Ima ali, ima nali cashcata decidingapaca: Bibliami ayudaita ushan
Biblia ima chuscu cosascunapi ñucanchita ciertopacha ayudajta ricupashunchi. Ashtaca gentecunami Biblia ciertopacha ayudajta cuenta japishca.
1. Matrimoniopi
Matrimoniopi causai imashina canamandaca na tucuicunachu chai yuyaitallata charin. Matrimoniocuna cushilla causangapaj imacunatallata minishtishcamanda parlashpaca shuj shuj yuyaicunatami charin.
BIBLIAPICA ¿IMATATA NIN?: “Cada unomi quiquinguna juyarinshnallata quiquingunapa huarmitaca juyana capanguichi. Shinallata huarmicunapash, quiquingunapa cusataca tucui shunguhuanmi respetana capanguichi” (Efesios 5:33).
CAIHUANGA ¿IMATATA NINGAPAJ MUNAN?: Taita Diosmi matrimoniotaca callarichirca. Chaimandami shuj matrimonio cushilla causangapaj imata minishtishcataca ali ali yachan (Marcos 10:6-9). Cusahuarmicunaca paicuna imata rurachun munashcapilla pensarinapa randica, paicunapa matrimonio ashtahuan shinlli tucuchun, imata rurana cashcapi pensarishpallami ashtahuan cushilla causaita ushanga. Cusacunaca paicunapa huarmigucunata juyashcataca aliguman tratashpa cuidashpami ricuchin. Cutin huarmigucunaca cusaguta respetashcataca paita apoyashpa aliguman parlashpami ricuchin.
BIBLIAPA CONSEJOCUNACA AYUDANMI: Quang shuti jarigu y paipa Thi shuti huarmiguca, Vietnam llactamandami can. Paicunaca paicunapa matrimoniopica nuncapash na cushilla causaitaca usharingachu yarcami. Quang shuti cusaca paipa huarmiguhuanga yapa grosero millai millaimi carca. Paica ninmi: “Ñuca huarmigu imata pensashcata na valichishpami ashtaca viajecunatami nali tratarcani”. Chashna tratajpimi huarmiguca divorciaringapaj munarca. Huarmiguca,“Ñuca cusapi confiaita, respetaita ñana ushashcatami sintircani” ninmi.
Asha tiempo jipaca cai cusahuarmica Bibliata estudiashpami Efesios 5:33pi consejota pactachirca. Cai consejo imapi ayudashcatami parlan. Cusaca, “Cai versoca ñuca huarmiguta ali, juyaihuan tratashpa tanto emocionalmente fisicamente tucuipi cuidana cashcata intindichunmi ayudahuarca”. Shinallata “cashna tratajpi ñuca huarmigu ñucata ashtahuan juyashpa tratajtami ricurcani” ninmi. Cutin huarmiguca, “Ñucaca Efesios 5:33 nishcashnami ñuca cusaguta ashtahuan respetangapaj esforzarini. Y ñuca cusaguca tranquila, ali sintirichunmi ayudahuan” ninmi.
Matrimoniomanda ashtahuan yachangapaj munashpaca jw.org paginapi Rijcharipaichi núm. 2 de 2018 revistapi “Familiacuna cushilla causachun 12 yuyaicuna” nishca temata ricupangui.
2. Shujcunata imashina tratanamanda
Gentecunaca shujcunata shuj razata charishcamanda shuj llactamanda cashcamanda, homosexualcuna cashcamanda y shuj religionda charishcamandami nali tratan.
BIBLIAPICA ¿IMATATA NIN?: “Tucui clase o tucui laya gentecunatami respetana capanguichi” (1 Pedro 2:17).
CAIHUANGA ¿IMATATA NINGAPAJ MUNAN?: Bibliapica shuj llactamanda gentecunata, homosexualcunata nali tratachunga na mandanllu. Ashtahuangarin maijan llactamanda cajpi, ima razata charijpi, rico o pobre cajpipash, Bibliapica tucui laya o tucui clase gentecunata respetachunmi yachachin (Hechos 10:34). Shujcunapa crishcacunahuan o ruraicunahuan na de acuerdo cashpapash tucuicunatami respetohuan aliguman tratana capanchi (Mateo 7:12).
BIBLIAPA CONSEJOCUNACA AYUDANMI: Danieltaca Asia llactamanda gentecunaca peligrosomi can nishpami yachachirca. Chaimandami paica Asia llactamanda tucui gentecunata na ricunayachishpa shujcunapa ñaupapi paicunata nalicachishpa riman carca. Paica ninmi: “Ñucaca paicunata shina tratanaca alimi can. Ñuca llactatami apoyajuni yanmi carcani. Ñuca rurashcacuna, ñuca pensashcacuna nali cashcataca pensaitapash na pensarcanichu”.
Jipamanga Danielca Bibliata yachajushpami cambiarca. Paica ninmi: “Taita Diospa ñaupapi tucui gentecuna igual cashcata yachajushpami ñucapash Taita Dios ricunshnallata tucui gentecunata ricui callarircani”. Cunanga Danielca pitapash por primera vez rijsishpaca ¿imatata pensan? Paica ninmi: “Cunanga shuj persona maimanda cashcataca ñana ricujunichu. Tucuicunatallatami juyaihuan tratani y mundo enteromanda amigocunatapashmi charipani”.
Ashtahuan yachajungapaj munashpaca jw.org paginapi Rijcharipaichi núm. 3 de 2020 revistapi “Tucuicunata igual tratachunga ¿imata ayudanga?” nishca temata ricupangui.
3. Culquimanda
Cushilla causangapaj, jipacunaman ali causangapaj munashpami gentecunaca rico o charij tucungapaj munan.
BIBLIAPICA ¿IMATATA NIN?: “Ali yachajushca canaca, jarcarina jirrushnami. Culquipash jarcarina jirrushnallatami. Ashtahuangarin ali yachaica, alipacha yachajushcacunaman causaita cuj cashcamandami ashtahuan ali” (Eclesiastés 7:12).
CAIHUANGA ¿IMATATA NINGAPAJ MUNAN?: Culqui minishtirishca cashpapash cunan punllacunapi ciertopacha cushilla causachun, shamuj punllacunapipash cushilla causachunga na ayudangachu (Proverbios 18:11; 23:4, 5). Ciertopacha cunan punllacunapi, shamuj punllacunapi cushilla causangapaj munashpaca, Bibliapa mandashca consejocunatami pactachina capanchi (1 Timoteo 6:17-19).
BIBLIAPA CONSEJOCUNACA AYUDANMI: Indonesiamanda Cardo shuti shuj jarica rico tucungapaj munashpami ninanda trabajashpa rico tucurca. Paica ninmi: “Ñucaca viajashpa, huasicunata carrocunata y shuj valishca valishca cosascunata randishpami, shujcuna na chari ushashca cosascunata randi ushashpa cushijushca carcani. Shinapash chashna causaica cungashcapimi ñapash tucurirca. Paica ninmi: “Cungashcapi umachishpami tucui tucui culquita shuahuarca. Chai culquita charingapaca ashtaca huatacunatami shinllita trabajashca carcani. Chaimi shuachishpaca imapapash na sirvi, imatapash na rurai ushanshna yanga yanga sintirircani”.
Paica, Bibliapi culquimanda parlaj consejota catishpami, culquimandalla yapata trabajanataca saquirca. Chaipa randica, minishtirishca cosasgucunahuanlla cushijushpa causanatami decidirca. Paica ninmi: “Bibliamanda yachajushcacuna ashtahuan importante cashcatami cuenta japishcani. Cunanga trabajanamandaca ñana yapata preocuparinichu. Tranquilo cushillami causani”.
Culquimanda Biblia ima nijta ashtahuan yachangapaj munashpaca jw.org paginapi Villajun número 3 de 2021 revistapi “Estudianapash, culquita charinapash ¿jipa punllacunapi ali causaita charichun ayudanllu?” nishca temata ricupangui.
4. Relaciones sexualesmanda
Relaciones sexualesta charinapi imacunalla ali o nali cashcata parlashpaca shuj shuj yuyaicunami tian.
BIBLIAPICA ¿IMATATA NIN?: “Huainayashpa causanata saquichunmi munan. Tucui cangunaca, quiquin huarmiguta charishpami, Diospajlla causashpa alicachina canguichi. Taita Diosta na rijsij gentecunashna jatun nali munaitalla rurashpaca, na causanachu canguichi” (1 Tesalonicenses 4:3-5).
CAIHUANGA ¿IMATATA NINGAPAJ MUNAN?: Bibliapica relaciones sexualesta imashina y pihuan charinatami yachachin. Y Bibliapica ‘huainayana’ shimitaca, cazarashca jahua shujhuan purijcunamanda parlangapaj, prostitucionda rurajcunamanda, nara cazarashpallata shuj jarihuan y shuj huarmihuan relaciones sexualesta charijcunamanda, jari pura o huarmi purallata relaciones sexualesta charijcunamanda, animalcunahuan relaciones sexualta charijcunamanda parlangapajmi utilizan (1 Corintios 6:9, 10). Jehovami relaciones sexualesta charichun gentecunamanga shuj regalogutashna cararca. Shinapash Paica cazarashcacunalla chaita rurai ushachunmi saquirca (Proverbios 5:18, 19).
BIBLIAPA CONSEJOCUNACA AYUDANMI: Australia llactamanda Kylie shuti huarmiguca ninmi: “Soltera cashpaca relaciones sexualesta charishpallami tranquila ali sintirisha yarcanimi. Shinapash chaipa randica, nali llaquillami sintirircani”.
Tiempohuanga Kylie shuti huarmiguca Bibliatami estudiashpami. Relaciones sexualesmanda Biblia ima nijta yachajushpa, chaita pactachi callarirca. Paica ninmi: “Bibliapa consejocuna ama sufrichun ayudajtami cuenta japipashcani. Jehová munashcashna causajuimandami cushilla sintirini. Bibliapi consejocunata catinami llaquicunamanda jarcahuashca”.
Ashtahuan yachangapaj munashpaca jw.org paginapi “Bibliapica nara cazarashpallata pacta causanamandaca ¿imatata nin?” nishca temata ricupangui.
Taita Diosca ñucanchicuna ima ali, ima nali cajta yachachunmi ayudan. Paipa consejocunata catinaca na siemprechu fácil can. Shinapash paipa consejocunaca ñucanchipallatami ali can. Paipa consejocunata catishpaca para siempremi cushilla causaita ushapashun.
