Ima ali, ima nali cashcata decidingapaca: Bibliapimi alipacha consejocuna tian

Cai idiomapi uyangapaj o ricungapaj

Ñucanchipa ricuipilla o shuj gentecunapa ricuipilla ima ali cashcata ricushpa decidinaca na siemprechu ali cosascunata rurachun ayudanga. Bibliapica imamanda shina pasajtami villan. Shinallata ñucanchi causaipi imata rurashpapash cushilla ali sintiringapaj imata rurana cashcatapashmi yachachin. Bibliapica ciertopacha ñucanchita ayudaj ali consejocunami tian.

TAITA DIOSPA AYUDATAMI MINISHTIPANCHI

Bibliapica gentecuna Jehová a Diospa ayudata minishtijta, shinallata paicuna sololla mandarita na ushashcatami ricuchin (Jeremías 10:23). Chaimandami Jehová Diosca ñucanchi causaipi ali decisiongunata japi ushachunga Bibliapi ali consejocunata cushca. Jehová Diosca ñucanchita ninanda juyaimandami nali decisiongunata agllashpa llaquicunapi ama urmachun cuidangapaj munan (Deuteronomio 5:29; 1 Juan 4:8). Ashtahuanbash paimi ñucanchitaca rurashca. Paica alipacha yachaita charij, ñucanchitapash alipacha rijsij Diosmi can. Chaimandami ñucanchimanga alipacha consejocunata cuita ushan (Salmo 100:3; 104:24). Shinapash Taita Diosca pai munashcashna causachunga pitapash na obliganllu.

Callaripica Jehová Diosca, Adán y Evamanga cushilla causaita charichunga tucui minishtirishcagucunatami curca (Génesis 1:28, 29; 2:8, 15). Shinallata facillla pactachi ushanlla mandamientota cushpami saquirca. Shinapash chai mandamientotaca paicunallata cazunata o na cazunata decidichunmi libre saquirca (Génesis 2:9, 16, 17). Shinapash Adán y Evaca paicuna munashcata ruranatami decidirca (Génesis 3:6). Shinaca chaita decidishca punllamandapachami cai mundopi gentecunapa causaica huaglitapacha huaglirca. Shinaca Taita Diospa mandashcata na cazushpaca cai mundopica cushilla tranquilo causaitaca na chari ushashcanchichu (Eclesiastés 8:9).

Ñucanchicuna maipi causajpi, ima culturata charijpipash, Bibliami ñucanchi causaipi ali decisiongunata japichun ayudaita ushan (2 Timoteo 3:16, 17; “ Bibliaca tucui gentecunapami can” nishca recuadrota ricupangui). Biblia imashina ayudajta ricupashunchi.

Bibliata ‘Taita Diospa Shimi’ (1 Tesalonicenses 2:13) nina imamanda cabal cashcata yachangapaca jw.org paginapi ¿Pita Bibliataca escribichirca? nishca videota ricupangui.

BIBLIACA TUCUI GENTECUNAPAMI CAN

Tucuita yachaj, juyaj Jehová Diosca paipa shimi Bibliataca tucui gentecunallata yachajui ushachunmi ashtaca ashtaca idiomacunapimi tiachun saquishca. Biblia completo o ashalla cashpapash imashina tiajta ricupashunchi:

3.500 yali. Cai cantidadta yali shimicunapimi Biblia completo o ashalla cashpapash traducishca tian. Chaimandami Bibliataca cai mundopica ashtahuan traducishca libromi can nipanchi.
5.000 millones yali. Cai cantidadta yalitami Bibliapa copiacunatapash llujchipashcanchi. Chaimandami Bibliaca shuj librocunamandaca ashtahuan utilizashca libromi can nipanchi.

Bibliaca na shuj razata charij personapallaca canllu. Bibliaca tucui gentecunapami can. Tucuicunapallatami Bibliaca can.

Bibliataca Internetpi liipai (250 yali idiomacunapimi tian) jw.org paginapi

HUAQUINGUNACA ¿IMAMANDATA BIBLIATACA NA SIRVICHIN?

Ñucanchi causaipica Bibliaca, maitashi ayudai ushanga nishpami huaquingunaca Bibliataca na valichin:

Gentecunapa pensashcacuna: “Bibliaca pandarinmi”.

Shinapash ¿imata cierto can?: Bibliaca callaripica nalishnalla imapipash pandarinshnallami ricurita ushan. Shinapash Bibliapi tiashca tucui yuyaicunata, chai tiempopi tiashca costumbrecunata, chai tiempopi Bibliata escribijcuna imata yuyashcata ricushpa, y shuj shuj cosascunata yaipi charishpaca, Biblia tucuipi cabal cashcatami yachai ushapashun.

Huaquin ejemplocunata ricungapaj munashpaca jw.org paginapi “¿Se contradice la Biblia?” nishca temata ricupangui.

Gentecunapa pensashcacuna: “Bibliata catijcunapashmi nalicunata rurashca. Chaimandami Biblia gentecunapa causaipi ciertopacha ayudajtaca na crinchi”.

Shinapash ¿imata cierto can?: Bibliapi nishcacunata na pactachishpa gentecuna nalicunata rurashcacunamandaca, Bibliaca na culpata charinllu. Ashtahuangarin Bibliapica religionda ñaupaman pushajcuna y ashtaca gentecunapash Diospa mandashcacunata na cazuna cashcatami villarca. Shinallata cashna gentecuna tiashcamandami Bibliapica: “cabal yachachishcacunamandaca nalicunata parlanga” nirca (2 Pedro 2:1, 2).

Ashtaca religionda ñaupaman pushajcuna imashina Bibliapa yachachishcacunata na pactachinajushcata yachangapaj munashpaca jw.org paginapi “Religionga ¿shuj negociochu can?” nishca temata ricupangui.

Gentecunapa pensashcacuna: “Bibliaca shujcunapa yuyaita ama respetachunmi animan”.

Shinapash ¿imata cierto can?: Bibliaca shujcunata respetohuan tratachunmi animan. Y ima comportamientocunata na alicachijtami cati yuyaicunapi ricuchin:

Shujcunamanda yalimi cani nishca yuyaicunata (Filipenses 2:3).
Tucui clase o tucui laya gentecunata na respetajta (1 Pedro 2:17).
Shucunata paicunashna pensachun obligajta (Mateo 10:14).

Bibliapica Taita Dios gentecunahuan shuj ali justo Dios cajtami ricuchin. Chaimandami ñucanchicunapash chaitallata rurachun munan (Romanos 9:14).

Ashtahuan yachangapaj munashpaca jw.org paginapi “Tolerancia | Bibliami ayudaita ushan” nishca temata ricupangui.

TAITA DIOSCA BIBLIAHUANMI ÑUCANCHITACA AYUDAN

Bibliapica Taita Dios callarimandapacha gentecunahuan imashina comportarishcatami ricuchin. Biblia tiashcamandami Taita Diospa ñaupapi imapacha ali, imapacha nali cashcata, shinallata imacunata rurana ñucanchita ayudajta o perjudicajtapash cabal yachaita ushapanchi (Salmo 19:7, 11). Ñucanchi imashina causanamanda Bibliapi tiashca consejocunaca ñucanchipa cada punlla causaipimi ayudaita ushan. Cai consejocunaca nuncapash na cambiangachu.

Por ejemplo, Proverbios 13:20pi tiashca consejota ricupashunchi. Caipica: “Alipacha yachajushca runacunahuan tandanajuj runaca, alipacha yachajushcami canga. Ashtahuangarin shinlli shungu runacunahuan tandanajuj runaca, ninandami llaquichi tucunga” nijunmi. Cai consejoca pundamandapachami cunangaman tucuicunapallata ali cashca. Y cashna ali consejocunataca Bibliapica ashtahuanmi tarita ushapanchi (“ Bibliapa consejocunaca siempremi ayudan” nishca recuadrota ricupangui).

Shinapash talvezpashmi “Bibliapi tiashca consejocunaca cunan punllacunapi ciertopacha ayudai ushashcataca ¿imashinata yachai ushani?” nishpa pensaripangui. Cati temapimi Biblia ciertopacha ayudai ushashcata gentecunapa propio experienciacunapi ricupashun.

a Diospa shutica Jehovami can (Lucas 4:8).

BIBLIAPA CONSEJOCUNACA SIEMPREMI AYUDAN

Biblia casi 2 mil huatacuna huashaman escribishca cashpapash, cunangamanmi ayudajushca. Gentecunaca cushilla ali causana munaitaca siempremi mascanajushca (Eclesiastés 1:9). Y Bibliapa consejocuna nunca na cambian cashcamandami chaita pactachichunga ayudaita ushan.

Honrado canamanda

“Tucuipi honrado cangapapashmi munapanchi” (Hebreos 13:18).
“Pipash shuanata yachashca cashpaca, ñana shuanachu can. Sino paipa maquihuanbachami imatapash aliguta rurashpa shinllita trabajana can” (Efesios 4:28).

Tucuicunahuan ali llevarinamanda

“Cada unomi shujcunapa beneficiota mascana capanchi y na ñucanchipa beneficiotallachu mascana capanchi” (1 Corintios 10:24).
“Shinaca, aunque shujcunamanda quejarina rasonda charishpapash, caishuj chaishujmi aguantarishpa y tucui shunguhuan perdonarishpa catina capanguichi” (Colosenses 3:13).

Ali decisiongunata japinamanda

“Na yachajushca runaca, imata nijpipash tucuita crinllami. Ashtahuangarin ali yachajushca runaca, imata rurangapajpash aliguta yarinrami” (Proverbios 14:15).
“Ali yuyaita charij runaca, ima llaqui japinata ricushpaca pacajunmi. Ashtahuangarin na yachajushca runacunaca, yangata rishpa llaquichi tucunllami” (Proverbios 22:3).

VILLAJUN REVISTA