Taita Diosca cashnami Adanmanga nirca: “Ima punlla cashpapash, chai yuramanda micushpaca huañunguipachami” nishpa (Génesis 2:17). Adán maimanda huañuna cajpica Taita Diosca na shina advirtinmanllu carca. Shinallata Adanga chai yuramanda imahorapash micushpa huañuna cashcataca alimi yacharca.

Jardín de Edenbica ashtaca yuracunapa fucushcata micungapami Adanbash, Evapash charirca. Chaimi chai yuramanda micunataca na minishtirca (Génesis 2:9). Adanbash, Evapash chai yurapa fucushcata na micushpaca, paicunaman causaita cuj Taita Diosta cazungapaj munashcatami ricuchinman carca. Shinallata Taita Dioslla ima ali cajta, ima nali cajta nina derechota charishcatami ricuchinman carca.

Adanbash, Evapash imamanda huañushcata yachangapaca paicuna imata rurashcatami yachana capanchi. Paicuna chaita rurashcamandami cunangaman sufrishpa causanchi. Diabloca shuj nali angelmi carca. Diabloca shuj culebrata parlachishpami Evamanga llullacunata nirca. Bibliapica ninmi: “Ashtahuangarin Mandaj Taita Dios rurashca, pambapi causanajuj animalcunamanda yalica culebrami, umachinata alipacha yachaj carca. Chai culebrami, huarmitaca cashna nirca: Shina cashpaca, ¿Taita Dioschu cangunataca: ‘Huertapi tucui yuracunamandaca, na micunachu canguichi’ nirca? nishpami tapurca” nishpa (Génesis 3:1).

Chaimi Evaca cashna nirca: ‘Huertapi tiaj yuracunapi fucushcataca, micui ushanchimi. Ashtahuangarin Taita Diosca, huerta chaupipi shayajuj yurapi fucushcamandami cashna nirca: ‘Ama huañungapaca, chai yuramandaca napacha micunachu canguichi, tacaritapash na tacarinachu canguichi’’ nishpa. Shina nijpimi chai culebraca Evataca cashna nirca: ‘Na huañunguichica. Ashtahuangarin chai yuramanda ima punlla micushpapash, cangunapaj ñavi pascarijpimi, Taita Dios yachanshnallata alita, nalitapash yachanguichi. Chaitaca, Taita Diospash yachanmi’ nishpa. Diablo shina nishpaca Jehová Dios llulla cashcata, ali cosascunata Adanmanbash, Evamanbash na cungapaj munanllu nishpa llullajushcatami ricuchijurca (Génesis 3:2-5).

Shinapash Evaca Diablopa nishcatami crirca. Chaimi Evaca chai yurapa frutata ricushpa, micunayai cashcata ricurca. Chai jipaca chai yurapa frutata japishpa Evaca chai na micuna frutata micurca. Bibliapica chai jipa ima tucushcatami nin. Chaipica ninmi: Evaca “paipaj cusamambash carajpimi paipash” micurca nishpa (Génesis 3:6).

Taita Diosca Adanbash, Evapash paita na cazushcata ricushpaca ninandami llaquirishcanga. Shinapash Jehová Diosca ¿imatata rurarca? Jehová Diosca Adandaca nircami: “Can cutin alpa tucungacamanmi,  imatapash rurashpa, cambaj ñavipi ninanda jumbishpa micungui. Canga, chai alpamanda japishpami rurai tucurcangui. Ñutu alpami cangui, ñutu alpallatami tigrangui” nishpa (Génesis 3:17-19). Jehová Dios nishcashnami pasarca. Bibliapica ninmi: “Adanga tucuimandaca, iscun patsaj quimsa chunga huatata causashpami huañurca” nishpa (Génesis 5:5). Adán huañushpaca cielopi o shuj ladopi na causashpa catircachu. Adandaca Jehová Diosmi alpamanda rurarca. Chaimi Adán huañushpaca cutin alpamanllata tigrarca.

Adanbash, Evapash Taita Diosta na cazushcamandami juchayucuna tucushpa, para siempre causana bendicionda chingachirca. Chai punllamandapachami paicunapa cuerpopipash cambiocuna tiarca. Shinapash na paicunallachu juchayucuna tucurca. Paicuna Jehová Diosta na cazushcamandaca tucui paicunapa miraicunapashmi juchayucuna tucurca. Romanos 5:12​pica ninmi: “Juchata ruranaca, shujlla runamandami cai pachapica callarirca. Chai juchamandami, huañuipash callarirca. Shinallatami tucuicuna juchata rurashcamandaca, huañuipash tucuicunapajman yalijun” nishpa.

Huañuimanda parlashpaca Bibliapica cashnami nin: “Mandaj Diosca, cai urcupimi tucuicunata jahualla quilpashca tiajujtaca tucuchinga. Tucui llactacunapi causajcunapaj ñavita quilpashca telatapashmi tucuchinga” nishpa (Isaías 25:7). Shina nishpaca juchamanda, huañuimandapash nipipash na quishpiri ushashcatami ningapaj munan. Chaimi “Adán runapaj miraicunaca, tucuicuna huañunajun” (1 Corintios 15:22). Shinaca ñucanchicunapashmi apóstol Pablo tapurishcashnallata cashna tapuripanchi: “Huañuchun charijuj cai cuerpomandaca, ¿pita ñucataca cacharichihuanga?” nishpa. Shinaca ¿pita huañuimandaca salvaita ushan? (Romanos 7:24).