1-3. a) Salmo 147​taca ¿ima horashi escribishcanga? b) ¿Imacunatata Salmo 147​mandaca yachajui ushapanchi?

TUCUICUNAMI shujcuna imatapash ali rurajpi, imatapash ali parlajpica paicunata alicachinchi. Shinapash ashtahuanbachaca, Jehová Diostami alicachina capanchi. Paimi tucuita paipa ninan ushaihuan rurashca. Paimi, gentecunata juyaimandapash paipa Churita cai Alpaman huañuchun cachamurca.

² Salmo 147ta escribishca runaguca, Jehová Diosta tucui shunguhuan alicachishpa alabangapami munarca. Shuj gentecunapash, Jehová Diosta alicachishpa alabachunmi ayudarca (Salmo 147:1, 7, 12, liingui).

³ Salmo 147ta escribij runagu ima shuti cashcataca, na yacharinllu. Shinapash ¿ima horashi Salmo 147taca escribishcanga? Salmo 147taca, israelitacunata Jehová Dios Babilonia llactamanda llujchishpa, Jerusalenman tigrachishca punllacunapimi escribishcanga (Sal. 147:2). Salmo 147ta escribij runaguca, israelitacuna paicunapa llactaman tigrashpa, Jehová Diosta alabai ushashcamandami, Jehová Diostaca alicachijurca. Shinapash, shuj cosascunamandapashmi Jehová Diostaca alicachijurca. Shinaca ¿imacunamandallata alicachijurca? ¿Imamandata ñucanchicunapash Jehová Diosta alicachina capanchi? (Sal. 147:1).

4. Rey Ciro libre cachun ayudajpica ¿imashinashi israelitacunaca sintirishcanga? ¿Imamandashi shina sintirishcanga?

⁴ Babiloniocunaca, israelitacunata pingaichingapaj munashpami, burlarishpa ninajurca: ‘Sion shuti pueblopi candana huaquin candanacunata, ñucanchiman candaichi’ nishpa. Shina burlarinajujpica ¿imashinashi israelitacunaca sintirinajushcanga? Israelitacunaca Jerusalén llacta tucuchi tucushcamandami, llaqui llaqui carca, candana munaitapash na charircachu (Sal. 137:1-3, 6). Shungu faquirishcashna sintirinajuimandami, cushichichun minishtinajurca. Shinapash, Jehová Dios nishca shinami, Persia llactamanda rey Ciroca, Babilonia llactata llaquichishpa, israelitacunataca libre cachun ayudarca. Jehová Diosmanda parlashpaca, rey Ciroca nircami: “Paillatami, Judá llactapi tiaj Jerusalenbi paipaj huasita shayachijuchumbash mandahuarca” nishpa. Chai jipapash nircami: “Pai agllashca puracunamanda Diosta catijcuna tiashpaca, tucuilla vichai tigrachunlla. Paicunata Mandaj Taita Diosca, paicunahuan cachun” nishpa (2 Crón. 36:23). Chai shimicunata uyashpami, israelitacunaca Babilonia llactapi cashpapash alillata sintirishcanga.

5. Salmo 147:3​pi nishca shinaca ¿imashinata Jehová Diosca paipa ninan ushaihuan ayudan?

⁵ Jehová Diosca, tucuilla Israel llactata cushichishpapash, cada unotami israelitacunataca cushichirca. Cunan punllacunapipash, shinallatami Jehová Diosca ayudajun. Salmo 147ta escribij runaguca ninmi: “Shungu faquirishcacunataca, paimi alichin. Chugricunatapash huatachishpami alichin” nishpa (Sal. 147:3). Ungushca cajpi, llaquilla cajpica, Jehová Diosmi cushichinga, llaquilla yuyaicunata ama charichunbash ayudanga. Chaitaca tucui shunguhuanmi confiana capanchi (Sal. 34:18; Is. 57:15). Ima llaquicuna japijpipash, Jehová Diosmi ñucanchimanga ali yachaitapash, shinlli tucushpa ñaupaman catichunbash fuerzata cun (Sant. 1:5).

6. Salmo 147:4​pica ¿imatata yachajupanchi? (Callari dibujota ricupangui).

⁶ Salmo 147ta escribij runaguca, jahua cielota ricushpami nirca, Jehová Diosca “luzerocuna mashna tiajtapash, cuentashcallami charin. Tucui chaicunataca, shutipimi cayan” nishpa (Sal. 147:4). ¿Imamandata luzerocunamanda o estrellacunamanda parlai callarirca? Pensaripashun. Salmo 147​ta escribij runaguca, estrellacunata ricuitaca usharcami. Shinapash, mashna estrellacuna tiashcataca, na yacharcachu. Cunan punllacunapi cientificocunaca ninmi, jahua cielopica ashtaca ashtaca millón estrellacunami tian nishpa. Shinapash mashnapacha cajtaca, na cuentai ushanllu. Mashnapacha cajtaca, Tucuita Ruraj Jehová Diosllami yachan. Tucuilla chai estrellacunatapash shutipimi charin (1 Cor. 15:41). Shinaca, ¿imatata yachajupanchi? Imashinami Jehová Diosca, cada estrella maipi cajtaca tucui horas yachan, shinallatami ñucanchicuna maipi cajta, imashina sintirinajujta, imata minishtinajujtaca, ali yachan.

7. ¿Ñucanchicuna imashina cajtata Jehová Diosca ali yachan?

⁷ Jehová Diosca ñucanchicuna cada uno ima llaquita charijtaca, alimi yachan. Cada unota ayudangapapashmi ushaita charin (Salmo 147:5, liingui). Huaquinbica ñana ushanichu yashpachari pensanchi. Shinapash Jehová Diosca, ñucanchicuna imatalla aguantai ushanataca, alimi yachan. Ñucanchicuna ‘ñutu alpa cajtaca’ yaipimi charin (Sal. 103:14). Juchayucuna caimandami,  ñucanchica cutin cutin pandarinchi. Tucuicunallatami imapash nalita nishcata, nali munaita charishcata, o pitapash envidiashpa ricushcata huaquinbica arripintirishcanchi. Jehová Diosca jucha illaj cashpapash, ñucanchicuna juchayucuna caimanda pandarijtaca, alimi yachan (Is. 40:28).

8. ¿Imashinata shuj panigupa ejemplopica, Jehová Dios ñucanchicunata ali intindijta ricupanchi?

⁸ Llaquicunapi cajpi Jehová Dios ayudashcataca, tucuicunallatami cuenta japishca cashun (Is. 41:10, 13). Kyoko shuti panigu ima pasashcata ricupashun. Shuj congregacionbi sirvichun cachajpimi, paica yapata desanimarirca. ¿Imashinata paica Jehová Dios paita intindishpa ayudajujta cuenta japirca? Kyoko nishca shinaca, mushuj congregacionbi huauquipanicuna ali intindijpimi paica nirca: “Chai ratocunapica, Jehová Dios parlashpa, ‘candaca precursora cashcamandapash, ñucaman mingarishcamandapash, ñuca ushigu cashcamandapashmi juyani, cushilla causachunmi munapani’ nijujpishnami sintirircani” nishpa. ¿Nachu quiquinba causaipipash, Jehová Dios tucuita ali yachashpa ayudashcata ricupashcangui?

9, 10. Ashtahuanbachaca ¿imapita Jehová Diosca ñucanchita cuidariajun? Shuj ejemplomanda parlapai.

⁹ Huaquinbica, micunamanda o imagucunamandapashmi preocuparinchi. Shinapash Jehová Diosca, frutacuna, granocuna, alipacha fucuchunmi cai Alpataca rurarca. Salmo 147:8, 9​pi nishca shinaca, ‘cuervo nishca animalcunapa huahuacuna ninanda caparinajujcunamanbashmi’, Jehová Diosca micunaguta caran (chai textota liingui). Chai animalgucunamanbash micunaguta carajpica, ñucanchi imata minishtijujta Jehová Dios caranataca, seguromi cana capanchi (Sal. 37:25).

¹⁰ Ashtahuanbachaca, shinlli feta charichunmi, Jehová Diosca ñucanchita cuidariajun. Shinallata, ñucanchi yuyaicunapipash tranquilo ali sintirichunmi Jehová Diosca ayudajun (Filip. 4:6, 7). Japón llactamanda Mutsuo shuti huauquipa ejemplota, paipa huarmipa ejemplota ricupashun. 2011 huatapimi Japonbica, marpi yacucuna jahuata jatarishpa, chai llactataca ninanda llaquichirca. Mutsuo huauquipash, paipa huarmipash huasi jahuaman vitsaimandallami salvarirca. Casi tucuilla cosascunatami chingachirca. Tuta enterotami yana yana, chiri chiri, ña tunirinalla ucupi pacarirca. Cayandi punllaca, animaringapami imagutapash mascai callarirca. Shinami, Anuario de los testigos de Jehová 2006 librotalla tarirca. Mutsuo huauquica, Anuario libropi “Los tsunamis más mortíferos de la historia” nishca tematami ñapash ricurca. Chai temapica, 2004 huatapi, Sumatra nishca llactapi shuj terremoto tiashcata, chai jipa marpi yacucuna jahuata jatarishpa, chai llactata ninanda tucuchishcatami parlajurca. Mutsuo huauquipash, paipa huarmipash, huacai huacaimi experienciacunataca liirca. Shinami, minishtijuj horaspipacha Jehová Dios llaquishpa animashcata cuenta japirca. Shinallata, shuj huauquipanicuna, ropaguta, micunaguta carajpimi, Jehová Dios paicunata juyashcata cuenta japirca. Ashtahuanbachaca, Comité de Sucursalmanda huauquicuna paicunapa congregacionda visitashpa, animajpimi ashtahuan shinlli tucurca. Mutsuo huauquica ninmi: “Jehová Dios ñucanchi ladopi shayarishpa, animashpa cuidajujpishnami sintirircanchi” nishpa. Imashinami ricupanchi, ñucanchicuna micunaguta, churajunaguta charichun ricuriajushpapash, espiritualmente ali cachunmi, Jehová Diosca ashtahuan cuidariajun.

11. Jehová Dios ayudachun munashpaca ¿imatata rurana capanchi?

¹¹ Jehová Diosca ‘na jariyajcunata’ ayudangapaca, listomi can (Sal. 147:6a). Shinapash, Jehová Dios ayudachunga ¿imatata rurana capanchi?  Chaipaca, Jehová Diosmanmi ashtahuan quimirina capanchi. Paiman quimiringapaca, na jariyashcacunachu cana capanchi (Sof. 2:3). Na jariyajcunaca, Jehová Dios tucui nali ruraicunata tucuchishpa, sufrinajuj gentecunata jambinshna ayudachunmi shuyan. Jehová Diosca, na jariyajcunatami alicachishpa ricun.

12, 13. a) Jehová Dios ayudachun munashpaca ¿imacunamandata jarcarina capanchi? b) Ñucanchicuna ¿imata rurachunda Jehová Diosca munan?

¹² Cutin, “paita na manllajcunataca, ninanda pingaichishpami” Jehová Diosca “alpacaman cumuchin” (Sal. 147:6b). Shinaca, Jehová Dios ñucanchita ama culirachun munashpa, llaquishpa juyachun munashpaca, Jehová Dios imata millanayachishcatami, ñucanchipash millanayachina canchi (Sal. 97:10). Shuj ejemplota ricupashun. Shuj jarihuan shuj huarmihuan puñushpa juchapi urmanataca millanayachinami canchi. Chaimandami, chai juchapi ama urmangapaca, pornografía nishcacunata ricunamandapash, shuj pinganai ruraicunamandapash caruyana canchi (Sal.  119:37; Mat. 5:28). Chai nali ruraicunamanda caruyana shinlli cajpipash esforzarishpaca, Jehová Diospa bendiciondami charishun.

¹³ Nali munaicunata mishangapaca, Jehová Diostami ayudahuai nishpa mañana capanchi. Bibliapica ninmi, Jehová Diosca ‘caballopa ushaipi, ninan shinlli runapi’ confiachunbash na munanllu nishpa. ¿Imamandata shina nin? Ñucanchipillata, o shuj gentecunapi na confiachun munashpami, Jehová Diosca shina nin (Sal. 147:10). Chaipa randica, Jehová Diostami ayudahuai nishpa rogana capanchi. Consejota cushpa trabajaj gentecunaca, shaijunllami. Shinapash Jehová Diosca, ñucanchicuna cutin cutin mañanajujpipash, nunca na shaijunllu. Salmo 147:11​pica ninmi: “Mandaj Diosca, paita manllajcunahuanmi cushijun. Pai llaquichun shuyajcunahuanmi cushijun” nishpa. Shinaca, na cunganachu capanchi, ñucanchicunata juyaimandami Jehová Diosca, ñucanchi nali munaicunata mishachun ayudashpa catinga.

14. Salmo 147​ta escribij runaguca ¿imapi pensarishpata animarirca?

¹⁴ Ñucanchicuna ayudachun minishtijujpica, Jehová Diosca ayudangami. Salmo 147ta escribij runaguca, israelitacunata Jehová Dios Jerusalenman tigrachun ayudashcata yarishpami nirca, paimi ‘pungucunapa aldabacunata ashtahuan shinllita churarca. Canba huahuacunatapash bendiciarca. Paimi, canba llactapica casilla causaita caran’ nishpa (Sal. 147:13, 14). Salmo 147ta escribij runaguca, Jerusalenba pungu aldabacunata Jehová Dios shinlliyachishpa, israelitacunata cuidajujta yachashpami animarirca.

15-17. a) Huaquinbica ¿imashinata sintiripanchi? Shinapash ¿imashinata Jehová Diosca ayudan? b) ¿Imashinata Jehová Diosca paipa Shimihuan ñapash ayudan? Shuj ejemplomanda parlapai.

¹⁵ Huaquinbica jatun llaquicunapi cashpami yapata preocuparinchi. Shinapash chai ratocunapica, Jehová Diosmi ali yachaita cunga. Salmo 147ta escribij runaguca nircami: “Paimi, paipaj Shimita cai pachaman cachamun. Paipaj Shimica, ñapash rinllami” nishpa. Shinallata nircami: “Paimi rasutapash, milmatashna urmachin”. Paimi ‘casatapash uchufatashna talimun’. “Paimi, rasutaca asha asha shitamun” nishpa. Shina nishca jipapash nircami: “Chai chiripica, ¿pita puri ushangayari?” nishpa. Ña tucuchingapacarin nircami: “Paipaj Shimihuan rimashpami yacuyachinga” nishpa (Sal. 147:15-18). Jehová Diosca, Tucui Ushaita charimanda, tucuita ali yachaimandami rasutapash, casatapash urmachita  ushan. Chaimandami, ñucanchicuna ima llaquipi cajpipash, ayudaita ushan.

¹⁶ Cunan punllacunapica, paipa Shimi Bibliahuanmi Jehová Diosca ñucanchita ñaupaman pushajun. Ñucanchi minishtijuj horascunapi espiritualmente ayudashcamandami nita ushanchi, Jehová Diospa “Shimica ñapash rinllami” nishpa. Pensaripashun, Bibliapash, ‘aliguta cazushpa aliguta yariashpa sirvij’ esclavopa publicaciongunapash, JW Broadcastingbash, jw.org direccionbash, ancianocunapash, shuj huauquipanicunapash, ashtacatami ñucanchitaca ayudashca (Mat. 24:45). Shinaca ¿nachu Salmo 147:15​pi nishca shinaca, Jehová Diosca ñapash ñucanchitaca ayudajushca?

¹⁷ Simone shuti paniguca, na imapapash sirvinichu, Jehová Diospash ñucataca na alicachihuanllu yashpami, llaquilla can carca. Shina sintirijushpapash, Jehová Diosta mañanataca nunca na saquircachu. Bibliata estudiashpa catinatapash, na saquircachu. Shina rurashpami, Simone paniguca, Jehová Diospa Shimi ninan ushaita charishcata cuenta japishpa nirca: “Ima llaquipi cashpapash, siempremi Jehová Dios ayudajujta, pai ñaupaman pushajujtaca cuenta japishcani” nishpa. Shinami chai paniguca, cushilla cashca.

18. a) ¿Imamandata Jehová Diostaca agradicina capanchi? b) ¿Imamandata quiquinga Jehová Diosta alicachipangui?

¹⁸ Salmo 147ta escribij runaguca, tucui llactacunamanda, Israel llactatalla agllashpa, Jehová Dios ‘paipa Shimicunata, paipa yachachishcacunata’ cushcataca alimi yacharca (Salmo 147:19, 20, liingui). Cunan punllacunapica, ñucanchicunallami Jehová Diospa shutita apana bendicionda charinchi. Ñucanchicunaca, Jehová Diosta rijsi ushashcamanda, paipa Shimihuan ñucanchita ayudajushcamanda, paipaman quimirita ushashcamandapash ninandami agradicinchi. Imashinami ricupashcanchi, ñucanchicunapash Salmo 147​ta escribij runagushnami, Jehová Diostaca ashtaca cosascunamanda alicachina capashcanchi. Shinallata, shujcunapash Jehová Diosta alicachichun ayudanami capashcanchi.