1, 2. a) Mateo 24:12pi shimicunaca ¿maijan gentecunapita pundapica pactarirca? b) ¿Imashinata Hechos libroca, Jesusta ashtaca catijcuna Jehová Diosta tucui shunguhuan juyashpa catishcata ricuchin? (Callari dibujota ricupangui).

JESÚS cai Alpapi cashpaca nircami, tucurimui punllacunapica ‘juyarishpa causanataca ashtacacunami saquinga’ nishpa (Mateo 24:3, 12) (“¿Imatata nisha nin?” nishca recuadrota ricupangui). Jesuspa shimicunaca, apostolcunapa punllacunapi causanajuj judiocunapimi pundapica pactarirca. Chai judiocunaca ninmi carca, ñucanchimi Taita Diospa llacta canchi nishpa. Shinapash, Taita Diosta tucui shunguhuan juyanataca saquishcarcami.

² Cutin, chai punllacunapi Jesusta ashtaca catijcunaca na shinachu carca. Paicunaca cushijushpami ‘Jesusmanda villachishpa catinajurca’. Taita Diostapash, huauquipanicunatapash, shuj gentecunatapash juyashcatami ricuchinajurca. Paicunaca tucui shunguhuanmi Jehová Diosta juyashpa catinajurca (Hechos 2:44-47; 5:42). Shinapash huaquingunaca, Jehová Diosta tucui shunguhuan juyanataca saquircami. ¿Imamanda shina nipanchi?

3. ¿Imamandashi Jesusta huaquin catijcunaca Jehová Diosta tucui shunguhuan juyanata saquishcanga?

³ Éfeso llactapi congregaciondaca Jesusca nircami: ‘Canba punda juyaitaca  saquishcanguimi’ nishpa (Apocalipsis 2:4). Éfeso llactapi Jesusta catijcunaca, chai llactapi gentecunapa yuyaicunata catimandami paicunapilla preocuparinajurca (Efesios 2:2, 3). Éfeso llactaca charij charij llactami carca. Chaipi gentecunaca valishca, ali cosascunatallami munan carca. Imapipash na preocuparishpa, tranquilo causanatami alicachin carca. Ashtahuangarin, shujhuan shujhuan puñushpa juchata rurajcunami carca. Taita Diospa leycunatapash na respetanllu carca. Taita Diostapash, shuj gentecunatapash juyashcata ricuchinapa randica, paicunalla ali causanatami pundapi churan carca.

4. a) ¿Imamandata cunan punllacunapi gentecunaca, Taita Diosta tucui shunguhuan juyanata saquishca? b) ¿Imacunatata cai temapica yachajupashun?

⁴ Mateo 24:12pi Jesuspa shimicunaca, cunan punllacunapipashmi pactarijun. Ashtaca ashtaca gentecunami Taita Diosta tucui shunguhuan juyanata saquinajun. Cai mundopi llaquicunata tucuchingapaj Taita Diospa ayudata mascanapa randica, gentecunapa organizacionba ayudacunatami ashtaca gentecunaca mascan. Shinami, Taita Diosta tucui shunguhuan juyanata saquinajun. Huaquinbica, Jehová Diosta sirvijcunapashmi, Éfeso llactamanda Jesusta catijcunashna Jehová Diosta tucui shunguhuan juyanata saquin. Chaimandami cai temapica, Jehová Diosta tucui shunguhuan juyashpa catingapaj imata ruranata yachajupashun. Shinallata, Bibliapi yachachishcacunata alicachishpa catingapaj, huauquipanicunatapash juyashpa catingapaj imata ruranatami yachajupashun.

5. ¿Imamandata Taita Diostaca tucui shunguhuan juyana capanchi?

⁵ ¿Pitata ashtahuanga juyana capanchi? Jesusca nircami: “Mandashcapica cashnami nijun: ‘Cambaj Taita Diostaca, tucui shunguhuan, tucui almahuan, tucui yuyaihuan juyangui nijunmi. Cai mandashca shimimi, tucuimanda punda ashtahuan yali ali” can nishpa (Mateo 22:37, 38). Jehová Diosta juyaimandami paipa mandashcacunata pactachi ushanchi. Shinallata, Taita Diosta juyaimandami llaquicunata aguantai ushanchi, nali ruraicunatapash millanayachinchi (Salmo 97:10, liingui). Shinapash, Diablopash, pai mandajuj mundopash ñucanchicuna Jehová Diosta tucui shunguhuan juyanata saquichunmi munan.

6. Taita Diosta juyanata saquij gentecunaca ¿imata tucun?

⁶ Cai mundopi gentecunaca imata juyana cashcataca na ali intindi ushanllu. Taita Diosta juyanapa randica, “paicunalla ali cangapaj munajcunami” can (2 Timoteo 3:2). Shinallata, paicunapa aicha munaicunata, ñavi ricushcandi munaicunatami mascan. Imata charishpapash, jariyanatami yachan (1 Juan 2:16). Ama chaicunata mascashpa llaqui apanajuchunmi, apóstol Pabloca advirtirca: “Quiquin munaitalla rurashpa causanaca, huañushpa chingagringapajllami” can nishpa. ¿Imamandata chaicunata mascajcunaca huañushpa chingagrinata tarin? Paicunapa munaicunatalla ruranata mascajcunaca, Taita Diospa contracunami tucun (Romanos 8:6, 7). Culquitalla mascanata, o shujhuan shujhuan puñushpa causanata alicachij gentecunaca, paicunallata na ali sintirishpami llaquilla causan (1 Corintios 6:18; 1 Timoteo 6:9, 10).

7. ¿Ima panda yuyaicunata cunan punllacunapi Jesusta catijcunataca llaquichita ushan?

⁷ Cunan punllacunapica, ashtaca gentecunami Taita Dios tiajtaca na crin. Cutin shujcunaca, Taita Dios tiajta crishpapash, Taita Diosman quimiri ushashcataca na crinllu. Shujcunacarin evolución nishcacunapimi crin. Chai gentecunaca, shuj gentecunapash paicunapa yuyaicunata catishpa Taita Dios tiashcata ama crichun, Taita Diosta juyanata saquichunmi munan. Paicunaca ninmi, na estudiashca gentecunalla, muspa gentecunallami Taita Dios tucuita rurashcataca crin nishpa. Ashtaca gentecunacarin, Tucuita Ruraj Jehová Diosta respetanapa randica, científico nishca gentecunatarami ashtahuan respetan (Romanos  1:25). Chai gentecunapa yuyaicunata catishpaca, Jehová Diosman ashtahuan quimirinatapash, paita juyanatapashmi saquishun (Hebreos 3:12).

8. a) Jehová Diosta huaquin sirvijcunaca ¿imamandata desanimarin? b) Salmo 136pi shimicunaca ¿imashinata animan?

⁸ Cai mundotaca Diablomi mandajun. Chaimandami huaquinbica desanimarishca sintirinchi (1 Juan 5:19). Shinapash, yapata desanimarijpica ñucanchi feca chiriyaita ushanmi. Jehová Diosta juyanatapashmi saquishun. Huaquinbica, culqui faltajlla causaimanda, ungushca caimanda, o mayorllagu caimandachari sufrinajunchi. Huaquinbicarin, ñucanchi munashcashna imatapash na ali rurai ushaimanda, o ñucanchi munashca cosascuna na pactarijpichari llaquilla canchi. Ima llaquicunata charishpapash, Jehová Diosca saquihuashcami nishpaca nunca na pensanachu canchi. Salmo 136:23pica cashnami animan, Jehová Diosca “ñucanchi urai cumurishpa llaquilla cajpica, paimi ñucanchita yarirca. Pai llaquinaca, causaita causaicamanmi” can nishpa. Ayudahuai nishpa mañajpica, Jehová Dios uyangami, ayudangami (Salmo 116:1; 136:24-26).

9. ¿Imamandata apóstol Pabloca Jehová Diosta tucui shunguhuan juyashpa catita usharca?

⁹ Apóstol Pabloca Jehová Dios paita imashina ayudashcata yarishpami shinlli tucurca. Paica escribircami: “Ñucata ayudajca, Jatun Diosmi. Shina cashcamandaca, gentecuna imata ruranatapash, na manllashachu” nishpa (Hebreos 13:6). Apóstol Pabloca Jehová Diospi tucui shunguhuan confiaimandami, llaquicunata aguantai usharca. Jatun jatun llaquicunapi cashpapash, Jehová Diospi confianataca nunca na saquircachu. Prezo cashpapashmi apóstol Pabloca ali shimicunata escribishpa shuj huauquipanicunata animarca (Efesios 4:1; Filipenses 1:7; Filemón 1). Llaquicunata charishpapash, Jehová Diostaca tucui shunguhuanmi juyashpa catirca. Jatun llaquicuna japijpi ‘tucuipi cushichij Taita Dios cushichinataca’, tucui shunguhuanmi confiarca (2 Corintios 1:3, 4). ¿Imashinata apóstol Pablopa ejemplota cati ushapanchi?

10. Jehová Diosta tucui shunguhuan juyashpa catingapaca ¿imatata rurana capanchi?

¹⁰ Ñucanchicuna Jehová Diosta tucui shunguhuan juyashpa catichunga ¿imatata apóstol Pabloca nirca? Paica nircami: “Taita Diosta  mañanataca, na saquinachu canguichi” nishpa. Shinallata nircami, Taita “Diostaca, na cungashpami mañajunalla canguichi” nishpa (1 Tesalonicenses 5:17; Romanos 12:12). ¿Imamandata Jehová Diosta mañashpaca paiman ashtahuan quimirinchi? Jehová Diosta mañashpaca paihuanmi parlanajunchi (Salmo 86:3). Ñucanchicuna imata pensashcata, ñucanchi shungu ucupi imashina sintirishcata Jehová Diosman parlashpaca, paimanmi ashtahuan quimirinchi (Salmo 65:2). Ashtahuangarin, ñucanchi mañashcacunata uyashpa ayudajpimi, Jehová Diostaca ashtahuan juyanchi. Shinallata, ‘tucui yuyaihuan paita mañajcunata ayudangapaj ladopi’ cashcatami cuenta japinchi (Salmo 145:18). Jehová Dios ñucanchita juyajta, ayudajta confianami cunan punllacunapipash, shamuj punllacunapipash llaquicunata aguantachun ayudanga.

11, 12. Bibliapi yachachishcacunata ashtahuan alicachingapaca ¿imatata rurana capanchi?

¹¹ Jesusta catijcunaca, Bibliapi na llullashpa yachachishca shimicunatami tucui shunguhuan alicachinchi. Jesusca paipa Taitataca nircami: “Cambaj shimica, napacha llullajchu” can nishpa (Juan 17:17). Shinaca, Bibliapi na llullashpa yachachishca shimicunata tucui shunguhuan alicachingapaca, Bibliapi imata yachachijujtami yachana canchi (Colosenses 1:10). Shinapash, na yachashpallachu saquirina canchi. Imata ashtahuan ruranata yachangapaca, Salmo 119pi shimicunatami ricuna capanchi (Salmo 119:97-100, liingui). Bibliapi imata liishcataca, punllapi cutin cutinmi pensarina canchi. Bibliapi yachachishcacunata ñucanchi causaipi pactachina imamanda ali cashcata pensarishpami, Bibliapi yachachishcacunataca ashtahuan ashtahuan alicachishun.

¹² Salmo 119ta escribij salmista runaguca nircami: “¡Cambaj Shimicunaca, ñuca shimipica, mishqui mishquimari! Ñuca shimipica, balun mishquitapash yali mishquimi” can nishpa (Salmo 119:103). Jehová Diospa organización cushca publicaciongunaca mishqui micuna cuendami can. Imashinami ñucanchi alicachishca micunata micujushpaca, na ucha tucurichun munanchi, shinallatami Bibliamanda yachachijuj publicaciongunata liijushpaca na ucha tucurichun munashpa, alimanda liina canchi. Shinami, ‘juyailla shimicunataca’ alicachishpa liishun, imata liishcatapash yarishunmi. Liishca shimicunahuanbash shujcunata ayudai ushashunmi (Eclesiastés 12:10).

13. a) ¿Imamandata profeta Jeremiasca, Taita Dios imata yachachishcataca tucui shunguhuan alicachirca? b) Shina alicachishcamandaca ¿imatata rurarca?

¹³ Profeta Jeremiasca, Taita Dios imata yachachishcataca tucui shunguhuanmi alicachirca. Paica nircami: ‘Canba Shimita ñucaman cujpica, ñucaca micurcanimi. Canba Shimica, ñuca shungupi ninandapacha cushichingapami carca. Tucuita Mandaj Dioslla, canba shutita ñucamanda alicachinajujpimi’ cushijurcani nishpa (Jeremías 15:16). Jeremiasca, Taita Diospa Shimipi yachachishcacunata tucui shunguhuan alicachishpami chaicunapi pensarin carca. Shina alicachimandami, Jehová Diospa shutipi parlanatapash, Jehová Dios imata villachun cachashcata villachinatapash ninanda alicachin carca. Ñucanchicunapash, Bibliapi yachachishcacunata alicachishpaca, testigo de Jehová canatapash, ali villaicunata cai tucurimui punllacunapi villachinatapash alicachishunmi.

14. Bibliapi na llullashpa yachachijuj shimicunata ashtahuan alicachingapaca ¿imatata ashtahuan rurana capanchi?

¹⁴ Bibliapi na llullashpa yachachishca shimicunata ashtahuan alicachingapaca ¿imatata ashtahuan rurana capanchi? Tandanajuicunaman rinataca na saquinachu capanchi. Tandanajuicunahuanmi Jehová Diosca ñucanchicunata yachachijun. Ashtahuanbachaca, Villajun revistahuanmi Jehová Diosca cada semana Bibliamanda yachachijun. Chai tandanajuita aliguta aprovechangapaca, Villajun revistatami aliguta prepararina  canchi. ¿Imashinata aliguta prepararita ushapanchi? Cada temapa tucuilla textocunatami liita ushapanchi. Cunan punllacunapica, ashtaca huauquipanicunami Villajun revistataca paicunapa celularcunapi, tabletcunapi liita o descargaita ushan. jw.org direccionman o JW Library nishcaman yaicujpica, cai revistaca ashtaca shimicunapimi tian. Huaquin formato electrónico nishcacunaca, Bibliamanda textocunata ñapash tarichunmi ayudan. Villajun revistapi temacunata imashina prepararishpapash, Bibliapi textocunataca aliguta liishpami, chai textocunapi pensarina capanchi. Shina rurashpami, Bibliapi na llullashpa yachachijuj shimicunataca ashtahuan alicachishun (Salmo 1:2, liingui).

15, 16. a) ¿Imatata Jesusca Juan 13:34, 35pica mandarca? b) ¿Imamandata nipanchi, Taita Diostapash juyashpa, Bibliapi yachachishcacunatapash alicachishpaca, ñucanchi huauquipanicunatapashmi juyashun nishpa?

¹⁵ Último tutata Jesús cai Alpapi cashpaca, paipa catijcunataca nircami: ‘Nara mandashca mushujtapachami, cashna nishpa cangunataca mandani: Caishujhuan, chaishujhuan ninanda juyarishpami causana canguichi. Ñuca imashnami cangunata ninanda juyani, chashnallatami cangunapash, caishujhuan chaishujhuan ninanda juyarishpa causana canguichi. Shina juyarishpa causanajujta ricushpami, ñucapa yachajujcuna cashcataca tucuicuna rijsinajunga’ nishpa (Juan 13:34, 35).

¹⁶ Taita Diosta na juyashpaca, ñucanchi huauquipanicunata juyaitaca na ushashunllu. Shinallata, ñucanchi huauquipanicunata na juyashpaca Taita Diosta juyaitaca na ushashunllu. Apóstol Juanga nircami, shuj huauquita “ñavihuan ricujushpapash, na juyashpaca, ñavipi na ricurij Taita Diostacarin, ¿imashnata juyai ushangayari?” nishpa (1 Juan 4:20). Ashtahuangarin, ñucanchi huauquipanicunata, ñucanchi Taita Diosta juyashpaca, Bibliapi yachachishcacunatapash alicachishunmi. ¿Imamandata shina nipanchi? Bibliapi imata yachajushcata alicachishpaca, Bibliapi mandashca shinami Taita Diostapash, shuj huauquipanicunatapash juyashun (1 Pedro 1:22; 1 Juan 4:21).

17. Ñucanchi huauquipanicunata juyashcataca ¿imashinata ricuchipanchi?

¹⁷ (1 Tesalonicenses 4:9, 10, liingui). ¿Imashinata ñucanchi huauquipanicunata juyashcataca  ricuchi ushapanchi? Huaquinbica, shuj mayorlla huauqui o panimi tandanajuicunaman ringapaj ayudachun minishtinajun. Cutin huaquinbica, shuj viuda panigumi huasipi pipash imagutapash arreglashpa ayudachun minishtijun (Santiago 1:27). Congregacionbica desanimarishca, llaquilla sintirinajun huauquipanicuna o imapash problemacunata charij huauquipanicunami tian. Paicunaca animachun, cushichichun, paicunamanda preocuparichunmi minishtinajun (Proverbios 12:25; Colosenses 4:11). Ñucanchi huauquipanicunata juyashcataca, ñucanchi parlashca shimicunahuan, ruraicunahuanmi ricuchinchi (Gálatas 6:10).

18. Shuj huauquihuan imapash problemata charishpaca ¿imata chai problemata arreglachun ayudanga?

¹⁸ Bibliapi nishca shinaca, ‘cai tucurimui punllacunapi’ gentecunaca paicunapilla pensarijcuna, charishpapash ashtahuan charingapaj munajcunami can (2 Timoteo 3:1, 2). Chaimandami Jesusta catijcunaca Jehová Diostapash, shuj huauquipanicunatapash ashtahuan juyangapaj, Bibliapi yachachishcacunatapash ashtahuan alicachingapaj esforzarina capanchi. Shinapash, juchayucuna caimandami huaquinbica, shuj huauquihuan ashata nanarishca cashun. Shina pasajpica, ñucanchi huauquita juyaimandami ima problemata charishca cashpapash, chai problemataca juyaihuan uchalla arreglashun (Efesios 4:32; Colosenses 3:14). Tucui shunguhuan juyashpa causanataca na saquinachu capanchi. Ashtahuangarin, Jehová Diostapash, ñucanchi huauquipanicunatapash tucui shunguhuan juyashpa, Bibliapi yachachishcacunatapash tucui shunguhuan alicachishpami catina capanchi.