1-3. Jehová Diosta “tucui shunguhuan” sirvijcunaca ¿imashinata paitaca sirvin? Shuj ejemplomanda parlapai.

JUCHAYUCUNA nacirishca caimandami tucuicuna pandarinchi. Chaimandami Jehová Dios paipa Churita cachamushpa ñucanchi juchacunata perdonangapaj munashcamandaca ashtacata agradicinchi. Humilde cashcata ricuchishpa arripintirishpaca perdonahuai nishpami Jehová Diostaca mañanalla canchi. Shina rurajpica ñucanchicuna juchayucuna cajpipash alimi tratanga (Salmo 103:10). Shinapash Jehová Diosca paita tucui shunguhuan o ‘ali shunguhuan’ sirvichunmi munan (1 Crónicas 28:9). Shinaca ¿imashinata juchayucuna cashpapash, tucui shunguhuan Jehová Diostaca sirvi ushanchi?

² Chaipaca, Asá shuti reypa causaitami Amasías shuti reypa causaihuan chimbapurashpa ricuna capanchi. Ishcandi reycunallatami ali cosascunata rurarca. Shinapash juchayucuna nacirishca caimandaca ishcandillatami pandarirca. Shinapash Bibliapica ninmi: “Asá shuti runaca, paipaj tucui causaipimi, Diosta tucui shunguhuan cazushpa causajurca” nishpa (2 Crónicas 15:16, 17; 25:1, 2;  Proverbios 17:3). Asaca siempremi Jehová Diostaca tucui shunguhuan cushichingapaj munarca (1 Crónicas 28:9). Shinapash rey Amasiasca na ‘tucui shunguhuanllu’ Jehová Diosta sirvirca. Contracunata mishashca jipaca, contracunapa yanga dioscunata apashpa rishpami rey Amasiasca chaicunata adorai callarirca (2 Crónicas 25:11-16).

³ Jehová Diosta “tucui shunguhuan” sirvijcunaca paicunapa tucui fuerzahuan Jehovata juyashpami paitalla adorangapaj munan. Bibliapi shungu nishpaca ñucanchi yuyaicunamanda, munaicunamandami parlajun. Shinallata, jipaman imata rurangapaj yuyanata, ima munaihuan ruranatami shungu nin. Juchayucuna cashpapash Jehová Diostaca tucui shunguhuanmi adorai ushanchi. Ñucanchicunaca pipash obligashcamanda, o Jehovata adorana cashcamandallaca na adoranchichu. Jehovata ciertopacha sirvingapaj munaimandami paitaca sirvinchi (2 Crónicas 19:9).

4. ¿Imatata cai temapica yachajupashun?

⁴ Jehová Diosta imashina tucui shunguhuan sirvinata ali intindingapaca Asapa, Jehosafatpa, Ezequiaspa, Josiaspa ejemplocunatami yachajupashun. Paicunaca Judá llactapa ali reycunami carca. Pandarishpapash, Jehová Diospa ñaupajpica alimi ricurirca. Jehová Diosca paicuna tucui shunguhuan sirvishcatami ricurca. Pandarijpipash ¿imamandata Jehová Diosca paicuna tucui shunguhuan sirvishcata ricurca? ¿Imashinata chai reycunapa ejemplota cati ushapanchi?

5. Asá rey tucushpaca ¿imacunatallata rurarca?

⁵ Israel llacta ishcaipi separarijpica, Israel llactapica shuj reymi tiarca. Cutin Judá llactapica shuj reymi tiarca. Asá rey tucushpaca, Judá llactapi yanga dioscunata adorajcuna, millanaita huainayajcuna tiachunga na saquircachu. Chaimandami maquihuan rurashca yanga dioscunataca ñutushpa tucuchirca. Shinallata, jaripurallata millanaita huainayashpa causajcunataca, Taita Diospa huasi ñaupamandaca llujchishpami cacharca. Ashtahuangarin, paipa abuelataca shuj yanga diosta rurashcamandami reina cajpipash, reina cashpa catichunga na saquirca (1 Reyes 15:11-13, NM). Rey Asaca pai mandajushca gentecunataca Taita Diosta ‘mascachun, paipa mandashcacunata pactachishpa’ causachunmi animarca. Shuj gentecunapash Jehová Diosta adorachunmi rey Asaca ashtacata esforzarirca (2 Crónicas 14:4).

6. Etiopía llactamanda soldadocuna atacajpica ¿imatata rey Asaca rurarca?

⁶ Rey Asá 10 huatacunata mandajujpica, gentecunaca tranquilomi causanajurca. Shinapash jipamanga Etiopía llactamanda shuj millón soldadocunami 300 carretacunapi rishpa Judá llactata atacarca (2 Crónicas 14:1, 6, 9, 10). Shina pasajpica ¿imatata rey Asaca rurarca? Jehová Dios ayudanata tucui shunguhuan crishpami Jehová Diostaca contracunata mishangapaj ayudahuai nishpa mañarca (2 Crónicas 14:11, liingui). Shuj viajecunaca, reycuna na cazujpipashmi Jehová Diosca contracunata mishachun paipa llactataca ayudashcarca. Shina rurashpami Jehová Diosca ciertopacha Taita Dios cashcata ricuchirca (1 Reyes 20:13, 26-30). Shinapash cai viajeca, rey Asá tucui shunguhuan confiashcamandami Jehová Diosca paipa llactata ayudarca. Rey Asapa oracionda uyashpami Jehová Diosca, Etiopía llactamanda contra soldadocunata  mishachun ayudarca (2 Crónicas 14:12, 13). Jipamanga ashtacata pandarishpami rey Asaca, Jehová Diosta ayudahuai nishpa mañanapa randica, Siria llactamanda reytara ayudahuai nirca (1 Reyes 15:16-22). Shina cajpipash, Jehová Diosca rey Asá paita tucui shunguhuan juyajtami ricurca. ‘Asá shuti runapa shunguca tucui causaipimi Mandaj Dioshuan’ carca. Shinaca ¿imashinata rey Asapa ali ejemplota cati ushapanchi? (1 Reyes 15:14).

7, 8. ¿Imashinata rey Asapa ejemplota cati ushapanchi?

⁷ Jehová Diosta tucui shunguhuan sirvijushcata o na tucui shunguhuan sirvijushcata yachangapaca pensaripashunchi: “¿Shinlli cajpipashchu Jehová Diosta cazuni? Congregación limpio cachunga ¿tucui shunguhuanllu ayudangapaj munani?” nishpa. Rey Asata yaripashun, paica shinlli shayarishpa na manllashpami paipa abuelataca ñana reina cashpa catichun saquishcanga. Huaquinbica ñucanchipashmi rey Asapa ejemplota catina canchi. Pensaripai: “Shuj familia o shuj amigo juchata rurashpa na arripintiringapaj munaimanda congregacionmanda expulsai tucujpica ¿imatashi rurasha? ¿Chai familiahuan o chai amigohuan parlanata saquingapaj munaimanllu? ¿Imatata ñuca shungupica rurangapaj munani?” nishpa.

⁸ Huaquinbica rey Asá cuendami, tucui gentecunami nalicachishpa ricuhuan nishpa llaquirinchiman. Tal vez colegiopi cumbacuna o profesorcunachari ñucanchicuna testigo de Jehová cajpi burlarin. Cutin huaquinbica, trabajopi cumbacunachari ñucanchicuna jatun tandanajuiman ringapaj permisota mañajpi, o na ashtahuan horascunata trabajashpa na ashtahuan culquita ganangapaj munajpi burlarin. Chai ratocunapica, rey Asapa ejemplota catishpami ñucanchipash Jehová Diospi confiana canchi, Jehovata mañana canchi, na manllana canchi, ima ali cajtapash rurashpa catina canchi. Siempre yaripashunchi, Jehová Diosca imashinami rey Asata shinlliyachishpa ayudarca, shinallatami ñucanchitapash shinlliyachishpa ayudanga.

9. ¿Imamandata villachijushpaca Jehová Diosta cushichinchi?

⁹ Rey Asaca na paipilla pensarinllu carca. Paica shuj gentecunapash Jehová Diosta mascachun imashina ayudanatami pensarin carca. Ñucanchicunapash, Jehová Diosta adorachunmi shuj gentecunata animanchi. Ñucanchicuna paicunaman villachijujtaca Jehová Diosca ricujunmi. Paita juyaimanda, shuj gentecunapi preocuparimanda, chai gentecuna jipacunaman ali causachun munaimanda villachijujta ricushpaca Jehová Diosca cushijushcapachami canga.

10, 11. ¿Imashinata rey Jehosafatpa ejemplota cati ushapanchi?

¹⁰ Rey Asaca Josafat o Jehosafat shuti churitami charirca. Bibliapica ninmi, Jehosafatca ‘paipa taita Asá shuti runa causashcashnallatami causajurca’ nishpa (2 Crónicas 20:31, 32). Rey Jehosafatca paipa taitapa ejemplotami catirca. Shinallata shuj gentecunatapash Jehová Diosta adorachunmi animarca. Taita Dios ‘mandashpa escribichishca libropi’ mandashcacunata Judá llactapi gentecuna pactachichunmi, huaquin jaricunataca chai llactacunapi yachachichun cacharca (2 Crónicas 17:7-10). Ashtahuangarin, Israel llactapi tiashca Efraín nishca urcucunacaman paillata rishpami rey Jehosafatca Jehová Diosta cutin adorachun gentecunataca ayudarca (2 Crónicas 19:4). Rey Jehosafatca ‘tucui shunguhuanmi  Mandaj Diostaca mascarca’ (2 Crónicas 22:9).

¹¹ Cunan punllacunapica, mundo enteropi gentecuna paita rijsichunmi Jehová Diosca munan. Chaimandami Jehová Diosta rijsichun gentecunataca ayudai ushanchi. Tapuripashunchi: “¿Tucui quillacuna villachingapaj esforzarinichu? Shujcunapash Jehová Diosta sirvichunga ¿Bibliamanda yachachingapaj munanichu? Bibliamanda yachachi ushangapaj shuj gentegutallapash taringapaca ¿Jehová Diosta ayudahuai nishpa mañanichu?” nishpa. Esforzarijpica, Jehová Diosca shuj gentegumanllapash Bibliata yachachi callarichun ayudangami. Shinaca ña cutin pensaripai: “¿Ñucanchi samana ratocunapipash Bibliamanda yachachingapaj munaimanllu?” nishpa. Rey Jehosafatta yaripashun. Paica shujcunapash Jehová Diosta cutin sirvichun ayudangapami munarca. Ñucanchicunapash paipa ejemplota catishpami, villachingapaj na llujshinajuj huauquipanicunata ayudangapaj esforzarita ushanchi. Congregacionba territoriopi causaj huaquin expulsashcacunaca tal vez ñana juchata ruranajungachu. Ancianocunaca paicunata visitangapaj, ayudangapami arreglocunata ruran.

12, 13. a) Manllanayachishpaca ¿imatata rey Jehosafatca rurarca? b) ¿Imamandata rey Jehosafatpa ejemplota catina capanchi?

¹² Shuj punllaca ashtaca soldadocunami Judá llactata atacangapaj munanajurca. Chaimandami rey Jehosafatca, paipa taitapa ejemplota catishpa Jehová Dios ayudanata confiarca (2 Crónicas 20:2-4, liingui). Jehosafatca ashtacatami manllanayachirca. Chaimandami Jehová Diostaca, contracunata mishangapaca ñucatapash canba llactatapash ayudapangui nishpa mañarca. Shinallata, Jehová Diosta mañajushpaca, imata ruranatapash na yachanichu nishpami mañarca. Rey Jehosafatca Jehová Dios ayudanata tucui shunguhuan crishpami, Jehová Diostaca “candallami ricurianajupanchi” nirca (2 Crónicas 20:12).

¹³ Huaquinbica rey Jehosafat cuendami shuj problemata imashina arreglanata na ushashpa manllarishca canchiman (2 Corintios 4:8, 9). Chai ratocunapica rey Jehosafat imata rurashcatami catina canchi. Paica, pai mandajuj gentecunapa ñaupajpi Jehová Diosta mañashpami nirca, contracunata mishaitaca na ushagrinichu nishpa (2 Crónicas 20:5). Quiquinbash taita o cusa cashpaca rey Jehosafatpa ejemplotami catita ushapangui. Shuj problemata charishpa, chai problemata imashina arreglanata na yachashpaca Jehová Diosta mañapai quiquindapash quiquinba familiatapash ayudachun. Quiquinba familiapa ñaupajpi, Jehová Diosta ayudahuai nishpa mañanataca na pinganayachinachu capangui. Shinami quiquinba familiaca, quiquinbash Jehová Diospi tucui shunguhuan confiashcata cuenta japinga. Jehová Diosca imashinami rey Jehosafatta ayudarca, shinallatami quiquindapash ayudanga.

14, 15. ¿Imashinata rey Ezequiasca Jehová Diospi tucui shunguhuan confiashcata ricuchirca?

¹⁴ Rey Ezequiaspash paipa taita nali ejemplota cushpa yanga dioscunata adorajpipash, Jehová Diospa ali amigo cangapami esforzarirca. ‘Paica lomacunapi tiaj altarcunata anchuchishpa, imamanbash rijchaj dioscunatapash faquishpami’ saquirca. Ashtahuangarin, israelitacuna adoranajujpimi ‘Moisés rurachishca bronce culebratapash faquishpa’ saquirca. Rey Ezequiasca Jehová Diosta tucui shunguhuan sirvishpami causajurca. Shinallata, ‘Moisesman Mandaj Dios mandashcata pactachishpami causajurca’ (2 Reyes 18:1-6).

¹⁵ Rey Ezequías mandajuj punllacunapica, Asiria llactamanda soldadocunami, Jerusalén llactata tucuchigrinchimi nishpa Judá llactata atacarca. Asiria llactamanda reyca, Jehová Diosmanda burlarishpami Ezequiastaca na macanajushpallata  mishachun saquichun munarca. Chashna jatun llaquipi cashpaca Jehová Diospi tucui shunguhuan confiashpami rey Ezequiasca ayudahuai nishpa Jehová Diosta mañarca. Rey Ezequiasca asirio soldadocunata yali Jehová Dios ashtaca poderta charishcataca alimi yacharca. Paipa llactata Jehová Dios salvanataca tucui shunguhuanmi crirca (Isaías 37:15-20, liingui). Chaimandami Jehová Diosca rey Ezequiaspa oracionda uyashpa, 185 mil asirio soldadocunata huañuchichun shuj angelta cacharca (Isaías 37:36, 37).

16, 17. ¿Imashinata rey Ezequiaspa ejemplota cati ushapanchi?

¹⁶ Jipa huatacunamanga rey Ezequiasca ungushcapacha cashpami ña huañunalla sirijurca. Shina llaquipi cashpami paica, Jehová Diostaca quiquinda cazushpa causashcata yarishpa ayudahuayari nishpa mañarca (2 Reyes 20:1-3, liingui). Jehová Diospash rey Ezequiaspa mañashcata uyashpami jambirca. Bibliapi yachajushca shinaca, cuna punllacunapi milagrota rurashpa jambinata o ashtahuan huatacunata causachun Jehová Dios ayudanataca na shuyajunachu canchi. Shinapash rey Ezequías cuendami Jehová Dios ayudanataca tucui shunguhuan confiaita ushapanchi. Jehová Diostaca cashna nishpami mañaita ushapanchi: ‘Mandaj Dioslla, candaca ninandapachami mañapani. Canba ñaupajpi na llullashpa, tucui shunguhuan canda cazushpa causashcataca yaripayari. Shinallata imata cashpapash canba ali canatalla rurashpa causashcatapash yaripayari’ nishpa. Shinaca ¿ungushca cajpipash Jehová Dios siempre cuidajunataca tucui shunguhuanllu cripanchi? (Salmo 41:3).

¹⁷ Rey Ezequiaspa ejemplomi ñucanchitaca, imamandapash Jehová Diosmanda caruyajunichu o imapash cosascunapichu Jehová Diosta sirvina tiempota ocupajuni nishpa pensarichun ayudan. Shuj ejemplota ricupashun. Ashtaca gentecunaca shuj gentecunahuan parlangapami Internetta o imacunatapash ocupan. Ashtacacunaca shuj gentecunatarami paicunapa diosta cuenta ricun. Huaquingunacarin famoso gentecunata, na rijsishca gentecunatami alicachishpa ricun. Chai gentecuna imata rurajta liishpa, chai gentecunapa fotocunata ricushpami ashtaca tiempota yalin. Familiacunahuan, ali amigocunahuan parlangapaj Internetta o imacunatapash ocupanaca alimi can. Shinapash huaquinbica chaicunami ashtaca tiempota ocupan. Huaquinbicarin, Internetpi churashca fotocunata, o ñucanchi escribishca comentariocunata shujcuna alichishpa ricujpi o escribijpimi importante gentecunashna sintiri callarinchi. Cutin huaquinbica, ñucanchi imata Internetpi churashcata ñana ricujpimi fiñarishca sintiri callarinchi. Chaicunata rurajunapa randica, apóstol Pablopa, Aquilapa paipa huarmi Priscilapa ejemplotami catina capanchi. Pensaripai: ¿paicunaca shuj huauquipanicuna, ashtahuanbachaca Jehovata na adoraj gentecuna imata rurajujta yachangapaj cada punlla tiempota llujchinlla carca? Bibliapica ninmi, apóstol Pabloca ‘gentecunamanmi punllandi Diospaj Shimita’ villachijurca nishpa. Bibliapica ninbashmi, Áquila paipa huarmi Priscilaca ‘Taita Dios imashina causachun munajtami ashtahuan aliguta’ villachinajurca, yachachinajurca nishpa (Hechos 18:4, 5, 26). Shinaca tucuicuna pensaripashunchi: ¿Shujcunata imapash dios cajpishna ama tratangapaj cuidadota charinichu? ¿Na minishtirishca cosascunapi ama ashtaca tiempota yalingapaj cuidadota charinichu? nishpa (Efesios 5:15, 16, liingui) * (notata ricupangui).

18, 19. ¿Imashinata rey Josiaspa ejemplota cati ushapanchi?

¹⁸ Bibliapica rey Josiasmandapashmi parlan. Paica rey Ezequiaspa bisnietomi carca. Rey  Josiasca ‘tucui shunguhuanmi’ Jehová Diosta cazushpa causarca (2 Crónicas 34:31). Paica joven cashpallatami ‘Taita Diosta mascai callarirca’. 20 huatacunata charishpacarin, Judá llactapi yanga dioscuna ama tiachunmi esforzarirca (2 Crónicas 34:1-3, liingui). Rey Josiasca Jehová Diosta cushichingapaj munashpami, Judá llactamanda shuj reycunatapash yali Jehová Dios alicachishca cosascunata rurarca. Shuj punllaca sumo sacerdotemi Jehová Diospa templo huasipica Jehová Dios escribichishca Leyta tarirca. Chaica Moisesllata escribishca libromi cashcanga. Rey Josiaspa secretario liishpa uyachijpica, Jehová Diosta ashtahuan ali sirvingapaj ashtahuan cosascunata rurana cashcatami rey Josiasca cuenta japirca. Josiasca shujcunatapashmi Jehová Diosta ashtahuan sirvichun animarca. Chaimandami rey Josias ‘causajuj tucui huatacunapica, Mandaj Taita Diosmanda na anchurishpa’ gentecunaca causanajurca (2 Crónicas 34:27, 33).

¹⁹ Josiasca rey Manasespa nietomi carca. Rey Manasesca, Jehová Diosca perdonangapaj munanmi nishpami Josiasmanga yachachishcanga. Jovenguna, cangunapashmi rey Josiaspa ejemplota catishpa Jehová Diosta ashtahuan rijsita ushapanguichi. Shinallata, cangunapa familiapi o congregacionbi mayorlla huauquipanicunamandaca, ashtacatami yachajuita ushapanguichi. Paicunaca Jehová Dios imashina paicunata ayudashcatami ashtacata parlai ushan. Taita Diospa Leyta liishpa uyachijpi rey Josías imashina sintirishcata ¿yaripanguichu? Paica Jehová Diosta cushichingapaj munashpami imapi cambiana cashcatapash ucha cambiarca. Canbash Bibliata liishpaca, Jehová Diosta tucui shunguhuan cazuna munaitami charipangui. Shina rurashpami Jehová Diosman ashtahuan quimirishpa ashtahuan cushilla capangui. Ashtahuangarin shuj gentecunamanbash Jehová Diosmanda parlangapami munapangui (2 Crónicas 34:18, 19, liingui). Bibliata estudiashpaca, Jehová Diosta ashtahuan ali sirvingapaj imapi cambiana cashcatapashmi cuenta japi ushapangui. Imapipash cambiana cashcata cuenta japishpaca, rey Josiaspa ejemplota catishpami cambiangapaj esforzarina capangui.

20, 21. a) Cai temapi yachajushca chuscu reycunaca ¿imashinata carca? b) ¿Imatata cati temapica yachajupashun?

²⁰ Jehová Diosta tucui shunguhuan sirvishca chuscu reycunamandaca ¿imatata yachajupashcanchi? Paicunaca Jehová Diosta cushichingapaj munashpami paicunapa tucui causaipi Jehovata adorashpa causarca. Jatun contracuna llaquichingapaj munajpipash, paicunaca Jehová Diospimi confiarca. Ashtahuanbachaca Jehová Diosta juyaimandami paitaca sirvirca.

²¹ Cai chuscu reycunaca, juchayucuna nacirishca cashpapash, pandarishpapashmi Jehová Diospa ñaupajpica ali ricurita usharca. Jehová Diosca chai reycuna tucui shunguhuan juyajtami ricurca. Ñucanchicunapash juchayucuna nacirishcacunami canchi, pandaritapash pandarinchimi. Shinapash ñucanchicuna tucui shunguhuan sirvijujta ricushpaca ashtacatami Jehová Diosca cushijun. Cati temapimi chai chuscu reycunapa pandarishcacunamanda imata yachajui ushashcata ricupashun.