1, 2. a) ¿Imashinata Jehová Diosca ñucanchita cushichin? b) Jehová Diosca ¿imatata Bibliapica nin?

SHUJ joven huauquica, 1 Corintios 7:28pimi pensarijurca. Chai textopica nijunmi, ‘cazarashcacunaca cai causaipi llaquicunata apanajungami’ nishpa. Shina pensarijushpami cazado anciano huauquitaca tapurca: “Cazarashcacunaca ¿ima llaquicunatata charin? Ñucapash cazarashpaca ¿imashinata chai llaquicunataca mishai ushani?” nishpa. Shina nijpimi anciano huauquica nirca, llaquicuna tiangami nishca jipapash, apóstol Pabloca nircami, ‘tucuipi cushichij Taita Diosmi jatun llaquicuna japijpipash cushichin’ nishpa (2 Cor. 1:3, 4).

² Ñucanchicuna llaquicunapi cajpica, juyashpami Jehová Diosca cushichin. Yaripai. ¿Nachu Jehová Diosca cutin cutin paipa Shimi Bibliahuan quiquindaca, imata ruranata ricuchishpa ayudashca? Jehová Diosca imashinami punda tiempocunapi paita sirvijcunata ali causachun munarca,  shinallatami ñucanchicunapash ali causachun munan (Jeremías 29:11, 12, liingui).

3. ¿Ima tapuicunatata cai temapica yachajupashun?

³ Llaquicuna imamanda tiashcata intindishpami, llaquicunata aguantai ushanchi. Chaimandami, cazarashca causaipi, familiapi imamanda llaquicuna tiajta yachashpaca, chai llaquicunata aguantai ushashun. Shinaca, apóstol Pablo nishca shinaca ¿imamandata familiacuna, ‘cazarashcacunaca llaquicunata’ charin? ¿Bibliamanda maijan ejemplocuna, cunan punllacunapi pipa ejemplocunata ñucanchitaca cushichishpa ayudan? Chai tapuicunata yachashpami, ñaupaman catita ushashun.

4, 5. ¿Imacunamandata ‘cazarashcacunaca llaquicunata charin’?

⁴ Adanda Evata cazarachijushpaca, Jehová Diosca nircami: ‘Jarica, paipa taitata, paipa mamata saquishpami, paipa huarmihuan tandanajushpa, shujlla aicha tucushpa causanga’ nishpa (Gén. 2:24). Shinapash, juchayucuna caimandami cazarajpica huaquin llaquicuna ricurin (Rom. 3:23). Nara cazarashpaca, jaripash huarmipash taitamamacunatami cazun. Shinapash cazarashpaca, jarimi Jehová Dios mandashca shina, paipa huarmipa uma cuenda tucun (1 Cor. 11:3). Huarmicunapapash, taitamamata cazunapa randi cusata cazunaca, huaquinbica shinllimi ricurin. Huaquinbicarin, jaripa o huarmipa familiacunamandami, chairalla cazarashcacunaca problemacunata charin.

⁵ Huaquinbicarin, huarmi vijsayu quedajpimi shuj problemacunapash ricurin. Cusahuarmicunaca ishcandillata cushijushpapash, pensari callarinmi ¿nacha imapash pasanga? ¿Huahuaca sanocha llujshinga? ¿Culquica pactangacha? nishpa. Huahua nacirijpicarin, huahuata ashtahuan llaquishpami mamaca huahuahuan ashtahuan cangapaj munanga. Taitapash familiata mantiningapami ashtahuan trabajana tucunga. Shinami cusahuarmicunaca ñana pundashna paicunalla ashtaca tiempota yali ushanga.

6-8. Huahuata charingapaj munashpapash huahuata na chari ushaj cusahuarmicunaca ¿imashinata sintirin?

⁶ Huaquin cusahuarmicunaca shuj llaquitapashmi charin. Paicunaca huahuacunata charingapaj munashpapash na ushanllu. Chaimandami huaquin huarmicunaca, na vijsayu quedai ushashpa yapata llaquirin (Prov. 13:12). Bibliata escribishca punllacunapica, huahuata na chari ushanaca shuj jatun pingaimi carca. Jacobpa huarmi Raquelta yaripashun. Paica huahuata na chari ushashpami, paipa ñaña huahuacunata charijpica, ninanda llaquirirca (Gén. 30:1, 2). Huaquin llactacunapi gentecunaca ashtaca huahuacunatami charin. Chai llactacunapi sirvinajuj misionerocunataca, imamandata huahuacunata na charinguichi nishpami tapun. Misionerocuna aliguman parlashpa contestajpipash gentecunaca ninmi: “Cangunapash huahuacunata charichunga, Taita Diosta mañanajushunmi” nishpa.

⁷ Inglaterra llactamanda shuj paniguca ninandami shuj huahuaguta charingapaj munan carca. Huahuacunata ñana chari ushana edadman chayashpacarin,  cai mundopica ñana huahuata chari ushashachu yashpami ninandapacha llaquirirca. Chaimandami chai panigupash, paipa cusapash shuj huahuaguta viñachingapaj adoptarca. Shinapash chai paniguca nircami: “Shuj huahuaguta viñachingapaj adoptashpapash, nunca na shuj huahuaguta ungurcanichu yashpami, pipash huañushcajpishna llaquiyarcani” nishpa.

⁸ Bibliapica ninmi: ‘Huarmica, huahuacunata charishpami quishpiringa’ nishpa (1 Tim. 2:15). Shinaca, ¿huahuacunata charimanda para siempre causai ushanatachu nijun? Na. Huahuata charij huarmicunaca huahuata cuidashpa, huasipi shuj cosascunatapash rurashpa ocupado caimandami cuentocunataca na caiman chaiman parlashpa purin, shujcunapa causaipipash na satirin (1 Tim. 5:13). Shinapash, cazarashcacunapash, familiacunapashmi problemacunata charin.

9. Huaquin cusahuarmicunaca ¿ima jatun llaquitata charin?

⁹ Cusa o huarmi huañujpi causanapash jatun llaquimi can. Huaquin cusahuarmicunaca, Ninan Manllanai Llaqui Punllacuna nara chayamujpillata huarmi o cusa huañunataca tal vez na pensashcangachu. Testigocunaca, Jesús nishca shinami huañushcacuna causarinataca, tucui shunguhuan crinchi. Viudocunaca huañushcacuna causarinata crishpami alillata sintirin (Juan 5:28, 29). Bibliapica, huañushcacunata causachishami nishpami Jehová Diosca gentecunata cushichin. Cunanga, Jehová Diosta sirvijcuna Jehová Dios cushichijpi, imashina alillata sintirishpa ñaupaman catishcata ricupashun.

10. Anaca ¿imamandata cushilla sintirita usharca? (Callari dibujota ricupangui).

¹⁰ Anaca Elqanapa huarmimi carca. Anataca ashtacatami Elqanaca juyan carca. Anaca huahuata na chari ushashpami, ninanda llaquirijurca. Elqanaca Peniná shuti huarmitapashmi charirca. Paica huahuacunata chari ushanmi carca (1 Samuel 1:4-7, liingui). Cada huatami Peninaca, huahuacunata na chari ushanguichu nishpa Anataca burlarin carca. Chaimandami Anaca ninanda llaquirin carca. Shinapash ¿imashinata Anaca cushijurca? Bibliapi nishca shinaca, paipa llaquicunata Jehová Diosman parlashpami ‘unaita mañajurcalla’. Anaca Jehová Dios paita uyachun munarcami. Shinapash, mañashca jipaca, Anaca “na ashtahuan llaquilla carcachu” (1 Sam. 1:12, 17, 18). Jehová Dios shuj huahuaguta cunata, o imashinapash ayudanataca tucui shunguhuanmi Anaca crirca.

11. ¿Imashinata Jehová Diosta mañanaca cushilla sintirichun ayudan?

¹¹ Juchayucuna caimanda, Diablo mandajuj mundopi causajuimandaca llaquicunata charishpa catishunmi (1 Juan 5:19). Shinapash ‘tucuipi cushichij Taita Diosca’  ayudangami. Llaqui apanajushpa tucui shunguhuan mañajpica, imashinami Anata ayudarca, shinallatami Jehová Diosca ñucanchicunatapash ayudanga. Anapa ejemplota catishpami, ñucanchi problemacunata Jehová Diosman tucui tucuita villashpa, ayudahuai nishpa rogana capanchi (Filip. 4:6, 7).

12. ¿Imashinata Anaca cushilla sintiri usharca?

¹² Huahuata na chari ushaimanda, o pipash huañujpi llaquilla cashpapash cushijuita tari ushapanchimi. Cunanga Ana shuti profeta mayorlla huarmiguta yaripashun. Paipa cusaca, cazarashcamanda 7 huatacuna jipallami huañurca. Bibliapica huahuacunata Ana charishcataca na imatapash ninllu. Anaca 84 huatacunata charishpapash, Jehová Diospa huasiman rinata na saquishpami ‘tutandi punllandi na micushpa, Diosta mañashpa causajurca’ (Luc. 2:37). Jehová Diosta adoraimandami Ana huarmiguca alillata sintirishpa cushijurca.

13. Familia na cushichijpipash ¿imashinata congregacionbi ali amigocunaca cushichita ushan?

¹³ Congregacionbi ali amigocunapashmi, ñucanchita cushichita ushan (Prov. 18:24). Paula panigupa ejemplota ricupashun. 5 huatagutalla charijpimi paipa mamaca congregacionda saquirca. Paica llaquillami carca. Shinapash, congregacionmanda Ann shuti precursora panigumi paitaca, llaquishpa, Jehová Diospa ñaupajpi ali ricurishpa catichunbash ayudarca. Paulaca ninmi: “Ann ñañaguca na ñuca familiachu carca. Shinapash, pai ñucamanda preocuparijpi, llaquijpimi Jehová Diosta sirvishpa cati usharcani” nishpa. Jipamanga, congregacionman paipa mama cutin tigrajpimi Paulaca, ninanda cushijurca. Annpash, Paulata Jehová Diosta sirvishpa catichun ayudai ushashcamandami ninanda cushijun.

14. ¿Imamandata shujcunata cushichinaca ñucanchipallata ali can?

¹⁴ Shujcunata juyashpa paicunapi preocuparishpaca, ñucanchi llaquicunataca  cunganchimi. Ashtaca panigucunaca, cazarashca cashpa o na cazarashca cashpapash, Jehová Diospa munaita rurashpa, ali villaicunata villachishpa paita ayudashpami cushijun. Huaquingunaca villachishpami imapash jambita ufianshna ali sintirin. Ñucanchi huauquipanicunamandapash, territoriopi gentecunamandapash preocuparishpami, congregacionbi huauquipanicuna shujllashna tandanajushca cachun ayudanchi (Filip. 2:4). Apóstol Pabloca, Tesalónica llactamanda huauquipanicunataca shuj “mama” cuendami cuidarca. Shinallata, shuj “taita” cuendami cushichirca (1 Tesalonicenses 2:7, 11, 12, liingui).

15. ¿Picunata huahuacunamanga Bibliata yachachina can?

¹⁵ Congregacionbi familiacunataca ¿imashinata ayudai ushapanchi? Huaquingunaca, asha tiempotalla congregacionbi cashpami, ñucanchitaca huahuacunaman Bibliata imashina yachachinata ayudahuai o Bibliamanda yachachipai nin. Bibliapica ninmi, taitamamacunami huahuacunataca yachachina can nishpa (Prov. 23:22; Efes. 6:1-4). Shujcuna ayudachun minishtishpa, paicunapa ayudata agradicishpapash, taitamamacunami huahuacunamanga yachachina can. Chaimandami taitamamacunaca huahuacunahuan cutin cutin parlana can.

16. Huahuaman Bibliata yachachipai nijpica ¿imacunatata siempre yarina capanchi?

¹⁶ Huahuaman Bibliata yachachipai nijpica, siempremi yarina capanchi, chai huahuapa taita o mamaca na canchichu. Huaquinbicarin, na Testigo taitamamacunapa huahuacunamanmi Bibliata yachachinchi. Shina cajpica, taitamamacuna huasipi cajpi o shuj Testigo cumbajpi yachachinami ali canman. Shinallata, chulunlla pushtucunapi yachachinatapash cuidarinami capanchi. Shinami shuj gentecunaca imapash nalicunataca na pensanga. Tiempohuangarin, tal vez taitamamacunallatami Jehová Dios mandashca shina, Bibliataca yachachinga.

17. ¿Imashinata huahuacunaca taitamamacunata cushichita ushan?

¹⁷ Jehová Diosta juyanata yachajushca jovengunaca, taitamamacunata respetashpa, culquiguhuan o imagucunapipash ayudashpami paicunataca cushichin. Shinallata, huahuacuna Jehová Diosta ali sirvinajujta ricushpami, taitamamacunaca cushijun. Set shuti runagupa churi Lamec shuti runaguta yaripashun. Paica, Jatun Manllanai Tamia nara tiashca punllacunapimi causarca. Paica Jehová Diostami adoran carca. Paica, paipa churi Noemanda parlashpami nirca: “Mandaj Dios cai alpata ninanda nalicachishcamanda, ñucanchi maquihuan alpapi imatapash rurashpa, ninan llaquita apanajujpimi, cai churiguca samachinga” nishpa. Chai shimicunaca Jehová Dios cai Alpata maldicinata saquishca punllacunapimi pactarirca (Gén. 5:29; 8:21). Cuna punllacunapica, Jehová Diosta ali adorangapaj munaj huahuacunaca ashtacatami paipa familiataca cushichita ushan. ¿Imashinata cushichita ushan? Llaquicunata aguantachun ayudashpa, Ninan Manllanai Llaqui punllacunamanda salvarichun ayudashpapash.

18. ¿Imamandata llaquicunata aguantai ushapanchi?

¹⁸ Cunan punllacunapica ashtaca millón gentecunami, Taita Diosta mañashpa, Bibliapi gentecunapa causaipi pensarishpa, shinallata Jehová Diosta sirvijcunahuan ali llevarishpa cushijuita tari ushashca (Salmo 145:18, 19, liingui). Jehová Diosllami ciertopacha cushijuita carai ushan. Chaita ali yachashpami, cunan punllacunapi o shamuj punllacunapi ima llaquicunata charishpapash aguantai ushashun.