ÑUCA taitamamacunaca 1910 huatacamanmi Tiflis-Georgia llactapi causarca. Chai jipaca, Saskatchewan-Canadá llactapimi shuj uchilla haciendapi causangapaj rirca. Ñucaca 1928 huatapimi nacirircani. Suctapura huahuacunamandaca ultimomi carcani. Ñuca naciringapaj 6 quillacuna faltajujpillatami ñuca taitaca huañushcarca. Ñuca mamitapash, ñuca llullugu cajpillatami huañushcarca. Jipamanga, ñucapa paya panigupashmi 17 huatacunatalla charishpa huañurca. Chaimi pichapura huahuacuna quedarcanchi. Ñucanchipa tioca, Nick shutimi carca. Paimi ñucanchicunataca viñachingapaj japirca.

Shuj punllaca ishcai huatacunata charishpami caballopa chupata chutajushcarcani. Chaimandami ñuca familiaca, cuidado caballora jaitanman nishpa caparishcarca. Shinapash ñucaca nimata na uyashcarcanichu. Antsicarin, na imapash pasahuarcachu. Shinapash chaipimi ñuca familiaca, ñuca na uyajujta sordo cashcata cuenta japishcarca.

Ñuca familiapa shuj rijsimi nishcarca, paitaca na uyaj huahuacunapa escuelamanrapash cachanguichimanga nishpa. Shina nijpimi ñuca tioca, Saskatoon-Saskatchewan llactapi escuelaman cachahuarca. Ñucaca 5 huatacunatallami charircani. Ñuca familiata saquishpa caruta rinataca ninandami manllanayahuarca. Fiesta punllacunapilla, vacación punllacunapillami familiapamanga rita ushan carcani. Tiempohuanga, señas shimita yachajushpami, escuelapi cumba huahuacunahuanbash cushijushpa pugllajun carcani.

Ñucapa shuj paya panica Marion shutimi carca. Paica, 1939 huatapimi cazararca. Paipa cusaca, Bill Danylchuck shutimi carca. Paicunami ñuca pani Francestapash, ñucatapash cargo tucurca. Ñuca familiamandaca, paicunami pundapica testigo de Jehovacunahuan Bibliata estudiai callarirca. Vacaciongunapimi Bibliapi imata yachajushcata ñucamanbash yachachingapaj esforzarin carca. Paicunaca señas shimitaca na yachanllu carca. Chaimandami paicunahuan intindirinaca shinlli carca. Shina cajpipash, Jehová Diosmanda yachajunata ñuca alicachijtami paicunaca cuenta japirca. Ñucapash, Bibliamanda cabalta yachachinajujta cuenta japishpami paicunahuan villachingapaj rircani. Shinami asha tiempo jipaca, bautizaringapaj munashpa 5 de septiembre de 1941 huatapi bautizarircani. Ñuca panipa cusa Billmi, shuj jirru tanque yacupi bautizahuarca. Chai yacuca chiri chirimi carca.

1946 huatapi vacacionbi huasiman tigrashpami, Cleveland-Estados Unidos llactapi jatun tandanajuiman rircanchi. Callari punllaca, imata yachachijujta ñuca intindichunmi ñuca panicunaca, discursocunapi imata nijta anotashpa ricuchihuarca. Shinapash cati punllaca, jatun tandanajuita señas shimiman traducinajujta yachaj chayashpami ninanda cushijurcani. Chaiman rishpami jatun tandanajuipipash, Bibliapi imata nijujtapash por fin intindi usharcani. Cushijushcapachami carcani.

Segunda Guerra Mundial tucurijpimi gentecunaca, paicunapa llactata apoyanajushcata ricuchingapaj munanajurca. Shinapash, jatun tandanajui jipa escuelaman tigrashpaca, Jehová Diosta pundapi churana munaihuanmi tigrarcani. Chaimandami banderata saludanata, señas shimipi himno nacionalta candanatapash, fiesta punllacunata yarinatapash saquircani. Shinallata, ñuca cumbacunahuan iglesiaman rinatapashmi saquircani. Chaimandami escuelapi profesorcunaca culirashpa ñucamanga llullacunata nin carca. Shinapash ñucaca na crircanichu. Ñuca cumbacunaca profesorcuna imata nijtaca ricunajurcami. Chaimi ñucaca paicunaman villachita usharcani. Shinami tiempohuanga, huaquin cumbacunapash Testigocuna tucurca. Shujca Larry Androsoff shutimi carca. Shujca, Norman Dittrickmi carca, cutin shujca Emil Schneider shutimi carca. Paicunaca cunangamanmi Jehová Diosta sirvinajun.

Shuj llactacunaman rishpaca, na uyaj gentecunaman villachingapami esforzarin carcani. Montreal llactapi cajpi ima pasashcata parlapasha. Sordo gentecunalla tandanajuj pushtuman rishpami, Eddie Tager shuti pandillero huambraguman villachircani. Paica, Laval-Quebec llacta señas congregacionbimi caina huatacaman sirvirca. Paica caina huatami huañurca. Shinallata, Juan Ardanez shuti huambragutami rijsircani. Paita rijsishpaca, apostolcunapa punllacunapi Berea llactamanda gentecunatami yarircani. Paica, Bibliamanda cabalta yachachijushcata ricungapami aligutapacha investigan carca (Hechos 17:10, 11). Paica testigo de Jehovami tucurca. Shinallata, huañungacamanmi Ottawa-Ontario llactapi anciano shina sirvijurca.

1950 huatapimi, Vancouver llactapi causangapaj rircani. Sordo gentecunaman villachinatami alicachin carcani. Shinapash, Chris Spicer shuti huarmiguman callepi villachishcataca nunca na cungashachu. Chai huarmiguca na sordachu carca. Paica tucui quillacuna ñucanchi revistacunata chasquingapami munarca. Shinallata paipa cusatapash rijsichingapami munarca. Paipa cusaca Gary shutimi carca. Paicunapa huasiman rishpaca,  papelpi escribishpami paicunahuanga unaillaguta parlarcanchi. Tauca huatacuna jipami, paicunahuanga Toronto-Ontario llactapi tiashca jatun tandanajuipi tuparircanchi. Paicunaca cushijushpami saludangapaj quimirimurca. Garyca chai jatun tandanajuipimi bautizarigrijushcarca. Paicunata ricushpami yarcani, villachishpa catinaca minishtirishcapacha cashcata. Ñucanchi villachishca gentecuna, jipaman Testigo tucunataca na yachanchichu.

Jipamanga Saskatoon llactamanmi tigrarcani. Chaipimi shuj huarmiguca ñuca ishcai gemela ushicunaman Bibliata yachachipai nirca. Paicunaca sordagucunami carca. Shujca Jean, shujca Joan Rothenberger shutimi carca. Paicunapash ñuca estudiashca escuelapillatami estudianajushcarca. Paicunapash Bibliapi imata yachajunajushcataca uchami paicunapa cumbacunaman parlashcarca. Chaimandami, Eunice Colin shuti cumbapash, shuj chuscu cumbacunapash bautizarirca. Eunicetaca colegiopi último huatata cashpami rijsircani. Chai punllaca shuj carameloguta carashpami tapuhuarca ¿nachu quiquinba amiga caita ushani? nishpa. Tiempohuanga ashtacatami Eunicetaca juyarcani. Paimi ñuca huarmigu tucurca.

Bibliata Eunice yachajui callarishcata yachashpami, paipa mamaca escuela directorhuan parlarca. Directortaca nircami, Bibliata ama yachajushpa catichun ñuca ushihuan parlapai nishpa. Ama yachajuichu nijpipash, Bibliamanda publicaciongunata director quichujpipash, Euniceca Jehová Diosta saquingapaca nimamanda na munarcachu. Bautizaringapaj munajujpica taitamamacunaca nircami: “Testigo de Jehová tucushpaca, cai huasimandaca rita rihuangui” nishpa. Shina nijpimi, Euniceca 17 huatacunatalla charishpapash, shuj Testigocunahuan causangapaj rirca. Shinami Euniceca Bibliata yachajunata na saquishpa bautizarirca. 1960 huatapimi cazararcanchi. Paipa taitamamacunaca ñucanchi cazarajuj punlla cumbangapaca na shamurcachu. Huaquin huatacuna jipaca, ñucanchicuna imata crishcata ricushpa, huahuacunata aliguta viñachijujta ricushpami,  Eunicepa taitamamacunaca ñucanchita respetai callarirca.

Ñucanchicunaca 7 huahuacunatami chariparcanchi. Paicunaca na sordocunachu can. Paicunata viñachinaca shinllimi cashca. Huahuacunahuan parlangapaj, Bibliamanda yachachingapami señas shimita paicunaman ali yachachingapaj esforzarircanchi. Congregacionbi huauquipanicunapashmi ashtacata ñucanchitaca ayudarca. Shuj punllaca, shuj papelgupi escribishpami shuj huauquica ñucanchimanga villarca, quiquingunapa shuj huahuaca nali shimicunatami Tandanajui Huasipica nijun nishpa. Chaimandami chai rato ñucanchi huahuahuan parlarcanchi. Ñuca chuscu churicunaca ancianocunami can. Paicunaca James, Jerry, Nicholas, Stevenmi can. Paicunapa familiacunandimi congregacionbi sirvinajun. Ashtahuangarin, Nicholas paipa huarmi Deborapash Gran Bretaña sucursalpimi, Equipo de Traducción de señaspi sirvinajun. Cutin, ñucanchi churi Steven, paipa huarmi Shannanpash Estados Unidos sucursalpimi, Equipo de Traducción de señaspi sirvinajun.

Ña 40 huatacunata cazarashcata pactachinajushpami, ñuca huarmiguca cancerhuan huañuparca. Ungushca punllacunapica, huañushcacuna causarinata yachashpami animarin carca.  Huañushcacuna causarina punllataca tucui shunguhuanmi shuyajuni.

Febrero de 2012 huatapimi, cinturas tullu faquirijta urmarcani. Shujcuna cuidachun minishtijushpami, ñuca churihuan ñuca jachunhuan causangapaj rircani. Paicunahuanga, Calgary Alberta llacta señas congregacionbi tandanajuicunamanmi rinchi. Chai congregacionbica anciano shinami sirvijuni. Primera vezmi señas congregacionbi cani. Shinaca ¿imashinata inglés shimita parlaj congregacionbi cashpapash, shinlli feta chari ushashcani? Shinlli feta charichunga Jehová Diosmi ayudahuashca. Taita illaj huahuacunataca cuidajushami nishca shimicunataca paica pactachishcami (Salmo 10:14). Ñucata ayudangapaj munaimanda, papelcunapi escribishca huauquipanicunata, señas shimita yachajushca huauquipanicunata, señas shimiman traducishca huauquipanicunatapash ashtacatami agradicipani.

Huaquinbica shujcuna imata ninajujta na intindi ushashpa, sordocunata imashina ayudanataca na yachanllu yashpami desanimarin carcani. Shinapash, chai ratocunapica apóstol Pedropa shimicunatami yarin carcani. Paica Jesustaca nircami: “Jesús, ¿pipajmanda rishunyari? Canllami, causaita causagrinata caraj shimicunataca charingui” nishpa (Juan 6:66-68). Imashinami ashtaca sordo huauquipanicunaca ashtaca huatacunata pacienciata charishca, shinallatami ñucapash pacienciata charinata yachajushcani. Shinallata Jehová Diospi, paipa organizacionbi confianatami yachajushcani. Chaita ruranaca alipachami cashca. Cunanbica, ashtaca publicaciongunami señas americano nishca shimipi tian. Chaimandami, tucui tandanajuicunapi imata nijta intindi ushapani. Ñucanchi Jehová Diosta sirvishpa causaimandaca, ashtaca bendiciongunatami charipashcani. Cushillapachami causapashcani.