1. ¿Imashinata Jehová Diosca alpa mangata alipacha rurajshna cashcata ricuchishca?

NOVIEMBRE DE 2010 huatapica china llactamanda punda tiempopi rurashca shuj valishca alpa mangagutami Inglaterra llactapica jatunajurca. Chaita randingapaj munajca, casi 70 millón dolarcunatami pagangapaj munarca. Alpa mangata rurajcunaca yanga ñutu alpaguta japishpami shuj juyailla, valishca alpa mangata ruranlla. Jehová Diospash alpa mangata ruraj runagushnami can. Shinapash paica, tucuita ashtahuan yali alipacha rurajmi can. Bibliapica ninmi, Jehová Diosca ‘ñutu alpata’ japishpami Adandaca jucha illajta rurarca nishpa (Génesis 2:7). Adanga “Taita Diospaj churimi”carca. Chaimandami paica Jehová Diospa cualidadcunata cati usharca (Lucas 3:38).

2, 3. Arripintirishca israelitacunashna cangapaca ¿imatata rurana capanchi?

² Taita Diospa churi cashpapash Adanga Taita Diosta na cazushpami Taita Diospa churi canata saquirca. Adán na cazujpipash Adanba tauca huahuacunaca Jehová Dios paicunata mandachunmi munarca (Hebreos 12:1). Chaimandami paicunaca, paicunata ruraj Taita Diosta tucui shunguhuan cazunata agllarca. Shina rurashpami paicunaca Diablota na cazushpa, Jehová Dios paicunapa Taita cachun, paicunata shuj alpa mangagutashna formachun munashcata ricuchirca  (Juan 8:44). Arripintirishca israelitacunapash Taita Diosta tucui shunguhuan cazungapaj munashpami nirca: “Mandaj Dioslla, canmi ñucanchi taita cangui. Ñucanchica, alpamanda rurashcacunallami canchi, canmi ñucanchita rurarcangui. Ñucanchica, tucuicunami cambaj maquihuan rurashca canchi” nishpa (Isaías 64:8) (“¿Imatata nisha nin?” nishca recuadrota ricupangui).

³ Cunan punllapi Jehovata sirvijcunapash arripintirishca israelitacunashnami Jehovataca tucui shunguhuan cazungapaj munanchi. Ñucanchica cushijushpami ninchi, Jehová Diosmi ñucanchi Taita can nishpa. Ñucanchita shuj alpa mangagutashna aliguta formachunmi munanchi. Chaimandami tapurina canchi: “¿Shuj valishca alpa mangagutashna aliguta formachun saquijunichu? ¿Ñuca huauquipanicunataca Jehová Dios formajuj alpa mangagutashna cajtachu ricuni? nishpa. Chaita ali intindingapami cai temapica cai quimsa tapuicunata yachajushun: 1) Alpa mangagutashna formangapaca ¿picunatata Jehová Diosca agllan? 2) ¿Imamandata Jehová Diosca alpa mangagutashna formangapaj munan? 3) ¿Imashinata Jehová Diosca alpa mangagutashna forman?

4. Paipaman quimirichun munashpaca ¿picunatata Jehová Diosca agllan? Shuj ejemplota churapai.

⁴ Gentecunaca jahua shungutallami ricunchi. Shinapash Jehová Diosca shungu ucupi imashina cajtami ricun (1 Samuel 16:7b, liingui). Shuj ejemplota ricupashun. Jesusta catij congregación tiai callarijujpica, imapapash na sirvij gentecunashnalla ricurijcunatami Jehová Diosca paimanbash, Jesusmanbash quimirichun saquirca (Juan 6:44). Saulomanda parlapashun. Paica judiocunata yachachijmi carca. Ashtahuangarin jariyashca, millai millai runami carca. Jesusta catijcunatapash catiriashpa llaquichishpami llullacunahuan juchachin carca (1 Timoteo 1:13). Shina cajpipash Jehová Diosca Saulopa shunguta ricushpami yacharca, Sauloca ali alpagushna cashcata (Proverbios 17:3). ‘Na israelcunapa ñaupajpipash, jatun mandajcunapa ñaupajpipash, israelcunapa ñaupajpipash villangapaj’ Saulo ali cashcata ricushpami Jehová Diosca shuj juyailla alpa mangagutashna formangapaj Saulotaca agllarca (Hechos 9:15). Shuj gentecunatapash agllashpami Jehová Diosca ‘alipa rurashca’ mangagucunatashna formarca (Romanos 9:21). Huaquingunaca shuhuacuna, machajcuna, jarihuan huarmihuan juchapi urmashpa causajcunami carca (1 Corintios 6:9-11). Shinapash Jehová Diosmanda yachajushpaca, paicunapa feta shinlliyachishpami catirca, paicunapa causaita Jehová Dios cambiashpa catichunbashmi saquirca.

5, 6. a) Jehová Dios ñucanchita shuj alpa mangagutashna formajujta crishpaca ¿imatata villachishca gentecunamandaca pensana capanchi? b) Jehová Dios ñucanchita shuj alpa mangagutashna formajujta crishpaca ¿imatata ñucanchi huauquipanicunamandaca pensashun?

⁵ Gentecunapa shunguta Jehová Dios ali ricushpa paipaman quimirichun saquinataca tucui shunguhuanmi crinchi. Chaimandami ñucanchi huauquipanicunamandapash, villachishca gentecunamandapash na imacunatapash pensajunachu canchi. Shinallata paica  na testigo de Jehová tucungachu nishpapash na pensajunachu canchi. Michael shuti runagu ima pasashcata ricupashun. Paica ninmi: “Testigocuna shamujpica pungutapash vichashpami canllapi yangata saquin carcani. Nali portarinllu carcani. Jipamanga shuj ali ali familiatami rijsircani. Paicunaca alipachami portarin carca. Shinapash paicuna Testigo cajta yachashpaca manllarishcami quedarcani. Paicuna ali portarijta ricushpami pensarircani, imamandata Testigocunataca nali tratan carcani nishpa. Shinami cuenta japircani, ñucaca na yachaimanda, shujcuna ima nijta uyaimandalla Testigocunata nali tratashcata”. Shinami Michaelca Testigocunamanda ashtahuan yachangapaj munashpa Bibliata yachajui callarirca. Jipamangarin bautizarishpami precursor tucurca.

⁶ Jehová Dios ñucanchita shuj alpa mangagutashna formajujta tucui shunguhuan crishpaca ¿imatata ñucanchi huauquipanicunamandaca pensashun? Ñucanchi huauquipanicunaca ña formai tucuchishca alpa mangacunaca na canllu. Paicunaca formashpa catichun minishtinajuj alpa mangagucunashnami can. Jehová Diosca paita sirvijcuna shungu ucupi imashina cajta, imapi formashpa catichun minishtijujtaca alimi yachan. Chaimandami paicuna pandarishcacunata ricujunapa randica paicuna imata ali rurai ushanata Jehová Diosca ricujun (Salmo 130:3). Shinaca ¿imashinata Jehovapa ejemplota cati ushanchi? Jehovapa ejemplota catingapaca ñucanchi huauquipanicuna imata ali ruranajujta ricushpami paicuna cambiashpa catichun ayudana canchi. Shina rurashpami Jehovata ayudanajunchi (1 Tesalonicenses 5:14, 15). Pundapica ancianocunami shuj huauquipanicunata ayudashpa ali ejemplota churana can (Efesios 4:8, NM, 11-13).

7. ¿Imamandata Jehová Dios intindichishpa yachachishcamandaca agradicina capanchi?

⁷ Huaquin gentecunaca ninmi, huahuacunata charishpami taitamamacuna imamanda intindichishpa yachachishcataca cuenta japinchi nishpa. Ashtahuangarin, ña jatun cashpami ñucanchi taitamamacuna ñucanchita juyaimanda intindichishpa yachachishcataca yachanchi (Hebreos 12:5, 6, 11, liingui). Jehová Diosca paipa huahuacuna cajpimi ñucanchitaca juyan. Chaimandami ñucanchitaca pacienciahuan intindichishpa yachachin. Paica ñucanchicuna ali decisiongunata agllachun, cushilla causachun, paita ñucanchi Taitatashna juyachunmi munan (Proverbios 23:15). Ñucanchi juchacunamanda na arripintirimanda llaqui apachun, huañuchunga na munanllu (Efesios 2:2, 3).

8, 9. a) Jehová Diosca ¿imashinata cunanbica yachachijun? b) Shamuj punllacunapica ¿imashinata Jehová Diosca yachachishpa catinga?

⁸ Jehovata nara rijsishpaca Jehová nalicachishca cosascunatachari ruran carcanchi. Shinapash Jehová Dios ñucanchita shuj alpa mangagutashna formashcamandami cunanbica cambiai ushashcanchi (Isaías 11:6-8; Colosenses 3:9, 10). Ñucanchita shuj alpa mangagutashna formashpa cambiangapami Jehová Diosca cunanbica tucuilla huauquipanicunahuan tandanajushpa tranquilo causaita carashca. Shina causanajushcamandami nali gentecunapurapi  causashpapash ali sintirinchi. Shinallata huaquin huauquipanicunaca juyaita na ricuchij familiapi viñashca cashpapash, huauquipanicunahuan tandanajushpa tranquilo causai tiashcamandami paicunata juyaj ashtaca huauquipanicunata charin (Juan 13:35). Tucuicunallatami shujcunata juyanata yachajushcanchi. Ashtahuanbachaca cunanbimi Jehovata juyanata yachajushpa pai ñucanchita juyajtapash ali yachanchi (Santiago 4:8).

⁹ Jehová Dios mandajuj punllacunapimi tucuilla huauquipanicunahuan tandanajushpa tranquilo causaitaca ali aprovechashun. Shinallata shuj juyailla paraíso Alpagupimi causashun. Chai punllacunapimi Jehová Diosca shuj alpa mangagutashna ñucanchitaca ashtahuan aliguta formashpa catinga, yachachingapash. Imashina canataca yaitallapash na yanchichu (Isaías 11:9). Ñucanchi yuyaicunamandapash, cuerpomandapashmi juchayu canata anchuchinga. Shinami ñucanchica Jehová Diosmanda ashtahuan yachajushpa tucuipi cazui ushashun. Shinaca, Jehová Dios ñucanchita shuj alpa mangagutashna formashpa catichun saquishunchi. Shinami ñucanchita juyashpa cambiachun ayudajushcamanda agradicishcata ricuchishun (Proverbios 3:11, 12).

10. ¿Imashinata Jesusca Jehová Diospa ejemplota catishpa pacienciata charishcata, alpa mangata aliguta formanshna cashcata ricuchirca?

¹⁰ Imashinami alpa mangacunata ruraj runaca maijan alpa ali cajta rijsin, shinallatami Jehová Diospash ñucanchitaca ali rijsin. Jehová Diosca ñucanchicuna imapi pandarijujta ricushpa, imata na rurai ushajujta ricushpa, imapi ña mejorashcata ricushpami alpa mangagutashna formashpa cambiachun ayudan (Salmo 103:10-14, liingui). Jehová Dios ñucanchimanda imata pensajta yachangapaca Jesús paipa apostolcunamanda imata pensashcata ricupashun. Jesuspa apostolcunaca cutin cutin pandarishpami, pi ashtahuan importante cashcata yachanamanda fiñarin carca. Quiquin chaipi cashpaca ¿imatata paicunamandaca pensanguiman carca? Paicunaca alpa mangagutashna formachunga ¿na munanllu ninguimanllu carca? Shina pensajpipash Jesusca na shina pensarcachu. Jesusca paipa catijcuna ayudata minishtinajujtaca alimi yacharca. Chaimandami llaquishpa pacienciahuan consejarca. Imashina humilde canatapash paipa ejemplohuanmi ricuchirca (Marcos 9:33-37; 10:37, 41-45; Lucas 22:24-27). Jesús causarishca jipaca, espíritu santota chasquishpami apostolcunaca pi ashtahuan importante cashcamandaca ñana preocuparishpa Jesús mandashcata pactachingapaj esforzarirca (Hechos 5:42).

11. a) ¿Imashinata rey Davidca formachun munajuj ali alpagushna cashcata ricuchirca? b) ¿Imashinata rey Davidpa ejemplota cati ushapanchi?

¹¹ Cunanbica Bibliahuan, paipa espíritu santohuan, congregacionhuanmi Jehová Diosca shuj alpa mangagutashna ñucanchitaca formajun. Biblia ñucanchita aliguta formachun munashpaca Bibliatami liina canchi, imata liishcapi pensarina canchi, Jehovatapash cazungapaj ayudahuangui nishpami mañana canchi. Rey Davidca Jehová Diostaca nircami: ‘Tutapash candaca aligutapachami yarijusha’ nishpa (Salmo 63:6). Shinallata nircami: “Mandaj Diostami alicachisha. Paimi, ñucataca alita yarichihuan. Tutacunapashmi, ñuca yuyaipica alita yachachihuan” nishpa (Salmo 16:7). Imashinami ricunchi, Davidca formachun munajuj ali alpagushnami carca. Paica Jehovapa consejocunapimi pensarin carca. Paipa yuyaicunata, shungu ucupi munaicunata Jehová Dios cambiachunmi munarca. Shinllita consejajpipashmi Davidca Jehová  Dios paita cambiachun munashcataca ricuchirca (2 Samuel 12:1-13). Shinaca ¿imashinata rey Davidpa ali ejemplota catishpa humilde cashcatapash, cazungapaj munashcatapash ricuchishun? Tapuripashunchi: “Bibliata liijushpaca ¿Jehovapa yuyaicunapi pensarishpa, paipa yuyaicuna ñucata cambiachun saquinichu? ¿Ashtahuan mejoraita ushanichu?” nishpa (Salmo 1:2, 3).

12, 13. Alpa mangagutashna aliguta formangapaca ¿imashinata Jehová Diosca paipa espíritu santotapash, congregaciondapash utilizan?

¹² Jehová Diospa espíritu santoca ¿imashinata ayudan? Espíritu santoca Jesuspa ejemplota catichun, granota fucuchinshna ali cualidadcunata charichunmi ayudan (Gálatas 5:22, 23). Granota fucuchinshna ayudajpimi juyaita ricuchi ushanchi. Jehová Diosta juyaimandami, ñucapa ali cachunmi mandajun yashpa pai ñucanchita cambiachun saquishpa cazungapaj munanchi. Ashtahuangarin, Jehovapa espíritu santomi ñucanchitaca cai nali mundopa munaicunata ama catichun ayudan (Efesios 2:2). Apóstol Pablota yaripashun. Pai joven cashpaca judiocunaman yachachijcunapa munaicunatami ruran carca. Shinapash espíritu santomi paitaca cambiachun ayudarca. Chaimandami paica nirca, “[‘Taita Dios’, NM] shinllipacha ushaita carajpimi, tucuita rurai ushani” nishpa (Filipenses 4:13). Ñucanchicunapashmi Jehovataca espíritu santota cuhuai nishpa tucui shunguhuan mañana canchi. Shina mañajpica paica uyangami (Salmo 10:17).

¹³ Ñucanchita shuj alpa mangagutashna aliguta formangapaca ¿imashinata Jehová Diosca congregaciondapash, ancianocunatapash utilizan? Shuj ejemplota ricupashun. Ñucanchicuna imapipash ashata nitijai callarijujpica ayudangapaj munashpami ancianocunaca shuj consejota cun. Shinapash na paicuna yuyashcatachu consejan (Gálatas 6:1). Paicunaca humildemi can. Aliguta intindishpa, ali yachaihuan consejangapaca pundapica Jehovatami mañan. Chai jipaca Bibliapipash, publicaciongunapipashmi informacionda mascan.  Shinaca ñucanchi ropamanda o shuj cosascunamanda ancianocuna juyaihuan consejajpica Jehová Dios ñucanchita juyashpa consejajujtami yarina canchi. Shina yarishpami Jehová Dios aliguta formajuj alpa mangagushna cashun. Chaita ruranaca ñucanchipallatami ali canga.

14. Jehová Diosca barrotashnami ñucanchitaca ima munashcata rurai ushan. Shinapash ¿imata ñucanchillata rurachunda saquishca?

¹⁴ Jehová Dios ñucanchita shuj alpa mangagutashna formajujta intindishpaca ñucanchi huauquipanicunahuanga alimi llevarishun. Villachishca gentecunamandapash, Bibliamanda yachajujcunamandapash na imacunatapash pensanajushunllu. Alpa mangata ruraj runacunaca barrota formajushpallatami barro limpio cachunga jupacunata, uchilla rumicunatapash asha asha limpian. Jehová Diospash cambiangapaj munajcunataca ayudanmi. Cambiachunga na pitapash obliganllu. Pai imata mandajushcata asha asha yachachishpami gentecunallata cambiangapaj munashcata o na munashcata agllachun saquin.

15, 16. Bibliamanda yachajujcunaca ¿imashinata shuj alpa mangagutashna Jehová Dios formachun munashcata ricuchin? Shuj ejemplota churapai.

¹⁵ Cunanga Australia llactapi causajuj Tessie shuti panigupa ejemplota ricupashun. Bibliata estudiai callarishpaca alimi Bibliataca intindirca. Shinapash paipa causaipica na cambiajurcachu, tandanajuicunamanbash na rinllu carca. Chaimandami paiman Bibliata yachachijca Jehovata mañashpa Bibliata ñana yachachishpa catingapaj decidirirca. Chaita na yachashpapash Tessieca Bibliata estudiajushpami paita yachachijmanga imamanda na cambiajushcata villarca. Ashtahuangarin nircami, ñucaca pandarijushcanimi. Culquimanda pugllanatami gushtani. Shinapash ñana pugllagrinichu nishpa.

¹⁶ Shinami Tessieca punda amigocuna burlarijujpipash tandanajuicunaman ri callarirca, cambiai callarircapash. Jipamangarin bautizarishpami, ishcai uchilla huahuacunata charishpapash precursora regular tucurca. Bibliamanda yachajujcuna cambiai callarijpica, Jehová Diospash paicunapaman quimirishpami shuj valishca alpa mangagutashna aliguta formai callarin.

17. a) Alpa mangagutashna Jehová Dios quiquinda formajushcamandaca ¿imamandata alicachipangui? b) ¿Ima tapuicunatata shamuj temapica yachajupashun?

¹⁷ Cunan punllacunapipashmi huaquin llactacunapica paicunapa maquihuanbacha rurashpa juyailla alpa mangagucunata ruraj runacuna tian. Jehová Diospash ñucanchita pacienciahuan shuj alpa mangagutashna formangapami consejocunata cun. Consejashca jipaca ñucanchi imata rurajtami ricujun (Salmo 32:8, liingui). Shinaca ¿Jehová Dios cada unomanda preocuparijujtaca intindinchichu? ¿Ñucanchita shuj alpa mangagutashna aliguta formajujtaca cuenta japinchichu? Jehová Dios formajuj alpa mangagushna cashpa catichunga ¿imata ñucanchitaca ayudanga? Na formachun munajuj alpa mangashna cangapaca ¿imacunamandata cuidarina canchi? ¿Imashinata taitamamacunaca shuj alpa mangagutashna paicunapa huahuacunata aliguta formai ushan? Chai tapuicunataca shamuj temapimi yachajupashun.