ASHTACA huatacuna huashamanga, shuj chiri chiri ucupimi Dakota del Sur, Estados Unidos llactapica, shuj jirru pila yacu ladopi chirimanda chujchunajuj shayanajurcanchi. Shinaca, imamanda chaipi cashcata quiquinguna intindipachunga, ñuca causaimanda ashaguta parlapasha.

Ñucaca 7 de marzo de 1936 huatapimi nacirircani. Chuscupura huahuacunamandaca ultimomi carcani. Shuj uchilla haciendagupimi Dakota del Sur llactapi causarcanchi. Haciendapi trabajanataca ñuca familiaca alicachinmi carca. Shinapash na chai trabajochu ashtahuan importante carca. Ñuca taitamamacunaca 1934 huatapi bautizarishpami testigo de Jehovacuna tucushcarca. Chaimandami paicunapaca Jehová Diospa munaita rurana ashtahuan importante carca. Ñuca taitaca Clarence shutimi carca. Pundapica ñuca taita, jipamanga ñuca tío Alfredmi Conde nishca uchilla congregacionbica siervo de compañía nishca carca. Siervo de compañía nishcatami cunanbica coordinador del cuerpo de ancianos nin.

Ñuca familiaca testigo de Jehovacunapa tandanajuicunamanmi rin carca. Shinallata Bibliapi ali villaicunatami huasin huasin villachin carca. Ñuca taitamamacuna yachachijpi, paicunapa ali ejemplota ricushpami, Jehová Diosta juyarcanchi. Ñuca pani Dorothypash, ñucapash 6 huatacunata charishpami villachi callarircanchi. Shinallata 1943 huatapimi, Escuela del Ministerio Teocrático nishca tiai callarijpi, chai Escuelapi anotarircanchi.

Jatun tandanajuicunataca ashtacatami alicachin carcanchi. 1949 huatapica, Sioux Falls-Dakota del Sur nishca llactapimi shuj jatun tandanajui tiarca. Chaipica Grant Suiter shuti huauquimi “Ñallapachami cai mundopi nali causaica tucuringa” nishca discursota curca. Chai discursopica, Jehová Diosman mingarishcacunaca ali villaicunata villachingapami causana can nishpami animarca. Chai  jipami Jehová Diosman mingarishpa 12 de noviembre de 1949 huatapica shuj jatun tandanajuipi bautizarircani. Chaimandami imashina callaripi nircani, ñucaca quimsapuracunahuan chai chiri chiri ucupi shayajurcani. Ñucanchica shuj jirru pila yacupimi bautizarigrinajurcanchi.

Jipamanga precursor cangapami munarcani. Chaimandami 15 huatacunatalla charishpa 1 de enero de 1952 huatapica precursor tucurcani. Bibliapica ninmi: “Alipacha yachajushca runacunahuan tandanajuj runaca, alipacha yachajushcami canga” nishpa (Proverbios 13:20). Alipacha yachajushca familiatami charircani. Chaimandami paicunapash ñuca precursor cachun apoyahuarca. Ñuca tioca Julius shutimi carca. Paihuan villachinatami alicachin carcani. Paica 60 huatacunatami charirca. Na chai edadtallata charishpapash ishcandi rishpa villachinatami gushtan carcanchi. Ashtaca ali cosascunatami paimandapash, paipa experienciamandapash yachajurcani. Jipamanga, ñuca pani Dorothypashmi precursora tucurca.

Ñuca uchilla cajpica, ñuca taitamamacunaca superintendente de circuito huauquicunatapash, paicunapa huarmicunatapashmi huasipi quedachun invitan carca. Jesse Cantwell paipa huarmipash ashtacatami ñucapi preocuparishpa animahuarca. Ladolla congregaciongunata visitanajushpaca, huaquinbica paicunahuan villachingapaj richunmi invitan carca. Paicunahuan canataca alicachinmi carcani. Chaimandami paicunapa ejemplota catishpa Jehová Diosta sirvinapi ocupado cashpa, precursor cangapaj munarcani.

Jipamanga Bud Miller shuti huauquimi superintendente de circuito carca. Paipa huarmica Joan shutimi carca. Paicuna congregacionda visitajuj tiempopica 18 huatacunatami charircani. Chai punllacunapica, picuna cuartelman rinata ricuj oficinamanmi rina carcani. Chai oficinapi trabajajcunaca, cuartelman richunmi munarca. Shinapash ñucaca yarcanimi, cuartelman rishpaca Jesús mandashcata na cazujuimanllu nishpa (Juan 15:19). Ashtahuangarin, ali villaicunata villachingapami munarcani. Chaimandami cuartelman ama ringapaca, testigo de Jehovacunapa villachijmi cani nishpa chai oficinapi parlagringapaj munarcani.

Huauqui Miller chai oficinaman cumbasha nijpica ashtacatami cushijurcani. Huauqui Millerca shuj gentecunahuan parlanataca na manllanllu carca. Ashtahuangarin Bibliapi imata nijtaca alimi yacharca. Pai cumbajpimi shinlli tucurcani. Shinami 1954 huatapica Testigo de Jehovacunapa villachij cashcamanda,  cuartelman rinataca na obligai ushahuarca. Chaimi ñucaca Jehovata ashtahuan sirvingapaj libre carcani.

Jipamanga Betelpi sirvichunmi invitahuarca. Ñucaca Nueva York llactapa Hacienda Watchtower nishcapimi quimsa huatacunata sirvijurcani. “Alipacha yachajushcacunahuan” igual sirvijuimandami ashtaca ali experienciacunata charircani.

Hacienda Watchtowerpimi WBBR nishca radio emisora tiarca. Testigo de Jehovacunami chai emisorataca 1924 huatamanda 1957 huatacaman ocuparca. Haciendapica 15 ó 20 betelitacunami sirvin carcanchi. Ashtacacunaca asha experienciatalla charij jovengunami carcanchi. Shinapash ñucanchipurapica Eldon Woodworth shuti mayorlla huauquimi trabajajurca. Paica ungidomi carca. Paica shuj taita cuendami carca. Tucuicunamanmi ashtaca ali cosascunata yachachirca. Imapash problemata ñucanchicuna charijpica, Woodworth huauquica siempremi nin carca: “Juchayucuna cajpipash Jehová Diosca ashtaca ali cosascunatami rurashca” nishpa.

Frederick Franz huauquipashmi ñucanchihuan carca. Paipashmi ñucanchitaca ashtacata ayudarca. Paica ali yachajushca huauquimi carca. Biblia imata nijtapash alimi yachan carca. Cada unomandami paica preocuparin carca. Chai punllacunapica, Harry Peterson shuti huauquimi yanun carca. Paipa apellidoca Papargyropoulos nishcami carca. Shinapash chai apellidota na ni ushashpami Peterson nin carcanchi. Paipash ungidomi carca. Villachinatapash ashtacatami alicachin carca. Betelpi ali sirvishpapash villachinataca na ladoman saquinllu carca. Tucui quillacunami ashtaca ashtaca revistacunata gentecunaman saquin carca. Bibliapi imata nijtapash alimi yachan carca. Ñucanchi imata tapuchijpipash Bibliahuanmi contestan carca.

Haciendapica, betelitacuna micuchunmi chaipillata fucushca frutacunata, verduracunataca ama huaglichun tarrocunapi churashpa trabajan carcanchi. Cada huatami casi shuj litrota apaj 45 mil tarrocunapi frutacunata, verduracunata churan carcanchi. Ñucaca Etta Huth shuti panihuanmi trabajan carcani. Paica ali yachajushca panigumi carca. Paimi frutacuna, verduracuna ama huaglichun recetacunata rurarca. Ladolla congregaciongunamanda panicunami ñucanchihuan trabajangapaj shamun carca. Ettami paicunataca aliguta organizarishpa  trabajanata yachachin carca. Etta paniguca frutacuna, verduracuna ama huaglichun tarrocunapi imashina churanata ali yachashpapash, haciendapi ñaupaman pushanajuj huauquicunataca siempremi respetarca. Paica tucuicunamanmi shuj ali ejemplota curca.

Angela Romano joven panigupashmi ayudangapaj shamun carca. Angelataca Angie nishpami rijsin carcanchi. Angietaca Etta panigumi Jehovata sirvichun ayudashcarca. Abril de 1958 huatapimi Angiehuan cazararcani. Cunangamanga ñami 58 huatacunata Jehovata sirvishcanchi. Angieca Jehovamanda na caruyashpa, paita siempre cazushpami causan. Chaimandami ali causai ushashcanchi. Paica alipacha yachajushca huarmigumi can. Ima cajpipash siempremi paipi confiaita ushani.

1957 huatapi WBBR radio emisorata jatujpica, asha tiempogutami Brooklyn Betelpi sirvijurcani. Shinapash Angiehuan cazarashpami Betelmanda llujshircani. Casi quimsa huatacunatami Staten Island llactapi precursorcuna carcanchi. Asha tiempogutaca, radio emisorata randishca mushuj dueñocunapami trabajarcani. Mushuj dueñocunaca WPOW nishpami radio emisorataca shutichirca.

Ayudachun minishtijuj pushtucunapi sirvigringapaj munashpami ñuca huarmiguhuanga asha cosascunahuanlla causan carcanchi. Shinami 1961 huatapi Falls City-Nebraska llactapi precursor especialcuna shina sirvichun invitajpica ari nishpa rircanchi. Chairalla chayashcajpimi, South Lansing-Nueva York llactapi Escuela del Ministerio del Reino nishcaman richun shuj quillata invitarca. Chaipi yachajushcacunahuanga cushijushcapachami carcanchi. Chai escuela tucurishca jipaca, Nebraska llactamanmi tigrachinga yarcanchimi. Shinapash Camboya llactapi misionero shina sirvigrichun cachajpimi ashata manllarishca carcanchi. Cai juyailla llactaca Asia llactapimi can. Camboyapica ashtaca mushuj cosascunatami ricurcanchi, uyarcanchi, malircanchipash. Chai llactapi ali villaicunata villachingapami tucui shunguhuan munarcanchi.

Shinapash Camboya llactapi problemacuna tiajpimi Vietnam del Sur nishca llactapi villachingapaj rircanchi. Ishcai huatacuna jipaca ungushcapachami carcani. Chaimandami Estados Unidosman tigrarcanchi. Na ñapash ali tucurcanichu. Shinapash ña alillata sintirishpami cutin precursorcuna tucurcanchi.

Marzo de 1965 huatapimi superintendente de circuito shina sirvi callarircani. Casi 33 huatacunatami superintendente de circuito, de distrito carcani. Jatun tandanajuicunata organizashpapashmi ayudashcani. Chai tucui ruraicunapica ñuca huarmigupash, ñucapash cushijushcapachami cashcanchi. Jatun tandanajuicunata alicachimandami jatun tandanajuicunapica cushijushpa ayudan carcani. Ashtaca huatacunatami Nueva York llactapi, shinallata Nueva York ladolla llactacunapi congregaciongunata visitashcanchi. Ashtaca jatun tandanajuicunataca Estadio de los Yankees nishcapimi charishcanchi.

Ñuca huarmiguhuanga ashtaca privilegiocunatami chasquishcanchi. 1995 huatapica Escuela de Entrenamiento Ministerialpi yachachichunmi invitahuarca. Quimsa huatacuna jipaca Betelpi sirvichunmi ñucanchitaca invitarca. Punda huatacunapica Betelpimi ñucaca tiempo completo especialpi sirvi callarircani.  Chaimandami 40 huatacuna jipa cutin Betelman tigrashpaca cushijushcapacha carcani. Betelpi cashpaca, huaquin tiempotaca Departamento de Serviciopimi trabajajurcani. Shinallata, Jehová Diospa organización rurashca ashtaca escuelacunapimi yachachijurcani. 2007 huatapica, Betelpi ruranajuj escuelacunata organizangapami Cuerpo Gobernanteca Departamento de Escuelas Teocráticas nishcata callarichirca. Huaquin huatacunatami chai departamentopi superintendente carcani.

Cai último huatacunapica Betelpi ruranajuj escuelacunapica, ashtaca cambiocunami tiashca. Ancianocunapa Escuela nishcaca 2008 huatapimi tiai callarirca. 2008 huatamanda ishcai huatacuna jipaca 12 mil ancianocunami chai escuelataca Patterson Betelpi, Brooklyn Betelpi charishca. Ancianocunapa Escuelaca shuj llactacunapipashmi tiashca. 2010 huatapica Escuela de Entrenamiento Ministerial nishcatami Escuela Bíblica para Varones Solteros ni callarirca. Shinallata, Cazarashcacunapa Escuela nishca mushuj escuelapashmi tiai callarirca.

Septiembre de 2014 huatapica Escuela Bíblica para Varones Solteros nishcata, Cazarashcacunapa Escuela nishcata shujlla escuelapi tandachishpami chai escuelataca Diospa Reinomanda Villachijcunapa Escuela nishpa churarca. Chai escuelamanga cazarashcacunapash, solterocunapash, solteracunapashmi rita ushan. Mundo enteropi ashtaca huauquipanicunaca, Diospa Reinomanda Villachijcunapa Escuela paicunapa llactapillata tiagrijta yachashpami ashtacata cushijurca. Shuj huauquipanicunapash chai escuelaman ri ushanata yachashpaca cushijunimi. Chai escuelaman ringapaj munaimanda paicunapa causaipi cambiocunata rurashca huauquipanicunata rijsishcamandaca ashtacatapachami cushijuni.

Chiri chiri ucupi bautizarishca punllamanda cunangamanga ali yachajushca ashtaca huauquipanicunatami rijsishcani. Paicunata rijsishcamandaca tucui shunguhuanmi Jehová Diosta agradicini. Paicunami ñucataca Jehovata ashtahuan ali rijsichun, Jehovata ashtahuan ali sirvichun ayudahuashca. Huaquingunaca ñucamanda ashtahuan jovenguna, o ñucamanda ashtahuan mayorcunami carca. Huaquingunaca shuj shuj llactacunamandami carca. Shinapash paicunapa causaita ricushpami, paicunaca Jehová Diosta ciertopacha juyashcata ricurcani. Jehovapa organizacionbi ali yachajushca amigocunata charishpa, paicunapa ali ejemplota cati ushashcamandaca ashtacatami cushijuni.