Huañuimandaca pipash na salvarita ushanchichu
CAIPI pensaripai, shuj peliculata ricujupashcanguiman. Chai peliculapica futbolta alipacha pugllaj jaripa causaimandami ricuchijunman. Chai jari futbolta imashna pugllajtaca ninandami alicachipangui. Chai peliculapica chai jari huahua cashpa futbolta pugllanata imashna yachajushcatami ricupangui. Shinallata ashtaca horascunata entrenajushcatapashmi ricupangui. Shinami jipamanga chai jari shuj alipacha equipopa pugllajushcata, shuj llactacunapipash rijsishcapacha tucushcata ricupangui. Shinapash chai jarica asha asha rucuyashpa, huañushcatami chai peliculapica ricupangui.
Chai jari ña huañushca cashpapash chai peliculapica chai jaripa causaimandami ricuchijun. Shinallatami pipash científico cashpa, imapash pugllaicunapi alipacha pugllador cashpa o rijsishcapacha cashpapash imahorapash huañunallatami can. Shinapash pensarinchipashchari, chai gentecunaca alipacha cosascunatami rurashca. Paicuna na mayoriashpa, na huañushpaca ashtaca cosascunatami ruranman carca nishpa.
Imashinami ricupanchi, tucuicunallatami imahorapash huañuna capanchi (Eclesiastés 9:5). Causashpa catingapaj imacunatapash rurashpapash mayoriashpa, huañunallatami tucunchi. Shinallata huaquinbica na yashcapimi imapash llaqui apashpa o imapash millai ungüi japijpi huañunchi. Bibliapi nishcashnami, ñucanchicunaca ‘fuyu ricurishpa, ñapash tucurinashna causanchi’ (Santiago 4:14).
Ashtacacunaca huañungapallami causanchi nin. Chaimi paicunaca, “micushunchi, ufiashunchi, cayaca huañuipajpash canchi” nin (1 Corintios 15:32). Shina nishpaca paicuna imahorapash huañunata ali yachashcatami ricuchin. Chaimi imahorapash shuj llaquita apashpaca ¿huañungapallachu causanchi? nishpa tapurinchi. Chai tapuimandaca ¿maipita yachajui ushapanchi?
Cunanbica cientificocunapash, doctorcunapash gentecuna ashtahuan causashpa catichunmi imacunatapash rurashca. Chaimi gentecunaca cientificocunapi confiashca. Shinapash cientificocuna, doctorcunapash shina rurajpipash tucuicunallatami cai cati tapuicunata na yachashpa catipanchi: Gentecunaca ¿imamandata mayoriashpa huañunchi? ¿Imahorapash huañuica tucuringacha? nishpa. Cati temacunapimi chai tapuicunamanda yachajupashun. Shinallata gentecunaca ¿huañungapallachu causanchi? nishca tapuitapashmi yachajupashun.