Bibliapica ninmi: “Shinamandami, imata cashpapash charijyanata munashcamandalla na rurana canguichi. Cunan imaguta charishpapash, chaihuanlla cushijushpa causanguichi” (Hebreos 13:5).

Cai mundopi gentecunaca, causangapaca ashtaca cosascunatami charina can ninmi. Shinapash Bibliapica charishca cosascunahuan cushilla causai usharinmi nin. Chaipaca ¿imatata rurana capanchi?

Ashtaca culquita charingapaca na munanachu capanchi. Ashtacacunaca “culquita juyashpa” causaimandami nali salud charishca, familiata, amigocunatapash saquishca, nalicunata rurai callarishca, shujcunapa ñaupapipash nali quedashca (1 Timoteo 6:10). Paicunaca ashtaca ali cosascunatami saquishca. Shinallata ashtahuan chariyangapaj munajcunaca ‘na cushilla’ causai ushangachu (Eclesiastés 5:10).

Gentecunaca cosascunamanda yali valishcami can. Huaquin cosascunataca imagupipash utilizanchimi. Shinapash chai cosascunaca ñucanchita ali trataita, juyaitapash na ushanllu. Chaitaca gentecunallami ruraita ushan. Shinallata shuj ali amigota charinami cushilla causachun ayudai ushan (Proverbios 17:17).

Bibliapica ninmi: “Cushilla shunguhuan causanaca, cuerpopajpash ali jambigumi” (Proverbios 17:22).

Ungüicunata aguantachunga cushilla causanami shuj jambigushna ayudaita ushan. Shinapash ungüicunata charishpa, cushilla causachunga ¿imata ayudaita ushan?

Agradicishcata ricuchina capanchi. Ungüicunata charishcamanda cada punlla quejarijushpaca, tucui punllacunami ñucanchicunapaca nali canga (Proverbios 15:15). Shinapash Bibliapica cashnami nin: “Pagui ninajunami canguichi” nishpa (Colosenses 3:15). Ñucanchicunaca causaimanda o uchilla cosascunamandami cada punlla agradicina capanchi. Shinallata indi juyaillata huashujujpi, huairata imashina sintijta, o shuj juyashca familia cushilla cajta ricushpami cushilla caita ushapanchi.

Shujcunamanda imagutapash rurana capanchi. Bibliapica, “carajpi japijcunatapash yalimi carajcunaca, ninanda cushijun” ninmi. Chaita ruranami ungüicunata charishpapash cushilla causachun ayudan (Hechos 20:35). Shujcunata ayudashcamanda paicuna ñucanchita agradicijpica cushillami sintiripanchi. Shina sintirishpami ñucanchi charishca problemacunamandaca na yapata preocuparinchi. Shujcunata ayudanami ashtahuan ali sintirichun ayudan.

Bibliapica ninmi: ‘Ima ashtahuan importante cashcata pundapi churana’ capanchi (Filipenses 1:10, NM ).

Cusahuarmi na pacta yalijpica asha ashami caruyaita ushan. Chaimandami cusahuarmicunaca cazarashca causaitaca paicunapa causaipica ninan valishca cashcatami ricuna can.

Imagutapash pacta rurapaichi. Bibliapica, “ishcaipura causanami ashtahuan ali” can ninmi (Eclesiastés 4:9). Quiquin imata gushtashcata ruranapa randica, cusahuarmi imagutapash pacta rurangapaj esforzarina capangui. Por ejemplo, ishcandimi yanuita ushapanguichi, puringapaj llujshi ushapanguichi, tranquilo cangapaj ishcandi cafeguta ufiai ushapanguichi o imagutapash pacta rurai ushapanguichi.

Juyarishpa causanguichi. Bibliapica, cusahuarmicunaca juyarishpa, respetarishpa causana canguichi ninmi (Efesios 5:28, 33). Cushilla ricuna, juyaihuan ugllana o shuj regaloguta caranaca cusahuarmi ali causachunmi ayudan. Shinallata cusahuarmicunaca ishcandi pacta puñuna cashcataca na cunganachu can (Hebreos 13:4).