Shina nishca jipami, Jehová Diosca shuj angelta cachashpa, shuj tutapilla 185 mil asirio soldadocunata huañuchirca (Is. 37:36).

¿Nachu shuj peliculata ricujushpa, pipash trampapi urmagrijujpi, o umachi tucugrijujpica, umachi tucugringuimi, ama chaitaca ruraichu nishpa caparingapaj munapashcangui? Angelcunapash shinallatami canga. Paicunaca ñucanchitaca ricujunmi. Paicunapashmi ñucanchitaca Diablo pandachichunga ama saquirichu nijunshna ricunajun.

Diablopa llullacunataca na crinachu capangui (Prov. 26:24, 25). Jehová Dios imata nijta uyashpami, paipi siempre confiana capangui (Prov. 3:5-7). Paica ninmi: “Ñuca huahualla, aliguta yachajushca cashpa, ñuca shungupi cushichihuayari” nishpa (Prov. 27:11). Chai shimicunataca yariami cana capanchi. Shina rurashpami, ñucanchi yuyaicunata na pandachichun saquishpa, Diablotaca mishai ushashun.