‘Shuj llactamanda shamushcacunataca’ Jehová Diosta cushilla sirvichun ayudapashunchi
“Mandaj Diosca, shuj llactamanda shamujcunatapash cuidajmi” (SALMO 146:9).
CÁNTICO 25, 3
1, 2. a) Ñucanchi huaquin huauquipanicunaca ¿ima llaquicunatata charishca? b) ¿Ima quimsa tapuicunatata cai temapica yachajupashun?
LIJE shuti huauquica ninmi: “Burundi llactapi gentecunata huañuchi callarijpica, ñucapash ñuca familiapash jatun tandanajuipimi carcanchi. Gentecuna caiman chaiman calpanajujta, disparanajujtami ricurcanchi. Ñucapash, ñuca taitamamacunapash, ñucapa 10 huauquipanicunapash ashalla cosascunata apashpami pacajushpa rircanchi. 1.600 kilometrocunata rishpami, ñucapa huaquin familiaca Malaui llactaman chayarca. Cutin shujcunaca, shuj shuj ladocunamanmi rircanchi” nishpa.
2 Mundo enteropica, 65 millón yali gentecunami, paicunapa huasicunatapash saquishpa shuj ladocunapi pacajungapaj rishca. ¿Imamandata shina rishca? Guerracuna tiajpi, o shujcuna catiriashpa llaquichijpimi shina rishca. Huaquin gentecunaca ninmi, cunan punllacunapimi ashtaca gentecuna pacajushpa shuj llactacunaman rishca nishpa * (notata ricupangui). Ashtaca Testigocunapashmi pacajushpa rina tucushca. Taucacunaca familiacunapash illaj, casi tucuilla cosascunapash illajmi quedashca. ¿Ima llaquicunatallata paicunaca charishca? Chashna llaquicunata charishca huauquipanicunataca ¿imashinata Jehová Diosta cushilla sirvichun ayudaita ushapanchi? (Salmo 100:2). Shuj llactamanda pacajushpa rishcacuna na Testigocuna cajpica ¿imashinata paicunaman villachita ushapanchi?
SHUJ LLACTAMANDA PACAJUSHPA RISHCACUNACA ¿IMA LLAQUICUNATATA CHARIN?
3. ¿Imamandata Jesuspash, paipa catijcunapash shuj llactacunaman pacajushpa rina tucurca?
3 Jehová Diospa shuj angelmi Josemanga villarca, rey Herodesca Jesusta huañuchingapaj munajunmi nishpa. Shina villajpimi Joseca, paipa huarmitapash, Jesustapash apashpa Egipto llactapi pacajungapaj rirca. Paicunaca rey Herodes huañungacamanmi Egiptopi quedarca (Mateo 2:13, 14, 19-21). Cutin, ashtaca huatacuna jipaca, contracuna catiriashpa llaquichijpimi, Jesusta catijcunaca ‘Judea, Samaria llactacunapi caiman, chaiman pacajushpa rirca’ (Hechos 8:1). Jesusca alimi yacharca, paipa ashtaca catijcunapash paicunapa huasicunata saquishpa shuj ladocunaman rina tucunata. Chaimandami nirca: ‘Cangunata llaquichingapaj cai pueblopi callarijpica, shuj puebloman pacajushpa ringuichi’ nishpa (Mateo 10:23). Shuj ladocunaman pacajushpa rinaca shinllimi can.
4, 5. a) Shuj llactacunaman pacajungapaj rinajushpaca ¿ima llaquicunatallata charin? b) Pacajuna pushtucunaman chayashpapash ¿ima llaquicunatata charin?
4 Shuj llactacunaman pacajushpa rij gentecunaca ashtaca llaquicunatami charin. Lije huauquipa jipa huauquica, Gad shutimi can. Paica ninmi: “Ñucaca 12 huatacunatami charircani. Tauca semanacunatami chaquilla purircanchi. Ñanbica, ashtaca gentecuna huañushca sirinajujtami ricurcanchi. Ñuca chaquicunaca punguishcapachami carca. Chaimandami ñuca familiataca richilla nircani. Shinapash ñuca taitaca, caipi canda huañuchichunga na saquishachu nishpami ayudarca. Huaquinbica ñanbi sirijushca mangoscunatalla chupashpami paran carcanchi. Jehová Diosta mañashpa, paipi confiashpallami cada punlla causashpa catita usharcanchi” nishpa (Filipenses 4:12, 13).
5 Lije huauquipa tauca familiaca, Naciones Unidaspa pacajuna nishca pushtucunapimi ashtaca huatacunata causashca. Chaicunapipashmi ashtaca llaquicuna tiarca. Lije huauquica, cunanbica superintendente de circuitomi can. Paica ninmi: “Chaipica, casi pipash na trabajota charinllu carca. Chaimandami gentecunaca, imata parlashcata, imata uyashcata caiman chaiman parlanata gushtan carca. Shinallata ufianata, shuhuanata, apostanata, shujhuan shujhuan puñushpa juchapi urmanatami alicachin carca” nishpa. Nalicunata ama yachajungapami Testigocunaca, congregacionbi ocupado cana carca (Hebreos 6:11, 12; 10:24, 25). Jehová Diospa ñaupajpi ali ricurishpa catingapaj munashpami, ashtaca huauquipanicunaca tiempota ali aprovechan carca. Shinami ashtaca huauquipanicunaca precursorcuna tucurca. Chai huauquipanicunaca, imashinami israelitacunaca chaquishca pambacunapi causanata saquirca, shinallatami ñucanchicunapash shuj punllaca pacajushpa causana pushtucunapica, ñana causashun nishpa animarin carca (2 Corintios 4:18).
SHUJ LLACTAMANDA PACAJUSHPA SHAMUSHCACUNATA JUYASHUNCHI
6. Taita Diosta juyaimandaca ¿imatata rurapanchi?
6 ‘Taita Diosta juyaimandami’ ñucanchi huauquipanicunata, ashtahuanbachaca llaqui apanajuj huauquipanicunata juyashcata ricuchinchi (1 Juan 3:17, 18, liingui). Shuj ejemplota ricupashun. Apostolcunapa punllacunapica yarjai punllacunami chayarca. Chaimandami Judea llactamanda huauquipanicunaca llaqui apanajurca. Chaimi shuj huauquipanicunaca paicunata ayudarca (Hechos 11:28, 29, NM). Apóstol Pablo, apóstol Pedropash shuj huauquipanicunata mingachinami canguichi nishpami animarca (Romanos 12:13; 1 Pedro 4:9). Shinaca, ñucanchicunata visitangapaj shamushca huauquipanicunatapash ali chasquishpaca ¿nachu llaquipi cajcunata, o Jehová Diosta sirvimanda catiriashpa llaquichi tucunajushca huauquipanicunatacarin ashtahuan juyashpa chasquina capashcanchi? * (notata ricupangui) (Proverbios 3:27, liingui).
7. Shuj huauquipanicunaca ¿imatallata rurarca?
7 Caina huatacunapillami Ucrania llactamanda ashtaca ashtaca testigo de Jehovacunaca, paicunapa llactapi guerracuna tiajpi, catiriashpa llaquichijpi paicunapa huasicunatapash saquishpa rina tucurca. Huaquin huauquipanicunaca huañuchi tucurcami. Cutin ashtaca huauquipanicunaca, Ucrania llactapillata, o Rusia llactapi shuj Testigocunapa huasicunapimi quedaita usharca. Ucrania llactamanda, Rusia llactamanda huauquipanicunaca na politicacunapi chapurircachu. Shinami paicunaca, ‘na cai pachapajta rurashpa causajcuna cashcata’ ricuchirca. Ashtahuangarin, ‘ali villaicunatami’ cushijushpa villachinajurca (Juan 15:19; Hechos 8:4).
PAICUNAPA FETA SHINLLIYACHICHUN AYUDASHUNCHI
8, 9. a) Shuj llactamanda pacajushpa shamushcacunaca ¿ima llaquicunatata mushuj llactacunapica charin? b) ¿Imamandata paicunaca pacienciahuan ayudachun minishtin?
8 Shuj llactamanda pacajushpa rishcacunaca, paicunapa llactapillata cashpapash shuj ladocunapi causangapami huaquingunaca rina tucushca. Cutin shujcunaca, na rijsishca llactacunapi causangapami rina tucushca. Huaquinbica gobiernocunami ropata, micunata, maipi causana pushtugutapash cun. Shinapash, shuj llactamanda pacajungapaj rishcacunaca ashtaca llaquicunatami charin. Paicunaca na micushca micunacunatami micushpa causana tucun. Cutin huaquinbica, cunuj llactacunamanda cashca cashpami, chirimanda imashina cuidarinataca na yachan. Shujcunacarin, nunca na ricushca mushuj aparatocunata utilizanatami yachajuna can.
9 Huaquin gobiernocunaca shuj llactamanda shamushcacuna mushuj llactapi yacharichunmi, huaquin ayudacunata charin. Shinapash huaquin quillacuna jipaca, paicunapa minishtirishca cosascunata paicunallata rurachunmi saquin. Chaicunata ruranaca, shuj llactamanda pacajushpa shamushcacunapaca shinllipachami can. ¿Imamandata shinlli can? Paicunaca mushuj shimita yachajushpapash, mushuj costumbrecunatapashmi yachajuna can. Shinallata, facturacunata, impuestocunata pagangapaj ima leycuna tiajtapashmi yachajuna can. Huahuacunata escuelaman, colegioman cachangapaj imata ruranata, huahuacunata mushuj llactapi imashina viñachinatapashmi yachajuna can. Huauquipanicuna chashna llaquicunata charijpica ¿imashinata pacienciahuan, respetohuan ayudashun? (Filipenses 2:3, 4).
10. ¿Imashinata shuj llactamanda pacajushpa shamushcacunapa feta shinlliyachi ushapanchi? (Callari dibujota ricupangui).
10 Huaquin gobiernocunaca, shuj llactamanda pacajushpa shamushca huauquipanicuna, chai llactapi huauquipanicunata mascachunga na saquinllu. Huaquin gobiernocunapa organizaciongunacarin, congregacionbi huauquipanicunata mascajpica, na ayudashunllu nishpami manllachingapaj munan. Huaquingunaca ninmi, tandanajuicunaman na rishpa trabajota chasquishpallami, cai llactapica quedaita ushanguichi nishpa. Huaquin huauquipanicunaca manllaimanda, imata ruraitapash na atinaimandami chai trabajocunata chasquin. Chaimandami shuj llactamanda pacajushpa shamushca huauquipanicunahuanga, ucha parlana capanchi. Paicunaca ñucanchicuna paicunamanda preocuparichunmi minishtinajun. Paicunamanda preocuparishpa, ayudashpami paicunapa feta shinlliyachinchi (Proverbios 12:25; 17:17).
SHUJ LLACTAMANDA PACAJUSHPA SHAMUSHCACUNATA AYUDASHUNCHI
11. a) Shuj llactamanda pacajushpa shamushca huauquipanicunaca ¿imatata callaripica minishtin? b) Shuj llactamanda pacajushpa shamushca huauquipanicunaca ¿imashinata agradicishcata ricuchita ushan?
11 Callaripica micunaguta, ropaguta, o shuj minishtirishca cosasgucunatami caraita ushapanchi * (notata ricupangui). Imapash uchilla cosasguta carajpillatami paicunaca ashtacata cushijun. Shinapash, chai huauquipanicunaca na yapata imacunatapash mañajunachu can. Huauquipanicuna imashina ayudajpipash agradicinami can. Shinami huauquipanicunaca cushijushpa ayudanga. Shinapash tiempohuanga, paicunapa minishtirishca cosascunata ruranata yachajunami can. Shina rurashpami paicunallata ali sintiringa, mushuj llactapi huauquipanicunahuanbash ali llevarita ushanga (2 Tesalonicenses 3:7-10). Shinapash, shuj llactamanda pacajushpa shamushca huauquipanicunataca ¿imashinata ayudashpa catita ushapanchi?
Shuj llactamanda pacajushpa shamushca huauquipanicunataca ¿imashinata ayudai ushapanchi? (Párrafo 11-13
12, 13. a) Shuj llactamanda pacajushpa shamushcacunataca ¿imashinata ayudai ushapanchi? b) Shuj ancianocunaca ¿imashinata chuscu huauquicunata ayudarca?
12 Shuj llactamanda pacajushpa shamushca huauquipanicunata ayudangapaca, na ashtaca culqui minishtirinllu. Paicunaca paicunata juyachun, tiempota cushpa ayudachunmi minishtin. Chaimandami, ima buscunata japinata, comprascunata maipi baratolla randinata yachachita ushapanchi. Shinallata, trabajai ushangapaj sirana maquinata,
o shuj herramientacunata maipi randinatami ricuchi ushapanchi. Ashtahuangarin, mushuj congregacionbi ali sintirichunmi ayudaita ushapanchi. Usharijpicarin, nachu tandanajuicunaman apachun minishtinajunguichi ninallami capanchi. Ashtahuanbash, mushuj llactapi imashina villachinata, shinallata paicunahuan villachingapaj llujshishpami ayudaita ushapanchi.13 Shuj llactamanda pacajushpa shamushca chuscu joven huauquicunapa ejemplota ricupashun. Mushuj congregacionman chayajpica, ancianocunami carrota manejanata, computadorapi cartacunata escribinata, trabajota mascangapaj solicitud hojacunata jundachinata yachachirca. Shinallata, Jehová Diosta sirvinata pundapi churangapaj paicunapa tiempota imashina aliguta aprovechanatami yachachirca (Gálatas 6:10). Jipamanga chuscundillatami precursorcuna tucurca. Jehová Diosta ashtahuan sirvingapaj esforzarishcamanda, ancianocuna ayudashcamandami paicunaca, cai mundopa cosascunapi na chapurishpa, congregacionbi ashtahuan ñaupaman catirca.
14. a) Shuj llactamanda pacajushpa shamushca huauquipanicunaca ¿ima tentaciondata aguantana can? b) ¿Imashinata shuj huauquica shinlli feta charishcata ricuchirca?
14 Tucuicunapallatami shuj cosascunata huashaman saquishpa Taita Diosta pundapi churanaca shinlli can. Chaimandami shuj llactamanda shamushca huauquicunapash, chai tentacionbi ama urmangapaj aguantana can * (notata ricupangui). Lije huauquipash, paipa huauquicunapash paicunapa taitata yarishpami nin: “Pacajushpa rinajushpaca, ñuca taitaca asha ashami na minishtirishca cosascunataca shitashpa rirca. Jipamanga, chushaj bolsaguta ricuchishpami asishpa nirca: ‘Ricuichi, causangapaca na ashtaca cosascuna minishtirinllu’” nishpa (1 Timoteo 6:8, liingui).
¿IMAPI AYUDACHUNDA ASHTAHUAN MINISHTIN?
15, 16. a) ¿Imashinata ñucanchi huauquipanicunapa feta shinlliyachita ushapanchi? b) Chai huauquipanicuna ali sintirichunga ¿imashinata ayudai ushapanchi?
15 Shuj llactamanda pacajushpa shamushcacunaca ropata, micunaguta minishtishpapash, ali sintiringapaj, Jehová Diospa ñaupajpi ali ricurishpa catingapami munanajun (Mateo 4:4). Ancianocunaca chai huauquipanicunapa idiomapi publicaciongunata cushpami ayudaita ushan. Shinallata, paicunapa shimita parlaj huauquipanicunata rijsichishpapashmi ayudaita ushan. Shina ayudanaca alipachami can. ¿Imamandata ali can? Paicunaca tucuitami saquishpa shamushca. Paicunapa familiacunata, rijsicunata, congregacionbi huauquipanicunataca ricunayachinajunmi. Paicunapa huauquipanicunahuan tandanajushpami Jehová Dios paicunata juyashcata, llaquishcata cuenta japi ushanga. Paicunata na juyashpa tratajpica, paicunapa llactapura na Testigo gentecunahuanrami cumba tucunga (1 Corintios 15:33, NM). Huauquipanicunata congregacionbi ali chasquishpaca, ‘shuj llactamanda shamushca’ gentecunata Jehová Dios ali cuidachunmi ayudanajupanchi (Salmo 146:9).
16 Jesuspash paipa taitamamacunapash paicunata llaquichingapaj munajuj reycuna huañungacamanmi, paicunapa llactamanga na tigraita usharca. Shinallata, cunan punllacunapi huaquingunaca paicunapa llactacunaman tigraitaca na ushanllu. Huaquingunacarin, paicunapa llactaman tigrangapaca na munanllu. Lije huauquica ninmi, ashtaca taitamamacunaca paicunapa llactapi familiacunata violajta, huañuchijtami ricurca. Chaimandami paicunapa huahuacunahuan llactaman tigrangapaca na munan. Chai huauquipanicunata ayudangapaj munashpaca, Bibliapi nishca shinami paicunata intindishpa, llaquishpa, juyashpa tratana canchi. Shinallata humildemi cana canchi (1 Pedro 3:8). Shuj llactamanda pacajushpa shamushcacunaca, catiriashpa llaquichi tucushcamandami shuj gentecunahuan tranquilo, ali llevaritaca na ushan. Huaquingunaca, huahuacunapa ñaupajpi ima llaquicunata charishcata parlanataca pinganayachinmi. Pensaripashunchi: “Ñuca chashna llaquipi cashca cashpaca ¿imashina tratachunda munaiman?” nishpa (Mateo 7:12).
SHUJ LLACTAMANDA PACAJUSHPA SHAMUSHCACUNA NA TESTIGO CAJPICA ¿IMASHINATA VILLACHINA CAPANCHI?
17. Shuj llactamanda pacajushpa shamushcacunaman villachishpaca ¿imashinata ayudai ushapanchi?
17 Cunan punllacunapica, Testigocunata na villachichun saquishca llactacunamandami ashtaca Testigocunaca pacajushpa rishca. Shinapash, Testigocuna villachingapaj esforzarijpimi, shuj llactamanda pacajushpa rishcacunaca ali villaicunata primera vez uyai ushashca (Mateo 13:19, 23). Ashtacacunaca shaijushcami sintirin. Chaimandami tandanajuicunapi cashpaca, tranquilo, munailla sintirin. Shinami paicunaca nishca, “Taita Diosca, cangunahuambachami cashca” nishpa (Mateo 11:28-30; 1 Corintios 14:25).
18, 19. Shuj llactamanda pacajushpa shamushca gentecunaman villachinajushpaca ¿imashinata cuidadota charishcata ricuchi ushapanchi?
18 Shuj llactamanda pacajushpa shamushcacunaman villachijushpaca, cuidadota charinami capanchi (Proverbios 22:3; Mateo 10:16). Paicunahuan parlajushpaca pacienciahuanmi uyana canchi. Shinapash politicamandaca na parlanachu canchi. Sucursalpa instrucciongunata, ñucanchi llactapi autoridadcuna imata nishcatami catina canchi. Shinami ñucanchicunaca na imapash peligropi cashun, shujcunatapash na peligropi churashun. Shuj llactamanda pacajushpa shamushcacunaca shuj religiongunata, shuj costumbrecunatami charin. Chaimandami paicuna imata pensajta, imashina sintirijta yachana canchi, respetanapash canchi. Shuj ejemplota ricupashun. Shuj llactamanda gentecunaca, huarmicuna imashina vistirinamandaca shuj shuj yuyaicunatami charin. Chaimandami chai gentecunaman villachingapaj rigrinajushpaca, paicunata ama nali sintichingapami ali ricushpa imagutapash churajuna capanchi.
19 Jesusta catijcunaca, gentecuna Testigo cajpi na Testigo cajpipash sufrinajujpica ayudangapami munanchi. Paicunata ayudashpaca, Jesús parlashca Samaria llactamanda runagushnami canchi (Lucas 10:33-37). Ashtahuanbachaca ali villaicunata villashpami chai gentecunataca ayudanchi. Shuj ancianoca shuj llactamanda pacajushpa shamushcacunatami ayudashca. Paica ninmi, paicunaman villachijushpaca uchami testigo de Jehovami cani nina canchi. Shinallata ninami canchi, imapash cosascunahuan ayudaitaca na ushapanchichu, Bibliamanda parlangapami munapanchi nishpa.
JUYAIHUAN TRATANACA ALIMI CAN
20, 21. a) Shuj llactamanda pacajushpa shamushca gentecunata juyaihuan tratanaca ¿imamandata ali can? b) ¿Imatata cati temapica yachajupashun?
20 ‘Shuj llactamanda shamushcacunata’ ali tratanaca alipachami can. Eritrea llactamanda Alganesh shuti panigu ima pasashcata ricupashun. Paipa llactapica catiriashpami llaquichinajurca. Chaimandami paipa cusa huañujpica, paipa 6 uchilla huahuagucunata apashpa shuj llactaman pacajungapaj rirca. Chaquishca chaquishca pambacunatami 8 punllacunata chaquilla rirca. Chai tucuita purishca jipami, Sudán llactaman chayarca. Chai paniguca ninmi: “Chai llactamanda huauquipanicunaca, paicunapa familia cajpishnami ali tratahuarca. Micunaguhuan, ropaguhuan, maipi causana pushtuguhuan, buspi rinahuanbashmi ayudahuarca. Na rijsishpapash, testigo de Jehovacunapura caimandallami paicunapa huasipica cushijushpa chasquin” nin (Juan 13:35, liingui).
21 Shuj llactamanda shamushca gentecunapa huahuacunamanga ¿imatata nita ushapanchi? Cati temapimi, chai familiacunapash Jehová Diosta cushijushpa sirvichun imashina ayudanata ricupashun.
^ par. 2 Cai temapica, shuj llactamanda pacajushpa rishcacuna nishpaca, guerracunamanda, shujcuna catiriashpa llaquichishcamanda, terremotocuna tiashcamanda paicunapa huasicunatapash saquishpa rishcacunatami shina ninajunchi. Huaquingunaca, paicunapa llactapillata o shuj llactamanmi pacajushpa rin.
^ par. 6 “Shuj llactamanda gentecunataca llaquishpa ali tratashunchi” nishca temataca, Villajun octubre 2016 revistapi 3-8 paginacunapi ricupangui.
^ par. 11 Shuj llactamanda huauquipanicuna pacajushpa shamushcandimi, ancianocunaca Organizados para hacer la voluntad de Jehová libropa capítulo 8, párrafo 30
^ par. 14 “Na pipash ishcai amota sirvi ushanllu”, shinallata “Jehová Diosmi ayudanga” nishca temacunata Villajun 1 de abril 2014 revistapi, 17-26 paginacunapi ricupangui.