Gentecunaca Tapunmi
¿Jesusta catijcunaca shujcuna ama llaquichichun nishpa pistolata, escopetata o imapash armacunata charinachu can?
Jesusta catijcunaca cuidarina, difindirina cashpapash, Bibliapi huaquin textocuna imata nijtaca, yariami cana capanchi. Shinami, shuj gentecunamanda difindiringapaj nishpa, imapash armacunata charina na ali cashcata yachai ushapanchi. Shinaca, Bibliapi huaquin textocunata ricupashun.
Jehová Diospaca, gentecunapa causaica ninan valishcami can. Rey Davidca Jehová Diostaca nircami: “Causaita cuj yacu llujshijujca, canhuanmi” can nishpa (Sal. 36:9). Chaimandami Jesusta catijcunaca cuidarinamanda, o paicunapa charishca cosascunata difindinamanda ama pitapash huañuchingapaj cuidarina can (Deut. 22:8; Sal. 51:14).
Gentecunataca imahuanbash huañuchinllami. Shinapash, shuj armata charijushpami huaquinbica yangata, o napash yashcapi huañuchinlla. * Ashtahuangarin, shuhuai tucujuj shuj armata charijujta ricushpaca, shuhuaca manllarishpami disparanlla. Chaipimi maijan cashpapash huaquinbica huañun.
Huañungapaj ashalla faltajujpica, Jesusca paipa catijcunataca nircami, shuj espadata randichi nishpa. Shinapash chai espadahuan macanajuchunga na nijurcachu (Luc. 22:36, 38). Shinaca ¿imamandata Jesusca shina nirca? Gentecuna armacunahuan llaquichingapaj munajpipash, espadacunahuan shayarishpa na macanajunachu canguichi nishpami, Jesusca shina nirca (Luc. 22:52). Sumo sacerdotepa esclavota shuj espadahuan Pedro chugrichijpica, Jesusca nircami: “Cambaj espadataca, maipi tiajushcapillata churai. Espadahuan macanajujcunaca, espadahuanllatami huañuchi tucunajunga” nishpa (Mat. 26:51, 52).
Miqueas 4:3pi nishca shinami, Jehová Diosta sirvijcunaca ‘espadacunata tacashpa, azadongunata rurashca. Lanzacunataca, hocescunamanmi tigrachishca’. Jesusta ali catijcunataca, tranquilo cashcamandami gentecunaca rijsin. Ashtahuangarin, apóstol Pablo consejashca shinami, shujcuna ‘nalita rurajpipash, na chashnallata tigrachin’. ‘Tucuicunahuan casilla aliguta causanatami’ mascan (Rom. 12:17, 18). Apóstol Pabloca ‘shuhuacunamandami’ ashtaca llaquicunata charirca (2 Cor. 11:26). Shinapash, Bibliapi imata yachachijujtaca yariami carca. Ashtahuangarin Jehová Diospipash, Bibliapipash confiashpami, macanajunaca na alichu can, ‘ali yachaita’ charinami ashtahuan ali can yashpa causarca (Ecl. 9:18).
Jesusta catijcunapaca, paicunapa causaimi paicunapa charishcacunamandapash ashtahuan yali valishca can. ‘Imata ninanda charishpapash, chaihuan unaita causajuitaca na ushanchichu’ (Luc. 12:15). Chaimandami, pipash pistolata ricuchishpa shuhuangapaj munajpica, na yapata manllarishpa parlana capanchi. Shinapash, shuhua na intindijpica, Jesús nishcatami cazunchi. Jesusca nircami: ‘Cangunata llaquichijpica saquinguichilla’. Shinaca, imatapash apachun saquinallami canchi (Mat. 5:39, 40; Luc. 6:29). * Ñucanchicunapash cuidarinami capanchi. Chaimandami ñucanchi charishcacunataca shuhuacuna ricujujtaca na churajushpa purijuna capanchi. Shinallata, ñucanchi territoriopi gentecunapash, testigo de Jehovacunaca tranquilocuna cashcatami ricuna can (Prov. 18:10;1 Juan 2:16).
Jesusta catijcunaca shujcunapa concienciata respetanchimi (Rom. 14:21). Shuj huauqui o shuj pani shuj armata charijta yachaj chayashpa, chaishuj huauquipanicuna nalicachishpa manllarijpica ¿imatata rurai ushan? Armacunata charina na prohibido cajpipash, huauquipanicunata juyaimandami, paicunapa concienciata respetashun (1 Cor. 10:32, 33; 13:4, 5).
Jesusta catijcunaca ali ejemplota ricuchingapami esforzarinchi (2 Cor. 4:2; 1 Ped. 5:2, 3). Shuj huauquica, difindiringapaj nishpa shuj armata charishcanman. Na charinachu cangui nishpa Bibliahuan consejajpipash, armata charishpa catishpaca, nali ejemplo cashcatami ricuchijunman. Chaimandami congregacionbi privilegiocunata charishpa catitaca ñana ushanga. Bibliahuan consejajpipash, trabajomanda shuj armata charishpa catishpaca, privilegiocunata charishpa catitaca ñana ushanmanllu. Shuj trabajotarapash mascashpami ali canman. *
Jesusta catijcunaca cada unomi, paillata imashina cuidarinata, paipa familiata imashina cuidanata, paipa charishca cosascunata imashina difindinata, ima trabajota chasquinataca ali ricuna can. Chaicunata cada uno ricuna cashpapash, Bibliapi textocuna ima nijta yarishpa, Jehová Diospa ali yachaita, paipa juyaita catijushcatapash ricuchinami capanchi. Jesusta catijcunaca Biblia ima nijta respetanchimi. Chaimandami shuj gentecunamanda difindiringapaj armacunata na charina cashcataca, ali intindinchi. Jehová Diospi confiaimanda, Bibliapi consejocunata catimanda tranquilo, ali causai ushashcataca alimi yachanchi (Sal. 97:10; Prov. 1:33; 2:6, 7).
Jatun Manllanai Llaqui Punllacunapica, Jehová Diospimi confiashun. Ñucanchillata difindirinataca na mascashunllu.
^ par. 3 Huaquingunaca, animalcunata japishpa micungapaj, o millai animalcunamanda difindiringapami pistolata o escopetata charin. Armata na ocupajushca horasca, llavehuan alichishpa, balacunata llujchishpa o desarmashpami charina can. Ñucanchi llactapi armacunata charina prohibido cajpi, o armacunata charinamanda imapash leycuna tiajpica, leycuna ima nijtaca, cazunami capanchi (Rom. 13:1).
^ par. 6 Violangapaj japijpi imashina difindirinata yachangapaca, “Cómo evitar una violación” nishca temata ¡Despertad! del 8 de marzo de 1993 revistapi ricupangui.
^ par. 2 Armacunata charina trabajota chasquinalla cashcata, na chasquinalla cashcata yachangapaca La Atalaya del 1 de noviembre de 2005 revistapi, página 31ta ricupangui. Shinallata, La Atalaya del 1 de noviembre de 1983 revistapi 25, 26 paginacunata ricupangui.
