1. ¿Imamandata Cainga nali decisionda agllarca? Chaimanda ¿imata pasarca?

SHUJ jatun decisiondami Cainga agllana carca. Paipa nali munaicunata jarcashpaca, paipallatami ali canman carca. Cutin nali munaicunata na jarcashpaca, paipallatami nali canman carca. Bibliapi nishca shinaca, Cainga nali decisiondami agllarca. Chaimandami paipa huauqui Abeltapash huañuchishpa, paita ruraj Jehová Diospa amigo caitapash ñana usharca (Génesis 4:3-16).

2. ¿Imamandata ali decisiongunata agllana capanchi?

² Tucuicunallatami decisiongunataca agllana canchi. Huaquinbica jatun decisiongunata, cutin huaquinbica uchilla decisiongunatami agllana tucunchi. Tauca decisiongunaca ñucanchipa alipa o nalipami can. Ali decisiongunata agllashpaca, tal vezmi tauca problemacunamanda caruyashpa ashtahuan ali causashun. Cutin nali decisiongunata agllashpaca, tal vezmi tauca problemacunapi urmashpa llaquilla causashun (Proverbios 14:8).

3. a) Ali decisiongunata agllangapaca ¿imapita crina capanchi? b) ¿Ima ishcai tapuicunatata cai temapica yachajupashun?

 ³ Ali decisiongunata agllangapaca ¿imatata rurana capanchi? Jehová Diospimi crina canchi. Jehová Dios ñucanchita ayudangapaj munashcataca tucui shunguhuanmi confiana canchi. Ali decisiongunata ñucanchi agllachun Jehová Dios ali yachaita cunatapash seguromi cana canchi. Shinallata, ali decisiongunata agllangapaca Bibliapi crishpami, Bibliapi Jehová Diospa consejocuna ali cajta confiana canchi (Santiago 1:5-8, liingui). Jehová Diospaman ashtahuan quimirishpa, paipa Shimi Bibliata ashtahuan alicachishpaca, ñucanchipa ima ali cajta Jehová Dios yachajtaca ashtahuan seguromi cashun. Shinami, imapash decisionda nara agllashpallata, Diospa Shimipi imata nijta yachangapaj munashun. Shinapash, ali decisiongunata agllanata yachajungapaca ¿imatata rurana capanchi? Shuj decisionda ña agllashca cashpaca ¿chai decisionda cambiaita ushanchichu?

4. ¿Ima decisiondata Adanga agllana tucurca? Chaimanda ¿imata pasarca?

⁴ Gentecunaca, Adanda Jehová Dios rurashca punllamandapachami decisiongunata agllana tucushca. Shuj ejemplota ricupashun. Adanga Jehová Diosta cazunata o paipa huarmi Evata cazunatami agllana carca. Adanga Evata cazunatami agllarca. Evami Adandaca nali decisionda agllachirca. Chaimandami Jehová Diosca jardín de Edenmanda Adandaca llujchishpa cacharca. Jipamanga Adanga huañurcami. Adán shuj nali decisionda agllashcamandami cunan punllacunacaman ashtaca llaquicunata charinchi.

5. ¿Imamandata ñucanchillata imata decidinataca agllana capanchi?

⁵ Huaquin gentecunaca yuyanmi, ñucanchillata decisiongunata na agllana cashpaca alimi canman nishpa. Ñucanchicunapash ¿shinachu yuyanchi? Shina yuyashpaca yarinami canchi, Jehová Diosca gentecunataca na robot maquinacunatashna rurarcachu. Maquinacunatashna rurashca cajpica, imata pensaita, imata deciditapash na ushanchimanllu. Ñucanchicuna ali decisiongunata agllanata yachajuchunga, Bibliatami Jehová Diosca curca. Jehová Diosca ñucanchillata imata decidinata agllachunmi munan. Decisiongunata agllanaca shuj jatun responsabilidadmi can. Cai cati ejemplota ricupashun.

6, 7. a) ¿Ima decisiondata israelitacunaca agllana tucurca? (Callari dibujota ricupangui). b) ¿Imamandata israelitacunaca ali decidita na usharca?

⁶ Jehová Dios carasha nishca alpacunapi israelitacuna ña causanajushpaca, Jehová Diosta adoranata o yanga dioscunata adoranatami israelitacunaca agllana tucurca (Josué 24:15, liingui). Chaita decidinaca jahuallashnallami carca. Shinapash na shinachu carca. Jehová Diosta adoranata, o yanga dioscunata adoranata agllashpaca causaita o huañuitami israelitacunaca agllanajurca. Shinaca ¿imatata israelitacunaca agllarca? Juezcuna mandajuj punllacunapica, nali decisiongunatami israelitacunaca agllashpa catirca. Chaimandami Jehová Diosta adoranata saquishpa yanga dioscunata adorai callarirca (Jueces 2:3, 11-23). Profeta Eliaspa punllacunapipashmi israelitacunaca, Jehová Diosta sirvinata o Baal nishca yanga diosta sirvinata agllana tucurca (1 Reyes 18:21). Ñucanchicunaca Jehová Diosta sirvina ali cashcataca alimi yachanchi. Chaimandami pita sirvinata agllanaca jahuallashnalla ricurin. Ali yachaita charijcunaca yanga diosta sirvinataca na agllanmanllu. Shinapash israelitacunapaca pita sirvinata agllanaca shinllimi carca. Bibliapica ninmi, israelitacunaca ‘ishcai yuyaihuanmi’ carca nishpa. Chaimandami Eliasca ali  yachaita charishcata ricuchishpa paicunataca Jehová Diosta adorachun animarca.

⁷ ¿Imamandata israelitacunaca shuj ali decisionda agllaitaca na usharca? Pundapica, Jehová Diospi na confiashpami Jehová imata nijtaca na uyangapaj munarca. Jehová Diospi na confiaimandami Jehovata ashtahuan ali rijsingapaj, paipa ali consejocunata yachangapaca na tiempota llujchirca. Tiempota llujchishpaca ali decisiongunata agllanatami yachajunman carca (Salmo 25:12). Shinallata, shuj llactamanda gentecunapa yuyaicunata catimandami israelitacunaca, ali decisionda agllaitaca na usharca. Ashtahuangarin, shuj llactamanda gentecuna paicunapa cuenda decidichunmi saquirca. Shina rurashpami israelitacunaca shuj llactamanda gentecunapa yuyaicunata catirca, yanga dioscunatapash adorai callarirca. Israelitacuna shina pasanataca ñami Jehová Diosca punda huatacunallata villashcarca (Éxodo 23:2).

8. ¿Imatata israelitacunapa ejemplomandaca yachajupanchi?

⁸ Imashinami israelitacunapa ejemplopi yachajushcanchi, ali decisiongunata agllangapaca Diospa Shimipi consejocunatami minishtinchi. Gálatas 6:5pica ninmi, cada unomi imata decidishcamandaca responsable canguichi nishpa. Shinaca, ñucanchicunapa cuenda shujcuna decidishpa cuchunga na saquinachu cashcanchi. Cada unomi decidina canchi. Ashtahuangarin, Jehová Diospa ñaupajpi ima ali cajta, ima nali cajtami yachajuna canchi.

9. ¿Imamandata shujcuna ñucanchimanda decidichun saquinaca peligroso can?

⁹ Huaquinbica ¿imamanda ñucanchicunapa cuenda shujcuna decidichun saquinchi? Huaquinbica, nali decisionda agllachun shujcuna atichinajujpimi nalita decidinchi (Proverbios 1:10, 15). Shujcuna ñucanchimanda decidichun saquinaca peligrosomi can. Ñucanchimanda decidichun saquishpaca, paicuna imata nishcatami ruranchiman. Shinallata, jatun llaquicunapimi urmaita ushanchiman. Shinapash ñucanchicunaca Bibliapi yachajushcata catishpa, ñucanchi concienciapi ali sintirishpami imata decidina cashpapash decidina canchi.

10. Galacia llacta congregacionmanda huauquipanicunataca ¿ima nishpata apóstol Pabloca advirtirca?

¹⁰ Apóstol Pabloca Galacia llacta congregacionmanda huauquipanicunataca, shujcuna cangunapa cuenda decidichunga na saquinachu canguichi nishpami advirtirca (Gálatas 4:17, liingui). Chai congregacionbi huaquin huauquicunaca shujcunapa cuenda decisiongunata agllangapami munanajurca. Chai huauquicunaca, paicunapilla pensarishpami shuj huauquicunapash paicunapa nishcata catichun munanajurca. Apostolcunapa nishcacunata catichunga na munarcachu. Ashtahuangarin jariyashcacunami carca. Chaimandami shuj huauquicuna decidina derechota charijpipash, paicunallata decidichunga na saquinajurca.

11. Shujcuna imapash decisionda agllagrijujpica ¿imashinata paicunata ayudai ushapanchi?

¹¹ Tucuicunami apóstol Pablopa ali ejemplota cati ushapanchi. Paica shuj huauquipanicunapash decidina derechota charishcataca respetarcami (2 Corintios 1:24, liingui). Cunan punllacunapi ancianocunapash,  shuj huauquicuna imapash decisionda agllana cajpi consejajushpaca, apóstol Pablopa ejemplotami catita ushan. Decisionda agllangapaj munajuj huauquica, imata decidishpapash paillatami chai decisionhuanga causanga. Chaimandami ancianocunaca, Diospa Shimipi imata nijta ricuchingapaj informacionda mascashpa chai huauquimanga ricuchin. Shinapash chai huauquipa cuenda ama decidingapami ancianocunaca ashtaca cuidadota charin. Shinaca ¿imatata yachajupanchi? Bibliapi imata nijta huauquicunaman ricuchishpapash, huauquicunallata agllana derechota charishcataca respetanami canchi. Paicunallatami imata decidinataca agllana can. Shina ruranaca paicunapallatami ali can. Nunca na pensanachu canchi, huauquicuna imata ruranataca ñucanchimi decidina canchi nishpa.

12, 13. ¿Imamandata culirashca cashpa o desanimarishca cashpaca decisiongunata agllanaca nali can?

¹² Cunan punllacunapi ashtaca gentecunaca shungu ima munashcata catishpami decisiongunataca agllan (“¿Imatata nisha nin?” nishca recuadrota ricupangui). Shinapash chaita rurashpaca jatun llaquicunapimi urmaita ushan. Bibliapica ninmi, gentecunaca juchayucuna nacirishca caimandami shungupi imashina sintirishcata catishpaca na decidina canguichi nishpa (Proverbios 28:26). Ñucanchi shunguca “tucui imatapash yali umachijlla, jatun nalimi” can. Chaimandami ñucanchi shungupica na confiana canchi (Jeremías 17:9). Bibliapica, ashtaca gentecuna paicunapa shungupi confiaimanda llaqui apashcatami parlan (1 Reyes 11:9; Jeremías 3:17; 13:10). Shinaca, imapash decisiongunata agllagrijushpa ñucanchi shungupi confiashpaca ¿imata tucunchiman?

¹³ Ñucanchi shunguca minishtirishcapachami can. Bibliapica mandanmi, canba tucui shunguhuanmi Taita Diostapash juyana canchi nishpa. Shinallata mandanmi, imashinami quiquinguna juyaringuichi shinallatami shuj gentecunatapash  juyana canguichi nishpa (Mateo 22:37-39). Shinapash, imashinami ñaupa parrafopa textocunapi yachajurcanchi, ñucanchi shungupi imashina sintirishcata catishpa pensarina o imatapash ruranaca peligrosomi can. Chaimandami ashtaca cuidadota charina canchi. Shuj ejemplota ricupashun. Culira cashpaca ali decisiongunata agllaitaca na ushashunllu (Proverbios 14:17; 29:22). Shinallata, imata ruranatapash na munashpa desanimarishca cashpaca, ali decisiongunata agllaitaca na ushashunllu (Números 32:6-12; Proverbios 24:10). Imata ruranata agllajushpaca, Jehová Diospa mandashcacunatami ñucanchi umapica charina canchi (Romanos 7:25). Chaimandami jatun decisiongunata agllajushpaca, ñucanchi shungupi imashina sintirishcataca na catina capanchi.

14. ¿Imamandata huaquinbica shuj decisionda ña agllashca cashpapash cambiata ushapanchi?

¹⁴ Tucuicunallatami ali decisiongunata agllana canchi. Ali yuyaj gentecunaca, paicuna agllashca decisionda cambiana o na cambiana cashcata ricungapami, alitachu decidircani nishpa huaquinbica cutin pensarin. Jehová Diospa ali ejemplota ricupashun. Profeta Jonaspa punllacunapica, Nínive llactamanda gentecunata tucuchinatami Jehová Diosca decidirca. Shinapash jipamanga, chai gentecuna ‘nalita rurashpa causanata saquishpa Diospaman tigrarishcatami, Taita Diosca ricurca. Chaimandami, llaquichishami nishca cashpapash llaquirishpa, na llaquichishpa saquirca’ (Jonás 3:10). Jehová Diosca shuj decisionda ña agllashca cashpapash, Nínive llactamanda gentecuna paicunapa nali ruraicunata saquijpimi Jehová Diosca paipa decisionda cambiarca. Shinami Jehová Diosca ali yuyaj cashcata, humilde cashcata, llaquij Taita Dios cashcata ricuchirca. Cutin, ashtaca gentecunaca nali pensarishpami decisiongunataca agllan. Shinapash Jehová Diosca culirashca cashpapashmi aliguta pensarishpa decisiongunataca agllan.

15. ¿Ima horata shuj decisionda ña agllashca cashpapash cambiata ushapanchi?

¹⁵ Huaquinbica ñucanchi causaipi cambiocuna tiajpimi, decisiongunataca cambiana tucunchi. Jehová Diospashmi huaquinbica shuj decisionda ña agllashca cashpapash cambiarca (1 Reyes 21:20, 21, 27-29; 2 Reyes 20:1-5). Cutin huaquinbica mushuj informacionda chasquimandami shuj decisionda ña agllashca cashpapash cambiana tucunchi. Rey Davidpa ejemplota ricupashun. Saulpa nietomanda nalicunata uyashpami rey Davidca shuj decisionda agllarca. Shinapash jipaman cabalta yachaj chayashpaca, pai agllashca decisiondaca cambiarcami (2 Samuel 19:24-29). Huaquinbica ñucanchipashmi, shuj decisionda ña agllashca cashpapash cambiata ushanchi.

16. a) Ali decisionda agllangapaj munashpaca ¿imacunatata rurana capanchi? b) ¿Imamandata shuj decisionda ña agllashca cashpapash cutin aliguta pensarina capanchi? ¿Imatata rurangapaj munana capanchi?

¹⁶ Bibliapica ninmi, jatun decisiongunata agllanajushpaca na musparinachu canguichi nishpa (Proverbios 21:5). Chaimandami ali decisiongunata  agllangapaj munashpaca aliguta pensarishpa decidina canchi (1 Tesalonicenses 5:21).Shuj ejemplota ricupashun. Taitacunaca nara shuj decisionda agllashpallatami Bibliapi imata nijta, publicaciongunapi imata nijta yachangapaj tiempota llujchina can. Shinallata, paipa familia imata nijta uyanapash alimi can. Abrahanda yaripashun. Jehová Diosca Abrahandaca nircami, canba huarmi imata nijtaca aligutami uyana cangui nishpa (Génesis 21:9-12). Ancianocunapash Bibliata, publicaciongunata estudiangapaj tiempota llujchinami can. Mushuj informacionda tarimanda agllashca decisionda cambiana tucushpaca cambianallami can. Shujcuna imata ninataca na manllanachu can. Ali yuyaj, humilde ancianocunaca cambiana minishtirijpica paicunapa yuyaicunatapash, decisiongunatapash cambianllami. Tucuicunallata paicunapa ejemplota catishpaca congregacionbi tucuilla huauquipanicuna shujllashna tandanajushca cachun, tranquilo cachunmi ayudashun (Hechos 6:1-4).

17. Ali decisiongunata agllachunga ¿imata ayudanga?

¹⁷ Huaquin decisiongunaca importantecunapachami can. Huaquin ejemplocunata ricupashun. Ima hora, pihuan cazaranata decidina, ima hora tiempo completopi sirvi callarinata decidinaca importantemi can. Chashna decisiongunata nara agllashpallatami aliguta pensarina canchi, Jehová Diosta ayudahuangui nishpapash mañanami canchi. Chaicunata rurangapaj tiempo minishtirijpipash, ali decisionda agllangapaj munashpaca Jehová Diospi confianami canchi. Pai imata nijtapash uyashpami cazuna canchi (Proverbios 1:5). Jehová Diosca paipa Shimi Bibliapica alipacha consejocunatami cun. Chaimandami Bibliata estudiana, Jehová Diosta ayudahuai nishpa mañana canchi. Jehová Diosmi ñucanchitaca paipa munaita pactachishpa ali decisiongunata agllachun ayudaita ushan. Shuj jatun decisionda nara agllashpallatami tapurina canchi: “Cai decisionda agllashpaca ¿Jehová Diosta juyashcata ricuchijunichu? ¿Ñuca familia cushilla, tranquilo causachun ayudangacha? ¿Juyashcata, na ñapash fiñarij cashcatachu ricuchijuni?” nishpa.

18. ¿Imamandata Jehová Diosca ñucanchicunallata imata decidinata agllachun munan?

¹⁸ Jehová Diosca paita juyachun, sirvichunga na pitapash obliganllu. Ashtahuangarin ñucanchillata decidichunmi munan. Paita sirvinata o na sirvinata agllana derechota gentecuna charishcataca respetanmi (Josué 24:15; Eclesiastés 5:4). Shinapash, Bibliapi yachajushcata catishpa imata decidishcata pactachichunmi Jehová Diosca munan. Jehová Dios ayudajujta crishpa, Bibliapi consejocunata pactachishpaca ali decisiongunatami agllashun. Ashtahuangarin, shina rurashpami imata decidishpapash na ishcai shungu cashcata ricuchishun (Santiago 1:5-8; 4:8).