1. a) Jipa punllacunapi pensarishpaca ¿imatata jovengunaca rurana can? b) ¿Imamandata jovengunaca na manllana can? (Callari fotocunata ricupangui).

JOVENGUNA, ¿nachu viaje ringapaj munanajushpaca maiman rinatara pundapica aliguta pensarina capanchi? Ñucanchi causaipash shuj viaje cuendami can. Chaimandami, jipa punllacunapi pensarishpa, joven cashpallata imata ruranataca aliguta pensarina can. Joven cashpallata pensarinaca ashata shinllimi can. Heather shuti joven paniguca ninmi: “Jipa punllacunapi imata ruranata pensarinataca manllanayanmi” nishpa. Quiquinbash chai panigushna sintirishpaca, Isaías 41:10​pi shimicunatami yarina capangui. Chaipica Jehová Diosca ninmi: ‘Na manllanachu canguichi, ñucami cangunahuan cani. Na shaijunachu canguichi, ñucami cangunaman ushaita cuj Taita Dios cani. Ñucami ayudajushalla’ nishpa (Is. 41:10).

2. ¿Imashinata yachapangui, Jehová Diosca quiquinbash cushilla causachun munashcata?

² Jehová Diosca, jipa punllacunapi imata ruranata aliguta pensarichunmi munan (Ecl. 12:1; Mat. 6:20). Paica quiquinbash  cushilla causachunmi munan. Chaimandami, quiquin ricushpa, uyashpa cushijuchunga juyailla cosascunata rurashca. Shinallata paica cuidajunmi. Ñucanchicuna ali causachunbashmi yachachijun. Paita na uyajcunataca Jehová Diosca ninmi: ‘Ñuca na ricunayachishcatarami agllarcanguichi. Ñucata sirvijcunaca cushijungami, ashtahuangarin cangunaca, pingaichi tucunguichimi. Ricuichi, ñucata sirvijcunaca, tucui shunguhuan ninanda cushijushpami candanajunga’ nishpa (Is. 65:12-14). Ali decisiongunata agllashpaca Jehová Diostami jatunyachinajunchi (Prov. 27:11).

3. Jehová Diosca jovenguna ¿imata rurachunda munan?

³ Jehová Diosca jovenguna ¿imata rurachunda munan? Pensaripai. Animalcunata Jehová Dios rurashpaca, micushpa, huahuacunata charishpa cushijuchunmi rurarca. Cutin gentecunataca, paita rijsishpa, paita ali sirvishpa cushijuchunmi rurarca (Sal. 128:1; Mat. 5:3). Bibliapi nishca shinaca, Jehová Diosca ‘juyarishpa causanata caraj’, ‘cushilla Taita Diosmi’ can. Gentecunatapash paiman “rijchajtami” rurarca (2 Cor. 13:11; 1 Tim. 1:11, NM; Gén. 1:27). Shinaca, Jehová Diospa ejemplota catishpaca cushillami causangui. Bibliapica ninmi: ‘Carajpi japijcunatapash yalimi carajcunaca, ninanda cushijun’ nishpa (Hech. 20:35). Chai shimicuna cierto cajtaca, quiquinllatami cuenta japipariangui. Cushilla causangapaj munashpaca caranami canchi. Chaimandami Jehová Diosca, paitapash, shuj gentecunatapash juyashcata ricuchishpa, imata ruranata aliguta pensarichun munan (Mateo 22:36-39, liingui).

4, 5. ¿Imamandata Jesusca cushilla causaita usharca?

⁴ Jesuspash shuj ali ejemplotami jovengunamanga saquishca. Bibliapica ninmi: ‘Asingapapash, bailangapapashmi’ shuj tiempo tian nishpa (Ecl. 3:4). Chaimandami Jesusca huahua cashpaca, pugllarca, cushijurca. Shinapash, Diospa Shimita yachajungapaj, Jehová Diosman quimiringapapash tiempota llujchinmi carca. 12 huatacunata charishpaca, judiocunata yachachijcunahuanmi Taita Diosmanda parlajurca. Imagutapash “aligutapacha yarishpa tigrachijpimi”, judiocunata yachachijcunaca manllarishpa Jesustaca uyanajurca (Luc. 2:42, 46, 47).

⁵ Ña jatun cashpaca, Jehová Dios munashca shinami, Jesusca ‘imagutapash na charijcunaman ali villaita villachirca, ñausacunatapash alichirca’ (Luc. 4:18). Chaicunata rurashpami Jesusca cushilla carca. Jesusmanda parlashpami Salmo 40:8​pica nin: “Ñuca Taita Dioslla, cambaj munaita rurashpami cushijushcani” nishpa. Jesusca shuj gentecunaman Jehová Diosmanda yachachinataca alicachinmi carca (Lucas 10:21, liingui). Shuj punllaca, shuj huarmigutapashmi Jehová Diosta adorachun yachachirca. Chai jipaca paipa catijcunataca nircami: “Ñucata cachamuj Taita munashcatami, rurashpa tucuchina cani. Chaimi, ñucapaj micunagu capan” nishpa (Juan 4:31-34). Jesusca, Jehová Diostapash, gentecunatapash juyashpami cushilla causarca. Shina rurashpami, jovengunapash cushilla causaita ushapanguichi.

6. ¿Imamandata shuj huauquicunaman, quiquin imata rurangapaj munajushcata parlanaca ali canman?

⁶ Ashtaca Testigocunaca, joven cashpallata precursorcuna tucushpami cushilla cashca. Paicunaman  quiquin imata rurangapaj munajushcata parlashpaca alimi canman. Proverbios 15:22​pica ninmi: “Ali yuyaita taucacuna cujpimi, shinllipacha tucun” nishpa. Chai huauquipanicunahuan parlajpica ningami, tiempo completopi sirvishpaca ashtaca ali cosascunatami yachajungui nishpa. Jesús jahua cielopi cashpaca, ashtaca cosascunatami Jehová Diosmandaca yachajurca. Cai Alpaman shamushpa villachijushpapash, ashtaca cosascunatami yachajushpa catirca. ¿Imatallata yachajurca? Ali villaicunata villachishpa gentecunapa shunguman chayashpa cushijunatami yachajurca. Shinallata, llaquicunapi cashpapash, Jehová Diosta tucuipi cazunatami yachajurca (Isaías 50:4, liingui; Heb. 5:8; 12:2). Shinaca ¿imamandata tiempo completopi sirvijushpaca cushilla caita ushapangui? Huaquin yuyaicunata ricupashun.

7. ¿Imamandata ashtaca jovengunaca shuj gentecunaman villachishpa yachachinata alicachin?

⁷ Jesusca nircami: ‘Ñucapa yachajujcuna tucuchunmi cai pachapi gentecunapaman rishpa villachina canguichi’ nishpa (Mat. 28:19, 20). Shuj gentecunaman villachishpa, yachachingapaj munashpaca cushillami causangui. Jehová Diostapash jatunyachinguimi. Imashinami imata rurai callarishpapash tiempohuan ali rurai usharin, shinallata tiempohuanmi villachishpa yachachitapash ali ushangui. Timothy shuti huauquigupa ejemplota ricupashun. Paica 19 huatacunata charishpami precursor tucurca. Paica ninmi: “Ñucaca Jehová Diosta juyaimandami tiempo completopi sirvingapaj munarcani. Callaripica, Bibliata yachajungapaj munaj gentecunataca na tari usharcanichu. Shinapash jipamanga, shuj ladomanmi rircani. Chaipica shuj quillapillami, tauca gentecunaman Bibliata yachachi callarircani. Shujcarin, tandanajuicunamanbash ri callarircami. Jipamanga, ishcai quillacunatami Soltero Huauquicunapa Escuelaman rircani. * Chaimandami shuj ladopi sirvichun cachahuarca. Chaipica chuscu gentecunamanmi Bibliata yachachi callarircani. Jehová Diospa espíritu santopa ayudahuan, Bibliata yachajuj gentecuna asha asha cambiajta ricushpami cushijuni” ninmi (1 Tes. 2:19).

8. Shuj gentecunamanbash villachingapaca ¿imatata huaquin jovengunaca rurashca?

⁸ Cutin huaquin jovengunaca shuj shimitami yachajushca. Estados Unidosmanda Jacob shuti huauquipa ejemplota ricupashun. Paica ninmi: “7 huatacunata charishpa escuelapi cajpica, huaquin cumbacunaca Vietnam llactamandami carca. Paicunaman Jehová Diosmanda parlangapaj munashpami, paicunapa shimita yachajui callarircani. Ashtahuanbachaca, inglés shimipi Villajun revistata, vietnamita shimipi Villajun revistahuan chimbapurashpami, vietnamita shimita yachajurcani. Shinallata, ñuca huasi ladollapi vietnamita shimita parlaj congregacionmanda huauquipanicunahuanmi llevari callarircani. 18 huatacunata charishpaca, precursormi tucurcani. Jipamanga, Soltero Huauquicunapa Escuelamanmi rircani. Chai escuelami vietnamita shimita parlaj grupopi precursor shina sirvichun ayudahuashca. Chai grupopica ñucallami anciano cani. Vietnamita ashtaca gentecunaca, paicunapa shimipi parlajpica manllarishpami uyan. Paicunapa huasimanbashmi invitahuan. Shinami taucacunaman Bibliata yachachi callarishcani. Huaquingunacarin, ñami bautizarishca” ninmi (Hechos 2:7, 8​huan chimbapurashpa ricupangui).

9. Shuj gentecunaman Bibliata yachachishpaca ¿imacunatallata yachajui ushapangui?

⁹ Shuj gentecunaman Bibliata yachachishpaca,  ashtaca cosascunatami yachajui ushapangui. ¿Imacunatallata yachajui ushapangui? Ali trabajador canata, shuj gentecunahuan aliguman, na manllashpa parlanatapashmi yachajupangui (Prov. 21:5; 2 Tim. 2:24). Shinallata, quiquinba crishcacunata Bibliahuan ashtahuan ali intindichinata yachajushpami cushilla sintiripangui. Ashtahuangarin, Jehová Diospa ruraicunapi ashtahuan aliguta ayudanatapashmi yachajupangui (1 Cor. 3:9).

10. Gentecuna na uyangapaj munaj territoriopi causashpapash ¿imashinata cushilla caita ushapangui?

¹⁰ Ali villaicunata na uyangapaj munaj territoriopi causashpapash, cushijuita ushapanguimi. ¿Imamandata shina nipanchi? Ali shungu gentecunata taringapaca, tucuicunallatami congregacionbica ayudarinchi. Jehová Diosta sirvingapaj munajuj genteguta shujlla huauqui tarijpipash, tucuicunallata tarichun ayudashcamandami, tucuicunallata cushijunchi. Brandon shuti precursor huauquipa ejemplota ricupashun. Paica 9 huatacunatami ali villaicunata na uyangapaj munaj territoriopi villachijurca. Paica ninmi: “Ali villaicunata Jehová Dios villachichun munajpimi villachini. Colegiota tucuchishca jipallami precursor tucurcani. Shuj jovengunatapash animashpa, Jehová Diosta sirvishpa viñanajujta ricunatami alicachini. Soltero Huauquicunapa Escuelaman rishca jipaca, shuj ladopi sirvichunmi cachahuarca. Shuj huauquipanicuna shujcunata bautizarichun ayudajpipash, ñucaca shugutallapash bautizarichunga na ayudai ushapashcanichu. Shinapash, tiempo completopi sirvishpa shuj gentecunaman villachinapi ayudashpami cushijupani” ninmi (Ecl. 11:6).

11. Huaquin jovengunaca ¿imashinata Jehová Diosta ashtahuan sirvinajun?

¹¹ Jehová Diosta ashtahuan sirvingapaj munashpaca ¿imatata ashtahuan rurai ushapangui? Shuj ejemplota ricupashun. Cunanbica ashtaca Tandanajui Huasicunami minishtirinajun. Chaimandami ashtaca jovengunaca, construccionbi voluntariocuna can. Tandanajui Huasicunaca Jehová Diosta adorangapami can. Chaimandami chaipi ayudashpaca ninanda cushijupangui. Shuj huauquicunahuan construccionbi igual trabajashcamandami cushilla caita ushapangui. Shinallata, trabajajushpa llaquicuna ama tiachun imashina trabajanata, ñaupaman pushajcunahuan ayudarishpa trabajanata, shuj cosascunatapashmi yachajui ushapangui.

12. Precursor tucushpaca ¿imatallata jipamanga rurai ushapanguiman?

¹² Kevin shuti huauquica ninmi: “Huahua cashpaca, Jehová Diosta tiempo completopi sirvingapami munarcani. Shinami 19 huatacunata charishpa precursor tucurcani. Precursor cashpa catita ushangapaca, albañil huauquihuan trabajajurcani. Shinami ventanacunata, pungucunata imashina churanata, shuj cosascunatapash yachajurcani. Jipamanga, ishcai huatacunatami Tandanajui Huasicunata arreglashpa, jatun acapanacuna tiashca jipa huauquipanicunapa huasicunatapash arreglashpa ayudajurcani. Sudáfrica llactapica construccionbi ayudana minishtirijunmi nijta uyashpami, shuj solicitudta jundachircani. Ari nishpa chasquijpimi, África llactaman rircani. Chaipica, huaquin semanacunapi shuj Tandanajui  Huasita rurashca jipami, shuj Tandanajui Huasita rurangapaj rinchi. Construcción grupopi trabajajcunaca, familiashnami canchi. Tucuicunami igual causanchi, tandanajushpa Bibliata estudianchi, igual trabajanchipash. Congregacionbi huauquipanicunahuan cada semana villachingapaj llujshinatapash alicachipanimi. Huahua cashpallata Jehová Diosta ashtahuan sirvinata aliguta pensarishcamandaca, jatun cushijuitami tarishcani” ninmi.

13. ¿Imamandata ashtaca jovengunaca Betelpi sirvinata gushtan?

¹³ Ashtaca huauquipanicunaca, precursor cana munaita pactachishca jipami, cunanbica Betelpi sirvinajun. Betelpica imata rurashpapash Jehová Diospami ruranajun. Chaimandami Betelpi sirvishpaca cushilla caita ushapangui. Ashtahuangarin, tucuicunallata Jehová Diosmanda aliguta yachajushpa catichunmi Betelca ayudan. Betelpi sirvijuj Dustin shuti huauquica ninmi: “9 huatacunata charishpaca, tiempo completopi sirvinatami aliguta pensarircani. Chaimandami colegiota tucuchishpaca precursor tucurcani. Huata chaupi jipami, Betelpi sirvichun invitahuarca. Betelpica jatun imprenta maquinacunata, computadoracunapi programacunata churanatami yachajurcani. Pundapica Betelpimi, mundo enteropi ali villaicuna imashina mirajujta villan. Chaimandami Betelpi canata gushtani. Shuj gentecunapash Jehová Diosman quimirichun ayudai ushashcamandami, Betelpi canataca tucui shunguhuan gushtani” ninmi.

14. Tiempo completopi sirvingapaj munajushpaca ¿imatata rurai ushapangui?

¹⁴ Tiempo completopi sirvingapaj munajushpaca ¿imatata rurai ushapangui? Ashtahuanbachaca ali cualidadcunata charingapami esforzarina capangui. Shinami Jehová Diosta ashtahuan ali sirvita ushapangui. Chaimandami, Diospa Shimitaca na cungashpa yachajushpa catina capangui. Bibliapi imata nijujtapash aligutami pensarina capangui. Tandanajuicunapi comentangapapash esforzarinami capangui. Escuelapi cashpallatami, ashtahuan ali villachingapaj prepararita ushapangui. Chaipaca, gentecuna imata yuyajta yachangapami, respetohuan tapuna capangui, imatata yuyapangui nishpa. Chai jipaca, paicuna imata nijtami aliguta uyana capangui. Shinallata, Tandanajui Huasita fichanacunapi, arreglanacunapipashmi ayudaita ushapangui. Jehová Diosca humilde gentecunata, ayudangapaj munaj gentecunatami alicachishpa ricun (Isaías 6:8, liingui; Hech. 6:1-3). Apóstol Pabloca, “Timoteoca ali causaitami charin” nishpa shuj huauquipanicuna parlanajujta uyashpami, Timoteotaca paihuan shuj llactacunaman rishpa villachichun invitarca (Hech. 16:1-5).

15. Trabajota taringapaca ¿imatata rurai ushapangui?

¹⁵ Casi tucuicunami tiempo completopi sirvingapaj munashpaca, trabajana tucun (Hech. 18:2, 3). Quiquinbash trabajana cashpaca, quiquin causajuj llactapi huaquin punllacunatalla trabajangapami, shuj uchilla cursota cati ushapangui. Superintendente de circuito huauquita, shuj precursorcunatami ima trabajota ali capanman nishpa tapuita ushapangui. Ashtahuangarin Bibliapi nishca shinami, quiquin ‘imatalla ruranataca, Mandaj Diospa maquipi mingana’ capangui. Shinami quiquin ‘imata yarijushcapash ali llujshinga’ (Prov. 16:3; 20:18).

16. ¿Imamandata joven cashpallata tiempo completopi sirvinaca ali can?

¹⁶ Ama cungapanguichu. Shamuj punllacunapi quiquin cushilla causachunmi Jehová Diosca munan (1 Timoteo 6:18, 19, liingui). Tiempo completopi sirvijushpaca, tiempo completopillata sirvinajuj shuj huauquipanicunahuan cashpami, quiquinbash espiritualmente shinlli caita ushapangui. Ashtaca huauquipanicunaca ninmi, joven cashpallata precursor tucunami cazarashcapipash ayudan cashca nishpa. Tauca huauquipanicunaca, nara cazarashpallata precursorcuna cashpami, cazarashca jipapash igual precursorcuna cashpa catita ushashca (Rom. 16:3, 4).

17, 18. Imata rurasha yajushpapash ¿imatata ricuchina capanchi

¹⁷ Ñucanchicunaca imata rurasha yajushpapash shungu imashina cashcatami ricuchinajupanchi. Salmo 20:4​pica Jehová Diosca ninmi: “Cambaj shungu munashcashnallata, cushpami ali canman. Can imatalla yarijushcataca, pactachishpami ali canman” nishpa. Shinaca, quiquinba causaihuan imata ruranataca aligutami pensarina capangui. Shinallata Jehová Dios imata cunanbi rurajushcata, paita sirvingapaj imata ruranatapash aligutami pensarina capangui. Shina pensarishca jipami, Jehová Diosta cushichingapaj imata ruranata aliguta pensarina capangui.

¹⁸ Jehová Diosta sirvijushpaca, Jehová Diosta jatunyachijuimandami cushilla causangui. Shinaca, “Mandaj Dioshuanlla cushijui. Paimi, cambaj shungupi imatalla mañashcacunataca caranga” (Sal. 37:4).