1, 2. Paipa sirvijcuna miranamanda parlashpaca ¿imatata Jehová Diosca nirca?

CUNAN punllacunapica testigo de Jehovacunami aliguta organizarishpa Jehovata juyan, Jehovata sirvingapaj munan. Paicunaca pandarinmi. Shinapash Jehová Diosca paicunata ñaupaman pushashpami paipa espíritu santohuan bendiciajun. Ricupashun imashina Jehová Dios bendiciajujta.

² Huata 1914​pica, huaquin gentecunallami Jehovata adoran carca. Shinapash villachinata Jehová Dios bendiciajushcamandami ashtaca millón gentecuna Bibliata yachajushpa testigo de Jehovacuna tucushca. Shinami Bibliapi cai shimicuna pactarishca: ‘Shuj uchillagumandaca, huaranga huarangashnami tucunga. Ashtahuan ashallagumandaca, ninan shinlli llactashnami tucunga. Ñucallatami caicuna chashna tucuna punllacunataca ucha pactachisha’ nishpa (Isaías 60:22). Chai shimicuna cunanbi pactarijujtaca tucuicunami ricushcanchi. Jehová Diosta sirvijcunaca shuj jatun llactashna tucushpami 8 millón yali gentecuna can. Jehovata sirvij llactaca huaquin llactacunatapash yalimi can.

3. Jehovata sirvijcunaca ¿imashinata shujcunata juyashcata ricuchishca?

 ³ Cai tucurimui punllacunapica Jehová Diosmi paita sirvijcunataca ashtahuan juyarichun ayudashca. Bibliapica ninmi, ‘Taita Diosca ninandapachami juyan’ nishpa. Chaimandami Jehová Diosca paita sirvijcunapash juyarichun munan (1 Juan 4:8). Jesusca paipa catijcunataca juyarinami canguichi nishpami mandarca. Ashtahuangarin nircami: “Shina juyarishpa causanajujta ricushpami, ñucapaj yachajujcuna cashcataca tucuicuna rijsinajunga” nishpa (Juan 13:34, 35). Cunan punllacunapipashmi Jehovata sirvijcunaca guerracuna tiajpipash shujcunata juyashcata ricuchishca. Shuj ejemplota ricupashun. Segunda Guerra Mundialpica casi 55 millón gentecunami huañurca. Shinapash Testigocunaca shujtallapash na huañuchircachu (Miqueas 4:1, 3, liingui). Shinami pitapash huañuchishcanguimi nishpaca ‘pipash na juchachita’ ushan (Hechos 20:26).

4. ¿Ima jarcai tiajpipashta Jehovata sirvijcunaca mirashca?

⁴ Cunan punllacunapica ‘cai pachapi mandajuj’ Diablo jarcangapaj munajpipash Jehovata sirvijcunaca mirashpami catishca (2 Corintios 4:4). Diabloca ashtaca podertami charin. Paimi cai mundopi politicocunatapash, radiopi, televisionbi ima nishcacunatapash controlashpa villachinata jarcangapaj munan. Shinapash na ushashcachu. Paipa mandana “punllacuna tucurijujta yachashpami” Diabloca ñucanchicuna Jehová Diosta sirvinata saquichun munan (Apocalipsis 12:12).

5. ¿Imamandata huaquinbica shujcuna ñucanchitaca llaquichin? (Callari fotota ricupangui).

⁵ Jehovata sirvijcunaca Jehovatapash, shujcunatapash juyana minishtirishca cashcataca alimi yachanchi. Jesusca nircami: ‘Canba Taita Diostaca, tucui shunguhuan, tucui almahuan, tucui yuyaihuan juyangui. Cai mandashca shimimi, tucuimanda punda ashtahuan yali ali. Chaipa cati mandashca shimipash, chashnallatami nijun: “Canba cumba runagutaca, imashna can juyarinshnallata juyangui” nijunmi’ nishpa (Mateo 22:35-39). Shinapash Bibliapi nishca shinaca, tucuicunami Adanba culpamanda juchayucuna nacirinchi (Romanos 5:12, 19, liingui). Chaimandami huaquinbica shuj huauqui imatapash nishpa o imatapash rurashpa ñucanchitaca llaquichin. Shina pasajpica ¿imatata rurashun? ¿Jehovataca tucui shunguhuan juyashpa catishunllu? ¿Jehovamandapash paipa organizacionmandapash na caruyashpa catishunllu? (“¿Imatata nisha nin?” nishca recuadrota ricupangui). Bibliapica Jehovata huaquin sirvijcuna imatapash nishpa o imatapash rurashpa shujcunata llaquichishcatami parlan. Shinaca paicunapa ejemplomanda imata yachajui ushashcata ricupashun.

6. ¿Imapita Elica pandarirca?

⁶ Cunanga Israel llactamanda Elí sumo sacerdotepi pensaripashun. Paipa ishcai churicunaca Jehová imata mandashcataca na cazunajurcachu. Bibliapi nishca shinaca, Elipa churicunaca nalicunami carca, Jehovatapash na respetanllu carca (1 Samuel 2:12). Elica paipa churicuna nalicunata ruranajujtaca alimi yacharca. Ali yachashca jahuapash na imatapash rurashpa yangata saquishpami pandarirca. Chaimandami jipamanga, Elitapash paipa ishcai churicunatapash Jehová Diosca llaquichirca. Ashtahuangarin, Elipa familiamanda shujllapash sumo sacerdote cachunga na saquircachu (1 Samuel 3:10-14). Shinaca pensaripashunchi. Elipa punllacunapi causanajushcanchiman. Elipa churicuna nalita ruranajujpipash na imatapash rurashpa yangata saquijta ricunajushcanchiman. ¿Imatashi ruranchiman?  ¿Ñucanchi fe chiriyachun saquishpachu Jehovapi ñana confiashpa Jehovamanda caruyanchiman?

7. a) Davidca ¿ima jatun juchatata rurarca? b) Shinapash ¿imatata Jehová Diosca rurarca?

⁷ Cunanga rey Davidpi pensarishun. Paica ali alimi carca. Chaimandami Jehová Diosca ashtacata paitaca juyarca (1 Samuel 13:13, 14; Hechos 13:22). Shinapash Davidca jatun juchacunapimi urmarca. Shuj punllaca, paipa soldado Urías shutimi contracunahuan macanajujurca. Chaicamanmi Davidca Uriaspa huarmihuan faltapi urmarca. Jipamanga, Uriaspa huarmi vijsayu cajta yachashpami Davidca, chai juchata pipash ama yachachun Uriastaca paipa huasiman tigrachun cayachun cacharca. Davidca Urías huasiman tigrashpa paipa huarmihuan puñuchunmi munarca. Shina pasajpica tucuicunami yanman carca, huahuaca Uriaspa cashcata. Shinapash Uriasca paipa huasiman tigrangapaca nimamanda na munarcachu. Chaimandami Davidca Urías macanajungapaj rishpa chaipi huañuchun arreglocunata rurarca. Cashna jatun juchapi urmashcamandami Davidpash paipa familiapash ashtaca llaquicunata charirca (2 Samuel 12:9-12). Shinapash David alita rurangapaj munajushcata ricushpami Jehová Diosca llaquishpa perdonarca (1 Reyes 9:4). Davidpa punllacunapi causanajushpa, David imata rurashcata yachashpaca ¿imashinashi sintirinchiman carca? ¿Jehovata sirvinata saquinchimanllu carca?

8. a) Apóstol Pedroca ¿imatata na pactachi usharca? b) Pedro pandarijpipash ¿imamandata Jehová Diosca Pedroman responsabilidadcunata cushpa catirca?

⁸ Apóstol Pedrotapash yaripashun. Jesusca paipa apóstol cachunmi Pedrotaca agllarca. Shinapash Pedroca huaquin nali cosascunatami rurarca nircapash. Shuj punllaca Jesustaca  nircami, shujcuna canda saquijpipash ñucaca nunca na candaca saquishachu nishpa (Marcos 14:27-31, 50). Shinapash, Jesusta prezo japijpica tucuilla apostolcunami Jesustalla saquirca. Jipamangarin, quimsa viajecamanmi Pedroca Jesustaca na rijsinichu nishpa negarirca (Marcos 14:53, 54, 66-72). Chashna nalita rurashcamandaca Pedroca ashtacatami llaquirirca. Chaimandami Jehová Diosca perdonashpa shuj responsabilidadcunatapash cushpa catirca. Ñucanchicuna chai punllacunapi Jesuspa catijcuna cashpa, Pedro imata rurashcata yachashpaca ¿Jehovapi confiashpa catinchimanllu carca?

9. ¿Imamandata quiquinga Jehová Dios siempre ima ali cajta ricushpa alita ruranataca tucui shunguhuan confiapangui?

⁹ ¿Imatata chai quimsa ejemplocunamandaca yachajunchi? Jehovata huaquin sirvijcunaca nali cosascunata rurashpami shujcunata ninanda llaquichishca. Cunanbi shinallata pasajpica ¿imatata rurashun? ¿Tandanajuicunaman rinatapash saquishpa, Jehovamandapash, paipa organizacionmandapash caruyashunllu? ¿O juchata rurajta Jehová Dios llaquishpa arripintirichun shuyajujtachu yarishun? Cutin juchamanda na arripintirijpica ¿imatata rurashun? ¿Jehová Dios ali yachajta, ima hora ali cajta ricushpa chai llaquita arreglanataca confianchichu? Pipash juchata rurashpa na arripintirijpica Jehová Diosca congregacionmanda llujchingallami. Shinapash ñucanchicunaca, Jehová Dios siempre ima ali cajta ricushpa alita ruranataca tucui shunguhuanami confiana canchi.

10. Judas Iscariotepash, apóstol Pedropash pandarijpica ¿imatata Jesusca ali yacharca?

¹⁰ Bibliapica shujcuna nalita rurajpipash Jehová Diosmandapash, paipa llactamandapash nunca na caruyashca gentecunapa ali ejemplocunamandami parlan. Jesuspa ali ejemplota ricupashun. Paipa apostolcunata agllagrijushpaca Jesusca tuta enteromi Jehovataca ayudahuangui nishpa mañarca. Shinapash jipamanga paipa apóstol Judas Iscariotemi paitaca traicionarca. Apóstol Pedropash Jesustaca na rijsinichu nishpami negarca (Lucas 6:12-16; 22:2-6, 31, 32). Paicuna shina llaquichijpipash Jesusca alimi yacharca, Jehová Diospash paipa chaishuj catijcunapash na culpata charishcata. Chaimandami Jesusca Jehovamanda na caruyashpa tucuipi cazushpa sirvishpa catirca. Chaita ricushpami Jehová Diosca huañushcacunamanda causachishpa, jipamangarin jahua cielopi Rey cachun Jesustaca churarca (Mateo 28:7, 18-20).

11. Cunan punllacunapi Jehovata sirvijcunamandaca ¿imatata Bibliaca nirca?

¹¹ Jesuspa ejemplopi yachajushca shinaca, Jehovamandapash paipa organizacionmandapash na caruyanachu canchi. Shinapash ¿imamandata na caruyana canchi? Pensaripai. Cai tucurimui punllacunapica Jehová Diosmi ñucanchitaca ñaupaman pushajun. Paimi mundo enteropi villachichun ayudajun. Ñucanchicunallami chaitaca rurai ushanchi. Ashtahuangarin, Jehová Dios yachachishcamandami tucuilla huauquipanicuna shujllashna tandanajushpa, cushilla caita ushanchi. Bibliapica nishcami, Jehovata sirvijcunaca ‘tucui shunguhuanmi ninanda cushijunga’ nishpa (Isaías 65:14).

12. Shujcuna pandarijta ricushpaca ¿imatata pensashun, imatata rurashun?

 ¹² Ñucanchicunaca Jehová Dios ñaupaman pushajushcamanda, ashtaca ali cosascunata rurachun ayudashcamandami cushilla canchi. Cutin Jehovata na sirvijcunaca cushilla causaitaca na ushanllu. Shamuj punllacunapi ali causai tiana esperanzatapash na charinllu. Shinaca congregacionbi shujcuna pandarijta ricushpaca ¿imatata pensashun, imatata rurashun? Shujcuna pandarijta ricushpaca Jehovamandapash paipa organizacionmandapash ama caruyashunchichu. Chaita ruranaca nalichu canman. Ali pensashpa ali yuyaita charishcataca na ricuchinajushunllu. Jehovamanda caruyanapa randica paiman ashtahuan quimirishpa, pai ñucanchita ñaupaman pushachun saquishunchi. Shinapash ¿imashinata chaitaca rurai ushanchi? Ricupashun.

13, 14. a) ¿Imamandata shujcuna pandarijpipash na ñapash fiñarina capanchi? b) Jehovapa ¿ima shimicunatata yarina capanchi?

¹³ Shuj huauqui imatapash nishpa o imatapash rurashpa llaquichijpica ¿imatata rurashun? Bibliaca ninmi, na ñapash fiñarinachu canguichi nishpa (Eclesiastés 7:9). Juchayucuna nacirishcamandaca tucuicunami pandarinchi. Chaimandami na ñapash fiñarina canchi, shujcuna imatapash nishpa o imatapash rurashpa huaquinbi llaquichinataca na cunganachu canchi. Shujcuna imapi pandarishcatacarin na yarijunallachu canchi. Chaicunata yarijushpaca Jehovata cushijushpa sirvitaca tal vez ñana ushashunllu. Ashtahuangarin ñucanchi fepash chiriyajpichari Jehovapa organizacionmandapash caruyanchiman. Caruyashpaca Jehovata sirvitapash, shamuj punllacunapi shuj paraíso Alpagupi causaitapash na ushashunllu.

¹⁴ Shinaca, shujcuna llaquichijpipash Jehovata cushilla sirvishpa catingapaca Jehovapa cai shimicunatami yarina canchi: ‘Ñucami jahua pachatapash, cai pachatapash mushujta rurasha. Punda ima tucushcacunaca cungashcami canga. Yuyaimanllapash na shamungachu’ nishpa (Isaías 65:17; 2 Pedro 3:13). Chai bendiciondaca paimanda na caruyashpa catijcunamanmi Jehová Diosca caranga.

15. Jesús nishca shinaca, shujcuna pandarijpica ¿imatata rurana capanchi?

¹⁵ Cunanbica nara paraíso Alpagupi causanajunchichu. Shinapash, pipash ñucanchita llaquichijpica Jehová Dios imata rurachun munashcatami yarina canchi. Jesusca nircami: ‘Cangunata nalita rurajcunata canguna perdonajpica, jahua pachapi tiajuj cangunapa Taitami cangunapa juchacunataca anchuchinga. Shinallata cangunata imatapash nalita rurajcunata na perdonajpica, jahua pachapi tiajuj cangunapa Taitapash canguna rurashca juchacunataca na anchuchingachu’ nishpa. Ashtahuangarin apóstol Pedroca Jesustaca tapurcami, pipash llaquichijpi 7 viajecaman ‘perdonanaca ¿alichu can?’ nishpa. Shina tapujpimi Jesusca nirca: ‘[77] viajetapash yalishpami perdonana’ cangui nishpa. Jesusca shujcuna pandarijpi siempre perdonana munaita charichunmi yachachirca (Mateo 6:14, 15; 18:21, 22).

16. Joseca ¿ima ali ejemplotata saquishca?

¹⁶ Josepa ejemplopash shujcuna llaquichijpi  imata ruranatami yachachin. Shinaca, Josepa causaimanda ashaguta yaripashun. Josepa taitaca Jacobmi carca. Jacobca ishcai churicunatallami paipa huarmi Raquelhuanga charirca. Chai ishcai churicunaca José, paipa jipa huauqui Benjaminmi carca. Jacobca chaishuj 10 churicunata charishpapash Josetami ashtahuan juyan carca. Chaimandami chaishuj 10 huauquicunaca Joseta ninanda na ricunayachishpa esclavotashna jatushpa cacharca. Randijcunaca Josetaca Egipto llactamanmi aparca. Shinami tauca huatacuna jipaca, ashtaca ali cosascunata José rurashcata Egiptomanda reyca uyarca. Chaimandami Egiptomanda reyca paipa cati jatun mandaj tucuchun Josetaca churarca. Ashtahuan jipa huatacunamanga, paicunapa llactapi micuna tucurijpimi Josepa huauquicunaca micunata randingapaj Egipto llactaman rirca. Joseta ricushpaca paicunapa huauqui cajtaca na rijsircachu. Shinapash Joseca paicunata rijsircami. Paicuna nali tratashca cajpipash paicunataca na llaquichircachu. Chaipa randica, ciertopacha cambiashcata o na cambiashcata ricungapami munarca. Paicuna ciertopacha cambiashcata ricushpami, ñucaca cangunapa huauqui Josemi cani nishpa villarca. Jipa huatacunamangarin cashna nishpami paicunataca cushichirca: ‘Na manllanachu canguichi. Ñucami cangunamanbash, cangunapa huahuacunamanbash, granocunata carashpa charisha’ nishpa (Génesis 50:21).

17. Shujcuna pandarijpica ¿imatata quiquinga ruragripangui?

¹⁷ Tucuicuna juchayu nacirishpa pandarishcamandaca ñucanchipashmi shujcunata llaquichinchi. Shinapash pitapash llaquichishcata cuenta japishpaca Bibliapi consejota catishpa perdonahuai nishunchi. Paicunahuan tranquilo, ali canata mascashunchi (Mateo 5:23, 24, liingui). ¿Nachu tucuicunallata shujcuna perdonajpica ali sintirinchi? Shinaca ñucanchicunapash shujcunata perdonanami canchi. Colosenses 3:13​pica cai ali consejotami cun: “Caishujhuan chaishujhuan cazurishpa, shinallata caishujhuan chaishujhuan llaquichirishca cashpapash, perdonarishpami causana canguichi. [‘Jehová’, NM] cangunapa juchata perdonashcashnallatami, cangunapash perdonarina canguichi” nishpa. Ñucanchi huauquipanicunata ciertopacha juyashpaca, yalishca punllacunapi ñucanchita imashina llaquichishcata yarishpa fiñarijunaca nalichu canman (1 Corintios 13:5). Ñucanchita llaquichijcunata perdonajpica Jehová Diospashmi ñucanchita perdonanga. Chaimandami Jehová Dios ñucanchita llaquishpa juyashcashnallata shujcunatapash llaquishpa juyana canchi (Salmo 103:12-14, liingui).